!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Шест лица убиени и осуммина ранети во терористички напад на џамија во Квебек


Квебек сити, 30 јануари, 2017 - 9:56 (META) 

Шест лица се убиени, а осуммина се ранети во вооружен напад на џамија за време на вечерна молитва, што синоќа се случил во канадскиот град Квебек Сити, сооошти канадската полиција, пренесува „Би-би-си“.

Во нападот учестувале две лица, кои отвориле оган во исламскиот културен центар во Квебек, додека во него имало околу 50 верници кои биле на молитва.

Еден од напаѓачите, како што пренесува „Би-би-си“, бил уапсен на самото место, додека другиот во близина на џамијата.

Канадските власти, како што соопштиле од полицијата, нападот го третираат како терористички напад.

„Го осудуваме овој терористички напад на муслимани во центарот, кој е место за молитва и засолниште. Канаѓаните муслимани се важен дел на нашето национално ткиво и за ваквите бесмилени дела нема место во нашите заедници, градови и во земјата“, изјавил канадскиот премиер Џастин Трудо.

Загинатите, според полицијата, се на возраст од 35 до 70 години, а дел од повредените биле во критична состојба.

Во јуни минатата година, истата џамија беше мета на инцидент од исламофоби, кога пред нејзините порти беше оставена свинска глава, со порака „добар апетит“.


Трудо: Бегалците се добредојдени во Канада


Отава, 29 јануари, 2017 - 14:38 (META) 

Канадскиот премиер Џастин Трудо им порача на жртвите на прогонот, тероризмот и војната дека се добредојдени во Канада.

– Сите оние кои се протерани и бегаат од тероризам и војна, Канада ќе ги прифати без разлика на верата. Различноста е наша сила – напиша Трудо на „Твитер“ и на неговиот профил на „Фејсбук“ со хаштаг „добредојдовте во Канада“.

Одговорот на Трудо следува откако американскиот претседател Доналд Трамп потпиша указ со кој се забранува влез во САД на лицата од седум муслимански земји.


Почина канадскиот пејач, поет и уметник Леонард Коен


Монтреал, 11 ноември, 2016 - 10:15 (META) 

Вчера, на 82-годишна возраст, почина канадскиот пејач, текстописец и поет Леонард Коен. Веста за неговата смрт е објавена на официјалниот фејсбук-профил на музичарот, но не се наведени детали околу причините за смртта.

„Со длабока тага соопштуваме дека почина легендарниот поет, текстописец и уметник Леонард Коен“, стои во соопштението.

Канадскиот премиер Џастин Трудо му оддаде почит на пејачот, кој беше еден од највлијателните музичари и текстописци, кој со својот впечатлив баритон раскажуваше приказни за љубов, смрт, омраза, војна и за мир.

„Со длабока тага ја примив веста за смртта на легендарниот Леонард Коен. Тој ќе остане запаметен по своите груби вокали, карактеристичниот хумор и прогонувачките лирики кои ги направија негови песни омилени за многу генерации“, изјавил Трудо, пренесува „Би-би-си“.

Коен се појави во 1960-тите години, заедно со други музчки легенди, меѓу кои и годинешниот добитник на Нобеловата награда за литература, Боб Дилан, и неговиот сонародник Џони Мичел.

Во петдецениската кариера Коен објави 14 студиски албуми, од кои последниот, насловен „Сакавте помрачно“ (You Want It Darker), минатиот месец.

Во 2008 година канадскиот музичар беше примен во „Рокенрол холот на славните“.


Канадските парламентарци гласаа за родово неутрална химна


Ванкувер, 16 јуни, 2016 - 15:29 (META) 

Канадските парламентарци денеска гласаа за измена на химната за нејзините стихови да бидат во согласност со политиката на новата либерална влада, која сака да биде инклузивна кон жените.

Со законот ќе се измени англиската верзија на химната „О, Канада“, така што стихот „О, Канада, ти си толку голема земја што сите твои синови вистински те сакаат“ ќе гласи „… што сите ние те сакаме“.

Измените, кои ги предложи претставник на Либералната партија, иако минале во долниот дом на парламентот во кој либералите имаат мнозинство, сепак треба да добијат потврда и од сенатот.

Премиерот Џастин Трудо рече дека родовата еднаквост е еден од приоритетите на неговата политика, откако беше избран минатата година и именуваше еднаков број мажи и жени во својот кабинет.

Тоа е прв пример на еднаква застапеност на жени и на мажи во канадската влада.


Трудо ќе биде првиот премиер на Канада кој ќе учествува на Парада на гордоста


Торонто, 23 февруари, 2016 - 19:20 (META) 

Организаторите на Парадата на гордоста во Торонто објавија дека Џастин Трудо ќе биде првиот премиер на Канада кој ќе учествува во маршот, јавува „Си-Би-Ес“.

Трудо ќе се појави на парадата на 3 јули.

Градот ќе ја организира манифестацијата на тема припадност и инклузивност.

Покрај Трудо, во маршот ќе учествуваат и министерот за финансии Бил Морно и премиерката на Онтарио, Четлин Вин, како и градоначалникот на Торонто, Џон Тори.

Организаторите нагласија дека место во маршот ќе имаат и сириските бегалци кои се хомосексуалци.


Канада ги повлекува борбените авиони од Ирак и од Сирија


Отава, 9 февруари, 2016 - 13:42 (META) 

Канада до 22 февруари ќе стави крај на воздушните удари во Ирак и во Сирија, на чија мета се припадниците на Исламска држава, и ќе ги врати дома своите шест борбени авиони, соопшти канадската влада.

Наместо тоа, Отава двојно ќе го зголеми бројот на лицата за воена обука во регионот, чиј број ќе биде 210.

Во мисијата на коалицијата, предводена од САД, и понатаму ќе учествуваат летала за набљудување и за дополнување гориво, соопшти министерот за одбрана на Канада, Харијет Сајан, на прес-конференцијата со премиерот Џастин Трудо.

За време на својата предизборна кампања, Трудо вети дека ќе ги врати борбените авиони во Канада и ќе стави крај на нивната мисија во Ирак и во Сирија, додека екипите за обука ќе продолжат да работат.

 


Канада: Стигна првиот авион со бегалци


Монтреал, 11 декември, 2015 - 10:13 (META) 

Првиот авион на канадската влада со бегалци од Сирија утрово слета во Канада, каде бегалците беа пречекани од премиерот Џастин Трудо.

Трудо, пречекувајќи ги 163 Сиријци, рече дека светот покажува како треба да се отворат своите срца.

Новоизбраната канадска влада вети дека со крајот на февруари ќе прими 25.000 бегалци.

Ставот на Канада, кога станува збор за бегалците, се разликува од тој на САД, кои не сакаат да примат мигранти.
Вториот авион со мигранти ќе слета утре во Монтреал.

Канадскиот министер за имиграција, Џон Мекалам, изјави дека сите десет провинции позитивно се изјасниле за примањето бегалци.