Вилма Русковска нов шеф на Обвинителството за организиран криминал


Скопје, 14 ноември, 2018 - 16:08 (META) 

Советот на јавни обвинители денеска ја избра Вилма Русковска, обвинителката која го води случајот за насилствата од 27 април, за нов шеф на Основното јавно обвинителство за гонење на организиран криминал и корупција – Скопје.

Покрај насилствата на 27 април, Русковска ги водеше и истрагите за „Диво Насеље“, „Змиско око“ и „Детонатор“.

На денешната седница на Советот на јавни обвинители беа избрани и шефови на скопското Вишо обвинителство, Мустафа Хајрулахи, во гостиварскто Вишо обвинителство Ислам Абази, за велешкото Основно обвинителство Гордана Тодорова, Елизабета Мишева во Кавадарци и Лиле Талевска за прв човек на битолското Основно обвинителство.


МВР за Диво Насеље: Противдржавен чин што не смее да се повтори


Скопје, 9 мај, 2018 - 13:20 (META) 

Министерството за внатрешни работи на тригодишнината од акцијата во кумановската населба Диво Насеље, кога загинаа осум припадници на полицијата, порача дека тој „нечовечки и противдржавен чин не смее никогаш да се повтори!“

„Припадниците на полицијата се тука да ги штитат граѓаните и уставниот поредок на државата и не смеат никогаш да бидат жртви на никакви поинакви интереси. Овие осум херои ги жртвуваа сопствените животи за да ги заштитат граѓаните, жртва за која треба сите да се вложиме и да работиме вредно, за веќе никогаш да не ни се случи.  Нашето заедничко, едно општество за сите е гарант на мирот и соживотот. Граѓаните секогаш ќе ја паметат нивната храброст, а иституциите во Република Македонија ќе ја осигураат правдата, како должност и кон нивните семејства и кон населението. Одговорните за настаните во Диво Насеље ќе се соочат со одговорноста“, стои во соопштението на МВР.


„Диво Насеље“: Три години, малку вистински одговори, многу прашања и шпекулации


Скопје, 8 мај, 2018 - 17:17 (META) 

„Диво Насеље“, еден од најголемите случаи оквалификувани како тероризам во современата македонска историја, со осум загинати и 37 ранети припадници на МВР и 10 убиени напаѓачи и по три години е уште далеку од конечна судска развршница.

На 2 ноември минатата година, две години и пет месеци по настаните 9 и 10 мај 2015 година во кумановската населба,  и година и осум месеци по почетокот на судењето на 8 февруари 2016 година, Основен суд Скопје 1 ги изрече првостепените пресуди против обвинетите.

Седуммина обвинети за тероризам и терористичка организација за настаните во кумановско Диво Насеље од 9 и 10 мај 2015 година добија доживотни казни затвор, 13 обвинети добија по 40 години затвор, шестмина по 20 години, еден обвинет 18 години, двајца по 14 години, двајца по 13 години затвор и двајца по 12 години затвор.

Следниот ден беше изречена уште една доживотна затворска казна.

Поради пресудата се протестираше во Македонија, Косово, а имаше и мал протест во Албанија.

Адвокатите веднаш најавија жалби, а случајот се уште не е стасан во Апелациски суд Скопје, за второстепено одлучување.

Како што објаснија од Основен суд Скопје 1, жалбите се процесуирани, а во моментот пресудата се преведува на албански јазик, и набргу предметот ќе биде доставен до Апелација.

– Од страна на одбраната во предметот, до судот доставени се повеќе жалби изјавени против првостепената пресуда. Во моментов се врши превод на пресудата на албански јазик, кој е во финална фаза, по што пресудата ќе биде доставена до обвинетите и откако ќе се комплетира доставата, предметот веднаш ќе биде доставен до Апелациониот суд на надлежно постапување – одговорија од Кривичниот суд на прашање од „Мета“ до каде е постапката со испраќање на предметот во повисокиот суд.

По пресудата и владејачката ДУИ, но и нејзиниот лидер Али Ахмети, го повторија ставот дека ќе бараат меѓународна експертска група да го расчисти целиот случај, а и премиерот Зоран Заев нагласи дека мора да има меѓународен експерт што ќе го разгледува случајот за кој СДСМ тврдеше дека е фингиран од тогашната власт на ВМРО-ДПМНЕ.

Но од сето тоа, како што утврди „Вистиномер“, досега нема ништо – ниту една институција не дала предлог до Владата или Собранието за почнување меѓународна истрага.

За расчистување на случајот ДУИ побара и формирање собраниска Анкетна комисија, која и се формираше, но освен конститутивната седница, не напреднала многу, а адвокатите на обвинетите не биле повикани на сослушување.

Косовското Министерство за финансии ја реализираше одлуката на владата од 10 октомври 2017 и на 7 февруари годинава на 29 семејства на загинатите и осудените за настаните во Диво насеље им исплати по 10.000 евра.

Во меѓувреме, нема нови индикации што ќе се прави со меѓународната истрага.

Во врска со самите настани, некои работи се потврдени, но некои сè уште се предмет на шпекулации.

Досега е познато следното:

  • Загинаа осум припадници на специјалните полициски единици, а 37 беа повредени;
  • Криминално-терористичката група броела четириесетина членови;
  • Во борбите со полицијата убиени се 10 членови на групата;
  • По борбите, на полицијата ѝ се предадоа 28 терористи;
  • Како водачи на групата се идентификувани Мухамед Красниќи, таканаречен командант Малишева, Мирсад Ндрецај, таканаречен командант Нато, Сами Укшини, таканаречен командант Соколи, Бег Ризај, алијас командант Бегу, и Деме Шеху, алијас Јунику;
  • Групата повеќе месеци била следена од безбедносните служби;
  • Истата група е одговорна за нападот на караулата Гошинце на 21 април 2015 година;
  • Групата планирала напади на државни и на цивилни цели;
  • Во околината на селото Брест, во бункер на отворен простор е пронајдено украденото оружје од караулата Гошинце (местото го посочил еден од уапсените во акцијата во Куманово, кој, според информации на медиумите, што надлежните ниту ги потврдија ниту ги демантираа, успеал да ѝ побегне на полицијата;
  • Лидерот на ДУИ, Али Ахмети, во интервју во емисијата „Патот кон…“ на „Алсат-М“, рече дека учествувал во преговорите за предавање на групата;
  • Еден од уапсените со терористичката група е вработен во Министерството за внатрешни работи (надлежните ја потврдија оваа информација по прашања иницирани од медиумите);
  • Агенцијата за разузнавање информира дека за случаите во Гошинце и во Куманово, „во однос на намерите на водачите на терористичката структура, нивни капацитети, логистички бази, курс на акција на непријателот, од страна на Агенцијата направено е рано предупредување во рамки на своите надлежности, во согласност со Законот за Агенција за разузнавање“.

Шпекулации:

  • Припадници на македонските тајни служби контактирале со членови на групата месеци пред настаните од 9 и од 10 мај;
  • Косовската разузнавачка агенција ги информирала претседателката Атифете Јахјага и премиерот Иса Мустафа за можноста за инцидент во Куманово;
  • Се споменуваат имиња на македонски политичари, агенти и функционери кои биле вклучени во инцидентот во Куманово;
  • Косовската полиција преку прислушувани разговори открила дека кумановската група планирала напад на косовскиот затвор во Подуево и ослободување на двајца озлогласени криминалци;
  • Борбите во Куманово биле договорено сценарио зад кое стоело предавство на членови на групата;
  • Плановите за Куманово биле правени во автомобил „бе-ем-ве“ во Урошевац;
  • Ноќта пред акцијата било евакуирани 70 отсто од населението во кумановско Диво Насеље;
  • Ситуацијата излегла од контрола кога членови на групата почнале да пукаат кон полицијата.

„Диво Насеље“: Пресудата се преведува, жалбите се процесуирани, предметот оди во Апелација


Скопје, 8 мај, 2018 - 14:58 (META) 

На 2 ноември минатата година, две години и пет месеци по настаните 9 и 10 мај 2015 година во кумановската населба, и година и осум месеци по почетокот на судењето на 8 февруари 2016 година, Основен суд Скопје 1 ги изрече првостепените пресуди против обвинетите.

Осуммина обвинети за тероризам и терористичка организација за настаните во кумановско Диво Насеље од 9 и 10 мај 2015 година добија доживотни казни затвор, 13 обвинети добија по 40 години затвор, шестмина по 20 години, еден обвинет 18 години, двајца по 14 години, двајца по 13 години затвор и двајца по 12 години затвор.

Адвокатите веднаш најавија жалби, а случајот се уште не е стасан во Апелациски суд Скопје, за второстепено одлучување.

Како што објаснија од Основен суд Скопје 1, жалбите се процесуирани, а во моментот пресудата се преведува на албански јазик, и набргу предметот ќе биде доставен до Апелација.

– Од страна на одбраната во предметот, до судот доставени се повеќе жалби изјавени против првостепената пресуда. Во моментов се врши превод на пресудата на албански јазик, кој е во финална фаза, по што пресудата ќе биде доставена до обвинетите и откако ќе се комплетира доставата, предметот веднаш ќе биде доставен до Апелациониот суд на надлежно постапување – одговорија од Кривичниот суд на прашање од „Мета“ до каде е постапката со испраќање на предметот во повисокиот суд.

По пресудата и владејачката ДУИ, но и нејзиниот лидер Али Ахмети, го повторија ставот дека ќе бараат меѓународна истрага, а и премиерот Зоран Заев нагласи дека мора да има меѓународен експерт за случајот за кој СДСМ тврдеше дека е фингиран од тогашната власт на ВМРО-ДПМНЕ.

За расчистување на случајот формирана е собраниска Анкетна комисија, која освен конститутивната седница, не напреднала многу.

Поради пресудата се протестираше во Македонија, Косово, а имаше и мал протест во Албанија.

Косовската влада на 29 семејства на загинатите и осудените за настаните во Диво Насеље им исплати по 10.000 евра.


Косово им исплати по 10.000 евра на семејствата на учесниците во „Диво насеље“


Приштина, 7 февруари, 2018 - 10:56 (META) 

Косовското Министерство за финансии ја реализираше одлуката на Владата и на 29 семејства на загинатите и осудените за настаните во кумановско Диво насеље во мај 2015 година им исплати по 10.000 евра.

– Исплатени се 290 илјади евра, пропорционално за 29 семејства на загнатите и осудени лица во настаните во Куманово, онака како што беше предвидено со одлуката на Владата од 10 октомври 2017 година, изјави – Мухарем Шабани, портпарол на косовското Министерството за финансии.

Донесената одлука на премиерот Рамуш Харадинај тогаш наиде на критика во косовската јавност.

На 9 и на 10 мај 2015 година, во Диво насеље вооружена група се судри со македонските безбедносни сили. Во престрелката загинаа осум полицајци од специјалните и од посебните единици на МВР, додека четириесетина беа тешко повредени. Убиени беа и десет лица од вооружената група.

За настаните во Дива населба, македонскиот суд во ноември лани на обвинетите им изрече седум доживотни казни затвор, 13 по 40 години, шест по 20 години, една од 18 години, две од 14, две од 13, две по 12 години затвор, а четири лица добија ослободителни пресуди.


Заев: Во нормална држава мора да се знае вистината за „Монструм“, „Диво насеље“, Младенов


Скопје, 29 декември, 2017 - 12:23 (META) 

Ако сакаме да бидеме нормална и сериозна земја, а не некаква творба тогаш мора да се знае целата вистина за „Монструм“, „Диво насеље“, за сообраќајката на Никола Младенов и за други случаи кои што се случувале во минатото, изјави премиерот Зоран Заев во синоќешното интервју во емисијата „Патот кон“ на „Алсат-М“.

Заев рече дека мора да има меѓународен експерт кој независно ќе ја соопшти вистината за случувањата во кумановско Диво насеље од 9 и 10 мај 2015 година и дека меѓународната истрага за овој случај е дел од програмата на Владата.

– Притоа мора да имаме предвид дека судските процеси течат, ние не смееме да ја нарушиме назвисноста на судството. Меѓународната истрага може да биде разнолика, може да поканиме еден правник, експерт од меѓународната заедница, од Европската Унија кој што ќе го следи целиот процес – рече Заев.

Тој вели дека „сите видовме што се случува“ во Диво насеље, но, оти има многу неодговорени прашања.

– Кој тоа им овозможил на овие луѓе да влезат во урбаното јадро во вториот по големина град во земјава и да бидат неколку дена таму. Како украденото оружје ( од караулата Гошинце) некој овозможил или не да биде преселено долу во градот. Дали постоеле пари, дали тие луѓе се излажани дека ќе дојдат ќе направат некоја драма и ќе заминат. Дали кога дошла полицијата ги направила сите постапки за апсење без притоа да има потреба од убиства? Како се убиени полицајците таму. Дали акцијата била огранизирана од органите како што треба? И тоа како многу прашања треба да бидат одговорени. За да не излезе Заев пристрасен, да не излезе дури и Али Ахмети пристрасен или било кој од претходната власта пристрасен мора да има меѓународен експерт кој што независно ќе ја соопшти вистината, судските процеси се судски процеси кои што треба да си течат – изјави Заев.

Инаку, за настаните во Диво насеље на почетокот на ноември, годинава осум лица беа осудени на доживотни затворски казни, 26 добија затворски казни од 12 до 40 години, а четири лица беа ослободени од обвиненијата.

Во врска со случајот „Монструм“, премиерот вели дека ги следел одлуките на Јавното обивнителство и на Врховниот суд и оти јавниот обвинител постапил чесно што му предложил на Врховниот суд да се врати постапката на повторно судење и да се разгледа заедно со новите докази кои ги има СЈО.

Тој најави дека деновиве или по Нова година ќе се види со родителите на убиените момчиња и додава дека овие луѓе, како и јавноста имаат право да ја знаат вистината.

– Врховниот суд тоа го прифатил и така одлучил. Еве тоа е тоа што јас го знам. Можеби во таа нова постапка ќе бидат осудени исти луѓе, можеби и не. Јас тоа не го знам, но луѓето ќе знаат зошто се тие или зошто не се тие. Овие луѓе кои првично беа осудени на доживотни казни затвор, тврдат дека не се виновни и треба да се утврди тоа. Доказите кои до сега постоеа и оние кои ги има во СЈО треба да се соберат и да се утврди дали е тоа така или не заедно со експертите, истражителите, јавните обвинители и судот, тоа е нивна постапка. Но, сега барем постои фер шанса за правда бидејќи сите докази ги има таму. Можеби тие докази кои ги има во СЈО ќе ги потврдат оние кои веќе ги има или пак, ќе доведе до вистинските извршители. Важно е и родителите и семејствата на убиените да ја знаат вистината. И тие ќе бидат мирни ако знаат дека до крај се се истражило и вистинските убијци ќе одговараат. И кај нив постојат прашалници. Јас ќе се видам со родителите на убиените деца веднаш по Нова година или деновиве, мојот Кабинет веќе закажа средба. Сите трагаат кон правдата и таа мора да биде обезбедена до крај – рече Заев.

Врховниот суд кој крајот на ноември годинава ги укина пресудите на Кривичниот и на Апелацискиот суд со кои шест лица беа осудени на доживотни затворски казни за петкратното убиство кај Смиљковско езеро од 12 април 2012 година и го врати случајот на повторно судење, а на обвинетите им го укина притворот и им одреди поблаги мерки на претпазливост.


Заев: Не сме стигнале, со Грција да разговараме за ново име


Приштина, 12 декември, 2017 - 12:09 (META) 

Прашањето за случајот „Диво Насеље“ не треба да биде пречка во односите помеѓу Македонија и Косово, оцениле по средбата во Приштина, премиерот Зоран Заев и неговиот колега Рамуш Харадинај. Заев, на заедничката прес-конференција, додал дека, за овој случај ќе има меѓународна истрага, за да се дојде до вистината.

Во врска со денешните разговори за името во Брисел, помеѓу посредникот од Обединетите Нации за името, Метју Нимиц, и македонскиот и грчкиот преговарач, Васко Наумовски и Адамантиос Василакис, Заев рече дека се надева дека „со посредништво на Нимиц, ќе биде потврдена заедничката желба на двете стани за изнаоѓање на решение“.

– Не сме стигнале до тоа, да разговараме за нови имиња. Се надевам дека состанокот ќе заврши во позитивна атмосфера за да можеме понатаму да очекуваме разработка на можни решенија на овој проблем – одговори Заев на новинарско прашање.

Заев и владината делегација денеска имаа билатерална средба со Харадинај, и со министри во неговата влада. Двете делегации се согласиле дека, постои интерес за продлабочување на соработката во областа на енергетиката. Оцениле дека, Косово има големи резерви на јаглен, а Македонија има можности и потенцијали да учествува во гасификацијата на Косово.

– Се согласивме дека е неопходно да ја подобриме инфраструктурата која не поврзува. Од наша страна, изразивме подготвеност да продолжиме со изградбата на делницата на автопатот Блаце-Скопје – рече Заев.

Заев денеска ќе се сретне и со косовскиот претседател Хашим Тачи и со претседателот на косовското Собрание, Кадри Весели.


Заев и Харадинај ќе разговараат за меѓународната истрага за „Диво Насеље“


Скопје, 4 декември, 2017 - 15:46 (META) 

Најавената меѓународна истрага за целосно расчистување на настаните во кумановско Диво Насеље од 9 и 10 мај 2015 година, не била тема на денешната официјална средба меѓу министрите за внатрешни работи на Македонија и на Косово, Оливер Спасовски и Фламур Сефај во Скопје.

Ова, одговарајќи на новинарско прашање, го соопшти косовскиот министер за внатрешни работи и додаде дека за ова прашање ќе разговараат премиерите на двете држави, Зоран Заев и Рамуш Харадинај.

– Ние денеска сме овде за други теми. За ова прашање ќе разговараат премиерите на двете држави – рече Сефај, одговарајќи на прашањето дали Косово ќе преземе нешто во врска со истрагата за кумановските настани пред две години.

Спасовски во врска со ова рече дека тие го кажале својот став претходно и дека немаат што повеќе да додадат.

Владата и претставници на меѓународната заедница бараат начин за спроведување на меѓународна истрага за неразјаснетите околности поврзани со настаните во Диво Насеље, изјави премиерот Заев на почетокот на ноември.

Судскиот процес за случајот „Диво Насеље“ заврши на 2 ноември годинава, кога Кривичниот суд изрече осудителни пресуди за 34 обвинети за тероризам и за терористичка организација, од кои осуммина добија доживотни, 26 лица добија долгогодишни затворски казни – од 12 до 40 години, а четири лица беа ослободни од обвиненијата.


Протест во Приштина, се бара ослободување на осудените во „Диво Насеље“


Приштина, 28 ноември, 2017 - 18:12 (META) 

Неколку стотици лица денеска протестираа во центарот на Приштина во знак на поддршка на 19 Косовци кои се осудени во Македонија како дел од кумановската група во случајот „Диво Насеље“.
Протестот го организираа семејствата на осудените Косовци, а беше поддржан од ветераните на ОВК и од други слични организации.

Од протестот беше испратен апел за нов судски процес, Македонија итно да ги ослободи косовските Албанци, а Приштина и Тирана да помогнат во тоа.

Мухамед Биљали, еден од организаторите, рече дека припадниците на кумановската група се „борци за слобода, без разлика како ги нарекува дневната политика“.

Протестот се одржа на Денот на албанското знаме.

Кривичниот суд во Скопје, на 2 ноември пресуди дека 33 од вкупно 37 обвинети се виновни за тероризам и за учество во терористичка организација во кумановската населба Диво Насеље, додека четворица беа ослободени од обвинението.

Седум од обвинетите се осудени на доживотен затвор, други 13 добија по 40 години затвор, а другите добија затворски казни во траење од 12 до 20 години.

Косовската влада претходно издвои 219.000 евра помош за семејствата на косовските државјани што беа убиени и казнети во случајот „Диво Насеље“.


Денешната акција, четврта според бројот на уапсени во оваа деценија


Скопје, 28 ноември, 2017 - 16:57 (META) 

Случајот за насилствата во Собранието од 27 април годинава е еден од четирите во изминатите 10 години во кои беа осомничени и уапсени најголем број лица.

Обвинителството за организиран криминал и за корупција денеска соопшти дека отворило истражна постапка за вкупно 36 лица, кои се товарат за терористичко загрозување на уставниот предок и на безбедноста, кривично дело за кое е предвидена затворска казна од најмалку 10 години.

Инаку, убедливо најголем број на осомничени – вкупно 86, беа уапсени во акцијата на МВР, со кодно име „Калдрма“, пред шест години.

Денешната акција за 27 април е четврта по масовност, зад „Змиско око“ и „Диво Насеље“, но прва помасовна од доаѓањето на власт на СДСМ.

Листата на најмасовни истраги и апсења изгледа вака:

  • „Калдрма“86 уапсени, инкасатори на „Македонија пат“, осомничени дека за наплата на патараните издавале фалсификувани фискални сметки, а парите си ги ставале в џеб. Тие се товареа дека го оштетиле буџетот на државата за два милиони евра. „Калдрма“ заврши со правоосилна пресуда, според која вкупно 86 обвинети беа осудени на близу три и пол века затвор;
  • „Змиско око“ – 72 уапсени, вработени на наплатените рампи, за проневера на милиони евра со тоа што на патниците им наплаќале половина од цената, а дел од парите ги присвојувале за себе. Овој случај од 2007 година беше првата од поголемите полициски акции на Владата на ВМРО-ДПМНЕ, по доаѓањето на власт на оваа партија во 2006 година, на чело со Никола Груевски. Сепак, случајот не заврши славно и неколкупати беше враќан на повторно судење;
  • Диво Насеље“ – 38 уапсени за настаните во кумановско Диво Насеље, од 9 и 10 мај 2015 година. За тероризам и за терористичка ораганизација, со првостепена пресуда, годинава беа осудени 34 обвинети, од кои осуммина добија доживотни затворски казни, а другите долгогодишни затворски казни;
  • „27 април“ – за 36 лица е поведена истражна постапкаи тие се товарат за терористичко загрозување на уставниот предок и на безбедноста, во врска со насилствата во Собранието од 27 април 2017 година.

Во изминатите 10 години, поголем број лица беа уапсени и во акциите „Детонатор“ – вкупно 23 и „Змиско око 2“ – вкупно 25.

Истрагата за насилствата од 27 април ја води обвинителката Вилма Русковска, а таа ги водеше и предметите „Диво Насеље“, „Змиско око“ и „Детонатор“.