!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Кривична пријава за жител на Корешница кој нудел поткуп за глас во Демир Капија


Неготино, 14 октомври, 2017 - 13:20 (META) 

М.С. од село Корешница, Демир Капија, во Полициската станица Неготино пријавил дека С.Б. (43) од село Корешница му понудил пари за да гласа за еден од кандидатите за градоначалник на Демир Капија.

Во Полициска станица Неготино во врска со настанот повикани биле неколку лица, а бил известен и јавен обвинител од Основно јавно обвинителство Кавадарци и од Основно јавно обвинителство Велес, по што пријавениот добил кривична пријава.


ВМРО-ДПМНЕ реагира за унапредување полицајци во Гевгелија и за автопатот Демир Капија – Смоквица


Скопје, 12 октомври, 2017 - 16:39 (META) 

ВМРО-ДПМНЕ денеска на две прес-конференции го обвини владејачкиот СДСМ дека е во паника и за партиски интереси деградира и унапредува полицајци, како и дека намерно не го пуштил во употреба автопатот Демир Капија – Смоквица, иако бил готов.

– СДС ги губи изборите и во Гевгелија. Затоа Спасовски е во паника и носи решенија спротивни на закон за да ги задоволи партиските послушници. Со издавање „писмени наредби“ со важност од 30 дена во екот на предизборната кампања, на само четири дена дена до изборите, се унапредени и разрешени полициски службеници по неколку скалила од системот на кариера. Ова е беззаконие и за ваквите предизборни партиски комбинаторики ќе следи одговорност – рече Милан Стефаноски на прес-конференцијата во седиштето на ВМРО-ДПМНЕ.

На друга прес-конференција Крсте Јовановски, пак, ја обвини Владата на СДСМ дека беспотребно ќе потрошела 850.000 евра преку нов анекс-договор за надзор, иако, како што рече тој, автопатот веќе бил готов.

– Значи, готов автопат, намерно го одолжуваат пуштањето во употреба поради изборите, а граѓаните тоа ќе го платат со 850.000 евра. Скандалозен анекс кој не се однесува на градежни работи, туку на надзор. Со ова, почитувани граѓани, се врши директна злоупотреба на вашите пари и се отвора сомнеж за тежок криминал кој СДС, Заев и Сугаревски свесно сакаат да го направат – обвини пратеникот Јовановски.


Автопатот Демир Капија – Смоквица ќе биде завршен до 28 февруари


Скопје, 10 октомври, 2017 - 20:47 (META) 

Владата денеска го усвои предлогот за потпишување анекс на договорот за изградба на автопатска делница Демир Капија – Смоквица, со кој се продолжува времетраењето на договорот за изградба до 28 февруари 2018 година.

Како што соопшти владината прес-служба, освен продолжувањето на рокот, анексот не предвидува дополнителни средства за градежните работи што треба да бидат изведени за завршување на автопатот.

Градежните зафати се однесуваат на дислокацијата на далноводот на МЕПСО и на изградбата на контролниот центар.

„Со продолжувањето на времетраењето на договорот за градежни работи до 28 февруари 2018 година, ќе се продолжи и времетраењето на договорот за надзор. Во согласност со првичните пресметки направени од надзорниот орган, за надзор на градежните работи се потребни околу 850.000 евра, средства кои се обезбедени во рамки на тековниот заем наменет за реализација на проектот. Со потпишување на анексот ќе се овозможи завршување и пуштање во сообраќај на новата автопатска делница Демир Капија – Смоквица, како дел од Паневропскиот коридор 10, најдоцна на почетокот на март 2018 година“, стои во соопштението.


Ќе се тргне тајноста од договорите со странските инвеститори


Скопје, 26 јули, 2017 - 11:23 (META) 

На вчерашната 16. седница, Владата усвоила барање за декласификација, односно симнување на тајноста, на сите договори склучени како државна тајна помеѓу поранешната влада и странските инвеститори во економските зони. Сите податоци по декласификацијата, ќе бидат целосно и транспарентно достапни на јавноста, порача Владата.

Истовремено, на седницата е усвоена информација за пороен дожд, електрични празнења, силен ветер и град и причинети штети на земјоделски култури на 20 јули 2017 година во Ресенскиот и во Тетовскиот Регион. Задолжено е Министерството за земјоделство, шумарство и водостопанство да формира комисии што ќе предложат решенија по поднесените барања за утврдување на настаната штета од земјоделците или организациите на производители.

За да овозможи продолжување на работите за изградба на автопатот Демир Капија – Смоквица, Владата усвоила одлука да се помогне на МЕПСО да обезбеди имотен лист за далеководите што се наоѓаат на трасата и коишто има потреба да бидат поместени. Владата истовремено ги задолжила надлежните државни претпријатија, заедно со ЕВН, да предложат системско решение за овој и другите проблеми што ја следат изградбата.


„Актор“: Судските власти во Скопје, предметот со автопатот го ставија во архива во 2014 година


Атина, 10 јуни, 2017 - 12:23 (META) 

Грчката компанија „Актор“ нема сознание за постоење кривично гонење во врска со договорот за изградба на автопатот Демир Капија – Смоквица, соопштуваат од компанијата.

Оттаму велат дека по извршената ревизија судските власти во Скопје, предметот го ставиле во архива во 2014 година. Според нив, договорт за изградба на автопатот е потпишан врз основна на добиен меѓународен тендер.

Грчките медиуми „Прототема“ и „Катимерини“ пишуваа дека Европската агенција за борба против корупција (ОЛАФ) ја обвини оваа компанија за измама и за перење пари во износ од 50 милиони евра при изградба на автопатот Демир Капија – Смоквица.

Од „Актор“ негираат дека се переле пари при изградбата на автопатската делница и посочуваат дека немало никаква измама при одвивањето на градежните работи.

На прашање на „Мета“, Основното јавно обвинителство за гонење организиран криминал и корупција пред две години изјави дека презема активности и прибира докази кои се неопходни за расветлување на случајот „Актор“.

„Со оглед на комплексноста на случајот, во надлежното обвинителство се преземаат дејства за прибирање докази, неопходни за утврдување на околностите на извршување на конкретниот кривично-правен настан“, одговорија на 24 март 2015 година од Обвинителство.


МТСП: Ниту се гради ниту, пак, ќе се гради бегалски камп во Демир Капија


Скопје, 4 јуни, 2017 - 17:11 (META) 

На територијата на општина Демир Капија ниту се гради ниту, пак, ќе се гради бегалски камп или нешто слично, соопштија денеска од Министерството за труд и социјална политика, кое како дезинформации ги отфрли шпекулациите за наводна изградба на бегалски камп.

„Министерството за труд и социјална политика најодговорно потврдува дека се врши реконструкција на Специјалниот завод- Демир Капија, која се однесува на депандансот кој се наоѓа во атарот на село Ергеле. За оваа активност финансиер е Меѓународната организација за миграции, која единствено треба за потребите на Министерството за труд и социјална политика да изврши реконструкција на постојните објекти исто како што претходно за потребите на Министерството за здравство спроведе и реконструкција на болниците во Гевгелија и во Куманово“, стои во соопштението на МТСП.

Оттаму нагласуваат дека Специјалниот завод – Демир Капија е составен дел од мрежата на јавни установи чијашто единствена намена е сместување и заштита на лица од ранливи категории.

„Ова значи дека истиот е невозможно да дава друг тип на услуги освен тие за кои согласно со Законот за социјална заштита е формиран. Воедно уште еднаш би сакале да го нагласиме ставот на Република Македонија која се декларираше како транзитна земја за мигранти и во согласност со таквата политика во моментот на територија на Република Македонија има вкупно 25 лица во двата прифатни транзитни центри во Гевгелија и на Табановце и 11 лица баратели на азил сместени во Јавната установа Прифатен центар за баратели на азил во село Визбегово, Скопско“, велат од Министерството за труд и социјална политика.


Нов земјотрес ја затресе Македонија


Скопје, 9 април, 2017 - 10:39 (META) 

Нов земјотрес беше почувствуван утринава во Македонија, во 7.40 часот, според Сеизмолошката опсерваторија на ПМФ во Скопје. Земјотресот беше почувствуван во јужна Македонија, а во некои градови, според извештаи, некои луѓе излегувале од зградите.

Како што се дознава од веб-страницата на Европско-медитеранскиот сеизмолошки центар, земјотресот со магнитуда од 3,9 степени се случил во 7.40 часот по македонско време на 109 километри од Скопје, 42 километри југозападно од Демир Капија и 9 километри северно од Промахој, Грција, односно на самата македонско-грчка граница. Земјотресот бил на 5 километри длабочина.

Петнаесет минути претходно, имало земјотрес и во Егејско Море, информира Европско-медитеранскиот сеизмолошки центар.

Вчера пак земјотрес северно од Тирана беше силно почувствуван во западна Македонија.


СДСМ: Додека беше премиер, Груевски изгради само седум километри автопат


Скопје, 26 август, 2016 - 18:41 (META) 

„Десет години Никола Груевски седеше во премиерската фотелја и успеа да изгради само седум километри автопат. Четири години досега се гради автопатот Демир Капија – Смоквица, за кој граѓаните денеска слушнаа дека ни овој септември нема да биде готов“, се вели во соопштението на СДСМ.

Во него, исто така, се додава дека Груевски е најдиректниот виновник за нерешените елементарни потреби на луѓето.

„Под власта на Груевски се случија и контроверзиите со исплати во кеш токму за изградбата на овој автопат, којшто изминатите години одзеде многу човечки животи,“ се вели во соопштението на СДСМ.


Жена загина во сообраќајка на патот Удово – Демир Капија


Скопје, 3 август, 2016 - 9:59 (META) 

Една жена го загуби животот во сообраќајна несреќа што се случила на патот Удово – Демир Капија, кој е затворен за сообраќај.

Сообраќајната несреќа се случила во 7.30 часот, кај местото Света Петка, кога патничко возило „фиат сеиченто“, со скопски регистарски таблички, удрил во автобус на „Струмица експрес“. Во несреќата Б.П., која била сопатник во автомобилот, починала на самото место.

Екипа на МВР е на местото на несреќата и увидот е во тек.


Двајца тешко повредени во сообраќајка кај Демир Капија


Скопје, 30 јули, 2016 - 11:35 (META) 

Две лица се тешко повредени во сообраќајна несреќа што синоќа, околу 21.40 часот, се случила на дел од автопатот меѓу селото Удово и Демир Капија. Во сообраќајката кај местото Водисир, учествувале три возила: автомобил со германски регистарски таблички и два камиона со полуприколки, едниот со прилепски регистарски ознаки, а другиот со кавадаречки.

Како што соопштија од МВР, повредените, кои се наоѓале во автомобилот, добиле потешки повреди. Тешки набиеници на главата и на левото рамо и фрактури на ребра добил возачот на патничкото моторно возило, 31-годишниот И.С., додека неговата мајка, 63-годишната Н.Х.С., добила повреди на главата и внатрешно крвавење. Поради тежината на повредите, лицата се префрлени во Ургентниот центар во Скопје.

Полициските екипи извршиле увид на местото на несреќата, поради што сообраќајот бил во прекин од 21.50 до 00.20 часот. Од АМСМ соопштуваат дека во моментов сообраќајот се одвива по една коловозна лента.