Грција ќе протера двајца руски дипломати поради обиди да се поткопа Договорот за името


Атина, 11 јули, 2018 - 10:32 (META) 

Грчката влада донела одлука да протера двајца руски дипломати и да забрани влез на двајца други, обвинувајќи ги за обиди да се вмешаат во внатрешните работи на Грција, како и да го поткопаат Договорот за името со Македонија, известува грчкиот весник „Катимерини“.

Дипломатите се товарат за обиди да се извлечат и да се протуркаат информации, како и да се поткупат грчки официјални лица. Според високи извори во грчката дипломатија, Атина бара Грција итно да ја напуштат Виктор Јаковлев и уште еден човек од амбасадата.

Наводно имало бројни координирани напори да се засили руското влијание во Грција, меѓудругото и преку активностите на Империјалното православно палестинско друштво. Имало и јасна намера на Русија да се вмеша во сензитивното прашање за Договорот меѓу Грција и Македонија и да се влијае негативно врз грчката позиција на Балканот.

Од руското Министерство за надворешни работи денеска соопштија дека соодветно ќе одговорат на протерувањето на руските дипломати.

Според весникот, преку поткуп тие се обидувале да влијаат врз некои општини, некои митрополити од Грчката православна црква, како и да стекнат поголемо влијание на Света гора.


Иванов приреди ифтарска вечера за дипломати, бизнисмени и претставници од јавниот живот


Скопје, 6 јуни, 2018 - 11:47 (META) 

Претседателот, Ѓорге Иванов синоќа приреди ифтарска вечера по повод светиот муслимански месец Рамазан, соопштија од кабинетот на претседателот.

– Ова се денови кога треба да се укаже чест и внимание, кога треба да се негуваат обичаите на нашата специфична македонска култура на традиција и соживот – рече претседателот Иванов во своето обраќање.

Тој додаде дека постот не е само откажување од храна, туку дека е и момент на почит на својата религија, на своето семејство, на своите ближни, воедно посакувајќи им на присутните многу радост, здравје, среќа и бериќет.

На ифтарската вечера присуствуваа претставници на јавниот живот, дипломати, бизнисмени, како и претставници на граѓански асоцијации и здруженија од Македонија.


Робертсон, Солана, Ле Роа, Ишингер и Гелбард како „Група Охрид“ ќе помагаат за ЕУ и НАТО


Скопје, 24 април, 2018 - 17:02 (META) 

Премиерот Зоран Заев денеска на заедничка прес-конференција со поранешниот генерален секретар на НАТО, лордот Џорџ Робертсон, ја промовираше „Групата Охрид“ за поддршка на Македонија на нејзиниот пат кон членство во НАТО и ЕУ

– Во оваа група има членови кои ставија печат со нивната дипломатска кариера и дадоа поддршка за нашите напори за изградба на демократска, стабилна и просперитетна држава. Тие се тука да го поддржат нашето членство во ЕУ и НАТО – рече Заев.

Во групата, освен Џорџ Робертсон, се вклучени и поранешниот висок претставник на ЕУ за надворешна политика и безбедност, Хавиер Солана, поранешниот шведски премиер и министер за надворешни работи Карл Билд и истакнатите дипломати како Кристофер Гајд, Роберт Гелбард, Ален Ле Роа, Волфганг Ишингер, Дајмонд Вилсон и Зоран Чичак.

Робертсон посочувајќи дека поминале 17 години, откако последен пат се обратил на прес-конференција во Македонија, истакна дека името „Група Охрид“ е избрано, бидејќи тој град има големо значење за земјата, со оглед на тоа дека таму е потпишан Охридскиот договор, но исто така тоа е и град заштитен од УНЕСКО.

Тој потсети дека 11 пати заедно со Солана ја посетиле земјава и биле сведоци на потпишувањето на Охридскиот договор.

– Земјата, која беше на работ на граѓанска војна, стана земја која тропна на европските врати и ја разбра потребата за подобра иднина – рече Робертсон и додаде дека оваа група нема да се меша во внатрешната работа на земјата, ќе ги советува Владата и министрите, но ќе биде достапна и за опозицијата и претседателот на државата.

Робертсон, исто така кажа дека решението за спорот за името со Грција ќе го остави на двете држави и дека нема да се меша во одлуката.


Стејт департментот ѝ предложи на Москва да ги замени протераните дипломати


Вашингтон, 4 април, 2018 - 10:36 (META) 

Стејт департментот на САД ѝ предложи на Москва да испрати нови дипломати за да ги замени 60-те кои беа протерани.

„Руската влада, како и претходно, има право да побара акредитација за пополнување на слободните места во дипломатската мисија“, изјави претставник на Стејт департментот на САД, истакнувајќи дека секое барање ќе биде разгледано одделно.

Тој смета дека Русија, исто така, ќе ги прифати новите американски дипломати на местото на протераните.


Имињата на новите амбасадори ќе се знаат откако ќе добијат агреман од земјите домаќини


Скопје, 9 ноември, 2017 - 11:14 (META) 

Имињата на македонските амбасадори кои ќе треба да ги пополнат испразнетите дипломатски претставништва ќе бидат соопштени дури откако ќе бидат одобрени од земјите во кои треба да бидат испратени, изјави министерот за надворешни работи Никола Димитров.

– Во процесот на одредување амбасадори се вклучени и трети земји согласно практиката и почитта кон земјите од кои што се бара согласност. Тогаш, кога тој процес ќе биде целосно завршен, ќе бидат соопштени имињата, за да не им направиме непријатност на земјите од кои бараме согласност – рече Димитров.

Тој истакна дека има одреден застој поради локалните избори, дел поради правни прчки, дел поради фокусот кон кампањата, но вели дека МНР прави сè за да се пополни дипломатската мрежа.

– Надворешната политика не се води само во главниот град или само на ниво на министер и дипломати во МНР. Апсолутно е приоритет и правиме сè за да ја пополниме мрежата што побрзо но и да го подобриме процентот на кариерни дипломати – рече Димитров.


Поради насилствата на 27 април, суспендирани четворица вработени во МНР


Скопје, 20 октомври, 2017 - 21:17 (META) 

Министерството за надворешни работи (МНР) соопшти дека суспендирало четворица вработени кои биле во Собранието на Република Македонија при упадот и бруталните насилства на 27 април годинава.

Како што се вели во соопштението, за ова Министерството за внатрешни работи (МВР) доставипо известување до Основното јавно обвинителство – Скопје.

„Министерството цени дека со нивните дејствија односно нивното неовластено влегување и присуство во Собранието на Република Македонија за време на настанот, постапувале спротивно на Етичкиот кодекс за вработените во Министерството за надворешни работи и го нарушиле угледот на професијата дипломат и воедно угледот на Министерството и државата. Таквото однесување, согласно позитивната регулатива, претставува дисциплински престап согласно Законот за административни службеници и Законот за надворешни работи, како и на Етичкиот кодекс за вработените во Министерството за надворешни работи и други лица што вршат работи во и за министерството за надворешни работи“, се вели во соопштението од МНР.

Постапката е почната на 7 јуни годинава, кога МНР од МВР побарало информации за можна инволвираност на вработени  во МНР во дивеењата во Собранието.


САД протеруваат 15 кубански дипломати


Вашингтон, 3 октомври, 2017 - 19:49 (META) 

Администрацијата на претседателот Доналд Трамп нареди протерување на 15 дипломати од кубанската амбасада во Вашингтон, откако САД минатата недела повлекоа половина од своите дипломати од Хавана, соопшти американскиот Стејт департмент.

Одлуката на американските власи доаѓа откако кубанските власти не успеаја да го заштитат американскиот персонал на Куба, кој бил изложен на мистериозни „напади“ кои им го оштетиле нивното здравје, соопшти претставник на американската администрација, кој побара да остане анонимен.

Кубанските дипломати имаат рок од седум дена да ги напуштат САД.


Русија тврди дека САД упаѓа во нивните дипломатски претставништва


Сан Франциско, 2 октомври, 2017 - 20:54 (META) 

Министерството за надворешни работи на Русија соопшти дека американските специјални служби се обидуваат да влезат во дипломатските претставништва на Русија во Сан Франциско.

Министерството објави снимки на кои, како што се наведува, се гледаат американските специјални служби како се обидуваат да упаднат на дипломатскиот имот.

Стејт департментот на крајот на август соопшти дека САД го затвора рускиот конзулат во Сан Франциско, како и конзуларните објекти во Вашингтон и во Њујорк.

Ова следуваше откако Москва го редуцираше бројот на американски дипломати кои може да бидат на руска територија.


Македонската Влада не била инволвирана во разузнавањето, утврдиле Димитров и Дачиќ


Ниш, 25 август, 2017 - 17:47 (META) 

Министрите за надворешни работи на Македонија и на Србија, Никола Димитров и Ивица Дачиќ денеска во Ниш разговараа за последните случувања на релација Белград – Скопје, по обвинувањата од српските власти за офанзивни разузнавачки активности против Србија.

Министрите, како што соопштија на прес-конференцијата, детално ги разгледале доказите, по кои Белград го повлече персоналот на српската амбасада од Скопје и заклучиле, дека во таквите активности не е вклучена македонската влада.

Шефот на српската дипломатија истакна дека информациите за разузнавачките активности не се однесуваат на македонската Влада, туку на безбедносниот сектор, кој тоа го правел заедно со една странска држава. Дачиќ, сепак не сакаше да прецизира за која држава станува збор.

Димитров истакна дека областа на разузнавањето е деликатна и поради тоа не сакаат да шпекулираат за да не нанесат поголема штета.

– Допрва треба да се работи на разјаснување на тие информации. Ме радува ако испадне дека информациите се точни дека не е инволвирана македонската влада. Затоа особено е важно овие информации детално да се испитаат – рече Димитров.

Тој истакна дека на тензиите кои настанале изминатите денови може да се гледа како шанса за подобрување на односите меѓу двете земји.

– И од овие денови можеме да видиме нешто добро, а тоа е да ги подобриме односите. Да ги донесеме на едно подобро ниво отколку што беа пред неделата. Свесен сум колку јавноста е збунета и жедна за информации, но поради природата на тој сектор мислам дека во оваа фаза, навлегувањето во детали може да не однесе во погрешна насока – рече Димитров.

Министрите изразија задоволство од ваквиот канал на комуникација и се договориле тој да остане постојано отворен.

Дачиќ во контекст на подобрувањето на добрососедските односи рече дека многу билатерални теми не биле покренати на средбата, поради што најави продлабочување на комуникацијата и соработката меѓу двете, како што рече, традиционално пријателски земји.

Во меѓувреме, амбасадата на Србија денеска почна нормално да функционира, откако персоналот вчера се врати во Скопје. Амбасадорката Душанка Дивјак-Томиќ, според најавите, ќе се врати во Македонија на 31 август.


Мекалистер: Брисел беше изненаден од дипломатскиот спор меѓу Србија и Македонија


Белград, 25 август, 2017 - 13:08 (META) 

Брисел бил изненаден од дипломатскиот спор меѓу Србија и Македонија, но е задоволен што раководствата на двете држави овозможиле да се дојде до решение преку дијалог на дипломатско ниво без ескалации, вели известувачот за Србија во Европскиот парламент и шеф надворешнополитичкиот совет на ЕП, Дејвид Мекалистер во интервју за балканскиот сервис на „Радио Слободна Европа“.

Мекалистер вели дека вчера разговарал со српските претставници околу контроверзниот спор меѓу Србија и Македонија од чија страна, како што наведува, му било кажано дека „тоа прашање е решено“.

Околу дипломатскиот спор, европарламентарецот вчера разговарал и со шефот на српската дипломатија Ивица Дачиќ.

– Ми беше соопштено дека конфликтот, ако така го нарекуваме, е решен. Тука беше и повикот од сите институции на Европската Унија двете страни да останат смирени, колку што е можно повеќе – вели Мекалистер.

Тој додава дека разговорот бил доверлив и поради тоа не може да зборува за деталите.

– Очигледно е дека Србија била разочарана од одредени активности кои Македонија ги презела против српските дипломати. Мислам дека сега ја разјаснија ситуацијата, дека двете страни го промениле мислењето по тоа прашање и се надевам дека нема да видиме повторување на ваквите чекори – наведува европратеникот.

Прашан каде е интересот на Србија за вклучување во македонските политички прилики и обратно, кој е интересот на Македонија тоа да го прави во Србија, Мекалистер вели дека не може да каже „која била причината за македонските акции, и што бил мотивот тоа да го направат“, бидејќи нема информации. Тој, додава оти смета дека сите земји од Западен Балкан треба да гледаат напред и дека сите држави од регионот треба да прават сè за да не се блокираат едни со други на нивниот пат кон членство во Европската Унија.

– Македонија е државата која со години беше блокирана, поради спорот околу името со Грција, и јас се надевам дека тој спор конечно ќе биде разрешен. И на тој начин и на оваа држава исто така би можеле да и ја понудиме ЕУ перспективата и да направиме неколку конкретни чекори – вели Мекалистер, кој денеска ја завршува дводневната посета на Белград каде имал разговори со највисоките државни претставници и со претставници на дел од опозицијата.