ВМРО-ДПМНE: Договорот од Преспа е правно-политички мртов


Скопје, 18 октомври, 2018 - 15:10 (META) 

Иако над еден милион и 200 илјади граѓани рекоа не за промена на името, Заев не се откажува, и со тоа директно ја крши волјата на граѓаните, се вели во реакцијата на ВМРО-ДПМНЕ, на изјавата на премиерот Зоран Заев.

„Во оваа фаза, договорот е чисто правно прашање, а како такво треба да се гледа низ призма на правото, законите и Уставот. Согласно правото Договорот од Преспа е правно – политички мртов, тоа го кажа ДИК, но тоа го кажува и Уставот. Одењето спротивно е злоупотреба на власта. Зоран Заев наместо насилно да турка спроведување на договор кој е одбиен од граѓаните, треба да си даде оставка како што вети, и не само заради штетниот договор кој го склучи, туку и за руинираната економија, урнисаното здравство и омаловаженото образование“, се вели во реакцијата на ВМРО-ДПМНЕ.


ДИК: На референдумот гласале 666.743 граѓани од кои 91,46 отсто „за“, а 5,65 „против“


Скопје, 1 октомври, 2018 - 14:54 (META) 

Државната изборна комисија (ДИК) ги објави официјалните резултати од гласањето на референдумот според кои, од 1.806.336 граѓани запишани на Избирачкиот список гласале 666.743 или 36,91 проценти. Од нив, 609.713 биле „за“ (91,46 проценти), а 37.700 биле против (5,65 отсто).

„Одлуката на референдумот не е усвоена, бидејќи не гласале повеќе од половината од вкупниот број на граѓани запишани во Избирачкиотм список“, рече претседателот на ДИК, Оливер Дерковски.

Во однос на одредени забелешки за работата на Општинските изборни комисии, тој додаде дека ако постојат докази, ќе има и одговорност во зависност од типот на повредата на постапките.

Прашан за неможноста претседателот на Собранието, Талат Џафери да го оствари правото на глас, Дерковски појасни дека тој, како и сите други граѓани требал да го искористи правото на увид во Избирачкиот список, а ДИК апелирале тоа да се направи од 9 до 23 септември.

„Господинот Талат Џафери гласал на претходните избори, но менувал документи и затоа не се нашол на списокот. Ако менувате лични документи и не сте на избирачки список, барате увид за да запишете“, додаде Дерковски.

Тој потенцираше дека неусогласеноста на законското решение за референдумот и Изборниот законик им правел проблеми на органите во спроведување на процесот, но со заеднички сили на надлежните биле надминати, и на крај имало успешно организиран референдум.

„Вчерашниот ден помина во најдобар ред, Македонија има демократски капацитет за организирање на вакви настани“, рече Дерковски.


ДИК: Излезноста на референдумот е 36,87 проценти, „за“ гласале 91,48 отсто


Скопје, 1 октомври, 2018 - 9:45 (META) 

Последните неофицијални податоци од веб-страницата на Државната изборна комисија покажуваат дека излезноста на референдумот е 36,87 проценти, односно гласале 661.393 граѓани запишани во Избирачкиот список, од 98,61 проценти обработени податоци.

„За“ гласале 91,48 отсто односно 605.016 гласачи, „против“ се изјасниле 37.312 односно 5,64 проценти од гласачите.

Официјалните податоци од ДИК ќе бидат соопштени околу пладне.


ДИК: Излезноста на референдумот 36,27 проценти, „за“ гласале 91,33 отсто


Скопје, 30 септември, 2018 - 23:03 (META) 

Според обработените 88,50 проценти од податоците, од страна на ДИК до 23 часот, на референдумот излегле 569.871 гласачи, односно 36,27 проценти од запишаните во Избирачкиот список. „За“ гласале 520.461 односно 91,33 проценти, против 32.801 или 5,76 проценти од гласачите.

Ова се неофицијални податоци од Државната изборна комисија, а официјалните се очекува да бидат соопштени утре, откако, како што информираше претседателот на ДИК, Оливер Дерковски, ќе пристигнат сите записници и ќе поминат роковите за жалби.

Прашан за успешноста на референдумот, тој го цитираше законот по ова прашање.

„Одлуките на референдумот се сметаат за усвоени ако за нив гласале мнозинството од вкупниот број на граѓани кои гласале, доколку гласале повеќе од половината од вкупниот број граѓани запишани во Избирачкиот список. Освен во случаите кога за одделни прашања со Уставот и со овој закон поинаку не е утврдено. Што значи, согласно овој член, потребно е исполнување на двата кумулативни услови за да донесете одлука на референдумот. Во овој случај, после 85 проценти обработени резултати, трендот кој го имаме на процентот на излезеност, јасно е дека еден од условите нема да биде исполнет, односно на референдумот не е донесена одлука. Тоа е законската одлука и не може да биде поинаку. Не можеме да навлеземе во политички коментари“, рече Дерковски.


ДИК: Излезноста на референдумот до 18.30 часот е 34,09 проценти


Скопје, 30 септември, 2018 - 19:38 (META) 

Излезноста на граѓаните на референдумот до 18.30 часот е 34,09 проценти од обработени околу 85 проценти од податоците, информираше ДИК.

„Бројката на граѓани кои гласале до 18.30 часот е 519.435, меѓутоа од 84,83 проценти обработени податоци“, појасни претседателот на ДИК, Оливер Дерковски.

Генералната оценка на ДИК е дека денот поминал добро и мирно, гласањето се одвивало во добра атмосфера со исклучок на одредени инциденти кои се појавиле во попладневните часови, кои по брзата реакција на надлежните, брзо биле санкционирани.

Општина Сарај е една од општините каде што излезноста на граѓаните на овој референдум е една од најголемите, односно 65,59 проценти од граѓаните запишани во Избирачкиот список излегле на гласање.

Од ДИК соопштија дека гласачките места во 19 часот биле затворени.


ДИК: До 17 часот излезноста на референдумот е 28,83 проценти


Скопје, 30 септември, 2018 - 17:53 (META) 

Државната изборна комисија информираше дека до 17 часот гласале 455.771 граѓанин, односно 28,83 проценти од вкупно запишаните гласачи во Избирачкиот список.

Во Општина Аеродром излезноста била  29,6 проценти, Арачиново 38,3 проценти, Берово 29,95, Битола 28,13 проценти, Богданци 30,45 проценти итн.

Од ДИК информираа дека сите приговори кои пристигнале до нив биле одбиени бидејќи немало законска основа да бидат прифатени. Станувало збор за граѓани кои не се нашле на Избирачкиот список бидејќи или менувале лични документи или немале важечки, а не го искористиле правото да бидат запишани во списокот за време на јавниот увид.

Од ДИК оценија дека сликата за денешеното гласање за време на референдумот е добра, со мали инциденти и упатија апел така да продолжи до затворањето на гласачките кутии во 19 часот.


ДИК: До 13 часот излезноста на референдумот е 16 отсто


Скопје, 30 септември, 2018 - 15:02 (META) 

До 13 часот на референдумот излегле 261.473 гласачи или 16 отсто од вкупно запишаните гласачи во Избирачкиот список. Ова се резултати од обработени 90,24 отсто од избирачките места , рече Оливер Дерковски, претседател на Државната изборна комисија.

Според податацоите на ДИК, најголем одзив има во скопските општини – Центар каде изглеле 26,29 отсто од запишаните галсачи, Карпош со 23,97 отсто и Сарај каде до 13 часот гласале 21,24 отсто. Најмал одзив има во Босилово – 6,96 отсто и Илинден – 7,18 отсто.

Гласањето тече мирно и без посериозни инциденти. Полицијата приведе неколку лица кои се обиделе да нападнат полициски службеници или пак навредувале или сликале граѓани кои сакале да гласаат.

Утринава започна гласањето на референдумот на кој, според одлуката донесена од страна на Собранието, прашањето на кое ќе се изјаснат граѓаните гласи: „Дали сте за членство во ЕУ и НАТО, со прифаќање на договорот на Република Македонија и Република Грција?“.

Референдумот ќе биде консултативен, a право на глас имаат 1.806.336 гласачи, кои се запишани во Избирачкиот список, кој беше заклучен на 10 септември. Гласачките места ќе бидат отворени до 19 часот. Референдумот се спроведува на 3.480 избирачки места во 80 општини во земјата.


Почна гласањето на референдумот, право на глас имаат 1.806.336 гласачи


Скопје, 30 септември, 2018 - 8:00 (META) 

Утринава започна гласањето на референдумот на кој, според одлуката донесена од страна на Собранието, прашањето на кое ќе се изјаснат граѓаните гласи: „Дали сте за членство во ЕУ и НАТО, со прифаќање на договорот на Република Македонија и Република Грција?“.

Гласањето се одвива непречено, освен со неколкуминутно задоцнување на три гласачки места во Прилеп и едно во Чучер Сандево заради отстранување пропаганден материјал.

Референдумот ќе биде консултативен, a право на глас имаат 1.806.336 гласачи, кои се запишани во Избирачкиот список, кој беше заклучен на 10 септември. Гласачките места ќе бидат отворени до 19 часот. Референдумот се спроведува на 3.480 избирачки места во 80 општини во земјата.

Избирачкиот одбор по завршувањето на гласањето веднаш ги сумира резултатите од гласањето на гласачкото место и составува записник кој заедно со целиот гласачки материјал во рок од три часа го доставува до општинската изборна комисија која го сумира резултатот од гласањето на избирачките места од своето подрачје.

Записникот и целокупниот гласачки материјал општинската изборна комисија во рок од 12 часа од приемот од избирачките одбори го доставува до Државната изборна комисија.

ДИК, пак, по приемот на записниците и целокупниот гласачки материјал од општинските изборни комисии во рок од 24 часа го утврдува и го објавува резултатот од гласањето на референдум на државно ниво. Потоа изготвува извештај за вкупниот број граѓани запишани во Избирачкиот список, вкупниот број граѓани што гласале, вкупниот број неупотребени гласачки ливчиња, бројот на неважечки и важечки гласачки ливчиња, бројката на граѓани што гласале „за“, оние што гласале „против“ и, конечно, резултатите од референдумот.

Резултатот од гласањето на референдумот ДИК го објавува во „Службен весник“ во рок од 15 дена од одржувањето на референдумот.

Референдумското прашање први го одговорија членовите на избирачките одбори кои отпатуваа кај нашинците во странство.

Молкот започна 48 часа пред гласањето и ќе заврши со затворањето на гласачките места денеска во 19 часот. За време на молкот престануваат сите облици на јавна пропаганда поврзана со референдумот.

Процесот на изјаснување на граѓаните на Република Македонија за референдумското прашање ќе го следат рекорден број домашни и странски набљудувачи. Официјалната бројка од ДИК на акредитирани домашни набљудувачи е 11.907, на странските набљудувачи е 493, а меѓународните организации акредитирале и 194 преведувачи.

Најмногу набљудувачи акредитирало Здружението за граѓански политики и иницијативи 5.574, потоа Сојузот на Здруженија на граѓани Македонска платформа против сиромаштија 3.736, НОВ МОСТ 1.882, Цивил – Центарот за слобода 307.

Референдумот во недела ќе го набљудуваат 197 монитори на мисијата на ОБСЕ/ОДИХР, а тие акредитирале и 129 преведувачи.

Покрај домашни, референдумот ќе го следат и странски новинари. ДИК акредитирала 83 новинари од 32 медиума, но, како што информираат оттаму, неколкумина новинари биле одбиени поради тоа што доставиле барање за акредитации по истекот рокот кој заврши на 24 септември на полноќ.


Почна дистрибуцијата на гласачките ливчиња до ОИК за референдумот


Битола, 27 септември, 2018 - 9:45 (META) 

Од печатницата „Киро Дандаро“ од Битола утрово почна дистрибуцијата на гласачкиот материјал за референдумот за името закажан за в недела.

Претседателот на Државната изборна комисија (ДИК) Оливер Деркоски изјави дека дистрибуцијата на гласачките ливчиња за референдумот започнало по проверката што членови на Комисијата ја направиле во печатницата „Киро Дандаро“. Оцени дека подготовката на референдумскиот материјал завршила одлично.

– Во текот на денот со помош на возила на Македонски пошти и наши екипи материјалот ќе биде дистрибуиран до ОИК – рече Деркоски.

Право на глас на плебисцитарното изјаснување имаат 1.806.336 гласачи, запишани во Избирачки список.
Гласачкиот материјал за референдумот се доставува директно до општинските изборни комисии, кои пак според роковникот на ДИК се должни еден ден пред денот на одржување на референдумот да го предадат на избирачкиот одбор.

Референдумот ќе се спроведува на 3.480 избирачки места во 80 општини во земјата.
Болните, изнемоштемите, лицата во домашен притвор, затворениците и државјаните на Република Македонија во странство гласаат еден ден пред референдумот, односно на 29 септември.

Референдумското прашање гласи: Дали сте за влез во ЕУ и НАТО со прифаќање на Договорот меѓу Република Македонија и Република Грција?“, а гласачите што ќе излезат на референдумот со заокружување со сино хемиско пенкало треба да се изјаснат дали се „за“ или „против“.

Гласањето на 30 септември почнува во 7 часот наутро и завршува во 19 часот.

ДИК првичните резултати од референдумот добиени по електронски пат ги објавува сукцесивно, а резултатите врз основа на податоците од записниците и целокупниот гласачки материјал од ОИК, во рок од 24 часа по приемот на записниците и целокупниот гласачки материјал од сите ОИК.

Резултатот од гласањето, ДИК го објавува во „Службен весник“ во рок од 15 дена од денот на одржување на референдумот


На полноќ завршува кампањата за референдумот и почнува молкот


Скопје, 27 септември, 2018 - 9:31 (META) 

Јавната пропаганда за референдумот што ќе се одржи во недела завршува вечерва на полноќ. Дотогаш треба да завршат сите активности на учесниците во кампањата и од полноќ започнува предизброниот молк.

Коалицијата „Излези ЗА европска Македонија“ вечер завршен собир има во Тетово, движењето Беса во скопски Чаир, а прес-конференции најавија Алијансата на Албанците. Прес-конференција ќе одржи и координативното тело против референдумот при Светскиот Македонски конгрес кое повикува на бојкот на референдумот.

Агенцијата за аудио и аудиовизуелни медиумски услуги вчера извести дека кампањата „Твој став, твое право“ на Државната изборна комисија, како кампања од јавен интерес не спаѓа во јавната пропаганда за референдумот и може да се емитува и во петок и во сабота иако веќе ќе биде молк пред референдумот.

– Ве известуваме дека АВМУ испрати известување до сите радиодифузери, во кое им посочи дека едукативната и информативна медиумска кампања „Твој став, твое право“ на Државната изборна комисија не се смета за платена јавна пропаганда за Референдумот и од тие причини можат да ја емитуваат и во деновите на референдумот, се вели во одговорот на АВМУ на барањето на ДИК.

Според Роковникот на ДИК молкот пред референдумот започнува 48 часа пред одржувањето на референдумот.