!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

ВМРО-ДПМНЕ: Ајде да ги расчистиме дилемите на предвремени парламентарни избори


Скопје, 13 септември, 2017 - 21:40 (META) 

Во врска со анкетата што „Телма“ ја објави во соработка со „М-Проспект“ и со МЦМС, ВМРО-ДПМНЕ сака да ги повика СДСМ и Зоран Заев да се охрабрат и да излезат и на предвремени парламентарни избори, на кои граѓаните ќе кажат што мислат за расипничкото и неодговорно владеење на СДСМ, се вели во реакцијата на опозициската партија.

Од ВМРО-ДПМНЕ велат дека само на тој начин ќе се расчистат дилемите, бидејќи, според партијата, денеска била објавена истата анкета која пред „само еден месец покажала сосема други резултати“.

„Според анкетата од крајот на јули, резултатите од МЦМС покажале дека ВМРО-ДПМНЕ e со стабилна предност пред СДСМ. Имено, на прашањето доколку утре се одржат избори за која партија би гласале, 27,1 отсто од испитаниците се одлучиле за ВМРО-ДПМНЕ, додека за СДСМ биле 22,7 отсто. Народот најдобро ќе каже дали се случило нешто во последните 30 дена за така драстично да се смени мислењето, односно дали Законот за двојазичност, Договорот со Бугарија, укинувањето на планираното зголемување на пензиите или тендерите кои Кочо Анѓушев си ги доделува себеси придонеле за зголемување на рејтингот на Зоран Заев“, стои во соопштението на ВМРО-ДПМНЕ.


Изборен законик, ДИК, дијаспора: Што бараа, а што ќе договорат партиите?


Скопје, 20 август, 2015 - 10:14 (META) 

По завршувањето на последната средба на работните групи за спроведување на Договорот од Пржино во делот за  околу изборното законодавство, ДИК, избирачкиот список, гласањето на дијаспората, неофицијални извори од преговарачки тимови брифираа дека е постигнат „некаков напредок“ за избирачкиот список и дека денеска би можело и да се очекува официјална изјава од преговарачките тимови.

Во меѓувреме во медиумите се појавија низа неофицијални информации и дилеми околу ставовите на преговарачките тимови за некои од трите прашања кои се предмет на разговор – избирачкиот список, функционирањето и надлежностите на ДИК и гласањето на дијаспората.

Во очекување на соопштението за договореното, еве кои се до сега познатите ставови на клучните играчи за овие три прашања:

1. Избирачки список

Според неофицијални информации најголем напредок работните групи постигнале во делот за Избирачкиот список и неговото прочистување.

Претставниците на политичките партии, потписнички на Договорот од Пржино, брифираат дека се блиску до прифаќање на идејата за активна регистрација, што подразбира во предизборниот процес секој гласач да може самиот да се пријави за гласање, но дилемата е дали пријавувањето да биде задолжително.

  • СДСМ: За овој предлог опозицијата смета дека треба да има активна регистрација на граѓаните и дека таа треба да е задолжителна, односно да се направи нов избирачки список на кои гласачите сами ќе се регистрираат со отпечаток од прст, а на ист начин да се врши и гласањето.
  • ВМРО – ДПМНЕ: Како и опозицијата, така и власта смета дека треба да се направи нов избирачки список, но според владејачката партија, активната регистрација на гласачите не треба да биде задолжителна.

2. Дијаспора

Се уште нема никакви официјални информации околу тоа дали се договорени промени во начинот на гласањето на дијаспората. Според неофицијални информации од преговарачите, ако ВМРО-ДПМНЕ попушти и се согласи активната регистрација да биде задолжителна, големи се шансите начинот на кој гласа дијаспората да остане непроменет. Гласањето на дијаспората беше камен на сопнување и минатата година, кога се правеше нов Изборен законик. Но тогаш партиите одлучија да ја остават оваа точка за „подобри времиња“.

  • СДСМ: Како што неодамна изјави Радмила Шекеринска, заменик претседателка на партијата, опозицијата сака да се задржи гласањето на дијаспората, но да се почитуваат препораките на ОБСЕ/ОДИХР според кои секој глас мора еднакво да вреди, без разлика дали се гласа во Македонија или странство. Опозицијата најголеми забелешки има затоа што пратеник во дијаспората може да се стане само со неколку стотици гласа.
  • ВМРО-ДПМНЕ: Според партијата на власт, начинот на кој на претходните избори гласала дијаспората е добар и нема намера да отстапи од тоа. Според нив, опозицијата сака да се укине или промени начинот на гласање во дијаспората затоа што од таму не добивале ниту еден пратеник.

3. ДИК

Ниту една од политичките партии официјално се нема изјаснето околу ставовите за Државната изборна комисија. На некоја од наредните средби треба да се договори функционирањето и надлежностите на ДИК, како и тоа кој се може и ќе биде член во оваа комисија. Неофицијално, од СДСМ дознаваме дека опозицијата сака да биде побројна во оваа комисија.