!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Одбојкарите освоија сребрен медал и никој не ги пречека


Скопје, 4 јули, 2017 - 11:26 (META) 

Машката одбојкарска репрезентација на Македонија, која вторпат го освои сребрениот медал во Европската лига, вчеравечер се врати дома, но за неа немаше организиран пречек, како за ракометарите, па сами минаа низ Порта Македонија, на плоштадот ја отпеаја македонската химна и потоа заиграа оро.

Како што извести „Екипа“, од „пречекот“ директен пренос од својот мобилен телефон преку „Фејсбук“ правел капитенот Никола Ѓорѓиев.

Во финалето на Ф4-турнирот одбојкарите со 3:1 загубија од Украина, но на земјава ѝ го донесоа второто сребро од ова натпреварување.

 


На плоштадот Македонија се подготвува пречек на ракометарите на „Вардар“


Скопје, 6 јуни, 2017 - 10:13 (META) 

На плоштадот Македонија се подготвува пречекот на ракометарите на РК „Вардар“, кои таму треба да пристигнат во 13 часот. Сцената, на која ќе се одвива предвидената програма, е поставена во близина на Камени мост.

Ракометарите на „Вардар“, кои ја освоија европската шампионска титула, се очекува да слетаат на аеродромот „Александар Велики“ во 11.15 часот, од каде ќе се упатат кон плоштадот Македонија, преку булеварите Александар Македонски, Гоце Делчев, Крсте Мисирков и Кочо Рацин.

Ракометарите на плоштадот Македонија ќе пристигнат преку Порта „Македонија“.


Дочекана Новата 2017 година, на некои од плоштадите прославата беше откажана


Скопје, 1 јануари, 2017 - 9:43 (META) 

Дочекот на Новата 2017 година беше прославен и низ градовите во земјава, но некои од нив, организираните прослави на градските плоштади ги откажаа поради пренамена на средствата во хуманитарни цели.

Во Велес, Скопје, Кавадарци, Битола, Берово организираниот дочек на Нова година беше откажан бидејќи парите наменети за прославата, градоначалниците решија да ги донираат за социјално загрозени граѓани.

Иницијативата почна во Србија, а под влијание на апелите на македонските твитерџии на социјалните мрежи, ваквата практика за пренамена на средствата се примени и кај некои од нашите општини.

Во Скопје, организиран дочек на Нова година имаше на Сквер Јадран, каде што граѓаните ги забавуваа Јура Стублиќ и „Филм“.

Во Охрид, кој е преполн со туристи за новогодишните празници, на плоштадот „Св. Климент Охридски“ пееја Елена Велевска и Ѓоко Таневски.

Организиран дочек за Нова година имаше и на градскиот плоштад во Прилеп.


На градскиот плоштад во Прилеп почна новогодишната прослава


Прилеп, 31 декември, 2016 - 14:43 (META) 

Со новогодишна програма за најмладите, почна новогодишниот дочек на градскиот плоштад во Прилеп.

Децата ги забавуваа „Јунаците од бајките“ од народниот театар „Војдан Чернодрински“ и музичката група „Нокаут“.

Вечерниот новогодишен дочек на плоштадот Методија Андонов Ченто е предвидено да почне во 22.30 часот, со настапот на групите „Белинда“ и „Шило“, а по предвидениот огномет на полноќ ќе настапат диџеите „Д мод“ (The Mode).

Прилепскиот градоначалник Марјан Ристески на сите граѓани им ја честита Новата година со желби за здравје, среќа и за просперитет.


Охрид е преполн со туристи за новогодишните празници


Охрид, 31 декември, 2016 - 11:35 (META) 

Сите хотели во Охрид, како и помал дел од приватните сместувачки капацитети, се закупени за новогодишните празници. Хотелиерите се презадоволни и се надеваат дека намалувањето на прометот од 10 проценти во последните месеци од 2016 година, ќе го ублажат со претстојниот празничен викенд.

Традиционално, покрај домашните, најголемиот број од туристите во Охрид и во Струга се од соседните земји, пред сè од Бугарија, Србија, Албанија и во помал број од Грција.

Гости има и од Црна Гора и од Хрватска, а со индивидуални аранжмани присутни се и одреден број новогодишни славеници и од Велика Британија, Полска и од Израел.

Хотелиерите се задоволни што Бугарите, кои еден подолг период апстинираа, повторно доаѓаат, така што токму тие ќе ѝ дадат печат на годинешната прослава.

Колку за илустрација, хотелот „Силекс“ е целосно закупен од гости од Бугарија. Тие ќе доминираат и во хотелите „Гарден“ и „Нова Ривиера“, а присутни се и во двата хотели „Тино“, каде што во најголем број се гости од Србија и од Црна Гора.

Охридските угостители за празниците понудија аранжмани од два до пет дена, а цената зависи од категоријата, како и од времетраењето на престојот.

Тридневните аранжмани, на база на полупансион, чинат од 100 до 160 евра, со вклучена свечена новогодишна вечера.

Свечена новогодишна програма, традиционално подготвува и локалната власт на градскиот плоштад „Св.Климент Охридски“, каде присутните ќе ги забавуваат Ѓоко Танески и Елена Велевска.

Покрај во Охрид, хотелските капацитети се речиси распродадени и во соседна Струга.


Берово е четвртата општина што го откажа организираниот новогодишен дочек


Берово, 28 декември, 2016 - 10:41 (META) 

Општина Берово се откажа од традиционалниот дочек на Новата година на градскиот плоштад, а средствата ќе бидат пренасочени во хуманитарни цели.

По Велес, Скопје и Кавадарци, Берово е четвртата општина во земјава што се откажува од организиран дочек.

Станува збор за 50.000 денари кои биле наменети за настап на естрадни ѕвезди и за огномет, но овие средства ќе бидат доделени на социјално загрозени граѓани.

– Во Берово имаме и дом за деца без родителска грижа и дом за лица со посебни потреби, така што овие средства за новогодишната ноќ подобро да ги дадеме таму. Исто така, во соработка со Центарот за социјални работи, ќе обезбедиме список на лица што живеат во социјален ризик, така што ќе гледаме и ним да им помогнеме – изјави градоначалникот Драган Наџински.

Иницијативата за откажување на новогодишните прослави на градските плоштади за парите да се пренаменат за хуманитарни цели, почна во Србија.

Под влијание на апелите на македонските твитерџии на социјалните мрежи ваквата практика да се примени и кај нас, општините почнаа да размислуваат да ги пренаменат планираните средства за прослава во хуманитарни цели.

Најпрво од организиран дочек на Нова година се откажа Општина Велес, потоа Град Скопје, а потоа и Кавадарци.


По Велес и Скопје, и Кавадарци го откажа организираниот дочек на Нова година


Скопје, 26 декември, 2016 - 11:44 (META) 

Кавадарци го откажа дочекот на Нова година на градскиот плоштад, така што по Велес и Скопје, ова е трет град во земјава што го откажува организираниот новогодишен дочек. Финансиските средства кои биле предвидени (околу 5.000 евра) ќе бидат донирани во хуманитарни цели.

– На наредната седница, Советот на Општината треба да одлучи за која хуманитарна намена ќе бидат насочени овие средства. Размислуваме и средствата планирани за новогодишниот коктел во Собранието да се пренаменат во хуманитарни цели – изјави градоначалникот Александар Панов.

Со планираните средства требало да се покрие настапот на Ристо Самарџиев, музички групи, огномет и слично.

Иницијативата за откажување на новогодишните прослави на градските плоштади за парите да се пренаменат за хуманитарни цели, почна во Србија.

Под влијание на апелите на македонските твитерџии на социјалните мрежи, ваквата практика да се примени и кај нас, општините почнаа да размислуваат да ги пренаменат планираните средства за прослава во хуманитарни цели.

Најпрво од организиран дочек на Нова година се откажа општина Велес, а потоа и Град Скопје. Продукцијата „Авалон“ се закани со тужба за Град Скопје доколку пејачите кои требаа да настапат на новогодишната вечер на скопскиот плоштад, побарале обесштетување.


„Авалон“ ќе го тужи Град Скопје ако ја откаже прославата за Нова година


Скопје, 22 декември, 2016 - 11:50 (META) 

Продукцијата „Авалон“ ќе го тужи Градот Скопје ако се откаже од дочек на Нова година и ќе бара целосно да бидат исплатени сите трошоци.

Ова го напиша првиот човек на „Авалон продукција“, Бобан Милошески, на својот профил на „Фејсбук“, како реакција на најавата на Град Скопје дека ќе се откаже од дочекот на Нова година на плоштадот и парите ќе бидат дадени во хуманитарни цели.

Меѓу пејачите што требаше да настапат за новогодишната ноќ на плоштадот беше и Каролина Гочева, која е ексклузивец на „Авалон“.

– Ако Град Скопје се откаже од дочек на Нова година, (а тоа може да го направи затоа што оваа година не плаќа 100.000 евра за некоја Северина и 50.000 евра за продукција од странство) и со тоа ги оштети македонските артисти и продукцијата од Македонија, „Авалон“ ќе го тужи Град Скопје и ќе бара целосно да бидат исплатени сите трошоци. Исто од хуманитарни причини, „Авалон“ ќе поведе иницијатива градоначалникот и вработените во Град Скопје своите шест месечни плати да ги донираат на сиромашните – пишува Милошески на својот статус на „Фејсбук“.

Тој додава дека Нова година на пејачите во Македонија им значи исто како на секој што работи за плата.

„Пејачите за Нова година заработуваат за живот и ним тој термин им значи како на некој вработен шест плати. И до кога со патриотизам на штета на Македонецот. Да беше некој Оливер Драгојевиќ како лани, ќе беше платен 100.000 евра и досега ќе беше исплатен, но бидејќи е Миле Кузмановски наш, немаме гајле и ќе глумиме хумани“, се вели во стстусот.

Во телефонски разговор Ивана Нолчева, портпаролката на „Авалон“, ни рече дека статусот на Милошески не претставува официјален став на продукцијата и побара да упатиме прашање по електронска пошта.


Ќе ги откажат ли општините прославите за да ги донираат парите во хумани цели


Скопје, 21 декември, 2016 - 16:49 (META) 

Иницијативата од Србија за откажување на новогодишните прослави на градските плоштади за парите да се пренаменат за хуманитарни цели, почна да се прифаќа и во Македонија.

Вработените во општинската администрација на Велес и градоначалникот Славчо Чадиев одлучиле парите од општинскиот буџет што биле предвидени за организирање на новогодишна прослава, да ги донираат во хуманитарни цели. Две илјади евра ќе им се доделат на дваесетина најсиромашни семејства во градот.

– Овие семејства ќе ги најдеме преку центарот за социјална работа. Дали тоа ќе биде помош во храна, хигиенски средства или, пак, можеби огрев, ќе видиме, во зависност од нивните потреби. Значи, Општина Велес нема да прави никакви прослави и сите средства ќе бидат наменети за најсиромашните семејства – изјави Чадиев.

Прв кој се откажа од новогодишната прослава беше српскиот град Пожега, при што беше одлучено парите да се пренаменат за помош на лекувањето на болните деца.

По ова, петиција „Да бидеме хумани – Нова година за нов живот“ беше иницирана во повеќе градови во Србија и во Војводина.

Оваа иницијатива наиде на добар прием и кај македонските твитерџии, кои упатија апел на социјалните мрежи, примерот од градовите во Србија, да го следат и градоначалниците во Македонија.

Како резултат на овие апели, Општина Центар информира дека во моментот се ревидираат договорите и правните последици за ваквата одлука.

– Настанот што го организира Општина Центар е одамна подготвен. Освен локални артисти, настапуваат и артисти од регионот, со кои веќе се склучени договори и чие откажување ќе предизвика сериозни финансиски последици. Истото важи и за другиот дел од организациските работи и логистичките трошоци. Општина Центар има целосно разбирање за овие барања.  Сепак, пред да се донесе ваквата одлука, важно е да се направи сериозна и објективна анализа дали воопшто и колку од буџетот може да се заштеди и реално да се пренамени. Во моментов, општинските служби работат на ова прашање и наскоро ќе имаме конкретен одговор – се вели во соопштението на Општина Центар.


Младите фудбалери свечено пречекани во Белград


Белград, 23 јуни, 2015 - 12:18 (META) 

Младинската фудбалска репрезентација на Србија беше свечено пречекана по освојувањето на Мундијалот, а настанот го пренесоа бројни светски медиуми.

Илјадници луѓе пред Собранието во Белград ги поздравија младите шампиони, победници на турнирот во Нов Зеланд.

Србија беше единствена европска селекција што стигна до полуфинале, па во борбата за трофеј со 2:1 го совлада петкратниот светски шампион, фудбалерите на Бразил.

– Околу 50.000 луѓе беа на улиците низ центарот на Белград, фудбалерите беа пречекани како херои по победата над Бразил. Навивачите запалија факли и со знамиња направија неповторлив амбиент за младите фудбалери – пренесува „Дејли мејл“.