ВМРО-ДПМНЕ тврди дека Заев вработил и советник со криминално досие


Скопје, 14 мај, 2018 - 15:22 (META) 

Опозициската ВМРО-ДПМНЕ денеска обвини дека меѓу 56-те советници на премиерот Зоран Заев е вработено и лице за кое нема докази дека има стручност во областа за која треба да советува, а згора на тоа има криминално досие оти во кафеана пукал во припадник на специјалните сили.

Како што соопшти портпаролот на ВМРО-ДПМНЕ, Димче Арсовски, станува збор за Силвио Аврамовски.

– Човекот е непознат за јавноста, но Заев си го назначил за надворешен соработник за економски прашања и зајакнување на економската соработка со земјите од Кавказ и Блискиот Исток. Во медиумите единствено се појавува како човек кој бил избран за делегат на Конгресот на СДСМ во 2011 година. Врска со Блискиот Исток или Кавказ – никаква. Единствено неговата сопруга, Маја Аврамовска – Трпевска, се јавува како вработена во германска невладина организација која што оперира во градот Тбилиси. Уште позагрижувачка е информацијата која што кружи во јавноста дека Силвио Аврамовски е човек кој што има досие во полиција. Затоа, прашуваме дали пред неговиот ангажман како советник на Зоран Заев, Владата го проверила неговото досие? Дали е точно дека против него се водела постапка затоа што во кафеана пукал во припадник на специјалните единици? – рече Арсовски.

Тој обвини дека власта ја празни државната каса за партиски потреби, а само за советниците на Заев годишно ќе се трошат по половина милион евра само за плати.

– Ветуваа намалување на бројот на министерствата, а ја наполнија владата со неспособни, некомпетентни и сомнителни кадри. Зоран Заев го наполни премиерскиот кабинет дури со 56 советници – 13 посебни советници, 33 надворешни советници и 10 обични советници. Ако како просек се земе нето-платата која ја имаше Заев договорено со командант Хоџа, кој за своето средно образование требаше да добива 600 евра месечно, тоа значи дека годишно граѓаните од својот џеб плаќаат вкупно за сите 56 советници над 540.000 евра за плати и придонеси. Тука не се вклучени тековните трошоци за советниците за патувања и користење на службени бенефиции кои што исто така директно паѓаат на грбот на граѓаните – рече Арсовски.


ВМРО-ДПМНЕ: Од работа избркани 1.500 луѓе оти немаат членски книшки на СДСМ


Скопје, 15 јули, 2017 - 16:23 (META) 

Неспособната антиреформаторска влада на СДС почна со чистките и со бруталната партизација на државата преку вработување партиски војници на СДСМ: 1.500 луѓе беа избркани од работа само затоа што немаат членски книшки на СДСМ, како што бара пратеникот од редовите на СДСМ, Курто Дудуш, обвини денеска на прес-конференција Димче Арсовски, потпретседател на Унијата на млади сили на ВМРО-ДПМНЕ.

Тој рече дека поради „фрустрациите и комплексите на новата владејачката гарнитура и носењето одлуки без размислување“, во Фондот за здравство во моментов не постои одбор кој може да носи одлуки околу лекување на осигурениците во странство.

– Почна и смената на директори на институции преку јавно декларирана фашизоидна и тоталитарна предумисла: сменети се многу успешни директори на театри само затоа што немаат членска на СДС и не размислуваат како Зоран Заев и Роберт Алаѓозовски. Од друга страна, масовно се вработуваат неквалификуваните кадри на Сорос кои со години одработуваа за политичките интереси на Зоран Заев и на СДС – рече Арсовски.

Тој на прес-конференцијата во седиштето на ВМРО-ДПМНЕ рече дека „со нивното ставање на платен список на владата на Република Македонија се покажа дека цело време ги бранеле само интересите на Заев и на СДС, за што дебело биле платени и тогаш и сега“.


ВМРО-ДПМНЕ: Сорос влезе длабоко во владата на Заев и СДС


Скопје, 8 јули, 2017 - 16:20 (META) 

Таканаречените невладини организации на Сорос кои се под директна контрола на СДС си го покажаа уште еднаш и дефинитивно своето вистинско лице. Тие никогаш не беа никаков невладин сектор, туку само слуги на политичките интереси на спрегата помеѓу СДС и Сорос изјави денеска Димче Арсовски, потпретседател на УМС на ВМРО-ДПМНЕ пред просториите на фондацијата „Отворено Општество“.

-Поранешните невладини, а сега владини советници и чиновници докажаа дека нивната цел никогаш не била да се биде граѓански коректив на власта, туку само да се доберат до фотелји и до позиции. Нивните принципи никогаш не биле одбрана на државата и нејзините интереси, туку личниот бенефит и личниот профит. Токму затоа во владата на Заев веќе се вработени десетици т.н. граѓански активисти кои цело време, изминативе години одработуваа за интересите на СДС, лажејќи ги граѓаните на Република Македонија дека застапуваат некаков граѓански интерес. Сорос влезе длабоко во владата на Заев и СДС и докажаа дека битката никогаш не била за слобода, демократија и правда, туку за доаѓање на власт со лаги, интриги и манипулации – изјави Арсовски.


ВМРО-ДПМНЕ: Од подготовките на арената „Филип Втори“, остана уште паркиралиштето за репортажни возила


Скопје, 23 јуни, 2017 - 16:12 (META) 

ВМРО-ДПМНЕ денеска порача дека ако не се одржи Суперкупот на УЕФА на Национална арена „Филип Втори“, виновна за тоа ќе биде власта на СДСМ.

– До последниот извештај на УЕФА, Владата на ВМРО-ДПМНЕ редовно добиваше позитивни извештаи. Сè што беше побарано од стручните лица на УЕФА беше реализирано од наша страна. Единствените обврски што остануваат да се реализираат пред да дојде последната најавена посета од стручните лица на УЕФА се тековни работи околу климатизацијата и средување на просторот, таканаречен ТВ-компаунд, каде што треба да бидат сместени репортажните возила за ТВ-преносот на Суперкупот – рече Димче Арсовски, потпретседател на Унијата на млади сили на партијата, на прес-конференција во седиштето на ВМРО-ДПМНЕ.

Тој нагласи дека нема сериозни пропусти во поглед на подготовките правени од претходната власт.

– Единствено треба да се обезбеди буџет за Јавното претпријатие за стопанисување со станбен и деловен простор со што сè би било реализирано во наредните 10 дена. Одржувањето на Суперкупот не смее во ниту еден случај да биде загрозено. Време за губење нема – рече Арсовски.