!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Градоначалничките кандидати за Струга за проблемите со водата и во сообраќајот


Струга, 4 октомври, 2017 - 16:04 (META) 

Лавдрим Елмази од Беса, Васил Ашталкоски од СДСМ и Зијадин Села од Алијанса за Албанците на вчерашната дебата на дебатниот карван „Живот во Македонија“ (#Debatpernime), кој го организираат „Порталб“, „Калѕо“ и „Вистиномер“, порачаа дека имаат решенија за најгорливите проблеми на Струга. Понудија неколку решенија за кои ветуваат дека ќе ги реализираат ако граѓаните им ја дадат довербата и освојат градоначалнички мандат.

Во дебатата што ја водеше новинарката Јета Џара, за сообраќајниот хаос што се случува во текот на летната сезона, кога возила се паркираат насекаде, Зијадин Села вети подземно паркиралиште кај плажата Караорман, Васил Ашталкоски ветува катна гаража, а Лавдрим Елмази мисли да го реши проблемот со воведување плаќање за паркирање.

За проблемите со водата, Ашталкоски вели дека треба да се направи комплетна реконструкција на водоводниот систем, а Елмази вели дека проблемите со јавното претпријатие „Проаква“ ќе се решат ако се постави професионалец, а не партиски кадар за директор, а со пари од јапонски инвеститори би се направиле подобрувања на системот.

И двајцата нудат решенија за проблемите со струшката депонија, која е голем извор на загадување на воздухот, бидејќи на неа честопати се случуваат пожари.

Дебатите се организираат со поддршка од телевизијата „Арт“ и од „БИРН Македонија“.

Вечерва „Живот во Македонија“ одржува дебата во Сарај.

Дебатата може да се следи во живо на „Порталб“, со почеток во 18 часот.


Градоначалничките кандидати за Тетово ветуваат решавање на сите проблеми


Тетово, 3 октомври, 2017 - 13:20 (META) 

Ветувајќи целосна транспарентност и посветеност на доброто на граѓаните, кандидадите Албанци за градоначалници на општина Тетово во вчерашната дебата на дебатниот карван „Живот во Македонија“ (#Debatpernime), кој го организираат „Порталб“, „Калѕо“ и телевизијата „Арт“, порачаа дека ако го освојат мандатот, конечно ќе прекине легализирањето дивоградби, урбаниот и сообраќајниот хаос и дека ќе го надминат проблемот со водоснабдувањето.

Теута Арифи, досегашен градоначалник на Тетово и градоначалнички кандидати на ДУИ, Аднан Незири, кандидат на Алијанса за Албанците, Бардил Даути од ДПА и Биљал Касами од Беса, во дебатата водена од новинарката Јета Џара, зборуваа и за своите идеи за решавање на проблемот со отпадот во Полог, извести „Порталб“.

Речиси сите се за поголемо рециклирање на отпадот и за градење модерна фабрика за отпад.

Денеска дебатниот карван „Живот во Македонија“ е во Струга. Дебатата може да се следи во живо на „Порталб“, со почеток во 18 часот, како и на телевизијата „Арт“ и на „Калѕо“.


Тетовци истурија отпад пред Општината и побараа оставка од Арифи


Тетово, 20 август, 2017 - 16:16 (META) 

Протестот на тетовци за чист воздух помина мирно, а граѓаните побaраа оставка од градоначалничката на Тетово, Теута Арифи. Тие истурија отпад пред зградата на Општината и извикуваа „Сакаме да дишеме“ и „Еве ви го отпадот“.

Граѓаните најпрво се собраа на плоштадот, а од таму се упатија кон зградата на Општината.

Тие денеска се жалеа на неподнослива миризба која се чувствуваше во градот, откако синоќа беше изгаснат пожарот на депонијата.

Генералниот секретар на Владата, Драги Рашковски, најави дека расчистувањето на тетовската депонија ќе почне утре.


Тетовци денеска ќе протестираат за чист воздух, се жалат на неподнослива миризба


Тетово, 20 август, 2017 - 11:37 (META) 

Граѓаните на Тетово денеска во 13 часот ќе се соберат на плоштад за да протестираат за чист воздух, бидејќи по горењето на депонијата, жителите се жалат дека во градот се чувствува неподнослива миризба.

Од плоштадот, како што е најавено на фејсбук-настанот „Депонија Тетово“, ќе се упатат кон зградата на Општина Тетово.

Генералниот секретар на Владата, Драги Рашковски, на својот фејсбук-профил објави дека чистењето на депонијата во Тетово, треба да почне од утре.

„Владата обезбеди средства и склучи договор за дислокација и чистење на тетовската депонија, процес кој треба да почне утре (понеделник). Некој тоа го знаел и затоа два дена пред да почне чистењето и дислокацијата, ја запалил се со цел да не може да дојде до тоа или да се одложи процесот, притоа загрозувајки го здравјето на луѓето. Кому му е ова во интерес? Проценете сами“, пишува Рашковски.

Според фотографиите објавени на социјалните мрежи, револтираните граѓани од утринава истураат смет пред влезната врата на зградата на Општината.

Депонијата во Тетово вчера гореше цел ден, а пожарот беше локализиран синоќа.


Тетовската депонија гори, ветрот ги отежнува условите за гаснење на пожарот


Тетово, 19 август, 2017 - 17:03 (META) 

Дивата депонија во Тетово која се наоѓа на влезот на градот гори, а пожарникарите се обидуваат да го локализираат пожарот.

Огнот се шири кон силосите за жито на „Жито Полог“, а според градоначалничката на Тетово, Теута Арифи за неколку часа ќе се знае дали екипите на територијалната противпожарна единица ќе успеат да го изгаснат пожарот или ќе биде потребна помош.

Во гаснењето на пожарот биле ангажирани четири цистерни, а ветерот ги усложнувал условите за негово локализирање.


Владата побарала поголем ангажман од институциите за справување со пожарите


Скопје, 1 август, 2017 - 11:30 (META) 

Владата на Реублика Македонија синоќа на 18. седница расправала за повеќе точки, меѓу кои и ситуацијата со пожарот во Требовље, како и за проблемот со струшката депонија, соопшти владината служба за информирање.

Како итна вонредна точка на дневниот ред на седницата, со која претседавал премиерот Зоран Заев, се нашла информацијата за пожарот во Требовље, во општина Македонски Брод, како и за други опожарени локации во земјава.

Притоа, бил задолжен Управувачкиот комитет за координација и управување на системот за управување со кризи, составен од неколку министри и Агрон Буџаку, претседателот на Центарот за управување со кризи (ЦУК), како и од претставници на АРМ, претставник од кабинетот на претседателот Ѓорѓе Иванов и претставник од ЈП „Македонски шуми“ и од УХМР, да донесат итни заклучоци и мерки за засилено дејствување.

Донесена е одлука МВР да го зголеми присуството на терен во сите засегнати подрачја, ЈП „Македонски шуми“ непрекинато да ја информира Дирекцијата за заштита и спасување за сите новонастанати состојби на терен и да продолжи континуирано гасење и локализација на активните пожари, како и да се создадат услови за дејствување на АРМ.

За привремено решавање на проблемот со депонијата во Струга, донесена е одлука со 12 милиони денари (195.000 евра) од буџетските резерви да се компресира сметот од депонијата во Струга и да се пренесе на друга локација.


Владата го усвои дополнетиот ребаланс на буџетот, донесе одлука за струшката депонија


Скопје, 28 јули, 2017 - 19:33 (META) 

Владата на Република Македонија на денешната седница го усвоила предлогот за изменување и за дополнување на буџетот на Република Македонија за 2017 година, по завршената амандманска расправа во собраниските комисии. Со оваа верзија на ребалансот, дополнета со амандмани од пратениците, се определуваат дополнителни 25 милиони денари по одредени ставки и се пренаменуваат пари во согласност со потребите на буџетските корисници, се вели во владиното соопштение.

На седницата што почна попладнево, донесена е и одлука за итно решавање на проблемот со депонијата во Струга. Министерството за финансии и Генералниот секретаријат на Владата добиле задолжение да обезбедат пари за безбедно и економично да се транспортира сметот од струшката депонија до други безбедни депонии во земјава. Исто така, се ангажираат чувари кои ќе ја надгледуваат целата локација, за да превенираат можни идни проблеми.

Истовремено, владиниот кабинет ја усвоил информацијата за проектот за поедноставување на процедурите за известување и за плаќање на персонален данок на доход, кој е финансиран од ИПА-фондовите.

На денешната владина седница, е разгледан и усвоен меморандумот за соработка во полето на природниот гас помеѓу Министерството за економија на Македонија и Министерството за енергетика на Бугарија и министерот за економија бил овластен да го потпише документот. Според Владата, соработка ќе овозможи можност за нова директна врска помеѓу двата системи за природен гас на двете земји.

На седумнаесеттата владина седница биле донесени и заклучоци повразни со организацијата на институционалната прослава на националниот и државен празник 2 Август – Ден на Републиката. Владата определила и членови на организациониот одбор за прослава на државниот празник.


ЛДП: Од ветените 72 милиони евра, во Дрисла не е вложено ниту евро


Скопје, 19 јуни, 2017 - 10:30 (META) 

По неколкуте реакции и обвинувања од ВМРО-ДПМНЕ до министерот Зоран Шапуриќ за непреземање мерки за струшката депонија, неговата партија, ЛДП, денеска ја обвини ВМРО-ДПМНЕ дека не преземала речиси ништо за единствената депонија во Македонија, скопска Дрисла, која, како што вели, исполнува мал дел од стандардите, и не ги реализирала ветувањата за инвестирање во неа.

„Во Македонија постојат 54 депонии од кои, само една – депонијата Дрисла, покрај Скопје, исполнува мал дел од  предвидените национални стандарди.  Во 2005 година, кога министер за животна средина и просторно планирање беше членот на ЛДП, д-р Зоран Шапуриќ, во консултација со домашни и со европски експерти беа усвоени плански документи со кои се предвидува решавање на депонирање на отпадот преку изградба на регионални депонии и со поттикнување на општините да изградат регинални депонии со здружување на сите свои потенцијали. Оттогаш, за 11 години апсолутно владеење ВМРО-ДПМНЕ не покажа никаков интерес за решавање на овој проблем и само неколку дена по заминување во опозиција, преку демагошки пристап, товарот го префрла на новата реформска влада“, се вели во реакцијата од ЛДП.

Партијата вели дека единствениот потег на ВМРО-ДПМНЕ е предавање на Дрисла на странска компанија која ветила инвестиции од 72 милиони евра, а досега не инвестирала ниту едно евро, за разлика од Град Скопје, под управа на градоначалник од ВМРО-ДПМНЕ, кој купувал механизација.


ВМРО-ДПМНЕ: Гаснењето на депонијата нема да го реши проблемот на Струга


Скопје, 18 јуни, 2017 - 12:25 (META) 

ВМРО-ДПМНЕ денеска ги обвини СДСМ и неговите коалициски партнери дека го загрозиле здравјето на граѓаните и животната средина, дозволувајќи 10 дена граѓаните на Струга да го дишат штетниот воздух.

„Со самото гасење на депонијата нема да се реши овој проблем, бидејќи постои опасност повторно да се запали, а истовремено има ризик да ја контаминира земјата и подземните води кои се влеваат во Охридското Езеро и во реката Црн Дрим. Пратениците од ВМРО-ДПМНЕ и од Коалицијата за подобра Македонија, за доброто на граѓаните во четвртокот побараа по итна постапка да се одржи седница на која ќе се разгледува алармантната состојба во Струга, но Талат Џафери се обиде да ја замолчи расправата и да не дозволи процедурални забелешки на пратениците од ВМРО-ДПМНЕ“, се вели во соопштението од опозициската партија.


СДСМ: ВМРО-ДПМНЕ да објасни зошто одби предлог за решавање на проблемот во Струга


Струга, 17 јуни, 2017 - 17:01 (META) 

Наместо да покажува лажна загриженост, ВМРО-ДПМНЕ треба да објасни зошто уште во 2013 година гласаше против предлогот на пратениците на СДСМ за трајно решавање на проблемот со струшката депонија, порача СДСМ во одговор на денешното соопштение на ВМРО-ДПМНЕ, во кое партијата на власт беше обвинета за незаинтересираност и за неспособност за решавање на проблемот на стружани.

„ВМРО-ДПМНЕ 11 години го игнорираше овој, како и многуте проблеми на граѓаните, а пред неколку години како парламентарно мнозниство, го одби предлогот на пратениците од СДСМ, во буџетот на Република Македонија за 2014 година да се издвојат 90 милиони денари за конзервирање на градската депонија во Струга. Проблемот со струшката депонија се решава интензивно со сета расположлива механизација. Пожарот веќe e изгаснат, а ќе следува затрупување на депонијата и нејзино целосно расчистување. Владата предводена од СДСМ ефикасно и трајно ќе го реши долгодишниот проблем со струшката депонија“, се вели во реакцијата од СДСМ.