!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Тимот на Обама направи погрешна проценка за Арапската пролет, смета директорот на ЦИА


Вашингтон, 10 јануари, 2017 - 20:07 (META) 

Директорот на ЦИА, Џон Бренан, смета дека администрацијата на американскиот претседател во заминување, Барак Обама, погрешно ги предвидела последиците од Арапската пролет.

– Мислам дека во Вашингтон, вклучувајќи и одредени претставници на администрацијата, имаа многу нереални очекувања дека Арапската пролет ќе ги задуши авторитарните режими и дека ќе почне да цвета демократија, затоа што тоа народот го сака – изјави Бренан.

Тој додаде дека концептот демократија во реалноста не бил вкоренет во многу луѓе, култури и земји.

Претходно, првиот човек на ЦИА наведе дека повлекувањето на американската војска од Ирак во 2011 година придонело за формирање и за јакнење на терористичката организација Исламска држава.


Критично важно е односите меѓу САД и Русија да се подобрат, смета шефот на ЦИА


Вашингтон, 5 јануари, 2017 - 12:40 (META) 

Директорот на ЦИА, Џон Бренан, изјави дека од суштинска важност за глобалната стабилност е САД и Русија да ги подобрат меѓусебните односи.

Тој рече дека се залага за премостување на сегашната голема напнатост во односите меѓу Русија и САД.

Бренан во интервју за „Пи-би-си њуз аур“, исто така, оценил дека, според него, не постои основа за приказните за нова студена војна и додаде дека „навистина се надева дека е така“.

– И навистина се надевам дека односите меѓу Москва и Вашингтон ќе се поправат затоа што е од критична важност за глобалната стабилност САД и Русија да имаат подобри односи. Јас апсолутно го поддржувам тоа – рече Бренан.


Директорот на ЦИА до Трамп: Не чепкај го договорот со Иран и внимателно со Русија


Вашингтон, 30 ноември, 2016 - 10:44 (META) 

Директорот на Централната разузнавачка агенција (ЦИА), Џон Бренан, го предупреди новоизбраниот претседател на САД, Доналд Трамп, дека ставањето крај на договорот меѓу САД и Иран за нуклеарната програма на Техеран би било „катастрофално“ и „врв на глупоста“. Ваквиот став, Бренан го истакнува во интервју за „Би-би-си“, во кое исто така го советува Трамп да биде претпазлив во односите со Русија.

Во текот на својата кампања, Трамп се закани дека ќе го укине договорот со Иран и најави поблиска соработка со Русија.

Бренан, кој треба да замине од функцијата шеф на ЦИА во јануари следната година, во врска со ситуацијата во Сирија ги обвинува сирискиот режим и Русија дека се одговорни за масакрот врз цивилното население, кој го опишува како „недозволив“.

Тој истакна дека администрацијата на САД треба да продолжи со поддршката на силите на умеренетите бунтовници во нивната борба против војската лојална на сирискиот претседател Башар ал Асад.

Русија продолжува да ја игра клучната улога околу иднината на Сирија, вели Бренан во интервјуто, но изразува скепса за волјата на Москва да се дојде до некаков договор за прекинување на непријателствата.

Во врска со наводите за обидите на Русија да влијае на претседателските избори преку хакирање и пуштање на информации во јавноста, директорот на ЦИА во интервјуто потврдува дека имало такви активности од Москва, но за нивното евентулано влијание остава да се произнесат службите задолжени за тоа.

Тој потврдува дека околу ова прашање имал разговори со руските тајни служби од кои барал одговор за овие активности и ги предупредил дека тие можат да завршат лошо.

САД не би требало да „се задржат на нивното ниво“ или да ризикуваат ескалација во односите со Русија одговарајќи на идентичен начин, вели Бренан, и додава дека постојат други начини за да се осигури дека Москва ја разбира пораката дека ваквите активности се неприфатливи.

Тероризмот, вели Бренан, и понатаму останува главна грижа на безбедносната политика на САД. Директорот на ЦИА, посочува дека Исламска држава и понатаму е „многу активна“ и дека бара начин тоа да го покаже, без разлика на случувањата на бојното поле.

„ИД е сè уште способна да изведува терористички напади против Западот“, вели Бренан, кој четири години е на чело на ЦИА.


Директорот на ЦИА е песимистичен за иднината на Сирија


Аспен, 31 јули, 2016 - 16:54 (META) 

Директорот на ЦИА, Џон Бренан изјави дека не е оптимист кога станува збор за иднината на Сирија, која веќе пет години е зафатена од војна.

– Не сум сигурен дека Сирија ќе може повторно да се состави – изјави Бренан на годишниот Безбедносен форум во Аспен.

Ова е една од ретките јавни признанија на американски претставници дека Сирија во сегашната состојба можеби нема да може да ја преживее граѓанската војна.


Директорот на ЦИА ја посетил Москва кон почетокот на март?


Москва, 28 март, 2016 - 13:40 (META) 

Директорот на американската разузнавачка агенција ЦИА, Џон Бренан ја посетил Москва на почетокот на март, соопшти руската агенција „Интерфакс“, повикувајќи се на заменик министерот за надворешни работи на Русија, Олег Сиримолотов.

Бренен меѓу другото имал состанок со руската служба за безбедност (ФСБ), а неговата посета се поврзува со одлуката на Москва да почне повлекување на своите трупи од Сирија, рече Сиримолотов.

Русија кон почетокот на март, ненадејно, по наредба на претседателот Владимир Путин, повлече најголем дел од своите воздушни сили од Сирија, кои од крајот на септември 2015 година учествуваа во воздушните напади во земјата.