Скопјанка пријавила дека воспитувачка го тепала нејзиниот шестгодишен син


Скопје, 7 февруари, 2018 - 14:17 (META) 

Скопјанка во Полициската станица Аеродром вчера пријавила дека нејзиниот шестгодишен син бил тепан од воспитувачка во градинка, соопшти СВР Скопје, појаснувајќи дека се работи на расчистување на случајот.

Жената кога завчера попладнето дошла да го земе синот од градинка забележала дека има оток на десниот образ и го прашала од што му е, на што детето рекло дека неговата воспитувачка неколку пати го удрила по образот. Мајката потоа го информирала директорот на градинката кој и кажал да пријави в полиција. Жената од градинката го однела детето на лекарски преглед, со кој е утврдено дека детето има оток, а вчера попладне го пријавила случајот в полиција.


Две кучиња искасале 10-годишно дете


Скопје, 16 декември, 2017 - 16:15 (META) 

Десетгодишно дете вчера попладне било нападнато и искасано од две кучиња на ул. „Волгоградска“ во Скопје, соопшти полицијата.

Синоќа во 20.30 часот, 50-годишниот Т.С. во полициската станица Карпош пријавил дека истиот ден околу 17:20 часот, на ул. „Волгоградска“ две кучиња го нападнале неговиот 10-годишен син.

Детето, како што се наведува во полициското соопштение, се здобил со видливи повреди – расекотини на двете нозе.


Се урна мал руски авион – само четиригодишно дете преживеало


Москва, 15 ноември, 2017 - 12:00 (META) 

Осум лица загинаа при пад на мал авион“ Л-410 на подрачјето на градот Нељкан, на истокот на Русија, соопшти руското Министерството за вонредни ситуации во земјата.

Само еден патник ја преживеал несреќата, станува збор за четиригодишно дете кое веднаш е хоспитализирано со тешки повреди.

Засега не се знае која е причината за несреќата. Истражниот комитет утврдува дали авионот паднал поради лошите временски услови, пилотска грешка или техничка неисправност.


ОЈО утврдува кривична одговорност за смртта на двегодишното дете од Охрид


Охрид, 10 октомври, 2017 - 15:42 (META) 

Основното јавно обвинителство Охрид го доби наодот од обдукција и од токсиколошката анализа на двегодишното дете кое почина во август годинава на детското одделение во Медицинскиот центар Охрид.

„Патолошко-хистолошката дијагноза и резултатите од токсилошките анализи укажуваат дека смртта кај детето настанала поради воспаление на двете белодробни крила, по што инфекцијата, навлегувајќи во крвта, предизвикала сепса. Детето првпат било примено на 25 август и по препишана терапија било пуштено дома. Поради влошување на состојбата, тоа двати било донесено во охридската болница, но последниот пат без знаци на живот“, информираат од ОЈО.


Седумгодишно момче исчезна во нападот во Барселона


Барселона, 18 август, 2017 - 11:06 (META) 

Седумгодишно момче од Австралија, кое се одвоило од семејството за време на терористичкиот напад во Барселона исчезнало, соопшти неговото семејство.

Тони Кадмен од Сиднеј на „Фејсбук“ напишал дека неговиот внук Џулијан исчезнал, а неговата мајка е во болница во тешка, но стабилна состојба, пренесува „Гардијан“.

Таткото на момчето, Ендрју вели дека разговарале неколку часа пред да исчезне. Тој веќе е на пат кон Барселона.
Семејството на интернет сподели фотографија од Џулијан, која би требало да помогне во потрагата.

Шефицата на австралиската дипломатија, Џули Бишоп рече дека еден Австралиец е исчезнат, а четворица се повредени во нападот.

Тригодишно девојче е најмладата жртва во нападот во Барселона, во кој загинаа 13 лица, а повредени се повеќе од 100.


Две деца повредени – едното паднало од трети кат, другото прободено со нож во стомакот


Штип, 25 јули, 2017 - 13:10 (META) 

Вчерашната ноќ била ужасна за две деца од Штип и од Битола – едното паднало од трети кат и добило тешки повреди, а другото било прободено со нож во стомакот.

Како што соопшти МВР, во Клиничкиот центар во Штип вчера во 22.10 часот било донесено 12-годишно дете од Штип, кое добило тешки телесни повреди при пад од трети кат од зграда на улицата Енгелсова. Поради сериозноста на повредите, малолетникот бил пренесен во Ургентен центар Скопје за понатамошно лекување.

Вчера пет минути пред полноќ, во СВР Битола било пријавено дека во итна медицинска помош бил донесен 14-годишник, кој бил повреден со нож во стомакот. За среќа, не биле повредени внатрешните органи, но детето е задржано на лекување. Било прободено со нож во стомакот од непознат сторител на улицата Филип Втори Македонски во Битола. Полицијата трага по сторителот.


Поведена постапка против едно лице за полов напад врз дете


Скопје, 2 јуни, 2017 - 12:10 (META) 

Основното јавно обвинителство (ОЈО) денеска соопшти дека е поведена постапка против едно лице за полов напад врз дете, за што му е определен и притвор од триесет дена.

Осомничениот делото го вршел во периодот од септември до декември 2016 година, во времето кога ги користел законски овозможените видувања со своето дете од вонбрачна заедница. Однесувањето на детето создало сомнеж кај мајката, која го пријавила случајот, а од тој момент Обвинителството ги презело сите потребни дејства за прибирање докази и за утврдување на факти во предметот.

„По спроведување на предистражна постапка, надлежен јавен обвинител од ОЈО Скопје донесе наредба за спроведување на истражна постапка против осомничениот за полов напад врз малолетник кој не наполнил 14 години“, се наведува во соопштението.

Обвинителството ценејќи дека се исполнети законските основи, до судија на претходна постапка поднело предлог за определување притвор за осомниченото лице. Судот го прифатил предлогот и со решение на осомничениот му е определен притвор во времетраење од триесет дена.


Поднесено обвинение за убиството на четиригодишното дете во Куманово


Скопје, 23 декември, 2016 - 16:09 (META) 

Основното јавно обвинителство Куманово поднело обвинителен акт против Б.И., осомничен за прегазувањето на четиригодишно дете, кое се случи на 25 јуни годинава кај кумановската болница. Како што соопшти денеска Јавното обвинителство, осомничениот се товари за убиство, според член 123 од Кривичниот законик.

Во врска со случајот, поднесено е обвинение против уште три други лица за насилство.

„На 25 јуни годинава, додека Б.И. заедно со неговата девојка чекале ред во здравствениот дом во Куманово, тој се скарал со родителот на четиригодишното момче за непочитување ред за прием во установата. Расправијата продолжила надвор од Здравствениот дом, кога членови на семејството на момчето ги нападнале Б.И. и неговиот брат. Обвинетиот со својот автомобил марка „мерцедес“ се обидел да ги прегази мајката, таткото и четиригодишното дете, кое од здобиените повреди почина“, стои во соопштението од Јавното обвинителство.


Жена и дете загинаа во пожар во бегалски камп на Лезбос


Атина, 25 ноември, 2016 - 9:57 (META) 

Жена и малолетно дете изгореа живи во пожар што синоќа избувна во бегалскиот камп Морија на островот Лезбос. Починатите бегалци се 60-годишна жена и нејзиниот 5-годишен внук, двајцата Курди од Ирак, кои биле во Морија четири месеци.

Трагедијата се случила ноќта, околу 23 часот, кога, според очевидци, експлодирала плинската боца на која жената готвела во нејзиниот шатор, а нејзиното внуче спиело внатре со неа. Пожарот се проширил низ голем дел од кампот, уништувајќи повеќе шатори. Во болница во Атина, со сериозни изгореници веднаш биле пренесени мајката на починатото дете и нејзиното второ четиригодишно дете со уште две лица, а со помали повреди и со респираторни проблеми во болница на Лезбос се лекуваат уште десетина лица.

Покрај пожарот, во кампот почнале и демонстрации, во кои дополнително биле уништени шатори на бегалците.

Противпожарните служби успеале да го изгаснат силниот пожар во кампот околу 3 часот утринава, а поради големата штета голем дел од бегалците ноќта ја поминале под ведро небо.

Според официјалните бројки на грчката влада, на Лезбос има повеќе од 6.000 бегалци, иако бегалскиот камп на островот има капацитет за 3.500 луѓе. Лезбос е остров со најголем број бегалци и мигранти кои се заглавени со месеци и според договорот меѓу Европската Унија и Турција, доколку не добијат азил, ќе мора да бидат вратени во Турција. Во Морија често има проблематични демонстрации, главно поради гневот на бегалците кои со месеци се заглавени без некаква перспектива и надеж дека наскоро ќе може да заминат на саканата дестинација.

Во цела Грција има повеќе од 62.000 бегалци.


Притворен жител на селото Алдинци, осомничен за убиство на брата си


Крушево, 10 октомври, 2016 - 12:13 (META) 

Судија на претходна постапка на барање на јавен обвинител му одреди 30 дена притвор на жител на крушевското село Алдинци, осомничен за убиство на својот и брат и за обид за убиство на 14-годишно дете, кои се случиле викендов.

Осомничениот, како што соопштија денеска од обвинителството, го убил својот брат во нивната семејна куќа. Тој го нападнал брата си со рачка од секрира, а потоа продолжил да го удира по главата со метална цевка, додека не го усмртил.

„По извршеното убиство, осомничениот се упатил кон куќа во непосредна близина, каде што со истата метална водоводна цевка се обидел да лиши од живот едно 14-годишно дете, но притоа бил спречен од соседите кои го фатиле. Детето со телесни повреди е пренесено во болницата во Прилеп, каде му е укажана лекарска помош и се наоѓа надвор од животна опасност. Судијата на претходна постапка го прифати предлогот од надлежниот јавен обвинител и на осомничениот му определи притвор во траење од 30 дена“, стои во соопштението од јавното обвинителство.