Интернетот расте, а со него и цензурата, малтретирањето и лажните вести


Лос Анџелес, 12 април, 2018 - 15:02 (META) 

Голем дел од луѓето стануваат сè посвесни за вистинското влијание на интернет врз нашите општества, економии и личната благосостојба, односно ги отвораат очите за фактот дека „колку е здрав интернетот“ не  е само техничко прашање, туку и „човечко“, се вели во извештајот „Здравствената состојба на интернетот 2018“ подготвен од Фондацијата „Мозила“.

Според подготвувачите, не е лесно да се даде кус одговор на прашањето во каква состојба е интернет и неговите корисници, но сепак посочува дека работите се подобруваат во три категории: пристап, достапност, енкрипција.

Наспроти тоа, приликите се влошуваат во поглед на цензурата, онлајн-малтретирањето и користењето на електрична енергија.

Извештајот „Здравјето на интернет 2018“ е групиран во пет категории: приватност и сигурност, отвореност, дигитална вклученост, веб-писменост и децентрализација. Според авторите, во текот на минатата година, најголемите причини за загриженост на „здравјето“ на интернет се сигурноста на интернетот на нештата, лажните вести и преголемите ИТ играчи.

Во делот за лажните вести како пример преку кој се илустрира овој феномен е искуството на дел од тимот на македонската Фондација за интернет и општество „Метаморфозис“, која од 2012 година со помош на УСАИД го има основано Сервисот за проверка на факти од медиумите.

За лажните вести, инаку, покрај „дежурните“ теми за Русија и изборите во САД во 2016 година, се одбележува дека дезинформирањето на социјалните медиуми станува тема што го загрижува целиот свет.

Истовремено се предвидува дека до 2020 година, дури 30 милијарди различни уреди ќе бидат онлајн, што може да бидат злоупотребени од злонамерни луѓе или фирми. Надминување на опасноста ќе значи поправање на лошиот софтвер, хардвер и практики на користење.

Како прва во „нездравите“ области е наведена категоријата на отвореноста и податоците, односно блокирањето на пристапот до социјалните медиуми и апликациите за комуникација, за огромен дел од светската популација. Тоа е случај во Кина, Русија, Индија, Турција, Иран, Украина, Египет, Бразил и Судан.

Во поглед на дигиталната вклученост, се вели дека иако медиумските компании стануваат посвесни за онлајн-малтретирањето, ситуацијата станува критична. Притоа, многу крупни играчи почнуваат да ја користат вештачката интелигенција, но таа, како што се наведува во извештајот, некогаш по грешка го блокира слободниот говор.

Во листата на негативности е вклучено и сè поголемото користење електрична енергија поврзано со интернет-активностите.


Oпштините побрзо ќе ги услужуваат граѓаните со софтверот за градежно земјиште


Скопје, 13 март, 2018 - 12:42 (META) 

Министерството за транспорт и врски го предаде на Заедницата на единиците на локалните самоуправи (ЗЕЛС) софтверскиот систем „е-Градежно земјиште“ кој треба да го користат општините во Македонија.

Оваа софтверска програма има за цел да им овозможи на граѓаните да ја спроведат целата постапка по поднесени барања за отуѓување, за давање на долготраен и краткотраен закуп, за давање на право на трајно користење, за пренесување на право на сопственост и засновање на право на стварна службеност на градежно земјиште во сопственост на државата.

Премиерот Зоран Заев рече дека, пренесувањето на надележостите од централна кон локалните власти, ќе создаде услови за уште поодговорно работење на општините во интерес на граѓаните.

– Со пренесувањето на софтверот за управување со градежното земјиште, општините ќе бидат многу помоќни, ќе бидат многу посилни, пофлексибилни, попосветени, да им излезат во пресрет на барањата на граѓаните или на компаниите. Ова, треба да значи охрабрување за сите инвеститори во Македонија, дека постапките кои ќе ги водат како први чекори за идни градби ќе бидат решени на локално ниво – рече премиерот Зоран Заев.

Тој додаде дека овој сервис кој е во рацете на општините е уште еден чекор од децентрализацијата, односно од пренесувањето на правата и обврските од централната на локалната власт.

Со програмата „е-Градежно земјиште“, во период од неколку месеци се очекува да има забрзување на сите постапки и да се воспостави висок степен на прецизност и дисциплина во однос на роковите.


Техада: Се надевам дека Собранието ќе го реши прашањето за локалните избори


Скопје, 10 март, 2017 - 12:32 (META) 

„Се надевам дека Собранието ќе го реши наскоро ова прашање и се надевам дека наскоро ќе има избори, иако малку подоцна отколку што беше планирано. Сепак, најважно е изборите да се одржат“, одговори на новинарско прашање за пролонгирањето на локалните избори швајцарската амбасадорка Сибил Зутер Техада, на завршниот настан на програмата „Форуми во заедницата“.

Министерката за локална самоуправа Ширет Елези, на прашањето како ќе функционираат општините ако наскоро не се распишат локалните избори, рече дека за локалните избори не е надлежно Министерството за локална самоуправа, туку Министерството за правда и дека не сака да прејудицира кога ќе бидат распишани изборите и што ќе се случи.

Програмата „Форуми во заедницата“ е модел за вклучување на граѓаните во донесувањето одлуки од локалната самоуправа и има цел да го поддржи процесот на децентрализација во Македонија.

Граѓаните, на овој начин, имаат можност да го подобрат секојдневниот живот со сопствени идеи и со учество, а администрацијата да развие локално управување преку учество, одговорност и доверба.