!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Бушати: Имаше договор со Груевски кој беше одбиен од причини неповрзани со Албанија


Тирана, 20 април, 2017 - 10:12 (META) 

Албанскиот министер за надворешни работи, Дитмир Бушати, кој престојува во Вашингтон, негира дека постои „тиранска платформа“ и дека Албанија се меша во внатрешните работи на Македонија.

Бушати, кој беше гостин на тинк-тенкот „Германски Маршалов фонд“, одби да одговори на прашањето од американските експерти што значи изјавата на албанскиот премиер Еди Рама за единство на Косово и Албанија, пренесе „Македонската радио-телевизија“.

– Не е прецизно да се каже дека има тиранска платформа. Нема тиранска платформа. Има платформа на албански политички партии за која се дискутираше со Груевски и со Заев. Имаше договор со Груевски, но потоа беше одбиен од причини што немаат врска со Албанија, Тирана или премиерот Рама. Никогаш не сме се мешале во домашните работи во Македонија и многу сме внимателни при советувањето на пријателски начин – вели Бушати.

Бушати избегна да одговори на барањето од претседателката на американскиот „Германски Маршалов фонд“, Карен Донфилд, да ја објасни изјавата на албанскиот премиер Еди Рама за потребата за единство на Косово и на Албанија ако не влезат во Европската Унија.

– Мислам дека ја објаснував позицијата на Албанија, на позицијата на албанскиот премиер за стратешкото партнерство што го имаме со Косово. Не можам да додадам ништо друго на тоа – рече Бушати.

Според Бушати, Албанија била најдемократската држава на Западниот Балкан и бедем против руското влијание, а дека во Србија, Црна Гора, Македонија, Босна и Херцеговина и во Хрватска имало назадување на демократијата.


Бушати се сретна со Габриел и со Кундерс во Тирана


Тирана, 17 април, 2017 - 16:09 (META) 

Министерот за надворешни работи на Албанија, Дитмир Бушати, денеска се сретнал со министерот за надворешни работи на Германија, Зигмар Габриел, како и со министерот за надворешни работи на Холандија, Берт Кундерс, јавува дописничката на „Мета“ од Тирана.

На заедничка прес-конференција Кундерс ја истакнал важноста од спроведување на реформи во судството.

„Сметам дека е важно да се има дијалог, слобода, слободни и фер избори, како и реформи во правосудството“, истакнал Кундерс.

Германскиот министер за надворешни работи, Габриел, пак, бил подиректен во својата порака кон Тирана. Тој посочил дека судските реформи биле блокирани, а Германија не можела да го разбере бојкотот на опозицијата.

Бушати, пак, истакнал дека „тие што го бојкотираат парламентот, ги попречуваат реформите во државата“ и ја повикал опозицијата да го прекине бојкотот.


ВМРО-ДПМНЕ: Заев за лична амнестија е решен да го промени името на државата по грчки терк


Скопје, 17 април, 2017 - 10:05 (META) 

„Криминалецот Заев за својата лична амнестија за криминалите што ги сторил е решен Македонија да ја направи двојазична, да ги прогласи за геноцидни сопствениот народ и држава, да го промени името на државата по грчки терк и во крајна фаза да ја федерализира Македонија“, се вели во редовното утринско соопштение на ВМРО-ДПМНЕ.

Во него се додава дека „криминалецот Заев сето ова го прави мошне отворено и без срам ги лаже сопствените граѓани и гласачи“.

„Мухамед Зекири од СДС лично потврди дека СДС прифатил сè од тиранската платформа. И Зијадин Села го демантира Заев, јавно кажувајќи дека без реализирање на тиранската платформа не влегува во влада. Зијадин Села е човекот од кого ќе зависи идното владино мнозинство на Заев, а кој јавно кажува дека македонската нација пред 100 години не постоела, дека не ги признава македонското знаме и химна и дека сака да ги смени и нив и Уставот. Криминалецот Заев молчи на ваквите изјави на својот иден владин партнер, како што молчеше и тој и СДС на антидржавните изјави на Еди Рама и на Дитмир Бушати“, се додава во соопштенето.


МНР го повика албанскиот амбасадор: Изјавите на Рама и на Бушати се сериозна провокација


Скопје, 4 април, 2017 - 10:18 (META) 

Амбасадорот на Албанија во Македонија, Фатос Река вчера бил повикан на разговор во Министерството за надворешни работи на земјава, по повод зачестените навредливи изјави и коментари на официјални лица на Република Албанија, насочени кон Република Македонија, соопшти денеска МНР.

„На средбата беше потенцирано дека изјавите на претседателот на владата (Еди Рама н.з.) и Министерот за надворешни работи на Република Албанија (Дитмир Бушати н.з.) за двонационалност и менување на уставното уредување на Република Македонија се отворено мешање во внатрешните работи на Република Македонија. Eтикетирањето на Македонците како „Славомакедонци“ е навредливо и дискриминаторски кон Македонците и сите граѓани на Република Македонија“, стои во соопштението на МНР.

На разговорот со албанскиот амбасадор било истакнато дека „ваквите пораки се сериозна провокација за добрососедството кое сакаме да го негуваме“ и дека прават „долгорочна штета на односите во регионот и потткнуваат екстремистичка реторика“.

„Она што ни треба во регионот, е обединување околу интеграцијата во Европската Унија, мир и економски напредок. Затоа, апелиравме да се прекине со провокациите, да се почитува сувереноста и да се работи на планот на добрососедството, за доброто на сите во регионот“, порачуваат од МНР.


Ѓорчев: Изјавите на Бушати и на Рама задираат во нашиот суверенитет


Скопје, 3 април, 2017 - 14:56 (META) 

„Јавноста во Македонија секој ден е сведок на негаторски изјави кои задираат во внатрешните прашања и во суверенитетот на земјава. Албанскиот министер за надворешни работи, Дитмир Бушати, препорачува тиранската платформа да била инкорпорирана, вклучена и составен дел од Уставот на Република Македонија, а албанскиот премиер Еди Рама, без попис лицитира со бројки од 35 отсто албанско население во Македонија“, реагираа денеска од ВМРО-ДПМНЕ на интервјуто на шефот на албанската дипломатија Дитмир Бушати за „Еуроактив“.

Членот на извршниот комитет на ВМРО-ДПМНЕ, Владимир Ѓорчев, денеска на прес-конференција изјави дека тоа што ѝ треба на Македонија не се туѓи платформи и туѓи мешетарења, туку обединување околу државните и националните интереси на тоа што се нарекува заедничка единствена Македонија.

Тој го обвини СДСМ дека молчи на ваквите изјави и дека со тоа директно ги одобрува антидржавните и антинационални политички „што ѝ се наметнуваат на Македонија“.


Бушати: Влегувањето на албанската платформа во Уставот ќе има позитивни ефекти


Брисел, 3 април, 2017 - 12:12 (META) 

Во Македонија постои длабока криза на демократијата, а Никола Груевски и неговата политичка партија се обидуваат да ја трансформираат демократската криза во меѓуетничка, изјави шефот на албанската дипломатија, Дитмир Бушати, во интервју за „Еуроактив“.

– Не постои тиранска платформа, постои документ напишан од три од четирите албански партии кои се застапени во сегашниот парламент и кои ние ги поддржавме затоа што во документот прво гледаме јасен обид на Албанците да ја здржат Македонија обединета, потоа да побараат подобра меѓуетничка хармонија во духот на Охридскиот договор, трето – да се имплементира Договорот од Пржино и четврто – да се деблокира патот на Македонија кон НАТО и ЕУ преку нормализирање на односите со Грција, Бугарија и, секако, со Албанија и со Косово – вели Бушати.

На тврдењето дека клучен елемент од тиранската платформа е албанскиот јазик да добие статус на официјален јазик во Македонија, што значи и менување на Уставот, Бушати вели дека тоа не значи и федерализација на државата.

„Не знам како тоа назначувањето на албанскиот за официјален јазик значи федерализација на државата. Но, ако се однесува на Охридскиот договор и на изворот на расправиите меѓу Македонците и Албанците во Македонија, јасно е дека имплементирањето на обврските од овој договор е на ниско ниво. Постојат тенденции од Груевски и од други да се сметаат Албанците за сезонски работници во нивната земја. Не постои сериозен напор да се осигури меѓуетничка хармонија во земјата. Во последните пет-шест години, општеството е сè повеќе поделено по етничка линија. Сметам дека вклучувањето на таканаречената албанска платформа во Уставот, во новата правна рамка на земјата, ќе даде многу попозитивни резултати за двете етнички групи во Македонија или за двете главни етнички групи, Македонците и Албанците – вели Бушати.


Бушати: Русија се обидува да ја блокира евроатлантската интеграција на Балканот


Шефот на албанската дипломатија, Дитмир Бушати, во интервју за „Атлантик канал“, изјави дека Балканскиот Регион се соочува со неколку безбедносни предизвици.

– Од клучно значење е САД да ја продлабочат својата посветеност на Балканот, регион кој се соочува со терористички закани и со обидот на Русија за го прошири својето влијание – рече Бучати.

Тој, говорејќи за обидите на Москва да го зголеми своето влијание, истакна дека Русија силно се обидува да ги блокира евроатлантските интеграции на Балканот, односно членството во ЕУ и во НАТО.


Бушати: Исплашени се тие што мислат дека со Македонија може да се владее без Албанците


Тирана, 2 март, 2017 - 15:31 (META) 

Дитмир Бушати, министерот за надворешни работи на Албанија, на својот твитер-профил објави коментар за новиот развој на ситуацијата во Македонија, избегнувајќи притоа да ја спомене вчера соопштената одлука на македонскиот претседател, Ѓорге Иванов, да не го додели мандатот правдајќи се со „платформата составена во Тирана“.

Шефот на албанската дипломатија порача дека само луѓе исплашени од вистинските вредности може да помислат дека со Македонија може да се владее без учество на Албанците.

„Ние постојано го поттикнувавме албанскиот фактор, без разлика каде е, вклучително и во Македонија, да игра конструктивна улога и активно да учествува во демократските процеси и своите проблеми да ги решава институционално. Тие што мислат дека со Македонија може да се владее без Албанците, се исплашени од социјалната еднаквост и од европските вредности и принципи“, порача преку „Твитер“ албанскиот министер за надворешни работи, Дитмир Бушати.


Бушати до Груевски: Албанците не се сезонски работници во своите домови


Тирана, 28 февруари, 2017 - 13:06 (META) 

„Албанците не се сезонски работници во своите домови. На нивните барања треба да се одговори навреме. Нема да престанеме да укажуваме на потребата од развој на Албанците, каде и да живеат, во однос на она што им припаѓа ним, за повеќе достоинство, еднаквост и за вклучување во планот за развој“, изјавил министерот за надворешни работи на Албанија, Дитмир Бушати, во говорот што вчера го одржал на Универзитетот во Скадар.

Оваа изјава, како што јавува дописничката на „Мета“ од Тирана, доаѓа по веста дека поранешниот македонски премиер и лидер на ВМРО-ДПМНЕ, Никола Груевски, се спротивставува на идејата за коалициска влада помеѓу СДСМ и албанските партии, и дека тој се понудил за поддршка на својот политички противник, Зоран Заев, само за да спречи реализација на барањата на Албанците.


Бушати: Албанците во Македонија го бараат тоа што Србите на Косово веќе го имаат


Скадар, 20 февруари, 2017 - 16:31 (META) 

Албанците во Македонија се клучен фактор за демократската стабилност и за иднината на евроатлантските интеграции на Македонија, а веќе една деценија бараат признавање на албанскиот јазик како официјален јазик, иако се неколкупати побројни од Србите на Косово, кои се 6 отсто, но нивниот јазик е официјален, рече шефот на албанската дипломатија, Дитмир Бушати.

Зборувајќи пред студентите на Универзитет „Луиѓи Гуракуќи“ во Скадар, Бушати нагласи и дека „долгата криза во Македонија, вознемирувачкиот развој на настаните во косовско-српските односи, како и стагнацијата во Босна и Херцеговина и интервенцијата на трет фактор во внатрешно-политичките промени во Црна Гора се некои индикатори што зборуваат за недоволното внимание од страна на ЕУ“.

Албанскиот министер за надворешни работи, нагласувајќи дека Албанија е определена за еднаквост и за почитување на човечкото достоинство, земајќи ги како урнек најдобрите регионални и европски парктики, ги спореди Косово и Македонија, велејќи дека Албанците во Македонија „имаат“ помалку од Србите во Косово.

– Во Косово српското малцинство сочинува само 6 отсто од населението, а српскиот јазик e официјален јазик и 10 отсто од пратеничките мандати се резервирани за националните малцинства, но би можеле да освојат и повеќе места во парламентот, во зависност на изборната динамика. Албанското население, пак, е државотворен фактор во Македонија и е неколкупати побројно од српското малцинство на Косово и, гледано од оваа перспектива, има голем контраст, оти веќе една деценија Албанците во Македонија бараат разбирање за признавање на албанскиот јазик за официјален – рече Бушати на предавањето пред студентите на Универзитетот „Луиѓи Гуракуќи“.