Бушати ги повика Албанците кои живеат во Македонија да го поддржат референдумот


Скопје, 13 септември, 2018 - 15:06 (META) 

Апелирам на сите граѓани на вашата земја, особено на Албанците кои живеат тука да дадат поддршка на историскиот Преспански договор, затоа што тој има исклучително значење за демократската стабилност на регионот, изјави денеска шефот на албанската дипломатија Дитмир Бушати на прес-конференцијата со неговиот македонски колега Никола Димитров.

– Сите се согласуваме дека Албанците кои живеат во Македонија ќе бидат огромни поддржувачи на процесите кои течат и уште еднаш сакам да апелирам да излезат масовно да учествуваат во изградбата на иднината и на подобар живот тука. Во оваа насока ќе продолжиме блиско да соработуваме со цел да создадеме што подобра и поинклузивна средина – рече Бушати.

Во однос на македонското малцинство во Албанија, Бушати рече дека се направени чекори напред со новиот Закон за малцинствата, со што, истакна тој, македонското малцинство е признаено како едно од малцинствата што составуваат поширок мозаик на малцинства во Албанија.

Во однос на положбата на Албанците во Македонија, Бушати рече оти тука има подобрена реалност, подобрена клима на соработка и на разбирање и подобра претставеност на Албанците, пред се, како што рече, преку позицијата претседател на Собранието и вицепремиер за европски прашања. Додаде оти очекува Законот за јазици што побрзо да стапи во сила.

Ја повтори поддршката што Албанија како членка на НАТО и ја дава на Македонија, и оти 2019 е многу значајна година за Македонија и ЕУ.


Могерини, Мичел и Бушати денеска во Скопје


Скопје, 13 септември, 2018 - 9:19 (META) 

Високата претставничка за недворешни работи на ЕУ Федерика Могерини, помошник-државниот секретар за европски и евроазиски прашања на САД, Арон Вес Мичел и министерот за надворешни работи на Албанија, Дитмир Бушати, денеска ќе престојуваат во работна посета на Македонија.

Могерини ќе има средби со премиерот Зоран Заев, со претседателот на државата Ѓорге Иванов, а ќе се сретне и со лидерот на опозицијата, Христијан Мицкоски.

Американскиот помошник државен секретар за европски и евроазиски прашања Арон Вес Мичел, пак, како што соопшти Стејт департментот, ќе има средби со премиерот Заев и со други официјални претставници за поддршка на Договорот од Преспа меѓу Македонија и Грција и претстојниот референдум на 30 септември. Мичел во Скопје ќе има средби и со претставници на парламентарните партии и на бизнис заедницата.

Следната седмица уште еден висок американски претставник ќе ја посети Македонија – секретарот за одбрана на САД, Џејмс Матис. Матис доаѓа во Скопје за да изрази јасна поддршка за претстојниот референдум за прашањето за името, но и загриженост поради можното мешање на Москва во процесот.

Во изминатиов период од дваесетина дена во Македонија дојдоа германската канцеларка Ангела Меркел, генералниот секретар на НАТО, Јенс Столтенберг, австрискиот канцелар Себастијан Курц, министерите за надворешни работи на Луксембург и на Холандија, Жан Аселборн и Стеф Блок.


Бушати: САД клучни за спроведувањето на Договорот меѓу Македонија и Грција


Тирана, 31 јули, 2018 - 11:08 (META) 

Ангажманот на САД на Балканот е од клучно значење со цел да се обезбеди дека нема да има какви било назадувања во однос на напорите на Грција и на Република Македонија за нормализирање на односите кои ќе ѝ го отворат патот за членство во НАТО, вели албанскиот министер за надворешни работи Дитмир Бушати.

– Сега кога двете земји ја поминуваат последната милја кон нормализација, фокусот на САД на ова прашање е од исклучително значење. Особено ако се има предвид дека постојат трети страни кои не го поддржуваат договорот помеѓу Атина и Скопје – рекол Бушати во разговор со извршниот потпретседател на Атлантскиот совет, Дејмон Нилсон, пренесува МИА.


Рама, Бушати: Голем ден за Албанија, за Македонија, но и за ЕУ


Тирана, 27 јуни, 2018 - 10:23 (META) 

Албанскиот премиер Еди Рама, во првата куса изјава околу одлуката за почнување преговoри на Албанија и на Македонија во јуни 2019 година, оценува дека тоа е голем успех на владите на двете земји.

– По 72 часа помеѓу внатрешните бранови на ЕУ, Албанија успеа да добие датум за влез во пристаништето на обединета Европа. Резултатите од нашите реформи ги натераа и скептиците да ги препознаат заслугите на Албанија и на Македонија. Добиена е една многу тешка битка, војната продолжува – порача Рама.

И шефот на албанската дипломатија Дитмир Бушати ја поздрави одлуката на министрите за надворешни работи на Европската Унија за отворање на преговорите за Албанија и Македонија во јуни 2019 година.

– Ова е голем ден за Албанија и за Македонија, секако и за иднината на ЕУ. Благодареност до сите земји-членки на ЕУ и до Европската комисија за нивната поддршка – вели Бушати.


Рама: Двајца прогресивни лидери испишаа историја, Балканот сега е подобро место


Тирана, 13 јуни, 2018 - 12:37 (META) 

Двајца прогресивни лидери на соседните земји денеска испишаа историја и им покажаа на ЕУ и на светот како волјата и подготвеноста да се надмине минатото може да пронајде простор за иднината кога изгледа дека таков простор нема, напиша албанскиот премиер Еди Рама вчера на својот Твитер-профил, честитајќи им на македонскиот и на грчкиот премиер Зоран Заев и Алексис Ципрас за постигнатиот договор за спорот за името.

„Честитки, Балканот денеска е подобро место благодарение на двајцата вас“, напиша Рама на англиски јазик. Договорот преку својот Твитер-профил го поздрави и албанскиот министер за надворешни работи, Дитмир Бушати, честитајќи им на македонскиот и на грчкиот колега, но и на македонскиот вицепремиер за евроинтеграции, Бујар Османи.  

„Честитки за нашите соседи и пријатели за постигнување решавачки договор за спорот за името. Тоа отвора пат не само за едно земја, туку за целиот регион, кон Евро-атлантското семејство. И покрај сите пречки, дипломатијата дејствува“, напиша Бушати.


Мета и Бушати: Законот за јазиците – значаен историски акт и знак за зрелост


Тирана, 15 март, 2018 - 11:39 (META) 

Официјална Тирана го поздрави донесувањето на законот за јазиците од страна на Собранието на Македонија. Албанскиот претседател Илир Мета изјави дека законот за јазиците претставува значаен историски акт.

-Овој акт е од големо значење не само за Албанците во Македонија туку претставува и европско достигнување на Македонија – рече Мета.

Албанската влада преку Министерството за надворешни работи исто така го поздрави донесувањето на законот за јазиците во Македонија.

-Донесувањето на Законот во Собранието на Македонија претставува потврда на политичка зрелост. Овој закон ги отвора патиштата за целосно интегрирање на Македонија во ЕУ – рече шефот на албанската дипломатија Дитмир Бушати.

Албанската опозиција оценува дека законот е од големо значење за Албанците и за земјата. Во соопштението на демократската партија се наведува дека ,,Донесувањето на законот е еден чекор напред за подобра клима за соживот во Македонија“.


Османи од Тирана: Проширувањето на ЕУ нема да биде кредибилно без Македонија и Албанија


Тирана, 17 јануари, 2018 - 15:20 (META) 

Вицепремиерот задолжен за европски прашања, Бујар Османи, во рамките на посетата на Албанија се сретна со министерот за Европа и надворешни работи на Република Албанија, Дитмир Бушати со кого разговарал за развојот на билатералните односи меѓу двете земји.

– Сакаме јасно да истакнеме дека не постои кредибилност на процесот на проширување на Европската Унија со земјите од Западен Балкан, без јасни перспективи за напредок на европските интеграции за Македонија и Албанија – изјавил Османи, пренесува Секретаријатот за европски прашања.

Според Османи, Македонија и Албанија заслужуваат соодветно место во Стратегијата за проширување на Европската Комисија, најавена од нејзиниот претседателот Жан Клод Јункер, а која се очекува да биде објавена на почетокот на февруари.

Вицепремиерот побарал директна поддршка од Албанија за полноправно членство на Македонија во НАТО.

Покрај средбата со Министерот Бушати, вицепремиерот Османи оствари средба и со претседателот на Република Албанија, Илир Мета, претседателот на Собранието Грамоз Ручи, а во агендата е предвидена и средба со претседателот на Демократската партија, Лулзим Баша.

Посетата на Тирана е дел од мини балканската турнеја која вицепремиерот Османи ја започна со посетата на Атина на почетокот на месецов и истата се очекува да продолжи со посета на Белград, а потоа и на Софија.


Димитров и Бушати разговараа за изградба на Коридорот 8


Скопје, 25 јули, 2017 - 18:27 (META) 

Интензивирање и зајакнување на политичката, економската и особено на инфраструктурната и на енергетската соработка, беше тема на денешната средба во Тирана, меѓу министерот за надворешни работи, Никола Димитров, и шефот на албанската дипломатија Дитмир Бушати, соопштија од македонското МНР.

Министрите разговарале за заедничкиот интерес за унапредување на состојбите во регионот и на регионалната соработка, во духот на европските и евроатлантските вредности.

„Се разговараше за можностите за реализација на заеднички проекти со користење на средства од ИПА-фондовите, особено во контекст на унапредување на интерконективноста. Министрите ја нагласија потребата од изградба на Коридорот 8, како и железничката пруга Кичево – Охрид, со крак до Лин. Беше потврден заедничкиот интерес за поскоро профункионирање на мешовитиот комитет за економска соработка“, стои во соопштението.

Од МНР наведуваат дека министрите договориле оваа есен да се одржи прва заедничка владина седница помеѓу Македонија и Албанија, како и одржување на редовни политички консултации по прашања од билатерален и од регионален интерес.
За време на посетата на Тирана, која доаѓа на покана на албанскиот министер за надворешни работи Бушати, Димитров се сретна и со албанскиот претседател, Илир Мета, кој истакна дека двете држави треба да покажат соработка и солидарност.

– Стабилна Македонија значи стабилност и за Албанија, просперитетна Македонија значи и просперитетна Албанија – рече Мета.


Бушати и Димитров договорија заедничка владина седница наесен


Тирана, 25 јули, 2017 - 14:22 (META) 

Албанија и Македонија немаат отворени прашања, истакнаа на заедничката прес-конференција во Тирана министрите за надворешни работи на двете земји, Дитмир Бушати и Никола Димитров, и додадоа дека ќе работат на подобрување на соработката, која е клучна за евроатлантските интеграции.

Бушати и Димитров најавија дека наесен во Подградец ќе се одржи заедничка седница на двете влади, на која ќе се разговара за заеднички проекти.

Албанскиот министер за надворешни работи, Бушати, рече дека официјална Тирана сака добри односи со Македонија, бидејќи таа претставува важен сосед за Албанија.

– Во минатото имаше некои заблуди во врска со нашите ставови. Македонија е важен сосед за нас и демократската стабилност, меѓуетничката хармонија, особено меѓу македонската и албанската заедница, се од исклучително значење и за Македонија и за Албанија, но исто така и за стабилноста на целиот регион и за неговата европерспектива – рече Бушати.

Тој, исто така, истакна дека Македонија може да смета на поддршката од Албанија за членство во НАТО.
– Албанија не сака и нема да биде пречка за која било земја во нејзините евроатлантски аспирации. Тирана е многу заинтересирана за стабилност на Македонија и на регионот – рече Бушати.

Димитров, од друга страна, истакна дека со својот албански колега се согласиле да направат повеќе од само политички изјави и да се интензивира соработката преку конкретни проекти. Тој истакна дека новата владата работи забрзано на усвојувањето на законот за употреба за јазиците, бидејќи тоа е во интерес не само на Албанците во Македонија туку и на стабилноста на целата држава.

– Оваа влада има заложба да стори сѐ што е во корист на нашите сограѓани Албанци, но и на оние што се припадници на другите етнички заедници во согласност со Уставот на Македонија. Овој процес не само што не се забавува, туку работиме да го забрзаме. Имплементацијата на Рамковниот договор и овој закон се во интерес на Македонија бидејќи нашата визија за Македонија е колку повеќе сите ја чувствуваат државата како своја толку сме постабилни. Затоа на овие прашање гледаме како на прашања што не се во интерес само на нашите сограѓани Албанци, туку како на прашања што се во интерес на целата држава – изјави Димитров.

Шефот на македонска дипломатија во текот на посетата на Тирана ќе има средби и со албанскиот премиер, Еди Рама, и со претседателот на Република Албанија, Илир Мета.


Димитров утре во Тирана на средби со Бушати, Рама и со Мета


Тирана, 24 јули, 2017 - 14:44 (META) 

Шефот на македонската дипломатија, Никола Димитров, утре во Тирана ќе има официјална средба со албанскиот министер за надворешни работи Дитмир Бушати, по што соговорниците ќе имаат и заедничка прес-конференција, соопшти македонското Министерство за надворешни работи.

За време на посетата, која е на покана на Бушати, Димитров ќе се сретне и со албанскиот премиер, Еди Рама, како и со претседателот на Република Албанија, Илир Мета.