Алинејата 4, додадена во Изборниот законик во Пржино, го кочи разрешувањето на Зврлевски


Скопје, 10 август, 2017 - 19:55 (META) 

Одредбата од членот 8-а од Изборниот законик, за која ВМРО-ДПМНЕ побара мислење од Државната комисија за спречување на корупцијата (ДКСК) во врска со собраниската расправа за разрешувањето на држвниот јавнен обвинител, Марко Зврлевски, беше додадена во Изборниот законик во согласност со Договорот од Пржино, што во 2015 година го постигнаа СДСМ, ВМРО-ДПМНЕ, ДУИ и ДПА, за излез од политичката криза.

Пратениците на опозициската партија сметаат дека собраниската седница на која се расправа за разрешувањето на јавниот обвинител, која почна на 5 јули и сè уште е во тек, е во спротивност со членот 8-а, став 1, алинеја 4 од Изборниот законик, според кој „од денот на донесувањето на одлуката за распишување избори не може да се почне со постапка за вработување нови лица или постапки за престанок на работен однос во државни и јавни институции, а воедно почнатите постапки се ставаат во мирување, освен во случај на итни и неодложни работи“.

Izboren zakonik

Во Изборниот законик објавен на интернет-страницата на Државната изборна комисија со жолто се означени измените и дополнувањата на законот донесени во 2015 и во 2016 година, по Договорот од Пржино

Одредбата беше дел од пакетот измени и дополнувања на Изборниот законик што Собрането ги донесе во ноември 2015 година, а кои произлегоа од обврските од Договорот од Пржино.

Измените на Изборниот законик беа и едно од барањата на СДСМ, како тогашна опозиција, а како основа беа земени препораките од извештајот на ОБСЕ/ОДИХР за предвремените парламетарни и претседателските избори што се одржаа во 2014 година.

Инаку, членот 8-а пред минатогодишните предвремени парламентарни избори неколкупати се најде пред Антикорупциската комисија. СДСМ тогаш поднесе неколку претставки од Комисијата, кои се однесуваа на прекрушувања на овој член од Изборниот законик, односно за незаконски вработувања во јавни институции и претпријатија во предизборниот период, а ДСКС ги одби сите како неосновани.

Државната комисија за спречување на корупција пред изборите ја разгледуваше и ја прифати претставката на дополнителниот заменик-министер за внатрешни работи, Оливер Андонов, (назначен по предлог на ВМРО-ДПМНЕ) против Оливер Спасовски, кој беше министер за внатрешни работи во техничката влада за спроведување на изборите.

Образложенито кое беше прифатено од мнозинството членови на Комисијата беше дека постои основан сомнеж дека Спасовски го прекршил членот 8-а од Изборниот законик, кога правел промени во МВР, по распишување на одлуката за предвремени парламентарни избори. Комисијата тогаш побара од Основното јавно обвинителство да поведе истрага за случајот.


Прибе на предавањето во Охрид одби да даде политичкa изјавa


Охрид, 23 јуни, 2017 - 11:06 (META) 

Германскиот експерт што го подготви извештајот за реформските приоритети кои се составен дел од Договорот од Пржино, Рајнхард Прибе, денеска во Охрид одржа предавање пред учесниците на еднонеделната Школа на природно право, која се одржува во организација на Македонската академија на науки и уметности и на Амбасадата на САД во Македонија.

Прибе во изјавата за медиуми не сакаше да даде политичка изјава и рече дека не е дојден во политичка мисија, туку да поразговара со дваесет и петте магистранти и петте докторанти на правни и на политички студии за демократските предизвици на земјата.

– Немам конкретни ниту политички пораки, се надевам дека ќе имаме отворена дискусија со учесниците на школата. Од академска гледна точка, ќе се обидам да објаснам што значи интеграцијата во Европската Унија, да помогнам тоа подобро да биде сфатено и, се надевам, ќе имаме добра дискусија – рече Прибе.

Се очекува, Прибе следните денови во Скопје да има средби со владини претставници за реформските приоритети, како и за акцискиот план на Владата за нивно спроведување.

В понеделник во Македонија доаѓа и еврокомесарот за проширување и за добрососедска политика, Јоханес Хан, кој ќе учествува на владина седница на која ќе му бидат презентирани мерките од акцискиот план за отстранување на пречките за интеграција на Македонија во ЕУ.


Туск и Јункер му го честитаа на Заев изборот за премиер


Брисел, 8 јуни, 2017 - 18:10 (META) 

Претседателите на Европскиот совет и на Европската комисија, Доналд Туск и Жан-Клод Јункер, денеска испратиле честитка до Зоран Заев по повод неговиот избор за премиер и за формирањето на новата Влада.

„Формирањето на новата Влада нуди можност за придвижување надвор од рамките на политичката борба што ја држеше земјата назад толку долго. Наредниот период ѝ нуди на новата Влада можност за посветена работа, преку конструктивен дијалог со опозицијата, кон заедничката цел за евроатлантска интеграција“, се вели во честитката, соопштуваат од Владата.

Континуираната посветеност на новата Владата кон целосна имплементација на Договорот од Пржино и спроведување на приоритетите за итна реформа ќе биде од суштинско значење за успехот на Македонија, се додава во честитката на Туск и на Јункер до Заев.


Хан повторно го испраќа Прибе да помогне со реформите за владеењето на правото


Брисел, 7 јуни, 2017 - 14:27 (META) 

Еврокомесарот за проширување и за добрососедска политика, Јоханес Хан, денеска соопшти дека во земјава повторно ќе испрати независна група правни експерти, предводени од Рајнхард Прибе, која треба да помогне и да ја советува новата Влада околу прашањата за владеењето на правото.

Испраќањето на експертската група, вели Хан, е дел од подготвеноста на Европската Унија да работи и да ѝ помага на новата Влада во спроведувањето на реформите.

– Оваа група ги вклучува истите експерти што го подготвија извештајот со препораките повразни со прислушуваните комуникации во 2015 година. Нивната работа придонесе за реформските приоритетите што ги состави Комисијата и беа вметнати во Договорот од Пржино. Експертската група ќе ја посети земјата наскоро за да изврши анализи на актуелната ситуација, ќе се надоврзе на претходните наоди и ќе обезбеди препораки како да се одговори на проблемите поврзaни со системското владеење на правото, каде имаше назадување во изминатите неколку години – вели Хан.

Еврокомесарот додава дека побарал од шефот на Делагацијата на ЕУ во земјава, Самуел Жбогар, да разговара со новата Влада за пошироките реформски приоритети поврзани со Европската Унија, со конкретни рокови за спроведување и за тоа како ЕУ може да помогне во спроведувањето на реформите.

– Ние сме посветени да работиме со новата Влада, како и со опозицијата, на враќањето на земјата на патот на интеграциите во ЕУ, што граѓаните го посакуваат и го заслужуваат – стои во изјавата на Хан.


Могерини – Џафери: Улогата на спикерот треба да биде над партиските и етничките интереси


Брисел, 4 мај, 2017 - 20:44 (META) 

Високата претставничка за надворешна политика и за безбедност на Европската Унија, Федерика Могерини, попладево се сретнала со новоизбраниот претседател на Собранието на Република Македонија, Талат Џафери, во рамките на неговата прва официјална посета на Брисел.

Могерини, како што соопштија од нејзиниот кабинет, го поздравила изборот на Талат Џафери за претседател на Собранието и истакнала дека тоа е улога која треба да биде над партиските и етничките политики, а во интерес на сите граѓани и заедници.

„Во разговорите, Могерини ја повтори острата осуда на Европска Унија на минатонеделното насилство во Собранието кон пратениците и новинарите. Таа го поздрави изборот на Талат Џафери за претседател на Собранието од страна на парламентарното мнозинство, истакнувајќи дека тоа е улога која треба да биде над партиските и етничките политики. Европската Унија е подготвена да соработува со него, со Собранието и со сите други институции за спроведување на реформските приоритети, како и за имплементацијата на Договорот од Пржино“, истакнала Могерини.

Таа нагласила дека Европската Унија очекува сите политички партии конструктивно да се вклучат во политичкиот процес, во формирањето на владата, како и во работата на новото Собрание.


Хан и тројцата европратеници во вторник доаѓаат во Македонија, потврди Коцијанчич


Брисел, 17 март, 2017 - 12:55 (META) 

Еврокомесарот за добрососедска политика и за проширување, Јоханес Хан, во вторник ќе допатува во Скопје, заедно со тројцата европратеници Едвард Кукан, Иво Вајгл и Кнут Флекенштајн, потврди денеска портпаролката на Евопската комисија, Маја Коцијанчич.

– Како што можете да видите на агендата, комесарот Хан во вторник, на 21 март, ќе патува во Скопје, заедно со тројцата европратеници кои добро ги познавате, Флекенштајн, Кукан и Вајгл. Тие заедно ќе се сретнат со претставници на сите парламентарни политички партии, како и со претседателот (Ѓорге) Иванов. Тие ќе ја повторат цврстата порака на ЕУ да се почитуваат изборните резултати и да се овозможи демократските процеси да продолжат и брзо да се формира влада што ќе продолжи да го имплементира Договорот од Пржино – рече Коцијанчич.

Таа потсети дека вчера, на Самитот на шесте западнобалкански лидери во Сараево, Хан ја истакнал неопходноста од регионална соработка и предупредил на ризикот од подгревање на тензиите, вклучувајќи ги и меѓуетничките, со изјави и со дејства што можат да ги поткопаат добрососедските односи.

На прашање дали се подготвува „Пржино 3“, Коцијанчич истакна дека ставот на Комисијата е дека Договорот од Пржино треба целосно да се имплементира.

– Сметаме дека покрај работите што треба да се случат е тоа што Договорот од Пржино, каков што го знаете, треба да се имплементира – рече Коцијанчич.


Жбогар: Во Брисел има голем интерес за случувањата во Македонија


Валандово, 16 март, 2017 - 13:31 (META) 

Евроамбасадорот Самуeл Жбогар денеска во Валандово изјави дека Договорот од Пржино довел до решение, но дека сè уште има работи кои треба да бидат имплементирани.

– Кога ќе се осврнеме на Договорот од Пржино, ќе видиме дека тој беше напорен процес, но доведе до решение. Од него сè уште треба да се исполнат одредени работи, пред сè реформските приоритети. Се надеваме дека следната влада ќе се посвети на исполнување на реформите – рече Жбогар за време на промовирањето на проектот „ЕУ за тебе“.

Прашан за посетата на еврокомесарот за проширување и за добрососедска политика, Јоханес Хан, на Македонија, Жбогар рече дека тоа сè уште не е потврдено.

– Немаме формална потврда, но има голем интерес во Брисел за тоа што се случува во Македонија – рече Жбогар.


Бејли: Има тензии, има поделби, но важно е институциите да функционираат


Скопје, 15 март, 2017 - 14:27 (META) 

Договорот од Пржино останува добра основа за надминување на политичката криза во земјата, изјави денеска американскиот амбасадор, Џес Бејли, на завршниот настан од проектот на УСАИД за меѓуетничката интеграција во образованието.

– Зборувавме за ова многупати, не знам дали има Пржино еден, два, три… Имавме систем поставен од мај до јули 2015 година, кој предвидуваше кризата да се реши со враќање во Собранието, со создавање услови за добри и фер избори, со справување со прашањето на неовластено прислушуваните разговори, како тие настанале и што откриваат, и потоа да продолжиме со реформските приоритети. Сметам дека тоа останува добра основа за да одиме напред. Ако ги погледнете овие елементи, мислам дека може да видите начин како да одиме напред – рече Бејли, одговарајќи на новинарско прашање дали е потребен трет дел од Дговорот од Пржино 3 за решавање на двегодишната политичката криза.

Сепак, тој истакна дека одлуката за следните чекори треба да ја донесат лидерите на политичките партии.

– Ние остануваме партнер и пријател на Македонија, сакаме да помогнеме процесот да се движи напред, но на крајот од денот, сè зависи од вас, од граѓаните, од вашите лидери, од тоа да профункционираат демократските институции. Има тензии во општеството, има поделби и важно е институциите да ги приближуваат граѓаните – рече американскиот амбасадор.

Во однос на доделувањето на мандатот за формирање влада, Бејли повтори дека очекува претседателот Ѓорге Иванов да ја преиспита својата одлука.

– Сметаме дека тоа не беше правилна одлука и се надеваме дека ќе ја преиспита. Мислам дека е важно демократските институции да функционираат и во тоа се содржани решенијата – рече Бејли.


Брисел не ја коментира платформата на партиите на Албанците


Брисел, 21 февруари, 2017 - 13:47 (META) 

Европската комисија денеска не сакаше да ја коментира платформата на партиите на Албанците, но повтори дека очекува наскоро да се формира влада која ќе има широка политичка поддршка.

– Како што и претходно изјавивме, не шпекулираме за составот на владата, за програмата во Македонија, но тоа што го очекуваме, а тоа е став кој го имаме откако се одржаа изборите, е брзо формирање на влада која ќе има широка политичка поддршка и која силно ќе се посвети на европските реформи и на имплементирањето на сите точки од Договорот од Пржино и на реформските приоритети. Тоа е многу јасна позиција, тоа е тоа што го очекуваме – изјави портпаролката на Европската комисија, Маја Коцијанчиќ, одговарајќи на новинарско прашање за тоа каков е ставот на Европската комисија за платформата на партиите на Албанците и за „мешањето на странски државници во внатрешните работи во Македонија“.

Еврокомесарот за проширување и за добрососедска политика, Јоханес Хан, пред 10 дена, за време на својата последна посета на Скопје, рече дека Брисел не се меша во формирањето на владата и порача дека политичките партии треба да покажат демократска зрелост и да понудат програма која се темели на Договорот од Пржино и посветеност на европската перспектива.

Евроамбасадорот Самуел Жбогар минатата недела во Берово оцени дека ситуацијата во Македонија не е толку драматична и оти на партиите треба да им се даде простор за да се договорат за формирање влада.


Амбасада на САД: Го следиме процесот на формирање и ќе работиме со идната влада


Скопје, 30 јануари, 2017 - 16:38 (META) 

Амбасадата на Соединетите Американски Држави во Македонија го набљудува процесот на формирање на нова влада и очекува, откако ќе биде формирана, да соработува со неа, во контекст на напредокот на земјата во евроатлантските интеграции, велат од Амбасадата.

„Очекуваме да работиме со македонската влада, кога ќе се формира, за напредување во евроатланската интеграција преку спроведување на реформите предвидени со Договорот од Пржино, особено во однос на владеење на правото“, велат од Амбасадата на САД во земјава, по истекот на рокот од 20 дена, во кој лидерот на ВМРО-ДПМНЕ, Никола Груевски, кому му беше доверен мандатот, не успеа да состави владина коалиција.

Од американската амбасада додаваат дека во овие напори остануваат партнер на Македонија.

Претходно, портпаролката на Европската комисија, Маја Коцијанчич, на прес-конференција рече дека Европската Унија очекува од претседателот на државата, Ѓорге Иванов, „да изврши итна и отворена консултација“ со политичките партии во земјата и „бргу да определи лидер за формирање влада“.