Општина Струмица поднесе барање до Владата за намалување на стапката на ДДВ за гасот


Струмица, 11 февруари, 2019 - 13:47 (META) 

Општина Струмица доставила барање до Владата за намалување на стапката на данокот на додадена вредност (ДДВ) за гасот од 18 на пет проценти. Според градоначалникот Коста Јаневски, решението на проблемот со загадениот воздух, во кое во најголем дел учествува затоплувањето на домовите е преку гасификација, како и проширување на гасоводната мрежа. За таа цел Јавното претпријатие „Срумица гас“ аплицирало до Светска банка за кредит во висина од 26 милиони денари, за проширување на гасоводната мрежа во должина од седум километри.

– Направивме и акционен план, дадовме конкретни предлози до Владата кои би требало овој енергенс да го направат поефтин за да може нашите граѓани да се приклучуваат. Предложивме данокот на додадена вредност на гасот да се намали од 18 на пет проценти и има расположение тоа да се направи, потоа да се субвенционираат горилници и приклучни елементи и според мене, тоа е реалниот начин на кој треба овој проблем да се решава, како и со проширувањето на мрежата за гасификација – смета Јаневски.

Општина Струмица го субвенционира секој приклучок на гасоводната мрежа со 100 евра. Советот на Општината изгласал мерка со која идните инвеститори на згради и домови ќе имаат намалување од осум проценти од комуналните давачки, ако се одлучат да изградат зелени покриви и фасади.

Во Струмица, која е гасифицирана од 2012 година, е изградена гасоводна мрежа од 33 километри.


Тевдовски: Модулот за автоматски поврат и пребивање на ДДВ ќе стартува годинава


Скопје, 23 јануари, 2019 - 11:23 (META) 

Навремен и неселективен поврат на ДДВ преку модул за автоматски поврат, електронско следење на плановите за јавните набавки, како и електронско обработување на царинските декларации и акцизните документи се дигитални процеси на кои Министерството за финансии заедно со УЈП и Царинската управа работеле минатата година, со цел подобрување на услугите за граѓаните и фирмите.

– Управата за јавни приходи направи Модул за автоматски поврат и пребивање даноци кон сите даночни обврзници. Главната цел е прецизно и навремено извршување на повратот и пребивањето даноци кон даночните обврзници – информира министерот за финансии, Драган Тевдовски.

Модулот за автоматски поврат и пребивање ќе стартува во текот на оваа година.

Паралелно, во насока на подобрување на услугите за фирмите, минатата година Министерството заедно со Царинската управа работеше и на Системот за управување со царински декларации.

Системот за управување со царински декларации на почетокот на февруари ќе почне да се применува на 11 пилот-проект царински испостави, а веќе од средината на годината ќе почне да се применува во сите царински испостави во земјава.

– На овој начин, за фирмите, значително се скратуваат трошоците и се намалува времето во подготовка и поднесување на документите. Сите документи ќе се поднесуваат електронски од која било точка во која било царинска испостава. Наша цел е да се автоматизираат процесите и со тоа да им се понудат подобри услуги и на граѓаните и на компаниите – вели Тевдовски.

Системот за обработка на царински декларации и акцизни документи ќе овозможи и размена на податоците со другите институции, како на пример, со Управата за јавни приходи при поднесување ДДВ пријави кон кои се поднесуваат царински декларации или со Заводот за статистика и Народна банка за податоци за увоз и извоз.


Компјутерска софтвер програма неселективно ќе им го враќа ДДВ на фирмите


Скопје, 4 јануари, 2019 - 14:48 (META) 

ИТ Секторот на Управата за јавни приходи (УЈП) развил компјутерски софтвер кој автоматски ќе прави поврат на ДДВ кон фирмите и пребивање на претплата на даноци кон сите даночни обврзници, соопшти денеска директорката на УЈП, Сања Лукаревска, која заедно со министерот за финансии Драган Тевдовски ја посетија Регионалната дирекција на УЈП во Скопје.

Според министерот Тевдовски, со новиот систем ќе се прави неселективен поврат на ДДВ.

– Преку развојот на модулот за автоматско пребивање се воспостави систем за неселективен и автоматски поврат на даноци кон даночните обврзници. Пример за тоа е повратот на ДДВ кон претпријатијата во 2018, кој беше брз и неселективен. Минатата година реализираниот поврат на ДДВ изнесува 23,1 милијарда денари и тој е за 19,3 отсто повисок од 2017 година – рече министерот за финансии Тевдовски.

Според Лукаревска, за подобро функционирање и давање на подобри услуги на граѓаните и фирмите, УЈП оди кон автоматизирање на процесите, во што влегува и платформата е-персонален данок и претпополнетата даночна пријава.

– Со задоволство можам да кажам дека веќе имаме 100 отсто успешност на реформата е-персонален данок, системот на којшто се регистрираа 656.000 граѓани, а се уште се регистрираат и физичките лица кои до тој рок не го направиле тоа. Успешната реализација е благодарение и на сите граѓани коишто и дадоа шанса на оваа реформа и соработуваат со Управата за јавни приходи. Од 1 јануари веќе започнавме со подготвување на претпополнета Годишна даночна пријава којашто ќе им биде доставена на сите физички лица регистрирани на е-пдд, по што од нив ќе чекаме потврда или корекција, со што верувам дека целосно ќе заокружиме еден успешен процес-рече директорката на УЈП Лукаревска.


Што нè очекува во 2019: Прогресивен данок, поврат на ДДВ, УЈП ќе ни ѕирка во сметките …


Скопје, 31 декември, 2018 - 12:24 (META) 

Изминува бурна година во која македонските граѓани беа изложени на невидени политички скандали, неизвесност и економска стагнација. Иако само времето може да покаже дали ќе дојде до позитивни промени во 2019 година има неколку економски и политички моменти кои уште сега може да се предвидат, а кои битно ќе влијаат врз секојдневното живеење.

Извесно е дека од 1 јануари 2019 година ќе има прогресивно оданочување од 18 отсто за примањата на лицата кои имаат месечен личен доход над 90.000 денари. Според новата регулатива, доколку даночната основа на поединечна исплата по некој од основите кој се даночи со прогресивни стапки го надминува прагот од 90.000 денари, за делот над 90.000 ќе се плати данок по повисоката стапка од 18 отсто уште во моментот на исплатата. На пример, доколку се исплаќа надоместок по основ на договор за дело од 100.000 денари, исплатувачот ќе треба да плати вкупен данок од 10.800 денари (10 отсто односно 9.000 денари за делот што е до 90.000 денари и 18 отсто односно 1.800 денари за делот што го надминува прагот од 90.000 денари).

Во најава е дека од 1 јули 2019 година ќе има поврат на ДДВ за граѓаните. Овој проект требаше да започне од 1 февруари, но поради подготовка на системот беше одложен. Се предвидува повратот на 15 отсто ДДВ да биде лимитиран на 30.000 денари месечно.

Можеби една од најпозитивните промени е што идната година ќе стапат на сила измените на Законот за нотаријат и на Законот за извршување со кои се намалуваат тарифите на нотарите и на извршителите од 50 до 90 отсто. Во постапките пред нотарите, граѓаните ќе бидат ослободени од судските такси и од надомест за клаузула за правосилност и извршност, а нотарската награда ќе биде 10 отсто од главниот долг, но не повеќе од 500 денари. Ако долгот е илјада денари, надоместокот за нотар ќе биде 100 денари. Ако долгот е 10 илјади денари, надоместокот наместо 1.000, ќе биде 500 денари. За сметките за вода, смет и одржување на заедничките простории во висина на 6 илјади денари, нема да биде потребно учество на адвокати, како и за сметки за струја и парно до 15 илјади денари.

Наградите на извршителите исто така се намалуваат, со тоа што се става ограничување дека при извршување на платни налози за комунални трошоци, наградата не може да биде повеќе од 20 отсто од висината на главниот долг.

Следната година стапуваат на сила и измените на Законот за банките со кои Управата за јавни приходи ќе може да има увид во податоците и информациите со кои располагаат банките само врз основа на писмено барање кое се поднесува за секое поединечно физичко лице. Измените имаат за цел да и олеснат на Управата за јавни приходи, која од 2019 година ќе започне да изготвува даночна пријава за секој даночен обврзник.
Големи се очекувањата во политиката кои се базирани на тоа дали ќе биде прифатен Преспанскиот договор со кој се предвидува промена на името на државата во Република Северна Македонија, а за кој Собранието треба да одлучува уште на средината на јануари, 2019 година.

Според најавите од НАТО, доколку договорот биде прифатен, Македонија може да стане 30. членка на алијансата уште на почетокот на следната година. Преговорите за членство се веќе почнати и се очекува да завршат во јануари 2019.

Амбициозни се плановите на Владата и во однос на зачленувањето во Европската Унија. Се очекува наредната 2019-та да биде годината кога Македонија ќе ги почне преговорите за членство во ЕУ. Ваквите очекувања се темелат на финализацијата на обврските од Преспанскиот договор, на реализацијата на зацртаното од Планот 18 и пред сè на изјавата на еврокомесарот Јоханес Хан за временската рамка за пристапување кон Унијата.

Нишката неизвесност што се уште постои во однос на Преспанскиот договор, не важи за претседателските избори. Имено, во април 2019 година се закажани избори по кои на местото на Ѓорѓе Иванов ќе седне ново лице.

Изненадување може да биде само реализацијата на „срамежливите најави“ за можен избор на претседател во Собранието доколку не се постигне цензус на претседателските избори, што дефинитивно би била уште една новина по која ќе остане запаметена 2019 година.


Заев најави поврат на ДДВ до 15 проценти за граѓаните од 1 јули 2019


Скопје, 26 декември, 2018 - 10:05 (META) 

Премиерот Зоран Заев во телевизиско интервју за „24 вести“ , во однос на економијата рече дека очекува 2019 да биде економска година за Македонија.

Неговите проценки се дека домашниот бруто-производ (БДП) ќе расте во последните два квартала и очекува да продолжи да расте до најавените пет проценти до крајот на мандатот. Оптимизмот го правда со отворените интеграции и регионалната соработка.

Заев посочи на зголемена трговска размена со Грција за 17 проценти после Договорот од Преспа. Рече дека 2,5 пати е пораснат интензитетот на повратот на ДДВ, дека се спроведува правична казнена политика, без рекет и закани и притисоци како порано.

Тој најави поврат на ДДВ до 15 проценти за граѓаните, од 1 јули 2019 година, како и услови за намалување на каматните стапки кај банките.


УЈП ја објави новата листа на должници, последна за годинава


Скопје, 11 декември, 2018 - 10:34 (META) 

Управата за јавни приходи (УЈП) ја објави листата на должници бр.12/2018 за долгови доспеани до 31 август и неплатени до 30 ноемрви по основ на ДДВ, данок на добивка, персонален данок на доход, придонеси од задолжително социјално осигурување, акцизи и царини. На листата објавени се 2.140 должници – правни лица што е помалку за 13 од претходната листа и 2.370 физички лица што е повеќе за 195 од претходната листа.

Вкупно објавениот нето-долг во Листата бр.12/2018 изнесува 10.027.643.843 денари (163 милиони евра), помалку за 58.864.425 денари од претходната листа. Нето-долгот за даноци и придонеси изнесува 9.998.544.030 денари (помалку за 48.707.933 денари од претходната листа), додека долгот за царински давачки е 29.099.813 денари (помалку за 10.156.492 денари од претходната листа).

Меѓу должниците се и голем број јавни претпријатија кои долажат стотици милиони денари по основ на даночни давачки. ЈП „Македонија пат“ должи 330 милиони денари, Македонска радио-телевизија должи 71,6 милиони денари, ЈП „МЖ-инфраструктура“ должи 29 милиони денари итн.


УЈП го продолжи рокот за поднесување на пријавата за ДДВ


Скопје, 26 октомври, 2018 - 13:01 (META) 

Управата за јавни приходи соопшти дека, рокот за поднесување на пријавата за данок на додадена вредност ДДВ-04 се продолжува, поради отежнатото поднесување на даночни пријави преку системот е-даноци.

„Крајниот рок за поднесување на ДДВ-пријавата, 25 октомври се продолжува за два работни дена, односно крајниот рок за поднесување на ДДВ-04 пријавите ќе се смета 29 октомври“, информираат од УЈП.

УЈП ја својата веб-страница, потсети дека граѓаните треба да се регистрираат во неколку чекори на системот e-pdd.ujp.gov.mk, со што ќе биде на увид Годишната даночна пријава.

Заклучно со 12 октомври во апликацијата „е-персонален данок“ се регистрирале 36. 824 граѓани.


Тевдовски: Наплатата на даноци повисока за 120 милиони евра повеќе од лани


Скопје, 10 септември, 2018 - 11:24 (META) 

Наплатата на даноци и придонеси заклучно со август е повисока за 120 милиони евра во однос на минатата година, вели министерот за финансии Драган Тевдовски. Тој додаде дека даноците и придонесите пораснале за седум проценти во однос на минатата година.

– Наплатата на даноците покажува интензивирање на економската активност. Ова се должи во голема мерка на растот на данокот на добивка, чија наплата е подобра за 25 проценти во однос на лани или за околу 35 милиони евра. Тоа укажува на зголемена активност на фирмите. Исто така има раст на придонесите на седум проценти што укажува дека трендот на раст на плати и нови работни места продолжува и после второто тримесечје. Имено, високата наплата на придонеси во првото полугодие од годинава е поврзано со растот на платите за 5,6 проценти и растот на бројот на работни места за околу 10.000 нови – рече Тевдовски и дополни дека сервисирањето на обврските од државата се одвива непречено.

– Повратот на ДДВ кон фирмите е навремен и неселективен. Од почетокот на годината до крајот на август, во стопанството се вратени 250 милиони евра поврат на ДДВ. Во август имавме извршено најголем поврат во последните години, во износ од 44 милиони евра. Со обезбедување на ликвидност на фирмите, се поддржуваат нивните тековни, но и инвестициски активности. Во овој период се забележува поголема инвестициска активност на компаниите. Имено, ако се анализира увозот, во периодот од јануари-јули 2018, најголем раст од 19,7 проценти се забележува кај секторот машини и транспортни уреди. Овој податок укажува на раст на инвестициите на фирмите во основни средства. Тоа ќе придонесе за раст на економската активност и во иднина, поголемо производство и нови работни места- вели Тевдовски.


Тевдовски: Стапката на ДДВ за станови останува 5 проценти


Скопје, 27 август, 2018 - 12:09 (META) 

За прв промет на станови, останува повластената стапка на ДДВ од 5 проценти. Денеска предлог измените на законот за изменување на Законот за додадена вредност влегоа во собраниска процедура.

– Со Предлогот на Законот за изменување на Законот за данокот на додадена вредност се врши пролонгирање на рокот и тоа до 31 декември 2023 година, за примената на повластена даночна стапка од 5% на првиот промет на станбени згради и станови во оној дел во кој истите се користат за станбени цели и кој ќе се изврши во рок до пет години по изградбата – рече министерот за финансии Драган Тевдовски.

Основна причина за измената на Законот за данокот на додадена вредност е да се излезе во пресрет на граѓаните, за поддршка за градежниот сектор, како и другите стопански гранки директно поврзани со градежништвото. Oва ќе има директно позитивно влијание врз домашната економија.


УЈП ја објави новата листа на должници


Скопје, 12 јули, 2018 - 11:46 (META) 

Управата за јавни приходи ја објави најновата листа на должници брoj седум, за долгови доспеани до 31 март и неплатени до 30 јуни по основ на данок на додадена вредност (ДДВ), данок на добивка, персонален данок на доход, придонеси од задолжително социјално осигурување, акцизи и царини.

На листата на должници објавени се 2.069 правни лица и 1.812 физички лица. Вкупно објавениот нето-долг изнесува околу 164 милиони евра, што е повеќе за 1,5 милиони евра од претходната листа.

На листата се најдоа и голем број јавни претрпијатија и државни компании помеѓу кои „Македонија пат“ (383 милиони денари), „Еурокомпозит“ (129 милиони денари), „Македонската радио телевизија“ (101 милион денари), „МЖ-инфраструктура“ (36 милиони денари), Општина Карпош (32 милиони денари).