Автоматско признавање на дипломите во Западен Балкан е се поблиску


Брисел, 26 јуни, 2018 - 17:19 (META) 

Министрите за образование од земјите на Западен Балкан, меѓу кои и од Македонија, ги поддржаа клучните принципи за автоматско признавање на академските квалификации во регионот, соопшти Регионалниот совет за соработка (РСС).

Овој напредок е направен на 7. министерски состанок на Платформата за образование и обука, за истражување и иновации, што беше организиран денеска во Брисел под покровителство на Европската комисија.

Станува збор за принципи кои се надградени врз основа на она што претходно го сработија Работната група на РСС и Иницијативата за реформи во образованието на Југоисточна Европа – ERI SEE, за признавање на квалификациите на Западен Балкан, што беше потенцирано и од генералниот секретар на РСС Горан Свилановиќ.

Принципите што беа поддржани од министрите, меѓу кои и од министерот за образование на Република Македонија Арбер Адеми, сочинуваат модел на автоматско признавање на академските квалификации, вклучувајќи транспарентни и фер процедури согласно со Лисабонската конвенција за признавање.


Наставниците и професорите ќе може да се вработат на неопределено време


Скопје, 23 мај, 2018 - 9:37 (META) 

На вчерашната 69. седница на Владата формирана е работна група за изнаоѓање на можно решение за проблемот со линдан во ОХИС. Оваа работна група во рок од три месеци треба да ја информира Владата за можните решенија на овој долгогодишен проблем.

Владата ја прифати информацијата голем дел од наставниците и професорите во основното и средното образование да се вработат на неопределено работно време.

Министрите на предлог на Министерството за финансии ја прифатија фискалната стратегија на Македонија 2019-2021.

„Среднорочната фискална стратегија претставува клучен документ за утврдување на среднорочните фискални цели на Владата и нивно поврзување со стратешките приоритети на Владата, како и алатка за следење на динамиката на приходите и расходите во однос на фискалните цели“, информираат од Влада.

Mинистрите го прифатија и текстот на спогодбата помеѓу Министерството за образование и вработување на Република Малта и Министерството за образование и наука на Македонија за взаемно признавање на високообразовните степени, дипломи и сертификати.


Балканот ќе преговара за признавање на дипломите на лекарите, инженерите, архитектите…


Сараево, 7 мај, 2018 - 17:34 (META) 

Земјите од Западен Балкан наскоро треба да започнат преговори за заедничко признавање на стручните квалификации на докторите по медицина, стоматолозите, архитектите и инженерите, соопшти денеска Регионалниот совет за соработка (РСС).

Претставници на шест земји од регионот на денешниот состанок во Сараево во седиштето на РСС ја потврдија препораката, која всушност беше барање во Агендата за мобилност во рамките на повеќегодишниот акциски план за изградба на Регионален економски простор, што беше усвоен во Трст минатата година од премиерите на шесте земји од Балканот.

Крајната цел на препорачаните преговори е да се склучи спогодба за меѓусебно признавање на стручните квалификации, а со тоа би се постигнало поедноставување на добивањето дозволи за занимавање со одредена професија во земјите во регионот, изјави претставникот на РСС, Вања Урошевиќ.

Владите на шесте земји сега треба да оформат преговарачки тимови како и главен преговарач и негов заменик, со цел целиот процес да заврши до крајот на 2019 година. Покрај ова, работната група им препорача на владите да направат и заедничка база на податоци за мобилноста на стручните лица која би била компатибилна со базата на податоци на ниво на Европската Унија.


Здружението на турски студенти апелира да се верува само на официјални институции


Скопје, 26 јануари, 2017 - 10:34 (META) 

Здружението на дипломирани студенти од турските универзитети во Македонија реагираше на недоразбирањата поврзани со објавените вести во дел од медиумите во врска со раскинувањето на договорот за заемно признавање на дипломите со Турција.

Од Здружението велат дека се преземени сите неопходни чекори и ги повикуваат сите засегнати лица да ги земаат предвид само информациите дадени од официјални институции.

„Забележавме дека вестите поврзани со укинувањето на билатералната спогодба за меѓусебно признавање на свидетелства, дипломи, квалификации, научни степени и звања стекнати во Република Македонија и во Република Турција, од страна на Република Турција, создаде грижа во образовните кругови и меѓу студентите и родителите. Од моментот кога овие вести беа објавени, Здружението на дипломирани студенти од турските универзитети ги презеде неопходните чекори и ги контактираше институциите и во нашата држава и во Република Турција. Имајќи ги предвид дезинформациите што се присутни во јавноста, сакаме да ја истакнеме важноста да останеме смирени и ве повикуваме да не ги земате предвид објаснувањата, освен оние дадени од страна на официјални институции“, велат Исмаил Алији и Џеладин Џули, копретседатели на Здружението на дипломирани студенти од турските универзитети.


Студентите Турци на Универзитетот во Штип загрижени од одлуката на Анкара за дипломите


Штип, 21 јануари, 2017 - 16:06 (META) 

Неизвеснот и загриженост кај турските студенти на Универизитетот „Гоце Делчев“ во Штип предзвика одлуката на властите во Анкара да го укинат договорот со Македонија за меѓусебно признавање на дипломите на сите образовни нивоа. Одлуката е донесена во декември минатата година, а на сила стапува на 11 февруари годинава.

На Универзитетот во Штип има 25 дипломирани турски државјани, а во моментов таму студираат 107 студенти од Турција. Само оваа студиска година на факултетите на Универзитетот „Гоце Делчев“ се запишани 30 нови студенти од Турција.

Од Универзитетот засега не сакаат да ја коментираат одлуката на турската влада. Портпаролот Кирил Барбареев кратко изјави дека ќе остават овој актуелен проблем да се решава на повисоко ниво, односно меѓу владите на двете земји.

Во крајно неповолна ситуација особено се турските студенти кои се на крај од своите студии, а кои во Штип имаат поминато дополнително една година само на изучување на македонскиот јазик. Турците на штипскиот универзитет во најголем број доаѓаат да студираат медицински науки, но и на техничките факултети.

Годишно за студии, еден студент од Турција плаќа по 1.000 евра за партиципација, односно 1.500 евра за студиите по медицина.

 


Турција го укина договорот за признавање на македонските дипломи


Анкара, 21 јануари, 2017 - 11:56 (META) 

Турција го поништила договорот со Македонија за меѓусебно признавање на македонските дипломи на сите образовни нивоа, јавува „Алсат М“. Одлуката веќе била објавена во службен весник во Турција, а се однесува на договорот потпишан меѓу двете земји на 6 јули 1998 година, со кој Турција и Македонија воспоставија признавање на дипломите на сите нивоа на средно и на високо образование.

Одлуката, која била донесена на состанокот на Советот на министри на Турција на 12 декември минатата година, била потпишана од претседателот на земјата, Реџеп Таип Ердоган, и стапува на сила на 11 февруари 2017 година.

„Договорот потпишан на 6 јули 1998 година во Скопје, меѓу Република Турција и Република Македонија со број 98/11600, кој стапи на сила на 12 јули 1998 година во врска со признавање на дипломите за средно образование, високо образование, магистратури и докторати, од денот 11 февруари 2017 година, се укинува. Врз основа на предметот со протоколарен број 11494949, од 22 ноември 2016 година на Министерството за надворешни работи и според Законот 244, член 3, со датум 31 мај 1963 година, оваа одлука е донесена на состанокот на Советот на министрите на 12 декември 2016 година“, било наведено во документот, објави „Алсат М“.

Од властите во Скопје засега нема официјална реакција во врска со одлуката на Анкара.

Министерот за образование и наука на Македонија, Пиштар Љутвиу, за телевизијата кратко изјавил оти не верува дека има причина за раскинување на договорот.

Порталот СДК пишува дека одлуката на властите во Анкара предизвикала вознемиреност кај македонските студенти во Турција, но и кај турските во земјава.


СДСМ: Дали некои високообразовни институции се претворени во вистинска работилница за дипломи?


Скопје, 12 декември, 2014 - 14:39 (META) 

Имаме сознанија за нерегуларности, клиентелизам, непотизам и за конфликт на интереси при вработувања театарски работници во театрите низ Македонија, истакна Роберт Алаѓозовски, претседател на комисијата за култура на СДСМ.

– Бараме одговор: Дали некои високообразовни институции се претворени во вистинска работилница за дипломи? Според нашите информации, студенти на овие факултети, од завршните години, набрзина дипломираат, испити се одржуваат во неиспитна сезона и уверенија се штанцаат надвор од законските рамки и процедури? Дали ова се прави за нивно експресно вработување во театрите? Дали по овој принцип е во постапка вработување на дваесетина актери, режисери и драматурзи во театрите во Скопје и во земјава? Дали е точно дека при вработувањата не се зема предвид рејтингот на образовните институции или класата на којашто студентите дипломирале, не се зема предвид успехот на кандидатите, ниту нивното портфолио, туку единствен критериум е близината до власта? – истакна Алаѓозовски.

Тој истакна дека СДСМ има сознанија дека при аудициите за вработување, некои факултети се фаворизираат надвор од објективно кредитираниот рејтинг на сметка на други. Дел од професорите ангажирани на одредени катедри, рече Алаѓозовски, имаат конфликт на интереси зашто тие ќе треба да ги примаат на работа студентите што претходно ги дипломирале.

– Поради сето ова, овие огласи се обжалени, но правдата не е истерана до крај, губејќи се во лавиринтите на зависното судство. Го повикуваме државниот просветен инспекторат да го испита скандалот со штанцањето дипломи. Го повикуваме трудовиот инспекторат да ги провери досегашните огласи и вработувањата со непотизам и по непринципиелни основи – рече Алаѓозовски.


Груевски: Екстерно тестирање нема да има, се разгледува воведување државен испит


Скопје, 23 ноември, 2014 - 11:23 (META) 

Екстерно тестирање во високото образование не се планира и нема да има, туку она што се разгледува е воведување државен испит, рече премиерот Никола Груевски во вчерашното интервју за дневникот на телевизија „Сител“.

Како што појасни премиерот , државниот испит има цел да го унапреди квалитетот на високото образование и да се стави крај на давањето дипломи без студентот да покаже елементарно знаење.

– Ние сме цврсто решени да најдеме мерка со која што ќе се стави крај на давањето дипломи без елементарно знаење затоа што тоа е на штета на сите оние што учат и со знаење и со учење доаѓаат до диплома. Знаењето движи напред, а не дипломата – изјави е премиерот Груевски во дневникот на „Сител“.

Тој додава дека државниот испит, за да им се олесни на студентите, ќе биде поделен во два дела од кои првиот ќе се полага кога студентот ќе ги положи испитите од втора година и ќе содржи по неколку прашања од сите испити што ги положил. Премиерот појаснува дека резултатот од државниот испит нема да влијае на оценките што ги добил студентот во текот на студиите и ако на државниот добие поени за вкупна оценка шест, значи дека го положил.

– Нема да му се менува ниту оценка, нема да има ниту реперкусија за студентот ниту за професорот. Државата сака да се осигура дека студентите што завршуваат факултети навистина имаат барем минимално знаење за шестка. Дали добиле десетка, деветка, тоа нека го мери пазарот на труд. Ова не го правиме случајно, туку затоа што во изминатите десет, петнаесет, па и дваесет години се соочуваме со проблеми, затоа што на некои факултети и на некои универзитети се даваат оценки без знаење. Зошто и како, на јавноста ѝ е познато, тоа веќе не е тајна и ние не можеме да останеме рамнодушни на тоа – вели Груевски.

Првиот државен испит, ќе се спроведе во 2017 година, а ќе ги опфати студентите што ќе се запишат на студии следната учебна година, односно во септември догодина. Ќе се полага квартално, а оние студенти кои нема да положат првиот пат, ќе полагаат неограничено, сè додека не положат.

– Самиот испит ќе го спроведува Одборот за акредитација, а не државата, ниту МОН. Тој е составен главно од универзитетски професори и ќе биде спроведуван во државни испитни центри, односно специјални простории опремени со компјутери и сè што е потребно за испитот да се полага. Писмените резултати ќе ги имаат веднаш штом го одговорат последното прашање – додава Груевски.

За студентите, кои минаната недела излегоа на протести против планираните мерки во високото образование, премиерот рече дека не знае зошто протестираат бидејќи нив не може да ги опфати државниот испит.

Изнесувањето на студентите на улица, Груевски вели дека е политика на опозициските партии, а за протестите минатата недела вели дека, според нивни информации, СДСМ бил силно фокусиран да излезат студентите на протести и ги поттикнувал професорите на некои факултети.