Германија: Транспортирани 44 тела од авионската несреќа


Берлин, 10 јуни, 2015 - 13:24 (META) 

Тела на 44 жртви од авионската несреќа на француските Алпи денеска стигнаа во Дизелдорф, каде ќе бидат вратени на семејствата за да бидат погребани.

„Ербас A320“ на компанијата „Џерманвингс“ се урна на француските Алпи на 24 март. Сите 150 патници и членови на екипажот загинале.

Врз основа на информациите добиени од црните кутии, заклучено е дека копилотот Андреас Лубиц намерно го урнал авионот.


Лубиц вежбал како да го урне авионот на „Џерманвингс“


Берлин, 6 мај, 2015 - 12:19 (META) 

Андреас Лубиц, копилотот осомничен дека намерно го урна авионот на „Џерманвингс“ и така уби 150 лица, на претходниот лет вежбал како да урне авион.

Германскиот весник „Билд“, наведувајќи извор близок до француската агенција БЕА кој го истражува случајот, пишува дека Лубиц истиот ден кога се случила несреќата, вежбал како да урне авион, контролирано спуштајќи го без причина.

Лубиц страдал од тешка депресија, а при преглед на компјутерот во неговиот стан, утврдено е дека во пресрет на несреќата, на интернет пребарувал на кој начин може да изврши самоубиство, наведува агенцијата.


Одржана комеморација за жртвите во несреќата на „Џерманвингс“


Келн, 17 април, 2015 - 20:36 (META) 

Околу 1.400 луѓе, меѓу нив и 500 членови на семејствата на жртвите, присуствувале на комеморацијата која во знак на сеќавање на 150 патници што ги загубија животите во авионската несреќа на „Џерманвингс“ денеска се одржа во катедралата во Келн, пренесува ХРТ.

На комеморацијата, на која била одржана екуменска богослужба, присуствувале германската канцеларка, Ангела Меркел, францускиот министер во владата, Ален Видалие, и шпанскиот министер за внатрешни работи, Хорхе Фернандез Дијаз.

Главен говорник на собирот бил германскиот претседател, Јоаким Гаук.

– Нè поврзуваат тагата, болката и чувството на беспомошност, но, исто така, нè поврзува и заемната поддршка, помошта и тоа што сме тука едни за други – рекол германскиот претседател.

На олтарот на катедралата биле ставени свеќи за секоја од жртвите во несреќата, а пред него биле поставени големи екрани за да можат комеморацијата да ја следат и оние за кои немало место во катедралата.


Германските контролори бараат далечинско управување со авионите


Берлин, 15 април, 2015 - 16:38 (META) 

Германската контрола за летање ја повика авионската индустрија да ја разгледа можноста за развој на технологии што би овозможиле во вонредни ситуации, далечински, од земја, да се преземе управувањето со патнички авион за безбедно да се приземји.

Апелот на експертите за безбедност во авиосообраќајот доаѓа по авионската несреќа во која пилотот на германската авиокомпанија „Џерманвингс“, Андреас Лубиц, намерно го урна авионот на француските Алпи, убивајќи со себе уште 149 лица.

– Мораме да мислиме дека денешната технологија ќе биде надмината – рече Клаус Дитер Ширле, директор на германската компанија задолжена за безбедност во авиосообраќајот.

Таквиот систем, според Ширле, во вонредни ситуации би можел да преземе команда во авионот и да го насочи авионот на безбедно, кон копно.
– Сепак, не би рекол дека тоа е наједноставното решение – наведе тој и додаде дека таква технологија веројатно ќе биде развиена следната деценија.


Лубиц во кафето на пилотот ставил диуретик


Берлин, 9 април, 2015 - 12:22 (META) 

Копилотот на „Џерманвингс“, 28-годишниот Андреас Лубиц, кој намерно го урнал авионот и со себе во смрт однел 149 лица, наводно во кафето на пилотот ставил диуретик за да го присили пилотот да го напушти кокпитот.

Германските медиуми наведуваат дека истражителите го пребарале компјутерот на Лубиц и во него пронашле податоци што говорат дека тој пред несреќата на интернет порачувал и диуретик.

Полицијата сè уште го истражува причините поради кои копилотот Лубиц го урнал авионот, поради што не сака да ги коментира пишувањата на медиумите.


Објавена фотографија од пилотот-херој, веднаш до таа на Лубиц


Келн, 7 април, 2015 - 11:36 (META) 

Британскиот весник „Дејли мејл“ ја објави првата фотографија од пилотот Патрик Сондхајмер, кој се обидел да го пречи Андреас Лубиц да го урне авионот на „Џерманвингс“ на француските Алпи и со себе да убие 149 луѓе.

Единствената фотографија на која се гледа Сондхајмер (првиот од лево на фотографијата) е снимена е седиштето на „Џерманвингс“ во Келн.

Контроверзија предизвика фактот што неговата фотографија е веднаш до онаа од копилотот Андреас Лубиц, човекот кој намерно го урна авионот и предизвика трагедија од невидени размери.


Надлежните не знаеле за состојбата на Лубиц


Берлин, 5 април, 2015 - 14:37 (META) 

Германското Федерално биро за воздухопловство соопшти дека немале претходни сознанија дека копилотот на авионот на „Џерманвингс“, Андреас Лубиц, се борел со тешка депресија, пред катастрофата на француските Алпи, во која загинаа 150 луѓе.

Од Федералното биро, за весникот „Велт ам сонтаг“, навеле дека првпат слушнале за менталните проблеми на Лубиц кога добиле пристап во неговото медицинско досие во „Луфтханза“ на 27 март, три дена по несреќата.
Лекарите на „Луфтханза“ кои го прегледале Лубиц, не ги известиле властите дека е во рана фаза на длабока депресија.

Весникот наведува дека лекарите на компанијата психолошки го тестирале Лубиц најмалку шест пати, од 2009 година, но понатамошни проверки на неговото ментално здравје не биле спроведени.


Авион на „Џерманвингс“ непланирано слетал во Венеција


Венеција, 4 април, 2015 - 17:26 (META) 

Авион на германската авиокомпанија „Џерманвингс“ бил принуден да слета во Венеција бидејќи на еден од патниците и на еден член на екипажот одеднаш им се слошило.

Авионот на летот 03882 од Хановер до Рим бил пренасочен на аеродромот „Марко Поло“ во Венеција, каде на патниците им било кажано да почекаат во чекалницата на терминалот за поаѓања.

Ова се случува за помалку од две седмици откако авион на истата компанија се сруши на француските Алпи, каде загинаа сите 150 патници и членови на екипажот, а осомничен дека намерно го соборил леталото е копилотот Андреас Лубиц.

Италијанскиот весник „Месаџеро“ пренел изјава на Евгениј Бартолини, професор од Рим, кој рекол дека на патниците кои седеле во редот зад него им било потребна помош поради страв од летање и вознемиреност.

„Кога авионот слета, капетанот ни рече преку микрофон дека на еден член од екипажот и на еден патник им се слошило и затоа одлучил да слета на аеродромот „Марко Поло“ во Венеција“, изјавил Бартолини.

Од „Џерманвингс“ демантирале дека станува збор за итна ситуација, но го потврдиле непланираното слетување во Венеција.
„Две лица, патник и член на екипажот, почувствувале гадење и им била потребна медицинска помош“, се наведува во соопштението од компанијата.


Втората црна кутија потврди дека Лубиц намерно го урнал авионот


Скопје, 3 април, 2015 - 13:00 (META) 

Втората црна кутија на „ербасот“ на „Џерманвингс“, кој минатата недела падна на француските Алпи, потврди дека копилотот Андреас Лубиц намерно го урнал авионот, со што со себе во смрт однел уште 149 лица, потврди француското Биро за истраги и анализи за безбедност во цивилната авијација (БЕА).

Во извештајот на БЕА се наведува дека копилотот користел автоматски пилот за да го доведе авионот во состојба на брзо спуштање кон висината од 100 метри.
Пилотот ги променил автоматските поставки на патот за време на слетувањето и ја зголемил брзината, покажуваат податоците од втората црна кутија, која содржи технички податоци за летот.

Податоците од првата кутија, на која се забележани разговорите во кокпитот, покажуваат дека Лубиц ја заклучил вратата кога пилотот излегол надвор, а потоа го однел авионот во положба за да удри во планината.


Пронајдена втората црна кутија од кобниот лет на „Џерманвингс“


Париз, 2 април, 2015 - 17:07 (META) 

Пронајдена е втората црна кутија од „ербасот“ на „Џерманвингс“, кој минатиот вторник се урна на француските Алпи, јавуваат француските медиуми.

Втората црна кутија би можела дополнително да ги расветли околностите на авионската несреќа во која загинаа 150 лица.

Снимките од првата црна кутија покажале дека авионот најверојатно го урнал неговиот копилот Андреас Лубиц.

Деталите од втората црна кутија се клучни за истрагата за несреќата затоа што содржат информации како што е брзината на авионот, неговата насока, но и аудиоснимка од настаните во авионот.

Германското обвинителство тврди дека Лубиц неколку дена пред несреќата на интернет пребарувал методи за самоубиство, како и информации за безбедносната врата на кокпитот. Податоците се добиени со анализа на резултатите од пребарувањата на неговиот „ајпад“ во период од 16 до 23 март.