!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Трајчевски: За овие избори медиумите известуваат порамномерно и попрофесионално


Скопје, 12 октомври, 2017 - 19:51 (META) 

За овие локални избори медиумите известуваат далеку порамномерно и попрофесионално во споредба со претходните два изборни циклуси, каде беше забележано нерамномерно известување и воочлива координација, рече директорот на Агенцијата за аудио и аудиовизуелни медиумски услуги (ААВМУ), Зоран Трајчевски, на денешната дебата на тема „Известување на медиумите во изборна кампања, искуства и предизвици“, што се одржа во Клубот на новинари.

Трајчевски истакна дека годинава првпат судот во Скопје постапил во законски рок по пријава на ААВМУ и донел пресуда за само 48 часа по поднесувањето. Според него, судот сè уште не ги решил предметите на AАВМУ поднесени пред две години.

Насер Селмани, претседател на Здружението на новинарите на Македонија (ЗНМ), рече дека постои тренд на намалување на нападите врз новинарите. За разлика од предвремените парламентарни избори во декември минатата година, кога беа регистрирани два физички напади на новинари, во оваа изборна кампања нема ниту еден физички напад, а регистрирани се само вербални закани.

– Полицијата почна сериозно да ги истражува нападите, но загрижува фактот дека од 54 напади ниту еден напаѓач не е казнет од судовите. Тоа покажува јасна политика на неказнивост. Само 10 случаи се целосно истражени и поднесени се пет кривични и уште толку прекршочни пријави. Со политиката на неказнивост не можеме да очекуваме подобрување на слобода на говорот – рече Селмани, кој се заложи за изградба на ефикасен институционален механизам за превенција на насилство против новинари, во кој ќе учествуваат полицијата, обвинителството и судот.

Дебата во Клубот на новинари беше организирана од „Онлимит медиа“ и од ЗНМ, а финансиски поддржана од „Цивика мобилитас“.


Денеска ќе се одржи јавна дебата за чист воздух во МКЦ


Скопје, 10 октомври, 2017 - 9:44 (META) 

Одбележувањето на Светската недела на вселената ќе биде финализирано со јавна дебата за загадувањето на воздухот денеска во „МКЦ – Џебно кино“ во 10 часот.

Оваа јавна дискусија е поддржана од програмата „НАСА дејтанаутс“ (NASA Datanauts), со чија помош оваа дебата ќе биде промовирана на глобално ниво. Целта е да се посочи како македонските граѓани се здружуваат и ја користат технологијата за решавање на еден ваков сериозен проблем.

Од организацијата велат дека дебатата ќе се фокусира на иницијатива за поголема соработка помеѓу државните институции, невладините организации и бизнис-секторот за креирање долгорочни мерки за справување со загадувањето на воздухот.

На дебатата првпат во јавноста ќе се прикажат споредбени податоци од апликацијата „Мој воздух“ за бројот на деновите од јануари 2015 до септември 2017 година во кои дозволената граница на ПМ10-честичките е надмината.


Кандидатите за градоначалници ветуваат препород за Сарај


Скопје, 5 октомври, 2017 - 10:34 (META) 

Со буџет на Општина Сарај од 20 милиони евра, кога би застанале на челото на општината, четворицата кандидати за градоналник на оваа општина, ветуваат дека ќе направат многу. Така кажаа на вчерашната дебата од дебатниот карван „Живот во Македонија“ (#Debatpernime), кој го организираат „Порталб“, „Калѕо“, „Вистиномер“ и телевизијата „Арт“.

Башким Бакиу од Беса, Блерим Беџети од ДУИ, Екрем Алија од Алијанса за Албанците и Сефедин Алиу од ДПА ветија дека 30 отсто од буџетот би се трошеле за реконструкција на постојните и за изградба на нови улици и патишта, како и за изградба на училиште во Чајлане, превоз за учениците од селата, изградба на поликлиника во Сарај, подобро управување со отпадот и за инвестиции во туристичките капацитети Матка, езерото Треска и рекреативниот центар Сарај.

Исто така, беше ветено ново училиште во Свиларе и ординации и други медицински установи од јавното здравство, а ако недостига медицински кадар, би се ангажирале и Косовци, пренесува „Порталб“.

Дебатата ја водеше новинарката Јета Џара. Дебатниот карван „Живот во Македонија“ продолжува денеска во Гостивар.


Градоначалничките кандидати за Струга за проблемите со водата и во сообраќајот


Струга, 4 октомври, 2017 - 16:04 (META) 

Лавдрим Елмази од Беса, Васил Ашталкоски од СДСМ и Зијадин Села од Алијанса за Албанците на вчерашната дебата на дебатниот карван „Живот во Македонија“ (#Debatpernime), кој го организираат „Порталб“, „Калѕо“ и „Вистиномер“, порачаа дека имаат решенија за најгорливите проблеми на Струга. Понудија неколку решенија за кои ветуваат дека ќе ги реализираат ако граѓаните им ја дадат довербата и освојат градоначалнички мандат.

Во дебатата што ја водеше новинарката Јета Џара, за сообраќајниот хаос што се случува во текот на летната сезона, кога возила се паркираат насекаде, Зијадин Села вети подземно паркиралиште кај плажата Караорман, Васил Ашталкоски ветува катна гаража, а Лавдрим Елмази мисли да го реши проблемот со воведување плаќање за паркирање.

За проблемите со водата, Ашталкоски вели дека треба да се направи комплетна реконструкција на водоводниот систем, а Елмази вели дека проблемите со јавното претпријатие „Проаква“ ќе се решат ако се постави професионалец, а не партиски кадар за директор, а со пари од јапонски инвеститори би се направиле подобрувања на системот.

И двајцата нудат решенија за проблемите со струшката депонија, која е голем извор на загадување на воздухот, бидејќи на неа честопати се случуваат пожари.

Дебатите се организираат со поддршка од телевизијата „Арт“ и од „БИРН Македонија“.

Вечерва „Живот во Македонија“ одржува дебата во Сарај.

Дебатата може да се следи во живо на „Порталб“, со почеток во 18 часот.


Проширување на улиците и повеќе зелени површини во Чаир ветија кандидатите


Скопје, 2 октомври, 2017 - 11:32 (META) 

Во телевизиската дебата „Живот во Македонија“, која ја организираа „Порталб“, „Калѕо“ и телевизијата „Арт“, четирите кандидати Албанци за градоначалници на општина Чаир, ветија дека во рамките на мандатот би граделе нови паркиралишта и би проширувале улици, а не би дозволиле дивоградби. Велат и дека ќе го сопрат претераното градење и воопшто нема да толерираат градење на зелените површини.

Идриз Орана од ДПА рече дека ќе биде бескомпромисен во врска со нелегалното градење и дека сите дивоградби ќе се уриваат. Фарук Авдиу од Алијанса за Албанците рече дека во првата година од неговиот мандат, ако победи на локалните избори, ќе го запре масовното градење и ќе спроведе ревизија на денационализацијата за да се види како градителите узурпирале паркови за да градат високи објекти. Висар Ганиу, градоначалничкиот кандидат на ДУИ, вели дека ќе се ревидираат сите детални урбанистички планови за да се усогласат со генералниот урбанистички план, за кој е надлежен Град Скопје.

Во поглед со проблемот со улиците блокирани од паркирани возила, сите четири кандидати кажаа дека решението е во изградба на нови паркиралишта. Сепак, ниту еден не прецизираше рок во кој ќе се реши овој горлив проблем за чаирчани.


Почна расправата за Законот за јазиците, ВМРО-ДПМНЕ обвини дека ДУИ го уценува СДСМ


Скопје, 14 септември, 2017 - 14:21 (META) 

На почетокот на расправата на пленарна седница во Собранието за предлог-законот за употреба на јазиците, пратеникот на ВМРО-ДПМНЕ, Илија Димовски, обвини дека со овој закон ДУИ го уценува СДСМ пред локалните избори закажани за 15 октомври.

– Законот за јазици се носи во пресрет на локалните избори и претставува политичка уцена од ДУИ кон СДСМ, со која треба да се покријат сите скандали, уцени и неостварени ветувања кон албанското население. Членовите на овој закон се неуставни и излегуваат од Рамковниот договор – рече Димовски на самиот почеток на расправата за законот за јазиците.

На ова му реплицираше Бранко Манојловски од ДУИ, кој рече дека проблемот не е јазикот туку проблем е националната омраза.

– Вие многу се борите со законот, а нема проблем со тоа. Јазикот мора да се реши, сакале вие или не. Исфрлете ја националната омраза и бидете луѓе за момент. Нема нестабилност на Македонија ако јазикот е проблем. Слаба е државата ако јазикот е проблем. Смирете се и мислите малку со глава и како луѓе, а не како Македонец или Албанец – вели Манојловски.

Петре Шилегов од СДСМ ја обвини опозицијата дека се обидува да добие политички поени со сензитивни теми и дека од предлог-законот прават „баба рога“.

– Се направи „баба рога“ од нешто што никој не го спомнува. Тоа беше тиранаската платофрма, сега е законот за јазиците, а утре ќе се најде нова тема со која ќе ги плашите граѓаните за уништување на нашата земја за да се ќари дневен политички поен. Секој што смета дека одредени законски решенија се спротивни на Уставот може да поведе постапка пред Уставен суд и сите ќе мора на тоа да се покориме. Никој не мора да учи јазик кој што не го сака. Никој нема да биде казнет ако не говори албански јазик – нагласи Шилегов.

Димовски обвини дека парламентарното мнозинство не сака да има дебата за овој закон и дека тоа е причината што законот има европско знаменце, на што реплицираше координаторот на пратеничката група на СДСМ, Томислав Тунтев, дека сè е предмет на јавна дебата затоа што се работи за едно од есенцијалните човекови права.

Пратениците ја користат паузата за ручек од еден час, а расправата ќе продолжи во 15 часот.


ВМРО-ДПМНЕ: СДСМ и Талат Џафери ја оневозможуваат демократијата во Собранието


Скопје, 10 август, 2017 - 9:39 (META) 

Талат Џафери, кој со поддршка на СДС го узурпира претседателското место во Собранието, врши вистински терор во законодавниот дом, се вели во соопштението на ВМРО-ДПМНЕ.

Во него се додава дека за само два месеци Џафери повикал обезбедување во собраниската сала повеќе отколку сите негови претходници заедно во изминатите 26 години.

„Во Собранието, кое е сржта на парламентарната демократија, тие сакаат да спроведуваат диктатура, да одлучуваат кој и кога ќе зборува од собраниската говорница и свесно да не го почитуваат деловникот за работа, а кој ќе се повика на правилникот – да го отстранат од собраниската сала. Со насилни интервенции на обезбедувањето, СДС и Џафери ја оневозможуваат дебатата и сакаат да ги спречат демократските права и процеси токму во местото кое е срцето на демократијата“, се вели во соопштението.

Од партијата додаваат дека преку „скандали, терор и кршење на Изборниот законик, СДС сакаат да избегнат дебата за клучните политички теми во моментов во Македонија, како што се неуставниот закон за јазици, националната стратегија за населување на мигранти во Македонија и штетниот договор кој владата на Заев го склучи со Бугарија, со кој се откажаа од многу позиции што многу значат за зачувување на државниот и националниот интерес“.

„СДС и Талат Џафери сакаат да избегаат од темите кои вистински ги обременуваат граѓаните и се обидуваат да ги блокираат дискусиите за струшката депонија и за пожарите“, се додава во соопштението.


Џафери: Расправата за Зврлевски ќе продолжи, а пратениците нека си бараат друго мислење


Скопје, 7 август, 2017 - 13:24 (META) 

На седницата за разрешување на јавниот обвинител Марко Зврлевски, пратеникот на ВМРО-ДПМНЕ, Илија Димовски, побара еден час пауза за да состави писмо до Државната комисија за спречување на корупција, за таа да се произнесе дали треба да продолжи седницата бидејќи се распишани локалните избори.

Тој смета дека во согласност со членот 8а од Изборниот законик, од денот на донесувањето на одлуката за распишување избори до завршување на изборите, пратениците не можат да носат одлуки, не можат да се почнат постапки за вработување нови лица и за престанок на работните односи на јавните функционери, односно постапките се ставаат во мирување.

На ова, претседателот на Собранието, Талат Џафери, рече дека како координатор на пратеничка група и пратеник може да се обрати до која било институција и да побара мислење, но тоа не значи дека Собранието не треба да продолжи да работи.

– Собранието не е должно да прекине со работа ако пратеник или партеничка група мислат поинаку. Немам намера да се обратам до ниту една институција во однос на моите надлежности. Според законот и деловникот, она што важи за Влада не се применува аналогоно на работата на Собранието. Секој пратеник може да се обрати до кој било орган доколку има некоја дилема, јас немам дилема за продолжението на оваа седница. Собранието не е должно да бара мислење од институција, во случајов Државна комисија за спречување на корупција, која ја формирало самото Собранието – рече Џафери.

Пратеникот на СДСМ, Тунтев, смета дека и денеска опозицијата се обидува да ја одолжи работата на Собранието по оваа точка.

– Опозицијата се обидува да оди во недоглед со постапката почната на барање на Владата за разрешување на Зврлески поради незаконско и несовесно работење на државниот обвинител. Дебатата не е дел од постапката за разрешување. Ако толку сакаат, нека се откажат од дебатата и нека се оди директно на гласање – изјави Тунтев.

Пратеникот на ВМРО-ДПМНЕ, Антонио Милошоски, кажа дека дебатата е дел од постапката за разрешување и никој нема право да ги тера пратениците да се откажат од таа дебата.

И тој побара седницата да биде прекината и да се дебатира за други теми, кои, како што рече, се значајни за граѓаните, како депонијата, пожарите, зголемување на платите во администрација и за мигрантите.

Продолжението на седницата е закажано за 15 часот.


Во Владата напладне ќе се одржи дебата за реформските приоритети


Скопје, 23 јуни, 2017 - 10:34 (META) 

Во свечената сала на Владата, денеска,  со почеток во 12 часот, ќе се одржи дебата за реформските приоритети.

„Поаѓајќи од важноста на процесот на европска интеграција, а во согласност со определбата на Владата за транспарентност во работата и за вклучување на граѓанското општество во процесот на креирање политики, денеска во Владата ќе се одржат тематски консултации за областите кои се битни во процесот на креирање политики во согласност со реформските приоритети“, се вели во соопштението од Владата.

На дебатата воведно обраќање ќе имаат премиерот Зоран Заев и заменик-претседателот на Владата задолжен за европски прашања, Бујар Османи, а ќе присуствува и министерот без ресор задолжен за комуникации, отчетност и транспарентност, Роберт Поповски.


Макрон поубедлив од Ле Пен во дебатата, покажуваат анкетите


Париз, 4 мај, 2017 - 11:12 (META) 

Кандидатот за претседател на Франција, независниот кандидат на центарот, Емануел Макрон, бил поубедлив од Марин ле Пен за време на клучната телевизиска дебата, покажуваат резултатите од истражувањето на јавното мислење.

Околу 63 отсто од лицата што учествувале во анкетата за телевизијата БФМ сметаат дека проевропскиот поранешен министер за економија бил поуверлив за време на дебатата од лидерката на Националниот фронт.

Две третини од лицата што гласале за кандидатот на радикалната левица Жан-Лик Меланшон во првиот круг на изборите, одржан на 23 април, сметаат дека Макрон бил поуверлив од Ле Пен, како и 58 отсто од тие што во првиот круг го поддржале конзервативецот Франсоа Фијон.

Двајцата кандидати што освоија најмногу гласови во првиот круг на изборите одржани на 23 април, синоќа за време на жестоката телевизиската дебата изнесоа меѓусебни обвинувања.

Макрон ја обвини Ле Пен дека лаже и предупреди дека таа ќе ја однесе Франција во граѓанска војна и дека ќе им даде на исламските екстремисти тоа што го сакаат со тоа што би ги прекршила правата на муслиманските граѓани.

Од друга страна, Ле Пен го обвини Макрон дека е благ спрема исламскиот екстремизам и го нарече кандидат на елитата.