Швајцарија, ЕУ и САД ќе и помагаат на Владата со изборните реформи


Скопје, 5 февруари, 2018 - 16:18 (META) 

Швајцарија е подготвена да помогне во зајакнувањето на капацитетите на Државната изборна комисија (ДИК), на општинските изборни комисии и генерално во изборните реформи, соопштила швајцарската амбасадорка во земјава, Сибил Зутер Техада на средбата со премиерот, Зоран Заев во Владата.

Премиерот Заев на средбата истакнал дека Владата е определена за изборни реформи кои што ќе бидат прифатени од сите политички субјекти во државата.

„Силно сме посветени на обезбедување независност и зајакнување на капацитетите на Државната изборна комисија, како и на спроведување на сите други потребни реформи за квалитетен изборен процес. Затоа, за нас е прифатлива секоја помош и соработка“, рекол Заев, стои во соопштението на владината прес-служба.

На средбата, тој ја информирал амбасадорката Техада дека ќе се формира координативно тело, кое што ќе работи со претставници на Европската Унија, на САД, на швајцарската Влада како и со сите заинтересирани, за подготовка и имплементација на изборните реформи.


Милошоски побара да се распише оглас за избор на нови членови на ДИК


Скопје, 2 февруари, 2018 - 16:50 (META) 

Пратеникот Антонио Милошоски од ВМРО-ДПМНЕ денеска на прес-конференција изјави дека е симптоматично што во моментов Државната изборна комисија е празна и нефункционална и оти треба сите државни институции кои би биле дел од евентуален процес за конечно одлучување за прашањето за името да бидат функционални за никој да нема алиби да го донесе Собранието пред свршен чин или да врши притисок да се изјасни на еден или на друг начин, без народот да ја изрази својата волја.

Милошоски денеска поднесе барање Собранието да донесе одлука за објавување јавен оглас за избор на претседател, потпретседател и шест членови на ДИК. Точката, според него, би требало да се стави на дневен ред на првата наредна седница, а изборот би се вршел според актуелниот Изборен законик.

– Дополнително сегашната состојба во ДИК е спротивна на членот 26 на Изборниот законик каде што стои дека Собранието има императивна норма да ја пополни ДИК со нов состав после 30 дена по завршувањето на мандатот на претходната ДИК, кој беше констатиран во декември. Досега нема такви иницијативи – рече Милошоски.

Сепак, негово лично мислење е дека составот на ДИК треба да биде помал по број, за ДИК да биде и поекономична и поефикасна.

– Но, тоа би било прашање на некои политички договори и некој поширок консензус. Ова е актуелниот закон и сметам дека според овој треба да имаме целосен состав на ДИК и да одговори на евентуални избори или референдум – додава Милошоски.


Собранието ги констатираше оставките на членовите на ДИК


Скопје, 25 декември, 2017 - 16:06 (META) 

Спикерот на Собранието, Талат Џафери денеска на пленарна седница констатираше дека им престанува мандатот на членовите на ДИК откако тие си поднесоа оставки.

Тој не соопшти кога и како ќе продолжи постапката за избор на нови членови на ДИК.

Нивните оставки следуваа по притисок на јавноста откако американскиот амбасадор Џес Бејли обелодени дека на затворена седница членовите одлучиле да си поделат бонуси за спроведување на локалните избори.

Во рок од три дена Талат Џафери ќе треба да ги извести партиите да предложат нови членови на Комисијата, а доколку тие не дадат свој предлог, членовите ги предлага собраниската комисија за прашања на избори и именувања.

Новите осум членови треба да бидат изгласани со двотретинско мнозинство.

Оставки поднесоа претседателот Александар Чичаковски, потпретседателот Реџеп Прекопуца и експертот Атанас Урумов како и партиските членови – Игор Милев и Виолета Дума предложени од СДСМ, Сашо Срцев и Силвана Бонева од ВМРО-ДПМНЕ и Субхи Јакупи од ДУИ. Само Ермира Асани Салија, од редовите на БЕСА не поднесе оставка.


Заев верува дека преку дијалог ќе ја врати опозицијата во Собранието


Скопје, 13 декември, 2017 - 12:24 (META) 

Премиерот Зоран Заев денеска не сакаше да соопшти дали синоќа се одржал најавениот состанок со коалициските партнери околу пополнувањето на испразнетите министерски места, меѓу кои и она во Министерството за здравство.

Заев рече дека штом ќе има решение за новите членови во Владата јавноста ќе биде извесетан.

– Знаете дека има испразнети пратенички места кои треба да бидат пополнети од Државната изборна комисија (ДИК). ДИК е во оставка, но треба да продолжи да работи додека Собранието не ги констатира оставките. Сите овие работи треба да бидат комплетирани за да можеме правно формално да ги спроведеме процедурите, вклучително и за комплетирањето на Владата – изјави Заев, одговарајќи на новинарско прашање по настанот во Собранието во организација на Евроатланскиот совет, на кој премиерот имаше свое обраќање.

Прашан како ќе ја вклучи опозицијата во овој процес, која ја бојкотира работата на Собранието поради притворањето на шестмина пратеници на ВМРО-ДПМНЕ поради насилствата од 27 април, Заев рече дека ќе биде отворена дебата и оти верува дека преку дијалог може да се најдат решенија.


Бонева си поднела оставка поради заканите по живот и некролозите низ Струмица


Скопје, 12 декември, 2017 - 16:46 (META) 

Силвана Бонева, членка на ДИК од редовите на ВМРО-ДПМНЕ, во оставката која ја депонирала до Собранието вели дека таа од нејзиниот избор во ДИК совесно, одговорно, согласно закон ја извршувала функцијата.

Според неа, критиките од јавноста за бонусот плати кои членовите ги добија за локалните избори, се „неосновани обвиненија и истовремено носење на пресуди дека се неморални“ иако законски работеле.

Таа во оставката вели дека е симптоматично што линчот е после тригодишна примена на Законот и е насочен само кон 9-те членови на ДИК, но не и за изборната администрација, на која исто така и бил исплатен надоместок.

„Бруталните навреди, клевети, закани по живот преку социјалните мрежи и некролози за мене на електричните столбови низ Струмица, е целосна повреда на моите основни човекови права, честа и угледот, а се во име на демократијата, правната држава и гласот на народот“, вели Бонева.

Во оставката таа потенцира дека со хајката се урнисало достоинството на ДИК како највисок државен орган кој е задолжен не само за спроведување на избори, туку и за спроведување на референдуми на државно и локално ниво.

„Од овие причини, а заради зачувување на мојот личен интегритет како човек, ја поднесувам оваа оставка и ви благодарам за досегашната искажана доверба“, додава Бонева.


Шесте оставки ДИК ги доставила до Собранието, Срцев и Бонева ќе ги однесат сами


Скопје, 12 декември, 2017 - 15:43 (META) 

Шесте оставки на членовите на Државната изборна комисија (ДИК) поднесени вчера и денеска, односно тие на претседателот Александар Чичаковски, потпретседателот Реџеп Прекопуца, Атанас Урумов, Виолета Дума, Игор Милев и Субхи Јакупи се веќе доставени во архивата на Собранието, дознава „Мета“ од извори во ДИК.

Според информацијата што ја добивме, членовите на ДИК предложени од ВМРО-ДПМНЕ, Силвана Бонева и Сашо Срцев, најавиле дека самите ќе ги достават оставките до Собранието, за разлика од нивните колеги .

Сè до моментот кога Собранието ќе ги констатира оставките, ДИК ќе продолжи да работи според своите ингеренции.


Заев ги поздрави и ги оцени како морален чин оставките на членовите на ДИК


Скопје, 11 декември, 2017 - 16:16 (META) 

Премиерот Зоран Заев ја поздрави одлуката на членовите на Државната изборна комисија да ги вратат парите од бонусите, како и оставките на дел од нив, кои ги оцени како морален чин.

– Се работи за исклучителни професионалци кои имаа сериозна улога во едно сериозно време и ја завршија професионално. Одлуката што ја донесоа знам дека е законска, но, веројатно е неетичка и неморална. Јас го поздравувам чинот што го поднесоа сите, а тоа е враќање на парите назад во буџетот, а истовремено поднесоа и лична одговорност како морален чекор, веројатно заради критиките од јавноста – рече Заев.

Премиерот додаде дека истовремено тие испратиле и сериозна порака на морално и етичко однесување, по реакциите на јавноста, заради, како што рече, нетранспаретноста на одлуката што ја донесоа и заради тоа што претходно не ја информираа јавноста дека ќе го искористат членот 19 од Изборниот законик што им овозможува дополнителни надоместоци.

Оставки од функции денеска си поднесоа претседателот на ДИК, Александар Чичаковски и членовите на Комисијата од СДСМ, Виолета Дума и Игор Милев.


Чичаковски и членовите на ДИК си поднесоа оставки на функциите


Скопје, 11 декември, 2017 - 13:29 (META) 

Претседателот на Државната изборна комисија (ДИК), Александар Чичаковски, за државната новинска агенција МИА потврдил дека си поднел оставка на функцијата.

Околу причините за оставката, Чичаковски навел дека тоа е негов личен чин.

Инаку, оставката на Чичаковски доаѓа откако во јавноста беше обелоденето дека членовите на ДИК си зеле високи бонуси за последните изборни циклуси, а беше почната и интернет-петиција со која се бараат оставки од деветмината членови на ДИК, која ја потпишаа над 5.000 лица.

И членовите на ДИК, Виолета Дума и Игор Милев, кои беа претставници на СДСМ во Комисијата за дел од медиумите потврдиле дека поднеле оставки на своите функции.

Мандатот на овој состав на ДИК истекува во 2020 година. Чичаковски е прв човек на ДИК од редот на експертите од 2015 година по постигнувањето на Договорот од Пржино.


Интернет-петиција за оставка од членовите на ДИК поради бонусите


Скопје, 7 декември, 2017 - 20:46 (META) 

Повеќе од 1.600 граѓани досега се потпишале на интернет-петицијата со која се бара оставка од членовите на Државната изборна комисија поради бонусите што си ги доделиле без да ја информираат јавноста.

„Бараме оставка на деветте членови на Државната изборна комисија (ДИК) поради неетичко однесување и кршење на принципите за работа, објавени на веб-страницата на ДИК, кои меѓу другото гласат: ‘Постојано вршиме самоевалуирање затоа што сакаме постојано да ја унапредуваме нашата работа и секој нареден изборен циклус да биде подобар од претходниот. Притоа ја зголемуваме ефикасноста, ја спроведуваме работата со помалку напор и ја зголемуваме ефективноста со што ги намалуваме трошоците за својата работа’“, се вели во петицијата.

Во неа се наведува дека платите на деветтемина членови на ДИК се движат меѓу 60.000 и 70.000 денари и дека во изминатите 18 месеци членовите на Комисијата трипати си доделиле вкупно 12 надоместоци за кои не ја информирале јавноста.

Случајот со бонусите на ДИК во јавноста го откри амбасадорот на САД во земјава, Џес Бејли, кој во вторникот неделава изјави оти слушнал дека членовите на Државната изборна комисија зад затворени врати едногласно си изгласале да добијат четири дополнителни плати по завршувањето на локалните избори во октомври годинава.

Еден ден подоцна ДИК одржа седница на која членовите рекоа дека одлуката за исплата на надоместоци била донесена во согласност со Изборниот законик и со правилникот за работа, но поради притисокот од јавноста решија бонусите да ги донираат или да ги вратат во буџетот.


Прифатено обвинението за „Титаник 2“, на обвинителна клупа Мијалков и Тачи


Скопје, 7 декември, 2017 - 10:04 (META) 

Советот за оценка за обвинителен акт при Основниот суд Скопје 1 го прифатил обвинението на СЈО за предметот „Титаник 2“, во врска со изборни нерегуларности.

Во случајот обвинети се поранешниот шеф на УБК, Сашо Мијалков, лидерот на ДПА, Мендух Тачи, членот на ДИК од ВМРО-ДПМНЕ, Сашо Срцев, како и поранешните членови на ДИК, Бедредин Ибраими и Анета Стефановска и Влатко Сајковски.

Советот не го прифатил предлогот за злоупотреба на службената положба да одговараат и петте судии од Управниот суд. Претходно судскиот совет им го одзеде имунитетот на управните судии Билјана Никодиновска-Петровска, Лидија Ивановска, Благородна Рангелова, Анета Џигерова и Газмент Фејзула, кој ги штитеше од кривична одговорност.

Предметот „Титаник 2“ се однесува на местење резултати на локалните избори во 2013 година. Според „бомбите“ што ги објави опозицијата, Мијалков и Тачи се договарале за гласање во однос на поднесени приговори до ДИК.

Апелацискиот суд одлучи прислушуваните разговори да бидат употребени како докази во постапката.