!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Џамијата „Али-паша“ во Охрид се реконструира и се конзервира


Охрид, 19 мај, 2017 - 16:13 (META) 

Директорката на Завод и музеј од Охрид, Тања Паскали-Бунташеска, денеска на прес-конференција изјави дека џамијата „Али-паша“ ќе остане во постојниот габарит, не се гради нова џамија, туку се врши само конзервација и реконструкција.

Со оглед на тоа што деновиве во јавноста се дискутираше и се бараа одговори околу конзервацијата и реконструкцијата на џамијата, Паскали-Бунташеска рече дека од Управата за заштита пристигнало одобрение за вршење на конзерваторските истражувања.

– На таа џамија се извршени многу градежни работи кои не соодветствуваа на архитектурата, всушност беа изведени како дивоградби од тогашното муфтиство. Истражувањата ги направивме за да видиме како изгледала џамијата во периодот кога била прогласена за споменик на културата и според нашиот закон да ја вратиме во автентична состојба. Точно е дека минарето е високо 32 метри, но тоа е дел од еден споменик на културата. На овој простор имаше остаток од постоечкото минаре во висина од шест и пол метри – истакна Паскали-Бунташеска.

Конзервацијата ќе трае до септември, па дури потоа ќе се премине на реконструкција на овој споменик на културата.


Нападната џамија во Пакистан, 11 лица загинаа, а 50 се повредени


Исламабад, 31 март, 2017 - 12:12 (META) 

Најмалку 11 лица загинаа, а повеќе десетици се повредени во експлозија кај шиитска џамија во градот Парачинар на северозападот на Пакистан.

Локалните медиуми јавуваат дека 50 лица се повредени и дека одговорноста за нападот ја презеле талибанците.

– Бројот на жртвите може да се зголеми бидејќи сè уште примаме повредени – рече хирург во државната болница „Моен Бегам“.

На местото на експлозијата е испратен воен спасувачки хеликоптер за да помогне при евакуација на повредените.


САД го признаа нападот во Идлиб, но мета не била џамијата


Идлиб, 17 март, 2017 - 10:51 (META) 

Војската на САД потврди дека извела воздушен напад на зграда каде се одржувал состанок на Ал каеда во северниот сириски град Идлиб, наведувајќи дека ќе ги испита извештаите за убиството на повеќе цивили при нападите.

– Не ја гаѓавме џамијата, но зградата што ја гаѓавме, а во која се одржуваше состанок на Ал каеда е на 15 метри од џамијата – изјави портпаролот на американската Централна команда, полковник Џон Томас.

Тој истакна дека американските сили извеле воздушен напад на место каде Ал каеда се состанала и додаде дека командата ќе ги испита наводите за цивилни жртви што настрадале при тој напад.

– Тоа го сфаќаме сериозно. Во нападот е уништена половина зграда, во која се одржа состанокот – рече Томас.

Во воздушниот напад на џамијата загинаа најмалку 42 лица, а повеќе десетици беа повредени.

Нападот се случил за време на вечерната молитва, кога џамијата била полна со верници.


Министерот Нухиу во Штип ги праша „Како сте“ само муслиманите


Штип, 21 февруари, 2017 - 14:54 (META) 

Во време на пладневната молитва во џамијата во Штип, без посебна најави, пристигна министерот за внатрешни работи, Агим Нухиу. Неговата посета е во рамките на проектот „Како сте“ на МВР, преку кој министерот разговара со граѓаните за нивните проблеми.

Нухиу се сретна само со муслиманските верници кои беа на молитва во џамијата.

– Продолжуваме со проектот „Како сте“ и ги прашуваме граѓаните за проблемите што произлегуваат од делокругот на Министерството за внатрешни работи. Јас сум тука за да ја пренесам пораката дека Министерството за внатрешни работи (МВР) ќе биде секогаш отворено за да ја продолжиме нашата соработка – рече Нухиу.

Нухиу не го посети Секторот за внатрешни работи во Штип, чие седиште е на стотина метри од џамијата.

СВР Штип соопшти дека биле само информирани дека ќе доаѓа министерот и за неговата маршрута, по што му организирале обезбедување, како што налага законот.


Во центарот на Битола ископани гробови од Отоманскиот период


Битола, 16 февруари, 2017 - 16:29 (META) 

Во центарот на Битола, кај месноста Стевче Патако, при градежни работи, најдени се човечки коски и остатоци од гроб, од Oсманлискиот период.

На само неколку метри од објектот на урбаната заедница, на самиот агол, градежни работници ископале остатоци од човечки коски, како и делови од гробови, по што по налог на Завод и музеј „Битола“, работите се стопирани и денеска се започнати ископувања, со цел да се утврди за што конкретно станува збор. Ова за „Мета“ го потврди археологот Енгин Насух, кој денеска со екипа од Завод и музеј „Битола“ излезе на терен.

Насух првично смета дека се работи за гробови од Османлискиот период, бидејќи своевремено на таа локација имало џамија.

– Најверојатно не станува збор за гробишта, бидејќи не најдовме гробови во некој организиран редослед, но веројатно се работи за гроб или неколку гробови, за кои допрва треба да се истражува со ископувањата и со слегувањето ниво под ниво. Коски веќе најдовме, за што ќе следи анализа – вели Насух.

Инаку, пред четириесеттина години кога се затрупувала и регулирала реката Курделец, покрај улицата Солунска, во напосредна близина на споменатиот локалитет, исто така биле најдени човечки остатоци.


Шест лица убиени и осуммина ранети во терористички напад на џамија во Квебек


Квебек сити, 30 јануари, 2017 - 9:56 (META) 

Шест лица се убиени, а осуммина се ранети во вооружен напад на џамија за време на вечерна молитва, што синоќа се случил во канадскиот град Квебек Сити, сооошти канадската полиција, пренесува „Би-би-си“.

Во нападот учестувале две лица, кои отвориле оган во исламскиот културен центар во Квебек, додека во него имало околу 50 верници кои биле на молитва.

Еден од напаѓачите, како што пренесува „Би-би-си“, бил уапсен на самото место, додека другиот во близина на џамијата.

Канадските власти, како што соопштиле од полицијата, нападот го третираат како терористички напад.

„Го осудуваме овој терористички напад на муслимани во центарот, кој е место за молитва и засолниште. Канаѓаните муслимани се важен дел на нашето национално ткиво и за ваквите бесмилени дела нема место во нашите заедници, градови и во земјата“, изјавил канадскиот премиер Џастин Трудо.

Загинатите, според полицијата, се на возраст од 35 до 70 години, а дел од повредените биле во критична состојба.

Во јуни минатата година, истата џамија беше мета на инцидент од исламофоби, кога пред нејзините порти беше оставена свинска глава, со порака „добар апетит“.


Две лица повредени при напад на џамија во Истанбул


Истанбул, 1 јануари, 2017 - 17:48 (META) 

Најмалку две лица се повредени при напад во џамијата „Хасан-паша“ во северниот дел на Истанбул, јавуваат светските медиуми.

Нападот се случил кога голем број верници се собирале поради вечерната молитва.

Ова е втор напад во Истанбул, откако претходно за време на дочекот на Нова година, во терористички напад во популарен ноќен клуб беа убиени 39 лица, а ранети се 69.


Пронајден мртов напаѓачот на џамијата во Цирих


Цирих, 20 декември, 2016 - 12:47 (META) 

Напаѓачот кој рани три лица во исламскиот центар во Цирих е мртов, соопшти полицијата.
Кантонската полиција во Цирих соопшти дека властите го идентификувале осомничениот за нападот, но не изнесе повеќе детали.

Напаѓачот вчера упадна во исламски центар и отвори оган кон верниците.

Швајцарската полиција, откако го пронајде телото, ја прекина потрагата.

Инцидентот се случи во молитвен дом во близина на железничката станица во центарот на Цирих.


Упаднале во џамија во Стокхолм и цртале свастики


Стокхолм, 26 ноември, 2016 - 16:56 (META) 

Неидентификувани напаѓачи упаднеле по утринската молитва во џамија во шведската престолнина Стокхолм и со спреј нацртале нацистички свастики и пораки со говор на омраза по ѕидовите, а фрлале и петарди, соопшти локалната полиција.

Официјални лица од џамијата изјавиле дека сите верници, освен еден, ја напуштиле џамијата за време на нападот, како и дека верникот кој останал бил вознемирен поради тоа што се случило.

Полицијата наведе дека го истражува инцидентот кој е забележан како вандализам и како кривично дело од омраза, но дека досега никој не е уапсен.

– Ова не е нешто што се очекуваше. Тешко е да се разбере што се случува во општеството, како на меѓународно ниво така и во нашата сопствена земја. Јас веќе не ја препознавам Шведска – изјави Мустафа Тумтурк, претставник на муслиманската заедница во Стокхолм и еден од основачите на џамијата која постои од 1985 година.

Во Шведска во последните години е забележан пораст на напади на џамии и на бегалски централи, откако оваа земја прифати рекорден број на бегалци – 245.000 во 2014 и во 2015 година.


Франција затвора четири џамии поради ширење радикализам


Париз, 3 ноември, 2016 - 12:03 (META) 

Францускиот министер за внатрешни работи, Бернар Казнев, наложи да се затворат четири џамии во парискиот регион.

Оваа мерка е наложена затоа што џамиите пропагирале радикална идеологија. Десетина џамии беа затворени во Франција по нападите изведени во Париз во ноември 2015 година.

Министерството не прецизираше кои џамии ќе бидат затворени, но наведе дека тие се источно, западно и северно од француската престолнина.

„Под превезот на верата, на тие места се одржуваат состаноци кои, всушност, имаат цел да промовираат радикална идеологија“, се вели во соопштението.

Вонредната состојба која е на сила во Франција, овозможува затворање на верски објекти во кои проповедањето може да предизвика омраза, насилство и терористички дела.