!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Жесток отпор на џихадистите пред Тал Араф


Багдад, 29 август, 2017 - 18:29 (META) 

Ирачката војска денеска извела серија воздушни и артилериски напади на позиции на екстремистите на Исламска држава, оддалечени 10 километри северозападно од Тал Араф.

Припадниците на ИД ѝ пружаат жесток отпор на ирачката војска пред ослободениот град Тал Араф, еден од последните упоришта на џихадистите во Ирак.

Властите во Багдад во неделата соопштија дека ирачката војска „целосно го ослободила“ градот Тал Араф од екстремистите на ИД.

Градот е на 150 километри од сириската граница, а се наоѓа покрај главниот пат што ИД го користи за снабдување.

Џихадистите во јуни 2014 година го зазедоа северниот град Тал Араф, кој се наоѓа на половина пат меѓу Мосул и сириската граница, како и пограничните зони.


Експлодира куќа во Шпанија во која џихадистите правеле бомби


Барселона, 18 август, 2017 - 12:03 (META) 

Куќа која се наоѓа јужно од Барселона целосно е разнесена во експлозија, а се сомнева дека во неа џихадистите правеле бомби, јавуваат светските медиуми. Има мртви и повредени!

Во вчерашниот терористички напад во центарот на Барселона се повредени најмалку стотина лица, а 13 се убиени. Осум часа по првиот напад се случи и втор во познатото летувалиште Камбрилс.

Експлозијата во куќата, која се наоѓа на околу 200 километри јужно од Барселона се случила после двата напада и во неа загина едно лице, а шест се повредени.

Набрзо по првата експлозија во куќата одекнала и втора, во која се повредени полицајци и пожарникари кои ја пребарувале куќата.

Соседите велат дека во куќата живееле браќа од Северна Африка.


Сириската војска целосно ја презела контролата врз Палмира од милитантите на ИД


Дамаск, 2 март, 2017 - 20:34 (META) 

Сириската војска, поддржана од Русија, целосно ја презела контролата врз античкиот град Палмира од милитантите на Исламска држава, потврдиле властите во Дамаск и во Москва, јавува „Би-би-си“.

Војската на Сирија и други провладини сили, според извештаите, навлегле во градот и ги истиснале милитантите на ИД, со што ставиле крај на втората окупација на Палмира од страна на џихадистичката група.

Борците на ИД првпат беа истерани од Палмира во март минатата година, но успеаја повторно да го заземат градот.

За време на првата окупација, милитантите уништија дел од античките споменици и градби во Палмира, кои беа дел од светското културно наследство.


Четириесет и четири жени од Косово биле на боиштата на Блискиот Исток


Приштина, 26 јануари, 2017 - 13:44 (META) 

Косовскиот центар за безбедносни студии соопшти дека од почетокот на конфликтите во Сирија и во Ирак, од 2012 до 2016 година, 44 косовски жени биле вклучени во тие конфликти, а меѓу нив има и 27 деца.

Врз основа на истражувањето на овој центар, „жените кои учествувале во терористичките организации давале нега, промовирале идеологија на ектремно насилство и регрутирале други жени да им се придружат на екстремистичките групи“.

Косовската полиција пронашла седум жени кои се вратиле на Косово, додека една се соочува со обвинение и чека судска пресуда.

Во извештајот на Центарот се нагласува дека најмалку шест од нив се изолирани и без институционална поддршка, додека некои од оние кои се вратиле, ги изгубиле сопрузите и морале повторно да се омажат.

Органите за безбедност соопштија дека 316 косовски државјани учествувале во странски конфликти и оти таму сè уште се наоѓаат околу 140 Косовци. Се верува дека во Косово се вратиле 117, а 35 се казнети.

Собранието на Косово усвои закон кој забранува Косовците да се борат на странски боишта, а за таквото дело се предвидува казна од пет до 15 години затвор.


Oбвинителството го потврди координираниот лов на терористи со Албанија и со Косово


Скопје, 8 ноември, 2016 - 11:01 (META) 

Координирана антитерористичка операција деновиве е спроведена во Албанија, Македонија и во Косово за апсење на лица, осомничени за регрутирање борци за Исламска држава од Балканот. Според информациите што вчера ги објавија албанските и косовските медиуми, осомничените, наводно, планирале и терористички акции на Балканот.

Од Јавното обвинителство за „Мета“ го потврдија учеството на македонските власти во антитерористичката операција и најавија повеќе детали за акцијата во текот на денот.

Вчера албанската полиција соопшти дека во соработка со обвинителството за сериозен криминал уапсила четири лица од албанска националност, а операцијата била изведена во Тирана, Скадар, Дебар и во Елбасан.

Властите во Приштина истиот ден соопштија дека во рамките на операцијата на територијата на Косово биле уапсени седум лица. Јавното обвинителство на Косово потврдило дека осомничените биле во контакт со други радикални исламисти во регионот.

Во Македонија изминатата година Јавното обвинителство и полицијата спроведоа две акции, „Ќелија“ и „Ќелија 2“, во кои беа уапсени поголем број лица за регрутирање борци за боиштата на Блискиот Исток. Тие беа обвинети за учество во странски воени и паравоени формации, а поголем дел од нив добија затворски казни, откако ја признаа вината и се спогодија со обвинителството.


Ал Багдади е сигурен во победа на ИД во Мосул


Мосул, 3 ноември, 2016 - 11:50 (META) 

Лидерот на Исламска држава, Абу Бакр ал Багдади, изјави дека е сигурен во победа на ИД во Мосул, а тоа го порача во официјална снимка што ја објави џихадистичката организација.

Ова е прво обраќање на Багдади откако почна офанзивата на ирачкиот град Мосул.
Багдади во порака ги повика луѓето во Мосул да се борат против „божјите непријатели“, а борците самоубијци ги повика да ги „уништат градовите на неверниците“.

Тој на снимката порачува дека ИД нема да се повлече од Мосул.

Ирачките безбедносни сили и курдските борци почнаа офанзива на Мосул на 17 октомври со воздушна и со копнена поддршка на коалицијата против сунитските екстремисти на чело со САД.

Ирачките антитерористички единици во вторникот ја зазедоа зградата на државната телевизија во Мосул, што досега е најважниот објект што го презеле од почетокот на офанзивата против џихадистите на ИД.

Екстремистите на Исламска држава го зазедоа Мосул во 2014 година и тој го претставува нивното последното големо упориште во Ирак.


ИД оставила зад себе 72 масовни гробници


Дамаск, 30 август, 2016 - 10:28 (META) 

Исламска држава оставила зад себе 72 масовни гробници со илјадници мртви, но веројатно ќе бидат пронајдени уште многу откако џихадистите ќе се повлечат, јавува агенцијата „Асошиејтед прес“.

Бројот на мртвите во тие гробници се движат од 5.200 до повеќе од 15.000 лица.

Во Сирија се наоѓаат повеќе од 17 масовни гробници, меѓу кои и една во која се закопани тела на стотина припадници на едно племе.

Истражувањето на американската новинска агенција покажало дека такви локации се наоѓаат и во затворот „Бадуш“ кај Мосул, каде се убиени повеќе од 600 затвореници, а тоа го докажуваат и ексклузивните сателитски фотографии.

Од 72 масовни гробници, колку што документирала американската агенција, најмалата содржела три тела, додека најголемата се верува дека има повеќе од 1.000 тела.


Сириската опозиција го зазеде градот Манбаџ


Манбиџ, 13 август, 2016 - 18:58 (META) 

Сириските опозициски сили, поддржани од САД, ја презедоа целосната контрола врз градот Манбиџ, во близина на турската граница, откако последните борци на Исламска држава го напуштија градот, изјави портпаролот на Сириските демократски сили, Шарфан Дарвиш.

Тој истакна дека бунтовниците сега го пребаруваат градот по заминувањето на последната група екстремисти, додавајќи дека се ослободени и повеќе од 2.000 цивили, кои биле чувани како заложници.

– Градот сега е целосно под наша контрола, но преземаме акции за негово чистење – објасни Дарвиш.

Сириските бунтовници нагласија дека не сакале да извршат напад од големи размери врз силите на ИД во градот поради цивилите, поради што бил и склучен договор да им биде дозволено на џихадистите слободно да го напуштат Манбиџ.

Според американски претставници, по завршувањето на операцијата за ослободување на Манбиџ ќе може да се почне акција за освојување на градот Рака, каде се очекуваат тешки борби.


Во Авганистан убиени 300 борци на Исламска држава


Њу Делхи, 10 август, 2016 - 16:40 (META) 

Авганистанските сили, со помош на САД убиле 300 борци на Исламска држава во операциите кои ги покренале пред две недели, изјави денеска американскиот и НАТО генералот Џон Николсон.

Николсон оцени дека со ова е зададен голем удар на ИД и додаде дека офанзивата е покрената во Нагархар.

Се претпоставува дека ИД има контрола врз тро или четири од повеќе пд 400 области во Авганистан.
Николсон, кој допатува во Њу Делхи за да разговара со претставници на индијската војска рече дека за време на операциите се убиени „одреден број истакнати лидери“ на ИД, како и 300 борци.

ИД во Авганистан се појави кон почетокот на минатата година и имала околу 3.000 борци во врвот на својата моќ во оваа земја.


Исламска држава го зазеде гасното наоѓалиште Шаер во Источна Сирија


Дамаск, 5 мај, 2016 - 18:07 (META) 

Исламска држава денеска го зазеде главното наоѓалиште на гас Шаер, во Источна Сирија, пренесоа британските медиуми, повикувајќи се на бунтовнички извори и на невладини организации.

Ова е прв борбен успех на џихадистите во реонот на Палмира, откако во март беа потиснати од градот.

Според агенцијата „Амак“, блиска на оваа џихадистичка група, борците воспоставиле контрола врз гасното наоѓалиште и неговите инсталации, каде биле разместени сириски војници.

Џихадистите, притоа, убиле најмалку 30 војници и стекнале големо количество тешко оружје, вклучувајќи тенкови и ракети.

Сирискиот центар за надзор на човековите права потврди дека Исламска држава го зазела реонот на наоѓалиштето, што се наоѓа на околу 150 километри северозападно од Палмира.

Настанот се случил по тридневни борби и покрај масовните воздушни напади за потиснување на џихадистите.