Заев се сретна со Сорос во Давос


Давос, 24 јануари, 2019 - 16:02 (META) 

Премиерот Зоран Заев, во рамки на Светскиот економски форум во Давос, се сретнал и со филантропот и финансиер Џорџ Сорос, основач на фондациите Отворено општество (ФОО) и со Патрик Гаспар, претседател на ФОО, соопшти Владата.

„Зачленувањето на Република Македонија во НАТО и интеграцијата кон Европската унија беа оценети како клучни чекори кои обезбедуваат стабилност и сигурност за земјата и за регионот, и ја отвораат вратата за нови странски инвестиции, за развој на македонската економија и за подобрување на квалитетот на живот на граѓаните“, се вели во соопштението испратено од Влада.

Заев и Сорос, како што велат од Владата, размениле идеи за интензивирање на соработката меѓу Владата и фондациите Отворено општество за обезбедување подобри капацитети за грижа и за предучилишно образование за децата и за поголема вклученост на граѓаните Роми во разни сфери на општествените текови во Македонија.

Во разговорот била истакната важноста на Националната стратегија за едно општество и мултикултурализам, како и потребата од интензивно учество на граѓанскиот сектор во креирање и спроведување на Стратегијата, со цел да се поддржи општествениот тренд на унапредување на довербата и комуникацијата меѓу различните граѓани и заедници во Република Македонија.


Џорџ Сорос е личност на годината според „Фајненшел тајмс“


Лондон, 19 декември, 2018 - 14:05 (META) 

Американскиот филантроп и милијардер Џорџ Сорос денеска од британскиот економски дневен весник „Фајненшел тајмс“ беше прогласен за личност на 2018 година.

„За личност на годината „Фајненшел тајмс“ обично решава врз основа на достигнувањата. Во случајот на Сорос оваа година, одлучено е врз основа на вредноста што тој ја претставува“, се вели во образложението.

Џорџ Сорос (88), унгарски Евреин кој во САД се збогатува и станува „таткото“ на хеџ-фондовите, е најпознат како борец за либерална демократија и отворено општество. За таа цел ја основа Фондацијата Отворено општество, преку која низ целиот свет покрај обемната добротворна активности, исто така ја поттикнува и поддржува образованието, како и борбата против авторитаризмот, расизмот и нетолеранцијата. Фондацијата дејствува и во Македонија, како Фондација Отворено општество – Македонија.


Студенти протестираат неколку дена пред истекот на рокот за соросовиот Универзитет да си замине од Унгарија


Будимпешта, 27 ноември, 2018 - 9:40 (META) 

Оваа седмица е последниот рок по кој ќе се види дали Централно-европскиот универзитет (ЦЕУ), приватниот универзитет основан во 1991 од страна на финансиерот и филантроп Џорџ Сорос, ќе остане во Унгарија, пишува „Глобал војсес“. Оваа институција, со седиште во Будимпешта од 1993, е во правна неизвесност уште од април 2017, кога унгарската влада ја усвои контроверзната измена на постоечките закони за високо образование во земјата.

Студентите се собраа да протестираат во саботата на 24 ноември и го окупираа главниот плоштад пред зградата на Парламентот во Будимпешта за да ја одбранат академската слобода во земјата.

Кон крајот на октомври, претседателот и ректор на ЦЕУ Мајкл Игнатиеф, изјави дека институцијата нема да ја чека владата до 1 јануари 2019 да го потпише документот со кој ќе се обезбеди местото на универзитетот како унгарско-американска академска институција во Унгарија. Наместо тоа, Централно-европскиот универзитет даде рок на унгарската влада до 1 декември 2018 и започна со воспоставување кампус во главниот град на соседна Австрија, Виена, каде што студентите од прва година би се префрлиле во академската 2019 година.

Универзитетот се подготвува да се исели во друга држава. „Универзитетот“ во случајов ги опфаќа сите засегнати од преселбата, вклучително и студентите, студентите на докторски студии, истражувачите, професорите и вработените од службата, од кои дел работат во ЦЕУ во Будимпешта повеќе од една деценија.

Разговорите кои се водат изминатиов период во унгарските академски кругови се во знакот на темата за академската слобода. Корвиновиот универзитет во Будимпешта се соочува со реформа со која би се организирале активностите на универзитетот според структура за правење профит, со што драстично би се намалил бројот на студенти стипендирани од државата. Истовремено, Катедрата за општествени науки при универзитетот ЕЛТЕ започна со штрајк и ја разгоре дискусијата за родови студии како резултат на затворањето на програмата. Покрај ова, унгарската Академија на науките се бори против намалувањата во буџетот кои се најавени од страна на унгарската влада.

Голем број студенти, истражувачи, професори и нивни поддржувачи излегоа на протест во саботата за да го свртат вниманието кон борбата за академската слобода во Унгарија. Според некои медиуми на протестот излегле илјадници луѓе а говорници биле претставници од ЕЛТЕ, Корвиновиот универзитет, ЦЕУ и унгарската Академија на Науките.

Говорниците го адресираа прашањето за академската слобода и законот од април 2017 кој го присилува ЦЕУ на егзил и повикаа на солидарност со работниците поради минатонеделната најава за нов закон кој ги изложува работните на експлоатација преку прекувремено работење. Се чини дека на списокот на проблематични регулативи во Унгарија му нема крај, а говорниците, од кои голем дел се општествени научници, ја критикуваа измената во Уставот со која се криминализира бездомништвото во земјата.

Говорниците и протестирачите ја искористија оваа можност да го искритикуваат унгарскиот премиер Виктор Орбан заради доделувањето азил на поранешниот македонски премиер Никола Груевски, бегалец од законот кој беше осуден во неговата земја на двегодишна казна затвор поради корупција.

Под мотото „Слободен универзитет“, студентското движење „Студентите за ЦЕУ“ (Students4CEU) го окупираше плоштадот Кошут пред Парламентот при крајот на саботниот протест. Студентите ја слават академската слобода со отворени предавања и проекции преку седмицата.

Окупацијата на плоштадот Кошут ќе заврши на 1 декември. Тогаш е и крајот на можноста за Централно-европскиот универзитет целосно да остане во Будимпешта.


Орбан: Организацијата на Сорос стои зад прогонот на Груевски


Будимпешта, 23 ноември, 2018 - 12:47 (META) 

Организацијата на Џорџ Сорос стои зад прогонот на поранешниот македонски премиер Никола Груевски, изјави денеска унгарскиот премиер Виктор Орбан во интервју за радиото „Кошут“.

Според Орбан, било нормално Будимпешта да му помогне на поранешниот македонски премиер бидејќи тој многу помогнал Унгарија да се одбрани од напливот на мигранти.

– Станува збор за поранешен лидер на блиска земја, земја која имаше клучна улога за справување со нелегалната миграција. Без таа помош ќе беше многу потешко да се одбранат унгарските граници, Човек треба чесно да се однесува кон своите сојузници – рече Орбан, потенцирајќи дека тој и Груевски биле сојузници.

Како што посочи, Унгарија веќе 30 години функционира како демократија, и ова не е прв пат да прима важни луѓе, но претходните случаи немале тежина како тој на Груевски.

Истакна дека унгарските власти ќе ја гарантираат безбедноста на Груевски, кој како што вели, во Македонија се соочува со комплицирани битки.

Прашан за барањето од Македонија за екстрадиција, Орбан рече дека Унгарија ќе обезбеди праведен третман на Груевски, а Владата нема да се меша во правните процедури што ги водат надлежните орани.


Владата на Орбан лани потрошила 40 милиони евра на анти-Сорос пропагандата


Будимпешта, 7 февруари, 2018 - 10:50 (META) 

Вкупно 40,5 милиони евра потрошила минатата година Владата на Унгарија на пропагандата против невладините организации и Институтот „Отворено општество“ на американскиот мултимилијардер роден во Унгарија, Џорџ Сорос, пишува унгарскиот центар за истражувачко новинарство „Atlatszo“, изнесувајќи ги резултатите од своето истражување.

Притоа, истражувачките новинари утврдиле дека третина од тие пари завршиле во џебот на Леринц Месарош (Lőrinc Mészáros), близок пријател на унгарскиот премиер Виктор Орбан.

„Atlatszo“ во текот на целата 2017 година следел колку владата троши на пропагандата, а откако на крајот на минатата година го побарале последниот комплет податоци, требало за него да платат 375 евра.

Во рамките на владините кампањи минатата година од април до ноември, со мала пауза во текот на летото, улиците во Унгарија беа исполепени со плакати против Сорос и против мигрантите.
Најголем дел од парите завршиле во џебот на Месарош, градоначалник на Фелчут, родниот град на Орбан и сопственик на неделник, портали и телевизијата „Ехо“. Станува збор за вкупно 12,8 милиони евра исплатени за реклами. На второ место е Андраш Томбор, бизнис-партнер на Арпад Хабоњи, советник кој работи за Орбан. На трето место е компанијата Одекс, која работи со билборди, а на четвртото е Енди Вајна, филмски автор кој тесно соработува со владата и сопственик на казина, кој „спечалил“ 3,3 милиони евра.


Владата и Сорос отворени за соработка за развој на демократијата и нови инвестиции


Давос, 26 јануари, 2018 - 20:02 (META) 

Премиерот Зоран Заев, денеска во Давос се сретнал со филантропот и финансиер Џорџ Сорос, основач на Фондацијата отворено општество (ФОО) и со Александар Сорос, заменик претседавач со глобалниот одбор на ФОО.

На средбата било истакнато дека Македонија ги споделува и промовира вредностите на демократијата, заштитата на човековите права, владеењето на правото и отвореното општество, како вредности за кои се застапува и ФОО.

„Концептот отворено општество еднакво за сите и понатаму останува столб врз кој се гради новиот лик на Република Македонија, заедно со демократските реформи за членство во ЕУ ​​и НАТО и со економските мерки кои ги презема Владата“, било нагласено на средбата со Сорос.

Во соопштението се додава дека, Владата и Џорџ Сорос и понатаму остануваат отворени за соработка на планот на развојот на демократските капацитети на општеството, како и на можностите за нови бизниси и директни инвестиции.


Орбан: Муслиманските мигранти ќе доведат до појава на паралелни општества


Будимпешта, 8 јануари, 2018 - 18:08 (META) 

Премиерот на Унгарија, Виктор Орбан во интервју за германскиот весник „Билд“ тврди дека милијардерот со унгарско потекло, Џорџ Сорос заработил на „казино капитализам“ и дека се однесува како шеф на држава без држава.

Со потенцирање дека Унгарија не сака мигранти, Орбан додаде дека Сорос финансирал 60 невладини организации кои ја поддржуваат миграцијата во Европа.

-Голем број на муслимански имигранти ќе доведат до појава на паралелни општества. Муслиманските и христијанските општества никогаш не се поврзуваат. Ние (Унгарија) тоа не го сакаме и не сакаме никој да не присилува на тоа –вели Орбан.

Тој вели дека не ги гледа мигрантите кои сакаат да влезат во ЕУ како бегалци туку како „инвазивна муслиманска сила“.


Хан со Сорос разговарал за засилување на реформите и за отворените општества


Брисел, 27 април, 2017 - 17:32 (META) 

Еврокомесарот за проширување и добрососедска политика Јоханес Хан и основачот на фондациите „Отворено општество“, Џорџ Сорос, денеска во Брисел разговарале за засилувањето на реформите и на отвореното општество во земјите од регионот на Зпаден Балкан и во Источна Европа.

„Секогаш е добро да се сретне Џорџ Сорос и да се разговара за нашите заеднички напори за засилување на реформите и на отворените општества на Западен Балкан и во Источна Европ“, напиша Хан на „Твитер“.

Џорџ Сорос е во посета на Брисел, каде денеска и утре треба да се сретне со претседателот на Европската комисија, Жан Клод Јункер, и со неговиот заменик Франс Тимерманс, како и со еврокомесарката за правосудство Вера Јурова и еврокомесарот за економски пораст и инвестиции, Јурки Катаинен.

Инаку, во Македонија, која е дел од регионот на Западен Балкан, заедно со Албанија, Србија, Црна Гора, Босна и Херцеговина и Косово, партијата ВМРО-ДПМНЕ води жестока кампања против граѓанското општество и невладините организации, а тој процес го нарекува „десоросоизација“.


Иванов од Будимпешта распали по невладините организации во Македонија


Будимпешта, 20 март, 2017 - 11:05 (META) 

Мора да се зајакне контролата и транспарентноста во финансирањето на работата на невладните организации, мора да се отфрлат сите сомнежи и да се направена дистинкција помеѓу невладините организации кои навистина работат во интерес на народот и тие што само се кријат зад името НВО.

Ова го изјави претседателот на државата, Ѓорге Иванов, во дел од интервју за унгарскиот весник „Маџар хирлап“ (Magyar Hírlap), одговарајќи на прашањето за напорите што Македонија и Унгарија ги вложуваат за намалување на политичките активности на невладините организации поддржани од Џорџ Сорос.

– Не треба да се дозволи злоупотреба на граѓанскиот сектор. Како професор по право, многу години поминав во цивилниот сектор, во фондации, институции, невладини организации, со иницијатива да помогнам општеството да се направи позрело. За жал, со неколку исклучоци, овој сектор сега е доминиран од партиски интереси, а интересите на граѓаните се најдолу меѓу приоритетите на овие организации – вели Иванов.

Македонскиот претседател вели дека „покрај политичка, на НВО им се дава и етничка боја бидејќи некои од странските фондации настојуваат да ги поддржат на етничка основа“.

– Ги осудувам сите обиди за политизирање на граѓанскиот сектор и обидот да се направат пристрасни. Неприфатливо е странски пари да се влеваат во НВО за развивање на политички цели, иницирање на активности, кои вклучуваат директно странско мешање во внатрешните работи на една суверена држава – нагласи Иванов.

Според него, граѓанскиот сектор треба да придонесе за прогрес и за позитивни промени кои ќе им бидат од корист на државата.

– Наместо тоа, ние имаме работа со организации кои на различни начини и без самокритичност дејствуваат деструктивно и спротивно на националните и на граѓанските интереси – заклучува Иванов.

Во интервјуто тој зборува и за актуелните политички случувања во земјата и вели дека партиите треба да го бараат решението преку одговорно однесување, а во согласност со Уставот на Република Македонија. Според Иванов, можно решение за надминување на ситуацијата се и нови предвремени парламентарни избори на кои граѓаните ќе се изјаснат и за темите кои се наметнаа во постизборниот период.

Иванов во интервјуто истакнува дека лидерот на СДСМ, Зоран Заев, наместо во рок од 10 дена, го известил по 27 дена дека има обезбедено мнозинство во Собранието со поддршка на сите партии на етничките Албанци. Тој уште еднаш повторува дека нема да го додели мандатот доколку не се отфрли албанската платформа со која, како што вели, се загрозува унитарноста, суверенитет и независноста на Македонија.

Претседателот истакнува дека дел од барањата на партиите од албанскиот политички блок се во судир со Уставот, додека другите барања зависат од статистиката на терен, за која е неопходно да се направи попис. Тој посочува дека главната причина за продлабочување на кризата е тиранската платформа и притоа истакна дека по нејзиното објавување следела радикална реторика и изјави од високи државни функционери на Албанија и на Косово, поради што неколкупати ја повикал меѓународната заедница да ја осуди платформата.

Инаку, Иванов денеска престојува во работна посета на Унгарија, каде ќе има средби со државниот врв на земјата.


Тереза Меј нема долго да остане на власт, оцени Сорос


Давос, 20 јануари, 2017 - 10:41 (META) 

Американскиот милијардер и инвеститор, Џорџ Сорос, изјавил дека британската премиерка Тереза Меј нема долго да остане на сегашната функција.

Тој за „Блумберг њуз“, на вечерата приредена на Светскиот економски форум во Давос, Швајцарија, рекол дека тешко може да се очекува Меј да остане на власт, имајќи ги предвид поделбите во незиниот кабинет.

Премиеркта на Велика Британија во вторникот ги претстави плановите за преговори за излез на земјата од ЕУ, а Сорос оцени дека процесот Брексит ќе биде долг и оти „горкиот развод“ ќе им наштети и на двете страни.

Сорос, исто така, е познат и по тоа што оствари голем профит во 1992 година, кога типувал против британската фунта, која тогаш падна под однапред утврденото ниво и морала да се повлече од Европскиот механизам за менувачки курс.

Тој исто така рекол дека лично е убеден оти новоизбраниот американски претседател Доналд Трамп нема да успее да ја спроведе политиката што ја најавил.