АХВ врши инспекција во пекарницата каде беше забележан стаорец


Скопје, 6 август, 2018 - 15:48 (META) 

Агенцијата за храна и ветеринарство (АХВ) соопшти дека се врши инспекција во пекарницата во центарот на Скопје, откако на социјалните мрежи се распространи фотографијата од стаорец во угостителскиот објект.

Инспекциските служби на агенцијата вршат проверка дали овој оператор со храна ги почитува пропишаните општи и посебни барања за безбедност на храната, вклучително и тоа дали се спроведени мерките за дезинфекција, дезинсекција и дератизација.

Во првите шест месеци од годинава извршени се вкупно 8.336 инспекциски надзори кај оператори со храна од неживотинско потекло, од кои кај пекарници, бурекџилници и трговци со леб и бели печива 1.027 контроли. Со контролите констатирани се пропусти од помал обем кои се однесуваат на применатаа на Добрите хигиенски и производни пракси или HACCP системот, како и поради несоодветно означување на производите.

Инспекциските служби изрекле  156 наредби за отстранување на констатираните недоследности, даден е налог за 82 едукации, а изречени се и 2 времени забрани.

Граѓаните може секоја недоследност да ја пријавуваат на бесплатната телефонска линија за потрошувачите на Агенцијата за храна и ветеринарство  0800 3 22 22, или на електронската пошта info@fva.gov.mk.


Извршена е дератизација и дезинфекција во Симница по двата смртни случаи


Скопје, 30 јули, 2017 - 18:26 (META) 

Комисијата за заразни болести при Министерството за здравство на 26 јули одржала итна седница поради двата смртни случаи од вирусна хеморагична треска, соопшти денеска Министерството за здравство.

Во соопштението се наведува дека стручен тим извршил епидемиолошки увид, анкета на домаќинствата на починатите, притоа е извршена дезинфекција и дератизација во домовите и во околината на починатите лица, земени се мостри од водата за пиење, извршена е едукација за лични превентивни мерки и совет за јавување на лекар при појава на први симптоми на болест.

Од анкетата со семејствата, добиена е информација дека починатите и поголем дел од семејството работеле и често престојувале на свое приватно бачило. Експертски тим излегол на терен и го посетиле бачилото во месноста наречена Буковиќ, во близина на преминот Стража.

„На бачилото не се затекнати ниту лица ниту овци. Извршена е дезинфекција во затворениот објект, во отворениот објект и во неговата непосредна околина како во близина на магацинот. Исто така, дезинфекција беше направена и на пошироката околина во самиот ограден простор и околу него“, се вели во соопштението од Министерството за здравство.

Од министерството соопштуваат дека Институтот за јавно здравје подготвил брошура за здравствените работници, но и за општата популација за едукација во врска со вирусните хеморагични грозници. Брошурата е објавена на веб-страницата на ИЈЗ, а е доставена и до центрите за јавно здравје за споделување со матични лекари и со други здравствени работници.


Дератизација во Тетово по поминати две децении


Тетово, 4 јуни, 2015 - 13:07 (META) 

По повеќе од две децении, почна да се спроведува дератизација на канализацискиот систем во Тетово. Целта е да се намали бројката на глодарите што предизвикуваат заразни болести. Дератизацијата на канализациските мрежи превентивно ќе ја спречи појавата на глодари на јавните површини и во објекти во градот, велат од Центарот за јавно здравје Тетово, кои ја спроведуваат дератизацијата, по претходно склучен договор со Општина Тетово.

– Дератизацијата се врши повеќе од две недели. Формирани се две екипи, кои работат на терен. Досега се истретирани вкупно 1.428 шахти – изјави д-р Дијана Јовановска, директорка на Центар за јавно здравје Тетово. Таа додаде дека е планирано в сабота целосно да заврши дератизацијата, со која ќе бидат опфатени околу 1.600 шахти

– Целта е да се намали бројката на глодари за да не предизвикуваат заразни болести – рече д-р Сузана Субашиќ од Центарот за јавно здравје Тетово.

Центарот за јавно здравје деновиве ќе почне и со дезинсекција во општина Тетово и во општина Јегуновце. Дезинсекцијата ќе се врши во наредните три месеци од земја и од воздух.

– Ние имаме апарат со кој дезинсекција вршиме на ладен начин во ноќните часови, неколку дена во месеците јуни, јули и август – вели д-р Субашиќ.

Јовановска, пак, додаде дека во соработка со Министерството за здравство, ќе се врши и авионско прскање во поплавените подрачја. Дезинсекцијата, според одговорните во Центарот за јавно здравје Тетово, ќе се врши до крајот на август, а дератизација ќе биде спроведена уште еднаш, во октомври.


Спроведена дератизација во поплавените места во Прилепско


Прилеп, 5 мај, 2015 - 14:13 (META) 

Стручните екипи на Центарот за јавно здравје од Прилеп со стабилизирањето на временските услови, почнаа дератизација во согласност со подготвениот план за поплавените населени места кои беа опфатени со поплавите кога настана излевање од коритото на Црна Река.

Со спроведувањето на мерките за дератизација, ќе се сведе на минимум можноста за зголемување на бројот на заразни болести кои евентуално би потекнале од загрозените подрачја. Како една од мерките, која во значителна мера ќе помогне е интервентната дератизација на населените места: Канатларци, Ерековци, Тополчани, Кадино Село, Мало и Големо Коњари, кои беа поплавени како и на целиот канализационен систем во општина Прилеп.

Директорот на Центарот за јавно здраве, Гоце Ингилизов, во изјава за медиумите истакна дека со оваа мерка ќе се намали бројот на штетни глодари, особено на црниот и на сивиот глушец како потенцијални преносители на заразните болести: туларемија, бруцелоза, лептоспироза, чума, салмонела, лигавка, шап, беснило и други.
Мамците се поставуваат во штали, амбари или помошни простории во населените места и во подземниот канализационен систем во градот. За оваа интервентна дератизација од буџетот на Општина Прилеп, издвоени се 700.000 денари.

Целта на дератизацијата покрај редуцирањето на глодарите е и зголемување на степенот на здравствена заштита на населението и одржување на стабилна хигиено-епидемиолошка состојба во градот. Кон средината на овој месец на територијата на Општина Прилеп ќе биде споредена авионска дезинсекција од Министерството за здравство.

Б.З.


Превентивна дератизација во Штип


Штип, 28 април, 2015 - 11:12 (META) 

Општината Штип денеска попладне ќе спроведе дератизација, како превентива против болеста туларемија што ја пренесуваат глодарите.

Овластена фирма ќе постави препарат во 160 канализациски шахти на територијата на општината.

Во Штип нема регистрирано случај на заболен од туларемија, меѓутоа епидемија беше прогласена во соседната општина Лозово.

Епидемиолозите сметаат дека парцијалната дератизација во одделни општини не е доволна заштита од болеста, туку дератизација треба да се изврши на територија на целата држава, како што се правеше некогаш.

Дератизацијата ќе се врши во периодот од 16 до 20 часот попладне.