Кривична против ЕЛЕМ и директори во РЕК Битола за загадување на животната средина


Битола, 13 февруари, 2018 - 13:17 (META) 

Секторот за внатрешни работи Битола поднесе кривична пријава против Електрани на Македонија (ЕЛЕМ) и против поранешни и актеуелни директори и раководители во РЕК Битола поради загадување на животната средина и природата.

Како што соопштија денеска од МВР, кривични пријави се поднесени против И.К. (63) од Гостивар, поранешен директор на подружница РЕК Битола, Ј.К. (67) од Битола, директор на подружница РЕК Битола, О.З. (54) од Битола, директор во РЕК Битола, З.М. (44) од Битола, раководител во подружница РЕК Битола и против С.А. (63) од Битола, раководител во подружница РЕК Битола поради постоење основи на сомнение за сторено кривично дело „соизвршителство“ во врска со „загадување на животната средина и природата“.

Кривична пријава е поднесена и против АД Електрани на Македонија – Скопје поради постоење основи на сомнение за сторено кривично дело „загадување на животната средина и природата“.

„Имено, по претходна пријава до СВР Битола и до ОЈО Битола, во тесна координација и дадени насоки за постапување од Јавното обвинителство направени се низа проверки при што е констатирано дека пријавените физички лица, со непридржување кон прописите за заштита и унапредување на животната средина, пропуштиле да ги реконструираат постоечките или да постават нови филтри за прашина. Дозволиле преку работата на пријавеното правно лице да се пропуштаат штетни честички количински повеќе од 50 милиграми на метар кубен“, стои во соопштението на МВР.

Осомничените физички лица, се додава во соопштението, дозволиле да се врши отпепелување на одлагалиштето, каде што често се создавале воздушни вртлози од пепел и земја.

„На тој начин предизвикале пораст на статистичкиот показател на загаденост на воздухот во град Битола, што претставува опасност по здравјето на луѓето“, стои во соопштението.


Владата финансиски ќе го помогне семејството Зулбеари


Скопје, 26 јануари, 2018 - 15:24 (META) 

Поттикната од трагичниот настан во тетовската населба Поток, во кој семејството Зулбеари во пожар ги загуби мајката и четирите малолетни деца, што длабоко ја потресе целата македонска јавност, Владата денеска ја свика 51. седница и донесе заклучок за доделување на еднократна парична помош, информираат од таму.

„Покрај паричната помош во висина од 300 илјади денари за семејството Зулбеари, на седницата е договорено владина делегација да го посети семејството и непосредно да го изрази длабокото сочувство за оваа трагедија“, се вели во соопштението на Владата.

Владата на денешната седница донела и неколку кадровски решенија. За вршител на должноста, директор на Државниот комунален инспекторат беше именувана Елизабета Јованчева. За директор на Културниот центар во Истанбул, Владата го именуваше Рамадан Рамадани, досегашен вршител на должноста во истата институција.


Раководството и сопственикот на Фабрика за кабли Неготино добија кривични пријави


Неготино, 14 јануари, 2018 - 14:45 (META) 

Полициската станица Неготино поднела кривична пријава против Г.Х. (47),генерален директор на АД „ФКН“ (Фабрика за кабли Неготино), против Ј.Ј. (37) претседателот  на одборот на директори на АД „ФКН“, против двајца членови на одборот на директори на АД „ФКН“, сите од Република Бугарија, како и против Љ.К. (61) од Велес, исто така член на одборот на директори.

Тие се товарат за злуопотреба на службената положба и овластување, но и за намерно предизвикување стечај, како и за оштетување или повластување на доверители и за фалсификување службена исправа. Како што наведува неготинската полиција, малверзациите биле со цел да се префрли имотот и сопственоста на АД ФКН врз друга фирма од Бугарија.

Кривични пријави за помагање добиле уште двајца Бугари, односно Ј.С. (41), сопственик и управител на ФКН ДООЕЛ Неготино и С.С. сопственик и управител на “Мега Ел ООД“ Софија, која е мнозински акционер во АД „ФКН. Нив полицијата ги товари за помагање во извршување на кривично дело.

Според пријавата, раководителите на АД ФКН во 2007 ја задолжиле фабриката кај една банка и под хипотека го ставиле целиот движен и недвижен имот, при што во спогодба со банката е наведена помала вредност на тој имот. Потоа во повеќе наврати од 2007 до 2010 година со двајцата сопственици и управители на другите фирми вршеле зделки со долгот, без одобрение од Собрание на акционери на АД „ФКН“ Неготино.

Раководството на Фабриката за кабли се товари и дека на ФКН ДООЕЛ му ги отстапиле сите договори, лиценци и сертификати за производство, со намера да го префрлат целокупниот имот во сопственост на „ФКН“ ДООЕЛ.

На овој начин АД „ФКН“ Неготино станало трајно неспособно да ги извршува обврските кон другите доверители и со тоа извршиле оштетување на останатите доверители, акционери и на Република Македонија за износ од 847.217.663 денари, вели полицијата.


Рашковски до ВМРО-ДПМНЕ: Тој што ви ја пишувал кривичната пријава е правно неписмен


Скопје, 9 септември, 2017 - 18:35 (META) 

Генералниот секретар на Владата, Драги Рашковски, на својот фејсбук-профил одговори на потегот на опозициската ВМРО-ДПМНЕ која поднела кривична пријава против него поради злоупотреба на службената положба и овластување.

„Господа од ВМРО-ДПМНЕ, кој и да ви ја пишувал кривичната пријава е правно неписмен и треба да му се земе дипломата (ако ја има). Повелете краток час по кривично право од професорот“, напиша тој, наведувајќи повеќе образложенија.

Рашковски вели дека генералниот секретар не ги носи одлуките за назначување, туку Владата како колективен орган.

„Генералниот секретар дури и не учествува при гласањето. Џабе 11 години на власт кога не го знаете законот за влада“, напиша Рашковски.

Тој на ВМРО-ДПМНЕ им порача дека доколку е донесено незаконско решение, треба да се оспори решението, а не да се тужи неговиот носител. Рашковски ги праша луѓето од ВМРО-ДПМНЕ, доколку станувало збор за незаконски смени на директори, зошто не повеле постапки против решенијата.

„Доколку вашите директори беа незаконски сменети, зошто не поведоа постапка против решението за разрешување? Послатка им беше апанажата која брзаа да ја земат. Сите ваши директори поднесоа барање за апанажа“, пишува, меѓу другото, Рашковски.


ВМРО-ДПМНЕ поднесе кривична пријава за генералниот секретар на Владата, Рашковски


Скопје, 9 септември, 2017 - 15:47 (META) 

Светлана Колариќ од ВМРО-ДПМНЕ денеска соопшти дека нејзината партија поднела кривична пријава до Основното јавно обвинителство за генералниот секретар на Владата, Драги Рашковски, за злоупотреба на службената положба. Го товарот за незаконско именување директори.

– Рашковски ја употребил својата положба и овозможил именување на директори од страна на Владата без тие да ја имаат исполнето со закон потребната квалификација. Единствена квалификација која тие ја имаат е тоа што се активисти на СДС. Рашковски од периодот на негово назначување за генерален секретар до датумот на распишување на изборите, повеќепати организирал именување на повеќе в.д. директори од страна на владата, на лица кои не ги исполнуваат законските основи за да бидат именувани, но и именувал луѓе кои не биле писмено предложени од надлежни органи, како, на пример, управен одбор, за позициите за кои тоа било потребно – рече Колариќ.

Таа рече дека СДСМ и Рашковски ги употребиле сите можности за поставување партиски кадри.

– Рашковски од позиција на генерален секретар до Владата доставувал решенија без комплетна документација за именување в.д. директори на институции, а именуваните кои требало да имаат писмен предлог за именување од одредена институција, го немале или истиот бил доставен до архивата на Владата и заверен по именувањето.  Ова е грубо и свесно кршење на законот, со цел целосна партизација на институциите и нивно ставање под јаремот на партијата на власт. За ова одговорност мора да има и ќе има – рече Колариќ.


Тројца нови директори во здравството, разрешени голем број економски менаџери


Скопје, 10 август, 2017 - 15:45 (META) 

Министерството за здравство информираше дека се именувани тројца нови директори на здравствени установи. Нов директор на Геронтолошкиот завод е Салија Љатиф, на Институтот за белодробни заболувања кај децата Козле е Ангелчо Андоновски, а Филип Гучев е новиот прв човек на Универзитетската клиника за ревматологија. На првата функција во Психијатриската болница Бардовци и понатаму ќе биде досегашниот директор, Ќамиљ Ковачи.

Исто така, разрешени се економските директори во Клиничката болница Тетово, во Клиничката болница Штип и на универзитетските клиники за радиотерапија и онкологија, за кардиологија, за кардиохирургија, за клиничка биохемија, за неврохирургија, за дигестивна хирургија, за пластична хирургија, за торакална и васкуларна хирургија, за гастроентерохепатологија и на Универзитетска клиника ТОАРИЛУЦ.

Опозициската ВМРО-ДПМНЕ на прес-конференција обвини дека СДСМ и министерот Таравари преку именувањето директори на клиники прават фамилијарни бизнис-шеми.


ВМРО-ДПМНЕ: Преку именувањето директори на клиники се прават фамилијарни бизнис-шеми


Скопје, 10 август, 2017 - 14:17 (META) 

СДСМ и Таравари создадоа уште еден потенцијален ризик за корупција и за создавање нелојална конкуренција на пазарот помеѓу веледрогериите со именувањето на Софија Пејкова за директор на Клиниката за пластична и реконструктивна хирургија, рече Марија Андоновска од ВМРО-ДПМНЕ денеска на прес-конференција, пред Клиниката за пластична и реконструктивна хирургија.

– По назначувањето на митаџиите од типот на Нетковски, Барбов и Докиќ за директори на скопските клиники, СДС се оддолжува и кон белата мафија, именувајќи ги Елена и Христијан Костови и Ирина Пановска за директори на едни од најголемите здрвствени установи во државата. Кога граѓаните помислија дека виделе сè од СДС, СДС е тука да ги демантира. СДС и Таравари ја именуваа Софија Пејкова, снаа за син на сопственикот на веледрогеријата „Адриа мед“, Коле Пејков, за директор на Клиниката за пластична и реконструктивна хирургија. Таравари со своите именувања директори на лица осудени криминалци, фатени митаџии и членови на најтесното семејство на сопственици на веледрогерии, ѝ порачува на јавноста дека не сака професионализација на здравството, туку преклопување на здравството со кадри блиски до власта, сврзани во фамилијарни бизнис-шеми со врвот на СДС – рече Андоновска.

Таа вели дека поставување лица за директори во здравствени установи кои се во роднински врски со сопственици на веледрогерии носи потенцијален ризик за корупција и создавање нелојална конкуренција на пазарот помеѓу веледрогериите.


Владата денеска ќе расправа за јавниот долг и ќе менува раководители


Скопје, 9 август, 2017 - 11:34 (META) 

Владата на Република Македонија на својата 22. седница денеска ќе расправа за повеќе точки, меѓу кои и смена на раководители на институции.

Членовите на владата ќе ја разгледаат информацијата на Центарот за управување со кризи за активностите поврзани со кризната состојба на дел од територијата на земјава, за периодот откако е донесена мерката до денеска, како и информацијата на Министерството за здравство во однос на препораките од Комисијата за превенирање на последиците од топлотни бранови.

На дневен ред се и извештаите за работата на Судскиот буџетски совет и за реализација на судскиот буџет за 2016 година, како и годишниот извештај за управување со јавниот долг на Република Македонија за 2016 година. Ќе се разгледува и информацијата од Министерството за економија во врска со формирање работни групи за подготовка на нацрт-текст за нов закон за енергетика.


Василевски и Зиков ќе го водат МЕПСО, Миновски нов директор на ЕЛЕМ


Скопје, 6 август, 2017 - 13:14 (META) 

Сашо Василесвки е назначен за директор на МЕПСО, Љупчо Зиков за директор на финансии и комерција на таа комопанија, а Драган Миновски е новиот директор на АД ЕЛЕМ, одлучи вчера Владата.

Сашо Василевски е дипломиран правник кој од 2006 до 2008 беше заменик-министер за правда, од 2008 до 2010 година бил член во Комисијата за полагање правосуден испит, а од 2011 до 2015 година бил член на Советот на јавните обвинители.

Љупчо Зиков е новинар и директор на неделникот „Капитал“ и беше и претседател на партијата Алијанса за подобра Македонија, основана заедно со Минчо Јорданов и Владо Бучковски.

Професорот на Електротехничкиот факултет при Универзитетот „Гоце Делчев“, Драган Миновски, на предлог на Владата е новиот директор на ЕЛЕМ кој доаѓа на местото на Христијан Мицковски, новиот генерален секретар на ВМРО-ДПМНЕ.

Мицковски на својот фејсбук-профил напиша дека е разрешен од местото претседател на управниот одбор и генерален директор на АД ЕЛЕМ.

„Горд сум на сето она што заеднички го правевме за АД ЕЛЕМ, за Македонија, направивме многу, а можевме уште повеќе. Аристотел рекол задоволство во работата дава совршеност во делото. Делото сега ќе продолжи на друг терен помеѓу студентите на факултет и граѓаните за Македонија“, напиша Мицковски.

Владата одлучила и Зоран Ѓорѓиев да биде нов генерален директор на ЈП „Македонски шуми“. Тој е е претседател на општинската организација на СДСМ од Кавадарци а во „Македонски шуми“ работи од 1996 година.


Серија нови именувања на директори на клиники и на здравствени домови


Скопје, 4 август, 2017 - 13:55 (META) 

Министерството за здравство денеска ги соопшти имињата на новоназначените директори на клиники и на здравствени домови. Промените на директорските места почнаа кон крајот на јуни, речиси еден месец по стапувањето на должност на новиот министер за здравство, Арбен Таравари од Алијанса за Албанците, еден од трите клучни партнери во владината коалиција.

Нов директор на Институтот за трансфузиона медицина е Кочо Димитровски, а на чело на Клиничка болница Битола ќе застане Зоран Лазаров. Нови директори на општите болници во Кавадарци и во Велес се Диме Коцев и Димитар Стровјански.  Прв човек на Општа болница Гостивар стана Гојарт Сулејмани.

Во клиничкиот центар „Мајка Тереза“ во Скопје се именувани девет нови директори на клиники. На Дигестивна хирургија прв човек ќе биде Зоран Караџов, а во фотелјата на Детска клиника долгогодишната директорка Аспазија Софијанова ќе биде наследена од Катерина Ставриќ. Прв човек на Клиниката за психијатрија ќе биде Стојан Бајрактаров, на таа за неврохирургија – Владимир Рендевски, а на Максилофацијална хирургија – Славе Наумовски. На чело на Клиниката за пулмологија и алергологија застанува Дејан Докиќ, кој беше обвинет за примање мито, а на местото на Смиља Туџарова, долгогодишната директорка на Клиниката за пластична и реконструктивна хирургија доаѓа Софија Пејкова. Прв човек на Клиниката за торакална и васкуларна хирургија ќе биде Неџати Јакупи, хирург и поранешен министер за животна средина. На челото на Клиниката за  уво, нос и грло доаѓа Јане Нетковски

Маја Манолева е новата директорка на Заводот за физикална медицина и за рехабилитација – Скопје.

Од денеска директор на  Здравствен дом Битола е Весна Спировска, на Здравствен дом Штип  Снежана Трајковска, на Здравствен дом Крива Паланка директор ќе биде Бранко Стаменковски, во Кратово – Љупчо Бојаџиев, во Виница – Венцо Вијунов, во Пробиштип – Гоце Неделковски, а во Струмица – Љубица Митева.

За прв човек на Заводот за слух, говор и глас во Битола е назначена Дивна Најдовска.

Министерот за здравство, исто така, го разрешил економскиот директор на Клиниката за гастроентерохепатологија.