!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

СДСМ: Демократските процеси продолжуваат, граѓаните да останат смирени


Скопје, 28 април, 2017 - 10:04 (META) 

Демократските процеси продолжуваат по легитимниот избор на нов претседател на Собранието на Република Македонија, порачаа од СДСМ во редовното утринско соопштение, а по вчерашните случувања и по насилството во Собранието, во кое беа повредени неколку пратеници, меѓу кои и лидерот на партијата, Зоран Заев.

„Домашната и меѓународната јавност гласно ја поддржаа деблокадата на Собранието. Исто така, јасно ја испратија пораката на режимот во распаѓање дека ова е неговиот крај, дека мора да се повлече пред мнозинската волја на повеќе од 700.000 граѓани“, стои во соопштението.

Оттаму повторно нагласуваат дека врвен приоритет за граѓаните и за државата е да се реализира до крај волјата на граѓаните изразена на веродостојни избори преку брз трансфер на власта, во согласност со Уставот, деловникот и со законите во Република Македонија.

Од партијата ги повикуваат институциите да ги преземат сите потребни мерки за заштита на државните и граѓанските интереси.

„Насилството врз легитимни претставници на граѓаните во Собранието и врз законодавниот дом е резултат на политиките на конфликт, омраза, поделби, поттикнување немири, политиките на Никола Груевски, поддржани од Ѓорге Иванов и од Трајко Вељаноски и тоа не смее да се повтори. Ќе одговараат за загрозување животи сите кои учествуваа во вечерашното насилство во Собранието, како и за сите други злодела нарачани и спроведени од раководството на ВМРО-ДПМНЕ“, велат од СДСМ.

Оттаму ги повикуваат граѓаните да останат смирени и да не подлегнуваат на режирани сценарија со кои, како што стои во соопштението, Никола Груевски и тесната криминална група околу него сакаат да испровоцираат нестабилност, затоа што во тоа гледаат сопствен спас од одговорноста.

„Во Република Македонија е направен огромен исчекор напред во демократските процеси. Избран е нов претседател на Собранието, а во периодот што претстои процесите ќе продолжат со конечно реализирање на мнозинската волја на граѓаните“, порачуваат од партијата.


Денеска нов собраниски обид за деблокада и за трансфер на власта


Скопје, 25 април, 2017 - 9:48 (META) 

Пред почетокот на денешното 18. продолжение на конститутивната седница на Собранието на Република Македонија, ВМРО-ДПМНЕ и СДСМ во своите редовни утрински соопштенија ги повторуваат своите позиции за излез од политичката криза.

Од ВМРО-ДПМНЕ повикуваат на одржување нови предвремени парламентатни избори, додека СДСМ порачува дека мора да има деблокада на демократските процеси и мирен трансфер на власта.

„ВМРО-ДПМНЕ апелира криминогената врхушка во врвот на СДС веднаш да ја отфрли тиранската платформа и да прифати нови парламентарни избори, на кои граѓаните ќе кажат што мислат за тиранската платформа“, стои во соопштението на ВМРО-ДПМНЕ.

Од СДСМ, пак, велат дека „фунционирањето на државниот систем, егзистенцијата на граѓаните и стабилноста на државата никој не смее да ги доведе во прашање“.

„Бидејќи блокадата од страна на пратениците на ВМРО-ДПМНЕ и поттикнувањето етнички провокации од страна на Никола Груевски и раководството на ВМРО-ДПМНЕ оди во прилог на хаос во државата, порачуваме дека институциите, политички партии и секој поединец се должни да се спротивстават и да дадат придонес кон нормализација на состојбите“, стои во соопштението на СДСМ, во кое се додава дека секоја активност спротивна на државните интереси е „тешко неуставно и незаконско дело за што следува сериозна одговорност“.

Вчера, пратеникот на ВМРО-ДПМНЕ, Крсто Мукоски, од собраниската говорница рече дека излезот од кризата е во лидерска средба. На ова, пратеникот на СДСМ, Петре Шилегов, во изјава за медиумите, реторички одговори: „За што би разговарале ние на лидерска средба и со кого би разговарале?“, додавајќи: „Ние имавме лидерски средби и врз основа на тие лидерски средби беше постигнат Договорот од Пржино“.

Павле Богоевски, независниот пратеник од коалицијата предводена од СДСМ, на собраниската говорница рече дека „нема да има нови предвремени избори кои ќе бидат организирани од оваа влада затоа што таа повеќе не го претставува легитимитетот на граѓаните“.


Заев до Ромео: Ќе продолжиме со чекорите за деблокирање на демократските процеси


Скопје, 21 април, 2017 - 13:34 (META) 

Парламентарното мнозинство ќе продолжи со чекорите кон избор на нов претседател на Собранието и избор на новата влада, рекол лидерот на СДСМ, Зоран Заев, на денешната средба со амбасадорот на Италија во Македонија, Карло Ромео.

На средбата, како што соопштуваат од СДСМ, била констатирана потребата од деблокада на демократските процеси и била нагласена потребата од разумност за мирен трансфер на власта преку почитување на демократските принципи.

– Македонија мора да оди напред. Парламентарното мнозинство ќе ги продолжи чекорите кон избор на нов собраниски претседател и избор на новата реформска влада, според Уставот, деловникот и законите во Република Македонија – рекол Заев на средбата.

Заев и Ромео разговарале и за ризиците од пролонгирањето на деблокадата на демократските процес, а лидерот на СДСМ, во тој контекст, посочил дека покрај техничкото функционирање на министрите, од средината на мај и на градоначалниицте и на советниците во општините целосно ќе им престане мандатот.


Хрватска ја деблокираше Србија за поглавјето 26 во пристапните преговори со ЕУ


Белград, 23 декември, 2016 - 17:14 (META) 

Министерот за образование на Србија, Младен Шарчевиќ, денеска со претставниците на хрватското Собрание и на Заводот за учебници потпишаа анекс-договор со кој се регулира прашањето за учебниците за хрватското малцинство што живее во Србија, јавува дописничката на „Мета“ од Белград.

На овој начин се создадоа услови Хрватска да ја одблокира Србија за поглавјето 26 во пристапните преговори со Европската Унија.

Министерот Шарчевиќ изјавил дека процесот на обезбедување учебници за основно образование на сите јазици на националните малцинства подразбира заедничка работа со претставниците на советите на националните малцинства околу рецензентите, авторите и изборот на дигиталните учебници.

Хрватскиот министер за надворешни работи, Иво Штир, во Загреб изјавил дека се стекнати услови за да се одблокира поглавјето 26, кое се однесува на образованието и на културата.

Според него, со потпишаниот анекс, договорот не го регулира само преводот на учебниците од српски на хрватски, туку ќе бидат опфатени и содржините.

Српскиот премиер Александар Вучиќ се заблагодари на Хрватска за деблокадата и верува дека тоа ќе придонесе за подобри односи помеѓу двете земји.