!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Скопје го одбележува 13 Ноември – Денот на ослободувањето на градот


Скопје, 13 ноември, 2017 - 10:47 (META) 

Денеска се одбележува 13 Ноември – Денот на ослободувањето на Скопје во Втората светска војна. На 13 ноември, пред 73 години борците од 42. и 50. Народнослободителна дивизија на македонската војска и 16. Македонска бригада го ослободија Скопје од фашистичка окупација.

По неколкудневни тешки борби со припадниците на 22. гренадирска германска дивизија, составена од 47. и 65. полк и делови од 11. воздухопловна десантна дивизија, како и со германската тврдинска бригада „Ангермилер“, која беше распоредена пред Качаничката клисура, борците на Народноослободителната војска со победоносен марш влегоа во Скопје.

Ослободувањето на Скопје ќе биде одбележан со повеќе култирни, хуманитарни и спортски манифестации.

По тој повод, градоначалникот на Град Скопје, Петре Шилегов ќе се сретне со претставници на Градскиот одбор на Сојузот на борци од Народноослободителната антифашистичка војна на Македонија.

Делегации на Собранието на Република Македонија и на Градот Скопје ќе положат цвеќе пред Споменикот на ослободителите на Скопје на Партизанските гробишта и пред споменикот на генерал Михајло Апостолски на Градските гробишта „Бутел“.

Во 12.30 часот, пред Споменикот на ослободителите на Скопје, на платото пред Владата, државни делегации, борци од НОВ, претставници од Армијата на Република Македонија, од општините на Град Скопје, членови на други институции, како и официјалната делегација од Град Скопје ќе положат цвеќиња.

Чествувањето на Денот на ослободување на Скопје ќе продолжи вечерва во Музејот на Скопје каде ќе биде промовирана книгата „На Скопје со љубов“ на архитектот Живко Поповски.

Во фоајето на Македонската опрера и балет (МОБ) ќе бидат изложени дела од 12. Меѓународна ликовна колонија „Скопје 2017“. Во МОБ свечено ќе биде одбележан празникот и ќе биде доделена наградата „13 Ноември“ на Град Скопје.

Од спортските манифестации, досега се одржаа Меѓународен шаховски турнир на слепи и лица со оштетен вид, финални борби доделување на „Златниот гонг“ и ноќна атлетска трка „Низ улиците на Скопје“.

До крајот на месецов се предвидени повеќе активности, по повод Денот на ослободувањето на Скопје.


Заев: На идните генерации треба да им дадеме причини за да го слават нашиот патриотизам


Скопје, 11 октомври, 2017 - 13:43 (META) 

Нашиот патриотизам идните генерации ќе го слават само ако им дадеме повеќе причини за тоа, истакна премиерот Зоран Заев во својот говор на централниот настан од одбележувањето на 11 Октомври – Денот на народното востание, кој се одржа пред Споменикот на ослободителите на Скопје, во дворот на Владата.

– Празнувањето на големите датуми и оддавањето чест на сите наши претходници вградени во државноста и во слободата на Македонија е само мал дел од нашата должност кон достојното минато – рече Заев, нагласувајќи дека патриотизмот не завршува тука.

Тој додаде дека патриотизмот идните генерации ќе го слават само ако им се дадат повеќе причини за тоа, како што тоа го направила генерацијата на партизаните од антифашистичката и народноослободителната борба.

– Пред 76 години нашите сограѓани во Прилеп и во Куманово се одважија и презедоа акции со кои го означија почетокот на востанието на македонскиот народ и на сите други граѓани во Македонија против фашистичкиот окупатор и почетокот на завршните процеси во впишувањето на македонската држава на мапата на народите во светот – рече Заев.

Покрај владина делегација, пред Споменикот на ослободителите на град Скопје, свежо цвеќе положија и делегација на
Собранието предводена од пратениците Јулиана Николова и Диме Велковски, на Армијата на Република Македонија, предводена од заменик-началникот на Генералштабот, генерал-мајор Мухамет Рацај, на Сојузот на борците предводена од Никола Стојановски и други делегации на државниот и на дипломатскиот кор.


Македонија го празнува 11 Октомври – Денот на антифашистичкото востание


Скопје, 11 октомври, 2017 - 9:43 (META) 

Македонија денеска одбележува 76 години од почетокот на антифашистичкото востание и народноослободителната војна. Востанието почна на 11 октомври 1941 година со нападот на Првиот прилепски партизански одред врз бугарскиот полициски участок, а следниот ден, на 12 октомври, оружјето го кренаа и партизаните од Кумановскиот одред.

Со тоа Македонија се приклучи на антифашистичката коалиција, а по четиригодишната Светска војна, со одлуките на Првото заседание на АСНОМ во 1944 година, го реализираше и повеќевековниот сон за основање македонска држава.

Празникот ќе биде одбележан со повеќе настани организирани од Собранието, Владата, Сојузот на борците и од општините Прилеп и Куманово.

Централниот настан ќе се одржи претпладне пред Споменикот на ослободителите на град Скопје, во дворот на Владата. Венци со цвеќе пред споменикот ќе положат делегации на Сојузот на борците предводена од Никола Стојановски, на Владата предводена од премиерот Зоран Заев, на Собранието предводена од пратениците Јулиана Николова и Диме Велковски, делегација на АРМ предводена од заменик-началникот на Генералштабот, генерал-мајор Мухамет Рацај, како и други делегации на државните институции и од дипломатскиот кор.

Предвидени се и кратки обраќања на Стојановски, Заев и на Рацај, како и настап на Воениот оркестар на АРМ.

Владини и собраниски делегации ќе положат цвеќе и пред спомен-обележјата во Прилеп и во Куманово. Владината делегација во Прилеп ќе ја предводат вицепремиерката и министер за одбрана Радмила Шекеринска и министерот за транспорт и врски Горан Сугарески, а собраниската, пратениците Кети Смилеска и Хари Локвенец. Тие ќе положат цвеќе пред спомениците на Методија Андонов Ченто и Кузман Јосифовски Питу, како и на спомен-обележјето Могила на непобедените.

Кај Спомен-костурницата во Куманово владината делегација ќе ја предводи вицепремиерот и министер за внатрешни работи, Оливер Спасовски, а собраниската пратеникот Мирослав Јовановиќ.

Напладне, во Собранието на Република Македонија, традиционално ќе биде врачена државната награда „11 Октомври“. Годинашни лауреати се музичарот Влатко Стефановски, кој ќе ја добие наградата за животно дело во областа на културата и на уметноста, и историчарот проф. д-р Амет Шериф, кому наградата „11 Октомври“ му се доделува за животно дело во областа на науката и образованието.


Политичката и мигрантската криза во фокусот на утрешната средба меѓу Иванов и Туск


Скопје, 2 април, 2017 - 12:26 (META) 

„Во фокусот на разговорите на претседателот Иванов и на претседателот на Европскиот совет, Доналд Туск, ќе бидaт заканата од илегална миграција со која се соочува Европа и политичката криза во Македонија по изборите во декември 2016 година“, информираат од кабинетот на претседателот Ѓорге Иванов, кој утре ќе биде домаќин на претседателот на Европскиот совет, Доналд Туск, кој ќе престојува во работна посета на Македонија.

Според агендата на активности, во 13.55 часот се очекува пристигнувањето на Туск во кабинетот на претседателот. Во 14 часот ќе почне тет-а-тет средбата на Иванов и на Туск, а половина час подоцна е пленарниот состанок на двете делегации.

Во 15 часот се предвидени изјави за медиумите од претседателот Ѓорге Иванов и од претседателот на Европскиот совет, Доналд Туск. Во 15.30 часот е предвиден работен ручек, на кој освен Иванов и Туск ќе бидат и членовите на делегациите.


Нова рунда преговори за Сирија во Казахстан, бунтовниците најавија бојкот


Астана, 14 март, 2017 - 10:11 (META) 

Во Астана, главниот град на Казахстан, денеска почнува новата рунда мировни преговори за Сирија, кои, како што јавуваат странските агенции, ќе бидат бојкотирани од сириските бунтовнички фракции.

Портпаролот на сириската вооружена опозација, Осама Абу Заид, изјавил дека одлуката за бојкот е донесена бидејќи не се почитуваат ветувањата за прекин на огнот во Сирија, кој на иницијатива на Русија и на Турција стапија на сила кон крајот на декември минатата година.

Преговорите во главниот град на Казахстан ги организираат Русија и Иран, кои ги поддржуваат сириските власти, и Турција, која е на страната на бунтовниците.

Ова е втора рунда преговори во Астана од почетокот на годинава, но засега нема конкретни резултати.

Сирискиот претседател Башар ал-Асад во пресрет на преговорите изјави дека за иднината на земјата ќе се одлучува по „пресметката“ со екстремистите и по националното помирување.

Министерството за надворешни работи на Казахстан соопшти дека на новата рунда преговори Русија ќе ја претставува специјалниот пратеник на претседателот Владимир Путин, Александар Лаврентијев, а Иран – заменик-шефот на дипломатијата, Хосеин Џабери Ансари.

Според весникот „Ал Ватан“ близок до властите во Дамаск, делегацијата на сириската влада ќе ја предводи сирискиот амбасадор во Обединетите нации, Башар ал Џафари.

На состанокот се повикани и претставници на САД и на Јордан, како и специјалниот пратеник на ОН за Сирија, Стефан де Мистура.


Вучиќ ја обвини Приштина за неуспехот на дијалогот и ги повика Србите да останат мирни


Белград, 2 февруари, 2017 - 23:11 (META) 

Премиерот на Србија, Александар Вучиќ, денеска ја обвини делегацијата на Косово за неуспехот на последната рунда од дијалогот во Брисел и по тој повод побара реакција од високата претставничка за надворешна и за безбедносна политика на Европската Унија, Федерика Могерини.

Вучиќ ги повика Србите на Косово да останат мирни, да веруваат во својата држава и да не го напуштаат Косово, а нивните политички претставници да не ги напуштаат институциите на Косово.

Вучиќ вечерва во Рашка се сретна со политичките претставници на Србите на Косово за да ги извести за исходот од вчерашниот дијалог меѓу Белград и Приштина во Брисел. Тој ја обвини Приштина дека користи „највалкана пропаганда“ и ги повика Србите да не наседнуваат на провокации.

Во Рашка истовремено беше одржан и состанок на министрите за одбрана и за внатрешни работи, Зоран Ѓорѓевиќ и Небојша Стефановиќ, како и состанок на началникот на Генерал-штабот на војската на Србија, Љубиша Диковиќ, со претставници на војската на Србија и на српското МВР.

За исходот од вчерашниот состанок со делегацијата на Приштина во Брисел, претседателот на Србија, Томислав Николиќ, денеска ги извести и амбасадорите на Русија, Соединетите Американски Држави и на Кина во Белград, на кои им пренесе дека однесувањето на косовската страна не води кон постигнување договор.


Денеска се одбележува 23 Октомври – Ден на македонската револуционерна борба


Скопје, 23 октомври, 2016 - 9:56 (META) 

Денеска Репубилика Македонија го одбележува 23 Октомври – Денот на Македонската револуционерна борба. По повод празникот делегации на Собранието и на Владата на Република Македонија денеска ќе положат венци свежо цвеќе пред Споменикот на основачите на ВМРО во паркот Жена-борец во Скопје.

Одборот за доделување на државната награда „23 Октомври“, напладне во свечената сала на Собранието на Република Македонија ќе ја додели наградата за 2016 година, за долгогодишни остварувања во областа на науката, културата, образованието, заштитата на државните интереси и за промоција на државните приоритети, вредности и културно-историското наследство.

Државната награда за остварувања во областа на културата и на уметноста оваа година ќе им биде доделена на проф. д-р Драган Даутовски, музички уметник, на актерот Иван Петрушевски и на ликовниот уметник Реџаи Исени.

Наградата „23 Октомври“ за остварување во областа на науката и на образованието ќе им биде доделена на проф. д-р Стефан Влахов, историчар и филозоф, и на проф. д-р Агим Пољоска, албанолог.

Синоќа, по повод празникот, во Македонската опера и балет се одржа свечена академија на која свое обраќање имаше премиерот Емил Димитриев.

Денот на македонската револуционерна борба се празнува по повод основањето на Македонската револуционерна организација. На денешен датум, во 1893 година, во куќата на Иван Хаџи-Николов во Солун, Христо Татарчев, Даме Груев, Петар Поп-Арсов, Антон Димитров и Христо Ботанџиев го формираа Македонскиот револуционерен комитет од кој подоцна произлезе Внатрешно-македонската револуцонерна организација (ВМРО) или Внатрешна македонско-одринска револуционерна организација (ВМОРО).

Празникот 23 Октомври – Ден на македонската револуционерна борба е еден од поновите државни празници, кој се одбележува од 2007 година, кога беше донесен новиот Закон за државни празници.


Делегации положија цвеќе пред споменикот на жртвите од земјотресот


Скопје, 26 јули, 2016 - 11:42 (META) 

Денеска, на Градските гробишта во Бутел, официјални делегации и претставници на институции положија цвеќиња пред Споменикот на жртвите од катастрофалниот земјотрес што се случи во 1963 година.

Цвеќиња во спомен на жртвите во катастрофалниот земјотрес положија делегација на Градот Скопје, делегација на Владата на Република Македонија, делегација на Собранието на Република Македонија, делегација на Советот на Град Скопје, делегација од Министерството за одбрана, делегации од политичките партии, делегации од сите општини на Град Скопје, делегации од дипломатскиот кор во Македонија и делегации од здруженија на граѓани и од други организации.

 


Скопје ја одбележува 53-годишнината од катастрофалниот земјотрес


Скопје, 26 јули, 2016 - 10:26 (META) 

Скопје денеска ја одбележува 53-годишнината од катастрофалниот земјотрес, кој се случи на 26 јули 1963 година, а во кој животите ги загубија 1.070 луѓе и 3.000 беа повредени.

По повод одбележувањето на годишнината, делегација на Собранието на Република Македонија, составена од пратениците Драган Данев, Владанка Авировиќ и Софија Куновска во 10 часот ќе положи венец свежо цвеќе на гробиштата во Бутел.

Во исто време, на гробиштата во Бутел пред Споменикот на загинатите во катастрофалниот земјотрес венци свежо цвеќе ќе положат и официјални делегации и претставници на повеќе државни и локални институции.

Како што информираат од Град Скопје, денеска во Културно-информативниот центар Скопје, од 9 до 17 часот ќе се одржи традиционалната крводарителска акција на Црвениот крст на град Скопје и изложба на фотографии.

Во Младинскиот културен центар во 20 часот ќе почне „МКЦ за Скопје“, настан со кој ќе биде одбележана 53-годишнината од скопскиот земјотрес, а ќе биде отворен со изложбата „Скопје 63 – Хроника на една катастрофа“ на хрватскиот фотограф Бошко Фржоп. Во рамките на настанот ќе бидат прикажани и пет кратки филмови на скопските режисери Игор Иванов Изи, Вардан Тозија, Даријан Пејовски, Ѓорче Ставревски и Марко Ѓокович. За крај на вечерта се планирани настапите на групите СИЗ, „Штутгарт онлајн“ (Stuttgart Online) и „Ју“ (You).

Во 20 часот во Музејот на град Скопје градоначалникот Коце Трајановски ќе им се обрати на присутните и ќе ја отвори изложбата „Скопје 1963 – Виртуелни изложбени тури“.

Катастрофалниот земјотрес во Скопје се случи на денешен ден во 1963 година, во 5.17 часот. Во потресот, кој беше со јачина од 9 девет степени по Меркалиевата или шест според Рихтеровата скала, со епицентар на плоштадот Македонија, беа урнати речиси 16.000 станови, околу 28.000 беа оштетени, а повеќе од 200.000 лица останаа без покрив над глава.

Скопската трагедија предизвика вознемиреност и шок во целиот свет, кој истовремено искажа и голема солидарност и ангажираност во справувањето со последиците од земјотресот.

Хуманитарните организации во светот почнаа со собирање помош за настраданиот град, а Скопје стана град на светската солидарност.


Медиумите се на денешната преговарачка агенда на работните групи


Скопје, 7 јули, 2016 - 10:06 (META) 

Работните групи на политичките партии потписнички на Договорот од Пржино, ВМРО-ДПМНЕ, ДУИ, СДСМ и ДПА, денеска во 11.30 часот, во резиденцијата на Европската Унија во Пржино, ќе разговараат за реформи во медиумите.

Средбата доаѓа по вчерашната посета на германскиот специјален пратеник, Јоханес Хајндл. Тој се сретна со лидерите на СДСМ, ДУИ и на ДПА, Зоран Заев, Али Ахмети и Мендух Тачи, и со партиска делегација на ВМРО-ДПМНЕ.

Меѓупартиските преговори беа прекинати кон средината на јуни поради дијаметрално спротивни ставови на ВМРО-ДПМНЕ и на СДСМ за регулацијата на медиумите и за начинот на прочистување на избирачкиот список.  Двете партии за прекинувањето на преговорите вината си ја префрлаа една на друга.