Средба на Бајден со косовскиот претседател Хашим Тачи


Вашингтон, 12 јануари, 2017 - 18:52 (META) 

Потпретседателот на САД во заминување, Џо Бајден, денеска се сретнал со претседателот на Косово, Хашим Тачи, соопштија од кабинетот на Бајден во Вашингтон.

Бајден, како што се наведува, на средбата истакнал дека САД и понатаму остануваат подготвени да продолжат да го помагаат развојот на Косово и целосната интеграција на земјата во меѓународната заедница.

Тој уште еднаш ја повикал владата во Приштина да го продолжи дијалогот со Србија, како и примената на реформите неопходни за борбата против корупцијата и за економскиот развој на Косово.

На американскиот потпретседател Џо Бајден мандатот му истекува на 20 јануари.


Бајден му порача на Трамп дека е „време да порасне“


Вашингтон, 6 јануари, 2017 - 11:00 (META) 

Потпретседателот на САД во заминување, Џо Бајден, ги критикуваше изјавите на новоизбраниот американски претседател, Доналд Трамп, за разузнавачките агенции и му порача дека е „време да порасне“.

Бајден, како што јавуваат светските агенции, ги оценил како „неразумни“ ставовите на Трамп во врска со извештаите на разузнавачките агенции за влијанието на руските хакери на претседателските избори во САД.

„Претседателот да нема доверба и да не е подготвен да ги сослуша разузнавачките агенции, од одбраната до ЦИА, тоа е целосно неразумно“, рекол Бајден.

Новоизбраниот американски претседател денеска треба да има состанок со разузнавачките агенции во врска со вмешаноста на Русија во хакерските напади. Трамп претходно повеќепати ги отфрли тврдењата од официјалните извештаи на безбедносните и на разузнавачките агенции дека Русија е вмешана во хакериските напади на Демократската партија на САД и дека влијаела на претседателските избори.

„Мислите дека знаете повеќе од разузнавачките служби, тоа е како јас да кажам дека знам повеќе за физиката од мојот професор по физика“, нагласил американскот потпретседател.

Бајден го критикувал и однесувањето на Трамп на социјалните мрежи.

„Доналд, порасни, време е да се однесуваш како возрасен човек, сега си претседател. Време е нешто да направиш и да покажеш што знаеш“, порачал Бајден.


Бајден изрази сочувство за загинатите во НАТО бомбардирањата во Србија


Белград, 16 август, 2016 - 19:59 (META) 

Американскиот потпретседател Џо Бајден денеска во Белград им изрази сочувство на сите семејства на загинатите во НАТО бомбардирањата.

– САД и Србија, секако не се согласуваат околу сите прашања, има многу лузни и рани кои постојат уште од 90-те години, но се надевам дека ќе преземеме чекори и тоа ќе го направат други, нови генерации, а целиот регион ќе забележи економски раст, рече Бајден на заедничката прес-конференција со премиерот на Србија, Александар Вучиќ.

Бајден оцени дека земјите во регионот треба преземат чекори поправање на грешките од минатото и додаде дека Србија претставува клучен политички и економски камен-темелник за целиот регион.

Вучиќ од друга страна рече дека очекува голема поддршка од САД за зачувување на мирот и стабилноста во регионот.

– Судири се случуваат многу лесно. Доволна е една искра и сите да влеземе во хаос. Мора да посветиме повеќе енергија за зачувување на мирот и стабилизација – рече Вучиќ, заблагодарувајќи му се на Бајден за поддршката.

Српскиот премиер исто така и заблагодари на САД и за поддршката на кој и ја даваат на Србија за евроинтеграциите.


Бајден ѝ порача нa Турција да ги гони пучистите согласно законот


Вашингтон, 22 јули, 2016 - 10:27 (META) 

Американскиот потпретседател Џо Бајден во телефонски разговор со турскиот премиер Бинали Јилдирим ја повикал Турција да ги гони пучистите во согласност со владеењето на законот, соопшти Белата куќа.

– Бајден изрази одлучна поддршка на турската демократија и ја поздрави посветеноста на турскиот народ на демократските институции – се вели во соопштението, а пренесуваат светските медиуми.

Во него се додава дека американскиот потпретседател повикал истрагата за извршителите на обидот за пуч да биде спроведена на начин што ќе ја зајакне довербата на јавноста во демократските институции и во владеењето на законот.

Официјалните лица на Турција соопштија дека бројката на уапсени по пучот во земјата надминала 10.000 лица.


Тајната служба застрелала вооружен маж пред Белата куќа


Вашингтон, 21 мај, 2016 - 10:57 (META) 

Припадници на тајната служба на САД вчера застрелале вооружен маж пред Белата куќа, поради што пристапот кон објектот бил блокиран извесно време, јавуваат светските медиуми.

Од полицијата за „Еј-би-си њуз“ изјавиле дека лицето извадило оружје кај безбедносниот пункт во близина на зградата, поради што било застрелано во стомакот.

Напаѓачот бил пренесен во болница со тешки повреди, соопштиле официјалните служби.

Претседателот Барак Обама за време на инцидентот не бил во Белата куќа, туку играл голф во предградието на Вашингтон.

Американскиот потпретседател Џо Бајден, кој се наоѓал во зградата за време на пукањето, веднаш бил однесен на безбедно место, јавуваат медиумите.


Џо Бајден во ненајавена посета на Ирак


Багдад, 29 април, 2016 - 14:14 (META) 

Потпретседателот на САД, Џо Бајден, денеска пристигна во ненајавена посета на Ирак, каде се сретна со ирачкиот премиер Хајдер ал-Абади, разговарајќи за политичките и за безбедносните прашања.

Ова е првпат Бајден, како клучна личност од Белата куќа за односите со Ирак, да ја посети оваа земја од повлекувањето на американските сили во 2011 година, но ова е трета посета овој мецес на високи американски претставници во државата.

– Бајден има блиски односи со ирачките лидери. Тие се во контакт барем еднаш во десет дена – изјави висок претставник на американската администрација, кој заедно со Бајден пристигнал во Ирак.


Бајден жали поради цивилните жртви при НАТО-бомбардирањата во 90-тите


Вашингтон, 25 март, 2016 - 12:03 (META) 

Потпретседателот на САД, Џозеф Бајден, во телефонскиот разговор со премиерот на Србија, Александар Вучиќ, изразил жалење поради цивилните жртви за време на акцијата на НАТО во 1999 година, како и војните во текот на 90-те години, објавено е на интернет-страницата на Белата куќа.

Бајден и Вучиќ вчера телефонски разговарале, на денот кога Србија обележа 17 години од почетокот на бомбардирањето на поранешна Југославија.

Истовремено, Бајден ја пофалил визијата на Вучиќ и напорите да изгради европска иднина на Србија.

„Двајцата лидери повторни го истакнале значењето на блиските односи меѓу САД и Србија и се согласиле дека е потребно да се сочува моментот и дијалогот меѓу Србија и Косово за да се промивира стабилноста и просперитетот на сите луѓе во регионот“, стои во соопштението.


САД и Турција се подготвени за воено решавање на кризата во Сирија


Истанбул, 23 јануари, 2016 - 16:59 (META) 

Американскиот потпретседател Џо Бајден изјави денеска дека Вашингтон и Анкара се подготвени за воено решавање на кризата во Сирија, доколку не се постигне политички договор.

– Знаеме дека е подобро ако се постигне политичко решение, но ако тоа не е можно, подготвени сме по воен пат да ја отстраниме Исламска држава – изјави Бајден на прес-конференција во Истанбул.

По средбата со турскиот премиер Ахмет Давутоглу, американскиот потпретседател изјави дека тие двајца разговарале за тоа дека САД и Турција, како членки на НАТО, ќе продолжат да ги помагаат бунтовничките сили на сунитските Арапи во борбата против сирискиот претседател Башар ал Асад.


Бајден и Ципрас разговараа за спорот за името


Давос, 20 јануари, 2016 - 16:58 (META) 

Грчкиот премиер Алексис Ципрас и потпретседателот на Соединетите Американски Држави (САД), Џо Бајден, во Давос разговараа за спорот за името. На денешната средба на двајцата политичари кои присуствуваат на Светскиот економски форум, било истакнато дека и Грција и САД им даваат голема важност на преговорите за името во рамки на Обединетите нации (ОН), под палката на посредникот Метју Нимиц.

Во разговорите за грчко-македонскиот спор, Бајден и Ципрас забележале дека е неопходно изборите во Македонија да придонесат за обезбедување на стабилноста на државата, но и за креирање поволна клима за заеднички-прифатливо решение за името, кое би ѝ помогнало на Македонија за нејзината европска перспектива.

Бајден и Ципрас разговарале и за грчката програма за штедење, бегалската криза, развивање на грчко-американската соработка, потенцијални американски инвестиции, енергетските прашања и кипарското прашање.

Средбата на грчкиот премиер со американскиот потпретседател доаѓа само една недела по состанокот на Бајден и на Никола Груевски, минатата недела во Вашингтон. Експремиерот Груевски се сретна со Бајден само неколку дена пред да поднесе оставка.


Груевски: Со Бајден зборувавме и за добрите работи и за предизвиците


Вашингтон, 12 јануари, 2016 - 0:04 (META) 

Заврши средбата помеѓу премиерот Никола Груевски и потпретседателот на САД, Џо Бајден, на која се зборувало за политичкиот дијалог, реформите, економијата и за економската соработка, како и за членството на Македонија во ЕУ и во НАТО.

– Со Бајден имавме одлична и пријателска средба. Од последното наше гледање досега се имаат случено многу добри работи, но и многу предизвици. Зборувавме и за добрите работи и за предизвиците. Америка е наш партнер, ние имаме потпишано декларација за стратегиско партнерство во 2008 година и во многу работи имаме сериозна поддршка од САД во овој изминат период. На средбата зборувавме за повеќе теми. Зборувавме за политичкиот договор, за реформите во повеќе сфери, за економијата и за економскта соработка, за безбедносните предизвици, но зборувавме и за членството на Македонија во НАТО и во Европската унија. Ние ќе продолжиме да соработуваме и во иднина со Америка, особено на полето на влезот на Македонија во НАТО и во ЕУ и нивната поддршка во тој правец ќе биде многу значајна за нас во иднина – изјави Груевски по средбата.

Претходно Груевски оствари средби и со Пити Сешн, претседател на Законодавниот комитет на Конгресот, и со Ален Берсин, помошник секретар за национална безбедност.

Груевски и Сешн на средбата ги поздравиле билатералните односи помеѓу Република Македонија и САД, истакнувајќи заложба за личен ангажман во нивното понатамошно продлабочување и унапредување, а со Берсин разговарале за можностите за унапредување на соработката на Република Македонија и на САД во областа на безбедноста и на превенцијата од безбедносни ризици.