Пластифицирани пари од 10 и 50 денари ќе се пуштат во употреба, книжните се повлекуваат


Скопје, 29 март, 2018 - 13:20 (META) 

Народна банка ќе пушти во оптек книжни пари изработени од полимер (пластифицирани), во апоени од 10 и 50 денари, информираат од таму.

„Истовремено беше донесена и одлуката за повлекување од оптек на книжните пари во апоени од 10 и 50 денари кои што се во оптек од 8 септември 1996 година, а се употребуваат и во моментов. Согласно со оваа одлука, на денот кога ќе бидат пуштени во оптек книжните пари во апоени од 10 и 50 денари, изработени од полимер, книжните пари со истата апоенска вредност, кои што се во оптек од септември 1996 година, престануваат да бидат законско средство за плаќање. Нив, правните и физичките лица ќе можат бесплатно да ги заменат со други книжни и ковани пари со еквивалентен износ. Замената на книжните пари, од 15 мај годинава до 15 мај следната година, ќе ја вршат деловните банки основани во Македонија, а по овој период, замената ќе се врши во Народната банка“, информираат од таму.

Почнувајќи од 15 април ќе бидат пуштени во оптек и ковани пари во апоен од 2 денари, со ознака на ковање „2018“.

„Со пуштање во оптек на овие ковани пари во готовинскиот платен промет во важност ќе бидат, паралелно, и кованите пари во апоен од 2 денари издадени претходно. На седницата беше донесена и Одлука согласно со која од 2 мај годинава ќе бидат пуштени во оптек и книжни пари во апоен од 100 денари, со ознака за печатење „мај 2018“, по што, паралелно во важност ќе бидат, и книжните пари со истата апоенска вредност издадени досега“, додаваат од таму.


Се враќа довербата во денарот


Скопје, 26 октомври, 2017 - 13:56 (META) 

За разлика од надолните движења на банкарските активности во првиот квартал од 2017 година, во вториот квартал од годината нивните промени се поповолни, се вели во извештајот за ризиците во банкарскиот систем во вториот квартал од 2017 годинa на Народна банка.

Во него се додава дека депозитите, иако минимално, се зголемиле на квартална основа.

„Порастот на депозитите од нефинансиските субјекти, пред сè, се должи на солидниот пораст од 7,9 проценти на денарските депозити од домаќинствата, за разлика од корпоративните депозити, кои се намалија. Побрзиот пораст на денарските во споредба со девизните депозити на домаќинствата е сигнал за постепено враќање на довербата и обновување на процесот на денаризација на депозитите, кој речиси запре во вториот квартал од претходната година под влијание на домашните политички случувања во тој период“, се вели во извештајот.

Во вториот квартал од годината, банките искористиле еден дел од ликвидните средства за позасилена кредитна активност. Така, кредитите на нефинансиските субјекти бележат пораст од 2,2 проценти, најмногу како резултат на долгорочните кредити одобрени на домаќинства.


НБРМ: Зголемено кредитирање на домаќинствата, а намалено на претпријатијата


Скопје, 22 август, 2017 - 11:52 (META) 

Кредитите на домаќинствата имаат месечен пораст од 0,8 проценти, а на годишно ниво 9,8 проценти покажуваат податоците на Народна банка. Притоа најголем дел од зголемувањето на кредитирањето се должи на порастот на денарските пласмани.

Од одобрените кредити, потрошувачките имаат месечен пораст од 1,1 процент, а станбените од 0,5 проценти. Годишниот пораст кај потрошувачките кредити е 12, а на станбените 13,7 проценти.

Кредитите на претпријатијата бележат намалување од 0,2 проценти како резултат на намалување на девизното кредитирање, кое, како што наведуваат од НБРМ, го надминува порастот на денарското кредитирање.


Нова кривична пријава за ексдиректорот на Неврохирургија


Скопје, 15 јули, 2017 - 13:41 (META) 

СВР Скопје соопшти дека до Основното јавно обвинителство-Скопје поднел кривична пријава против А.Ч. (57), поранешен директор на Клиниката за неврохирургија во Kлиничкиoт центар „Мајка Тереза“. Го товари за противправно стекнување и прикривање имот.

Според новата пријава, Александар Чапаровски, кој претходно во мај доби кривична пријава за примање поткуп, од 2007 до 2017 година, спротивно на обврската, не ја пријавил својата имотна состојба во Државната комисија за спречување на корупција, за да прикрие, како што вели полицијата, значителен износ пари, недвижен имот и скапи монети.

СВР Скопје, по наредба од Основен суд Скопје 1 и од Основно јавно обвинителство Скопје, во присуство на јавен обвинител, отворило сеф во банка кој бил изнајмен од Чапаровски и во него се пронајдени 199.000 евра, 18.300 американски долари, 21.900 швајцарски франци, 1.500 фунти, 50 бугарски лева, како и паричник со 19 монети од благороден метал и накит, за кои пријавениот немал доказ од каде потекнуваат.

Истражувајќи ја документацијата во Агенцијата на катастар за недвижности е утврдено дека Чапаровски има шест имотни листа за недвижен имот на подрачјето на Скопје и еден имотен лист за недвижен имот во Гостивар.

Чапаровски во мај доби кривична пријава за примање поткуп, а во неговата работна канцеларија беа пронајдени вкупно 24.890 евра, 4.477 американски долари, 2.250 швајцарски франци, 65 австралиски долари, 170 хрватски куни, 60 бугарски лева и 4.700 денари, додека при извршен претрес во неговиот дом пронајдени се и одземени вкупно 9.750 евра и 10.000 денари.


НБРМ: Штедењето во април намалено во однос на март поради неизвесноста


Скопје, 10 мај, 2017 - 14:12 (META) 

Штедењето во април е намалено во однос на минатиот месец, информира Народна банка. Оттаму велат дека намалување на депозитите има и кај населението и кај претпријатијата.

„Во услови на зголемена неизвесност, поумерено е намалувањето кај депозитите на населението“, додаваат од Народна банка.

Во однос на кредитната активност, првичните податоци за април покажуваат пораст на кредитите на месечна основа, повеќе на населението отколку на компаниите.

„Во април, непосредно по неколкумесечниот пораст, ликвидноста на банките умерено се намали, главно поради сезонски повисоката побарувачка за денарска готовина на населението, која е карактеристична пред велигденските и првомајските празници. Повисоката понуда на девизи на менувачкиот пазар главно беше резултат на сезонски ефект, односно за време на велигденските празници“, се вели во извештајот на Народна банка.


Граѓаните лани имале разнишана доверба во банките и во денарот


Скопје, 4 мај, 2017 - 13:53 (META) 

Граѓаните имале разнишна доверба во банките во вториот квартал од 2016 година, што било изразено преку повлекувањето на депозити, преку недоверба за стабилноста на домашната валута, како и преку засилена побарувачка на девизи, се вели во извештајот за ризиците во банкарскиот систем на Македонија за 2016 година на Народна банка.

Како резултат на тоа, банкарските депозити повеќе биле во странски валути отколку во денари, наспроти практиката од претходните години.

„Годишната стапка на пораст на денарските депозити речиси се преполови во однос на 2015 година. Ова предизвика да се намали учеството на денарските во вкупните депозити, од 57,6 проценти во 2015 г. на 56,9 проценти на крајот на 2016 година. Лани, порастот на денарските депозити (кој изнесуваше 4,1 отсто), најмногу беше условен од порастот на корпоративните депозити. Денарските депозити на домаќинствата се зголемија за само 0,7 отсто, што е повеќекратно забавување во однос на 2015 година, кога порастот изнесуваше 14 проценти“, се вели во извештајот.


Граѓаните во јуни повеќе штеделе во денари


Скопје, 10 август, 2016 - 13:16 (META) 

Забавување на падот на вкупниот депозитен потенцијал и мало зголемување на штедењето на населението е забележано во јуни, информираат од Народна банка. Населението повеќе штедело во денари отколку во странска валута.

– Ваквото однесување покажува значително подобрување на перцепциите на субјектите, а делумно може да е реакција на поместувањата во каматната политика на банките. Имено, во јуни за првпат по подолг временски период, се забележува проширување на распонот помеѓу каматата на депозитите на населението во денари и депозитите во девизи, што е резултат на досега преземените монетарни мерки – велат од Народна банка.


Народна банка: Штедењето во денари на долг рок е најисплатливо


Скопје, 29 мај, 2016 - 15:01 (META) 

Штедењето во денари на долг рок е најисплатливо, затоа што овие депозити нудат највисока каматна стапка, пишува на страницата на „Фејсбук“ на Народна банка.

– Така, според последните расположливи податоци со март 2016 година просечната каматна стапка на долгорочните денарски депозити на населението (над 2 години без валутна клаузула) изнесува 3,7 проценти, додека каматната стапка на краткорочните депозити во евра до една година изнесува 0,8%. Со чување на заштедите дома „под перница” не остварувате никаков принос – порачуваат од Народна банка.

Тие нудат и графички приказ кој покажува колку би изнесувале заштедите на граѓаните за пет години доколку ги чуваат дома или ги стават во банка како краткорочен депозит во евра или пак како долгорочен депозит во денари.


Груевски: СДСМ лаже, едиствениот приход ми е од платата


Скопје, 22 мај, 2016 - 16:16 (META) 

Со сета морална и материјална одговорност тврдам дека единствениот приход кој го имам изминативе години е приходот од платата која што ја добивам. Единствениот начин на кој што заработувам е преку платата која што ја добивав. Не постојат никакви екстра приходи, сомнителни трансакции или приливи какви што сака да измисли СДСМ, стои во соопштението од ВМРО-ДПМНЕ испратено во име на претседателот на партијата, Никола Груевски, а како реакција на денешната прес-конференција на портпаролот на СДСМ, Петре Шилегов.

„Настапот на СДСМ е уште една голема лага, со која партијата се обидува да ги доведе во заблуда граѓаните. Целосна лага е тоа дека анкетните листови од 2014 и 2015 година биле сокриени. Тие беа доставени до Државната комисија за спречување на корупција и достапни на јавноста. Свесен сум дека актуелниот закон не го наложува тоа, но повторно би апелирал до ДКСК да ги стави на увид моите анкетни листови. На граѓаните им требаат проекти и просперитет. Не им се потребни вакви валкани и невистинити сплеткарења“, стои во реакцијата на Груевски.

Попладнево на иста тема, прес-конференција одржа и пратеникот на ВМРО-ДПМНЕ, Андон Чибишев,  кој пак го праша Шилегов како во 2015 година купил два стана од 72 и 64 метри квадратни, вредни 160.000 евра.

– Господине Шилегов, јавноста чека одговор, дали и како сте се стекнале со толкав имот, во вредност од 160 000 евра? Ако се земе во предвид дека вашата плата во просек е 1.000 евра месечно, значи дека Вие треба да работите 13 години како пратеник за да заработите толкава сума пари за да ги купите двата стана – рече Чибишев.


Шилегов: Груевски со плата од 1.400 евра за една година „заштедил“ 120.000 евра


Скопје, 22 мај, 2016 - 14:18 (META) 

Аболицираниот Никола Груевски тргал на страна секој месец по 10.000 евра или за една година официјално станал побогат за 118.629 евра, соопшти денеска на прес-конференција портпаролот на СДСМ, Петре Шилегов.

Тој ги покажа анкетните листови на Груевски за 2014 и 2015 година, кои доскорешниот директор на Државната комисија за спречување на корупција не сакаше да им ги покаже на новинарите, минатиот месец на прес-конференција.

– Груевски, ги зголемил заштедите на американските долари, швајцарските франци, британските фунти на неговите девизни сметки, но најмногу ги зголемил сумите во денари и во евра. Пријавувал приливи во банка од по 300.000 денари, но и по 3 милиони денари. Интересно е дека за овие големи приливи од по 2 милиони и 3 милиони во 2015 година Груевски во анкетниот лист се правда дека му биле од 2005 и 2012 година. Но ако е така, зошто не му биле пријавени во анкетниот лист од претходната, 2014 година? Нето платата на Никола Груевски изнесувала 88.139 денари – рече Шилегов.

anketen list gruevski

Дека Груевски не се потпирал на неговата плата, посочи Шилегов, покажува графата за основот на стекнување.

– Тука, Никола Груевски, како што е наведено, или не дал податок, или рекол дека ги стекнал парите на друг начин. Никола Груевски не одговорил на Антикорупциската комисија, но мора да им одговори на граѓаните: Кој е тој начин на којшто Никола Груевски заработува, така што за една година успеал да заштеди 118.629 евра? Граѓаните слушнаа од „Вистината за Македонија“ и за оф-шор релациите на Груевски со рајските земји, за милионски тендери и провизии, за милионски парцели на Водно. Ова е уште една причина зошто на Груевски му се потребни аболициите од Ѓорге Иванов. Нему и на неговите соработници. Аболиција целосно мора да се поништи и сите кои правеле злоупотреби на штета на граѓаните ќе одговараат – додаде Шилегов.

anketen list gruevski 2