Заев испрати писмо со сочувство до египетскиот претседател за нападот на Синај


Скопје, 26 ноември, 2017 - 15:33 (META) 

Премиерот Зоран Заев, во име на Владата и на граѓаните на Република Македонија, испрати писмо со сочувство до претседателот на Египет, Абдул Фатах ал-Сиси, за нападот во џамијата во Бир ал-Абед на Синај, во кој загинаа повеќе од 300 лица, меѓу кои и деца.

„Прифатете го моето најдлабоко сочувство за трагичниот настан и за загубените животи. Овој ужасен настан предизвика длабока тага и страв кај сите наши граѓани и семејства во двете земји. Останува надежта дека ние, политичките лидери, остануваме посветени на спречување на таквите ужасни напади врз нашата слобода и дека заеднички ќе се бориме да изградиме побезбедни и подобри општества“, се вели во писмото со сочувство на премиерот Заев до египетскиот претседател Абдул Фатах ал-Сиси.


Се зголемува бројот на загинати во нападот на Синај


Каиро, 25 ноември, 2017 - 16:40 (META) 

Бројот на загинати во нападот на џамија во северниот дел на египетскиот Синајски Полуостров се зголеми на 305 лица, додека најмалку 126 лица се повредени, соопшти денеска египетското државно обвинителство.

Главниот државен обвинител, Набил Садек, соопштил дека нападот го извршиле меѓу 25 и 30 милитанти и дека меѓу загинатите 27 се деца, пренесуваат светските медиумите.

Милитантите биле стационирани на главната врата на џамијата и покрај 12 прозорци, пред да почнат да пукаат кон верниците што се наоѓале внатре. Милитантите запалиле и седум автомобили, кои биле паркирани пред џамијата.

Египетскиот претседател Абдел Фатах ал-Сиси денеска наредил изградба на мавзолеј за лицата убиени во нападот во џамијата.

Засега ниту една група не ја презеде одговорноста за нападот, но агенциите потсетуваат дека Исламска држава претходно вети дека на Синај и во Египет „ќе ги истреби суфиите“, припадници на мистичкото исламско движење, кои екстремистите ги сметаат за еретици. Суфиите се собирале токму во џамијата што беше цел на вчерашниот напад.


Бројот на загинати во Египет се зголеми на 235 лица, претседателот најави „брутален“ одговор


Каиро, 24 ноември, 2017 - 19:04 (META) 

Египетскиот претседател Абдел Фатах ал-Сиси денеска најави „брутален“ одговор по нападот врз џамијата во Синај, во кој, според новите сознанија, животите ги загубиле 235 луѓе.

– Вооружените сили и полицијата ќе ги одмаздат нашите маченици и набргу со сила ќе ги вратат безбедноста и стабилноста – рече Сиси во телевизиското обраќање.

Египетската војска почна со воздушни напади на подрачјето на Синај, концентрирајќи се на планинското подрачје околу џамијата, каде, како што се верува, се кријат напаѓачите.

Вооружените напаѓачи упаднале во џамијата за време на молитвата на припадници на безбедносните сили. Очевидци велат дека прво се слушнала експлозија во близина на џамијата, а потоа напаѓачите, кои пристигнале со четири теренски возила, упаднале во џамијата и отвориле оган.


Бројот на загинатите во Синај се зголеми на 184 лица


Каиро, 24 ноември, 2017 - 15:20 (META) 

Бројот на загинатите во експлозијата и во нападот на џамијата на Синај се зголеми на 184 лица, а на повредените на 120 лица, јавуваат светските медиуми.

Вооружените напаѓачи упаднале во џамијата за време на молитвата на локалните безбедносни припадници.

Засега никој не ја презема одговорноста за нападот, а Египет веќе со години се бори со екстремистите, чии напади се радикализираа по смената на власта во 2013 година.

Египетскиот претседател Абдула Фатах ал-Сиси веднаш свика состанок на највисоките безбедносни претставници.

Очевидци велат дека прво се слушнала експлозија во близина на џамијата, а потоа напаѓачите, кои пристигнале со четири теренски возила, упаднале во џамијата и отвориле оган.

Како што пренесува „Би-би-си“, мета на нападот биле лица кои ги поддржуваат безбедносните сили во Египет.


Најмалку 18 загинати во самоубиствен бомбашки напад во Пакистан


Куета, 5 октомври, 2017 - 20:36 (META) 

Најмалку 18 лица се убиени, а повеќе од 30 се повредени во самоубиствен бомбашки напад кој денеска се случил во светилиште во пакистанската провинција Балучистан, јавуваат светските агенции.

Одговорноста за нападот ја презела екстремистичката група Исламска држава (ИД).

Бомбашкиот напад бил изврешен на влезот на светилиштето, каде за време на нападот пристигале голем број верници за да му оддадат почит на починатиот локален верски лидер.

Меѓу загинатите во нападот е и полицаец, кој го запрел бомбашот на влезот во џамијата и спречил билансот на жртвите да биде поголем.

Малцинските исламски групи во провинцијата Балучистан се честа мета на напади на милитантите, вклучувајќи ја и Исламска држава.

Овој регион е погоден од насилства на два фронта. Покрај нападите на талибанците и на другите сунитски екстремистички групи, сепаратистите во Балучистан ги напаѓаат објектите на централната пакистанска влада.


Еден загинат и десет повредени при удар на комби во пешаци пред џамија во Лондон


Лондон, 19 јуни, 2017 - 10:18 (META) 

Едно лице загинало, додека десет се повредени утрово кога комби ударило во пешаци во близина на џамија во северниот дел на Лондон. Случајот, како што јавуваат светските агенции, го истражуваат припадници на британската антитерористичка единица.

Комбито ударило во муслимански верници, во моментот додека тие излегувале од утринската рамазанска молитва од џамијата во Финсбури парк.

Најголемата британска мулсиманска организација случајот го оцени како чин на исламофобија.

Како што соопшти лондонската Метрополитен полиција, еден маж починал на местото на несреќата. Од полицијата соопштиле дека осуммина повредени биле однесени во три различни болници, додека на две лица им била укажна медицинска помош на самото место.

Четириесет и осумгодишниот маж, кој го управувал комбито и кој бил задржан од минувачите, подоцна бил однесен во болница.

Премиерката на Велика Британија, Тереза Меј, изјавила дека полицијата го третира случајот како „потенцијален терористички напад“.

„Ќе закажам итен состанок ова утро. Сите мои мисли се со жртвите, нивните семејства и со службите за итна помош кои се на местото на несреќата“, изјави Меј.

Градоначалникот на Лондон, Садик Кан, изјави дека дополнителни полициски сили се распоредени низ Лондон, особено во муслиманските квартови.

„Сè уште не ги знаеме деталите, но јасно е дека станува збор за намерен напад на недолжни жители на Лондон, од кои многумина завршувале со молитвата за светиот месец Рамазан…Иако се чини дека ова е напад на одредена заедница, како што беа застрашувачките напади во Манчестер, Вестминистер и на Лондонскиот мост, тоа воедно е и навреда на нашите заеднички вредности како толеранцијата, слободата и почитувањето“, рекол Кан.


Изградбата на џамијата на Попова Шапка продолжува, иако нема дозвола за градба


Тетово, 14 јуни, 2017 - 16:33 (META) 

На Попова Шапка деновиве повторно продолжија градежни активности за изградба на џамија која нема дозвола за градба. Инвеститорот не се откажува од изградбата на џамијата дивоградба, иако тетовскиот општински инспекторат во изминативе две недели, двапати бил на местото каде што се гради и му наложил да го запре градење.

Иако и двете забрани беа испочитувани неколку дена, ископите за поставување на темелите продолжиле уште во текот на вчерашнот ден. Денеска, местото каде што треба да се гради џамијата беше израмнето и се носеше градежен материјал.

Од секторот за урбанизам при Општина Тетово велат дека на таа локација нема издадено никакво одобрение за изградба на верски објект ниту, пак, за каков било објект. Од тетовски општински инспекторат имаат отворено предмет во кој е констатирано дека џамијата е дивоградба.

Во случајот е вклучен и државниот градежен инспекторат, кој само врши надзор на работата на тетовскиот инспекторат. Но, денеска ниту од Општина Тетово ниту од државниот градежен инспекторат не ни одговараа на повиците да објаснат што ќе преземат против инвеститорот, кој и понатами го крши законот.

Од тетовското муфтиство при Исламската верска заедница денеска не беа достапни за коментар.

Претходно за дел од медиумите негираа дека вршат градежни активности за изградба на џамија на Попова Шапка, иако на повеќе билборди поставени на патот кон Попова Шапка пишува дека во туристичкиот центар ќе се гради џамија, а како инвеститор се наведува ИВЗ.

Планот е џамијата најверојатно да биде на три ката, со големо минаре, а локација се наоѓа веднаш над главниот пат на туристичкиот цетнар, на само десетина метри од викендички.


Без дозвола за градба, се подготвува теренот за изградба на џамија на Попова Шапка


Тетово, 30 мај, 2017 - 15:03 (META) 

Без дозвола за градба, во туристичкиот центар Попова Шапка, се вршат градежни активности за изградба на џамија, потврдуваат од секторот за урбанизам при Општина Тетово.

– Викенд-населбата на Попова Шапка е под надлежност на Општина Тетово. За оваа викенд-населба сè уште не е изработен детален урбанистички план и секоја нова градба што се гради е дивоградба. За парцелата каде што сега се изведуваат градежни активности, нема издадено одобрение за градба. Кога ќе се изработи нов детален урбанистички план, тогаш ние имаме право да издаваме дозволи за градба – велат од секторот за урбанизам при Општина Тетово.

Од Општина Тетово засега не кажуваат какви мерки ќе преземат во врска со овој верски објект.

Според неофицијални информации, општинскиот инспекторат деновиве ги запрел градежните активности, но денеска граѓани ни испратија фотографии на кои се гледа дека градежна механизација работи на проширување на парцелата.

Од тетовскотo муфтиство при Исламската верска заедница (ИВЗ), од каде побаравме став околу изградбата на џамијата, кусо одговорија дека не вршат никакви градежни активности на Попова Шапка.

Инаку, веќе неколку месеци покрај патот кон Попова Шапка, поставени се повеќе билборди со насликана џамија која треба да се гради на Попова Шапка. На билбордот пишува дека инвеститор на овој верски објект е тетовското муфтиство при Исламската верска заедница, а наведени се неколку жиро-сметки на кои граѓаните можат да донираат за изградба на џамијата.


Џамијата „Али-паша“ во Охрид се реконструира и се конзервира


Охрид, 19 мај, 2017 - 16:13 (META) 

Директорката на Завод и музеј од Охрид, Тања Паскали-Бунташеска, денеска на прес-конференција изјави дека џамијата „Али-паша“ ќе остане во постојниот габарит, не се гради нова џамија, туку се врши само конзервација и реконструкција.

Со оглед на тоа што деновиве во јавноста се дискутираше и се бараа одговори околу конзервацијата и реконструкцијата на џамијата, Паскали-Бунташеска рече дека од Управата за заштита пристигнало одобрение за вршење на конзерваторските истражувања.

– На таа џамија се извршени многу градежни работи кои не соодветствуваа на архитектурата, всушност беа изведени како дивоградби од тогашното муфтиство. Истражувањата ги направивме за да видиме како изгледала џамијата во периодот кога била прогласена за споменик на културата и според нашиот закон да ја вратиме во автентична состојба. Точно е дека минарето е високо 32 метри, но тоа е дел од еден споменик на културата. На овој простор имаше остаток од постоечкото минаре во висина од шест и пол метри – истакна Паскали-Бунташеска.

Конзервацијата ќе трае до септември, па дури потоа ќе се премине на реконструкција на овој споменик на културата.


Нападната џамија во Пакистан, 11 лица загинаа, а 50 се повредени


Исламабад, 31 март, 2017 - 12:12 (META) 

Најмалку 11 лица загинаа, а повеќе десетици се повредени во експлозија кај шиитска џамија во градот Парачинар на северозападот на Пакистан.

Локалните медиуми јавуваат дека 50 лица се повредени и дека одговорноста за нападот ја презеле талибанците.

– Бројот на жртвите може да се зголеми бидејќи сè уште примаме повредени – рече хирург во државната болница „Моен Бегам“.

На местото на експлозијата е испратен воен спасувачки хеликоптер за да помогне при евакуација на повредените.