Папас: Договорот од Преспа беше измачен од лажни вести


Скопје, 19 февруари, 2019 - 16:24 (META) 

Лажните вести за Договорот од Преспа денеска беа тема на прес-конференцијата во Владата, на која министерот за информатичко општество и администрација Дамјан Манчевски и неговиот грчки колега министерот за дигитални политики, телекомуникации и медиуми на Република Грција, Никос Папас потпишаа Меморандум за разбирање, пишува „КриТинк“.

На конференцијата проследена и од голем број на грчки новинари, еден од нив праша, како двете Влади ќе се справат со лажните вести кои се однесуваат на Северна Македонија и Грција, имајќи предвид, како што рече, дека „нивните креатори доаѓаат од Велес“.

Двајцата министри беа согласни дека за Договорот од Преспа имало безброј лажни информации и дадоа свое видување, како овој проблем може да се реши.

Целиот текст прочитајте го на овој линк.


Новото име во учебниците, сведителствата и во наставата ќе влегува во фази


Скопје, 18 февруари, 2019 - 13:38 (META) 

Сите учебници што се користат во образовниот систем во сите нивоа на образование, како и целата педагошка евиденција што ја водат наставниците и професорите, вклучително и свидетелствата и сите официјални документи, ќе се менуваат во следните пет години.

Согласно Договорот од Преспа, секаде каде што стои името „Република Македонија“ или „Македонија“ треба да се промени во „Република Северна Македонија“.

– Посебна комисија при Министерството за надворешни работи ќе работи заедно со Грција на овие прашања. Учебниците се за во некоја идна друга фаза, но во секој случај, таа комисија ќе решава за нив – велат во Владата.

Лаура Папранику, советник на министерот Арбер Адеми за „Мета.мк“ изјави дека засега нема ништо конкретно во врска со ова прашање.

– Чекаме насоки или одлука на Влада, па потоа најверојатно во фази ќе се менува целокупната документација. Во оваа фаза, не знам колку пари би ја чинело сето тоа државата – рече Папранику.

Освен во учебниците, новото име на државата треба да биде впишано и во целата педагошка евиденција што ја водат училиштата, наставниците и професорите во сите нивоа на образование. Тоа значи дека освен нови учебници, ќе се печатат и нови дневници, нови свидетелства, нови главни книги, ученички легитимации, евидентни листови годишни програми на училиштата.

Согласно Договорот од Преспа, во целата нова официјална документација, државните институции треба да го користат новото име на државата. Во однос на ова, ќе има два транзициски периоди, еден „технички“ и еден „политички“. Техничкиот транзициски период се однесува на сите официјални документи од јавната администрација – и оние за меѓународна и оние за внатрешна употреба. Таму стои дека ваквите документи и материјали ќе се обновуваат во следните пет години.


Могерини: ЕУ ќе го поздрави успехот постигнат со Договорот од Преспа


Брисел, 18 февруари, 2019 - 9:50 (META) 

Високата претставничка на ЕУ за надворешна политика и безбедност, Федерика Могерини пред почетокот на Советот на министри за надворешни работи на земјите членки на ЕУ, порача дека министрите ќе го поздрават историскиот успех што го постигнаа двете страни со Договорот од Преспа.

Решавањето на спорот за името е една од ретките добри вести за ЕУ, посочи Могерини пред почетокот на состанокот, јави дописничката на МИА од Брисел.

-Мислам дека сите ќе бидат среќни што ќе можеме да започнеме со нешто постигнато после толку работа, благодарение на импресивното лидерство, храброст и одлучност на лидерите и на народите на двете земји – изјави шефицата на европската дипломатија.


Сите рокови за Република Северна Македонија: Што и до кога треба да се промени (инфографик)


Скопје, 14 февруари, 2019 - 8:32 (META) 

Промената на таблата на граничниот премин со Република Грција е првиот чекор што го направи државата кон целосна промена на уставното име во Република Северна Македонија.

Според меѓуресорската група задолжена за извршување на обврските од Договорот од Преспа меѓу Македонија и Грција, роковите за целосна промена на името се движат од 3 дена па до се до пет години од отворањето на релевантното ЕУ поглавје.


Таблата на Богородица доби налепница Република Северна Македонија (галерија)


Гевгелија, 13 февруари, 2019 - 13:31 (META) 

Царинската управа денеска на граничниот премин Богородица со Република Грција залепи налепница на таблата на која го пишува новото уставно име на државата – Република Северна Македонија.

Во рок од три дена Царинската управа треба да постави табли и на останатите гранични премини, државната граница на Република Северна Македонија и на двата аеродроми во Република Северна Македонија.

Директорот на Царинската управа, Ѓоко Танасоски појасни дека поради тоа што времето е кратко за спроведување тендерски постапки, а согласно заклучоците на Владата предвидено е таблите да бидат променети каде што е можно со налепници, а каде е можно со монтирање други табли, за да се исполни обврската во рок од три дена да бидат променети таблите на граничните премини со новото име Република Северна Македонија.


Документи со новото име граѓаните ќе добиваат откако МВР ќе направи набавка


Скопје, 11 февруари, 2019 - 11:49 (META) 

Личните документи со новото име Република Северна Македонија, односно пасоши, лични карти, возачки дозволи … граѓаните ќе може да ги добиваат откако, Владата ќе го објави во Службен весник датумот на влегување во сила на Уставните амандмани и Уставниот закон.

Протоколот од Атина се очекува да биде испратен денеска.

На прашањето, кога граѓаните ќе почне да добиваат документи со новото име, портпаролот на Владата, Миле Бошњакоски за „Мета“ одговори дека откако нотата ќе биде испратена и ќе биде објавено во Службен весник, потоа МВР треба да распише јавна набавка за новите документи.

„МВР треба да набави нови пасоши, документи. Нема ограничување за тоа, дали додека трае набавката на документите граѓаните ќе можат да вадат нови, бидејќи ќе си добијат документи по старо, кои потоа ќе треба да ги заменат во рок од пет години“, одговори Бошњакоски.

„Мета“ чека од одговор од МВР колку време ќе трае процедурата за набавка на нови документи.

Инаку, веќе почна промената на натписите и таблите на државните органи и Собранието, а утринава владината зграда осамна без натписот „Влада на Република Македонија“.


Заев и Ципрас ќе примат награда на Минхенската безбедносна конференција


Минхен, 1 февруари, 2019 - 10:10 (META) 

Наградата „Ewald von Kleist“ на Минхенската безбедносна конференција, оваа година, ќе им биде доделена на Зоран Заев и Алексис Ципрас за Договорот од Преспа, објави „Дојче Веле“ на грчки јазик.

Претседателот на конференцијата, Волфганг Ишингер на неговиот официјален „Твитер“ профил на 25 јануари, кусо откако Договорот од Преспа беше ратификуван од грчкиот Парламент, напиша дека „ двајцата премиери ќе бидат поканети на 16 февруари во Минхен да ја примат престижната награда“ за време на 55-та конференција.

Портпаролот на Минхенската безбедносна конференција што ќе се одржи од 15 до 17 февруари, вчера за „Дојче веле“ потврдил дека и Заев и Ципрас ја прифатиле поканата.

Наградата се доделува од 2009, а меѓу досегашни добитници се Хавиер Солана, Јоаким Гаук и ОБСЕ.


„Северна Македонија“, во употреба, најверојатно, од 15 февруари


Скопје, 30 јануари, 2019 - 15:38 (META) 

Новото име на државата, „Република Северна Македонија“, во официјална употреба најверојатно ќе влезе на 15 февруари. Портпаролот на Владата Миле Бошњаковски за „Мета“ потврди дека одлуките кои произлегуваат од Преспанскиот договор ќе стапат во сила 7 дена откако Грција ќе го ратификува Протоколот за пристапување на Македонија во НАТО, а Грција, пак, најверојатно ќе го ратификува протоколот на 8 февруари.

„Во симболичен гест, грчката влада најверојатно ќе биде првата земја која ќе го ратификува Протоколот за пристап на Северна Македонија во НАТО, бидејќи цели тоа да го стори до 8 февруари, тврдат извори блиски до темата“, објави вчера „Еурактив“.

Владата на вчерашната седница формирала меѓуресорско тело за имплементација на обврските од Преспанскиот договор.

„Со одлуките поврзани со имплементацијата на одредбите од Преспанскиот Договор се предвидува сет од мерки и активности што треба да ги преземе Владата на РМ, како и сите други органи на државната управа и сите државни институции, а кои произлегуваат од усвоените амандмани на Уставот на Република Македонија и кои ќе стапат на сила 7 дена по влегувањето во сила, односно веднаш после ратификацијата на Протоколот за пристапување на нашата земја во НАТО од страна на Република Грција, и кои ја регулираат употребата на новото уставно име согласно амандманите“, соопшти Владата.

Според Владата, во предвидениот рок ќе треба да се изврши промена на таблите на граничните премини, на дипломатско-конзуларните претставништва и на влезовите на сите државни институции, јавни претпријатија и претпријатија во државна сопственост

– Се разбира, тоа нема да се случи преку ноќ, но ќе почне да се спроведува во предвидениот рок – појаснува Бошњаковски.

Истата постапка Владата ќе им препорача да ја спроведат и единиците на локална самоуправа, а секторите и службите за односи со јавноста на државните и јавните институции „добиваат насоки за употреба на уставното име согласно усвоените амандмани“.

Од 8 февруари, односно од грчката ратификација на Протоколот за пристап во НАТО, почнува да течат и петгодишните рокови за впишување на „Северна Македонија“ во сите официјални документи, вклучувајќи ги и пасошите и личните карти. Документи со новото име, според Преспанскиот договор, ќе се издаваат при редовна замена на важечките, но најдоцна во рок од пет години од стапување на сила на спогодбата.


Макрон: Договорот од Преспа е пример за решавање на проблемите


Никозија, 30 јануари, 2019 - 11:53 (META) 

Договорот од Преспа претставува пример за решавање на проблемите во Европа и пошироко, изјави францускиот претседател, Емануел Макрон, говорејќи за спорот со името на Петтиот самит на земјите од Југот што се одржува во Кипар, пренесе грчкиот весник „Катимерини“.

Тој истакна дека договорот е надеж за сите дека дијалогот води до резултати.

-Би сакал да ги споменам премиерите Алексис Ципрас и Зоран Заев, кои заедно се договорија за името Северна Македонија, усвојувајќи го договорот. Тоа е одличен пример за Европа и порака на надеж за сите нас – рече Макрон.

Францускиот претседател, говореше и за билатералните односи меѓу Франција и Кипар, потврдувајќи ја поддршката на Франција во напорите за решавање на кипарскиот проблем.


Ќе има нови, „преспански“ табли за институциите, границите и државните органи


Скопје, 30 јануари, 2019 - 10:24 (META) 

На 117. седница одржана вчера, една од првите точки била Информацијата за извршување на Преспанскиот договор. Се разгледувале мерките и активностите што во склад со измените на Уставот, Владата ќе треба да ги преземе обврските седум дена по стапувањето на Договорот на сила, односно со ратификацијата на Протоколот за пристапување на нашата земја во НАТО од страна на Грција.

Според заклученото, по тој датум, министерствата, државни органите и институции, јавните претпријатија и акционерските друштва во сопственост на државата ќе треба да извршат промена на таблите на граничните премини и државната граница на нашата земја, на дипломатско-конзуларните претставништва, како и на влезовите на институциите.

Исти насоки ќе добијат и општините. Најинтересното e што, како што вели Владата „секторите и службите за односи со јавност на државните и јавните институции добиваат насоки за употреба на уставното име согласно усвоените амандмани“.

Дополнително, дадена е обврска државните органи да формираат работни групи за утврдување на натамошните мерки и активности за извршување на одредбите на Договорот од Преспа, а Генералниот секретаријат на Владата добил задолжение да формира Меѓуресорска група која ќе треба да изработи сеопфатен Национален акциски план за понатамошните мерки и активности за извршување на обврските на Македонија кои произлегуваат од договорот со Грција.