Грција ја поддржa Македонија за приклучување кон Јадранско-јонската иницијатива


Скопје, 23 февруари, 2018 - 10:33 (META) 

Грција ја поддржува кандидатурата на Македонија за членство во Јадранско – јонската иницијатива, јавува Македонската информативна агенција (МИА).

– Заменикот министер за надворешни работи на Грција, Јоргос Катругалос, со допис до надлежните комесари за проширување, Јоханес Хан и за регионална политика, Корина Крецу, ја објави намерата на Грција да ја поддржи кандидатурата на ПЈРМ во рамките на стратегијата на Европската унија за Јадранско –јонскиот регион (EUSAIR) – пишува во соопштението од грчкото МНР.

Од грчкото МНР потсетуваат дека во иницијативата вклучени се Грција, Италија, Словенија, Хрватска, Србија, Црна Гора, Албанија и Босна и Херцеговина, а соработка се реализира преку четири столба кои се однесуваат на „синиот раст“, односно растот во морските и поморските сектори, поврзувањето, односно транспорт и енергетика, животна средина и туризам.

Грчката поддршка за македонската кандидатура во Јадранско – јонската иницијатива, беше договорена и соопштена на средбата на Зоран Заев и Алексис Ципрас во Давос, како една од двете отстапки што ќе ги направи официјална Атина откако Македонија ги преименува аеродромот и автопатот.


Кабинет на Иванов: Претседателот не е информиран за каков било договор меѓу Заев и Ципрас


Скопје, 7 февруари, 2018 - 18:30 (META) 

Претседателот Ѓорге Иванов не е информиран за каков било постигнат договор меѓу македонскиот и грчкиот премиер на нивната средба во Давос, на која се темелат јавните изјави на министерот за надворешни работи на Грција, Никос Коѕиас, информираат од кабинетот на Иванов за Македонската информативна агенција (МИА).

Оттаму нагласуваат дека на информативната средба во Клубот на пратеници што се одржа на 27 јануари, присутните биле информирани за предложените идеи на медијаторот Метју Нимиц, во рамките на процесот што се води под покровителство на Обединетите нации.

„При информирањето за исходот од средбата во Давос не се спомена каков било постигнат договор или, пак, спогодба за којашто сега јавноста ја информираат грчки претставници. Македонскиот претседател останува на јавниот став искажан по таа средба, а во очекување Владата да ги информира граѓаните на Република Македонија за преземените активности на владините претставници, по однос на ова прашање“, велат од кабинетот на Иванов.


ВМРО-ДПМНЕ: Владата не смее да молчи и да крие детали околу процесот на разговори


Скопје, 7 февруари, 2018 - 15:59 (META) 

Во врска со преименувањето на аеродромот и автопатот, ВМРО-ДПМНЕ останува на ставот дека нема иредентизам во актуелните имиња, се вели во соопштението на партијата.

Од таму додаваат дека би било добро „граѓаните да слушнат дали одлуката на владата е дел од некоја поширока стратегија или повторно станува збор за еднострани постапки од кои Македонија нема никаква корист.“

„Владата не смее да молчи и да крие детали околу процесот на разговори. Во вакви околности, кога се кријат останатите детали, крајно несериозно и многу опасно е јавното лицитирање со одредниците кои се прифатливи. Настапот на премиерот Заев може да има сериозни последици по целиот процес и драматично да ги наруши македонските преговарачки позиции“, се додава во соопштението.

Од ВМРО-ДПМНЕ додаваат дека „Заев вчера кажа дека била прифатлива географска одредница, но не кажа во чие име говори, и која е таа одредница што за него е прифатлива.“

„Не кажа ниту кој би бил опсегот на употреба, а премолчи и околу тоа дали станува збор само за географска одредница која би била за меѓународна употреба или тоа значи промена и на Уставот, односно уставното име, националноста и јазикот. Исто така, остана неодговорено и прашањето дали оваа географска одредница би имала англиска транскрипција или не. Граѓаните се интересираат и имаат право да знаат дали освен подготвеноста на Заев за географска одредница, тој е подготвен и на отстапки во однос на идентитетските одредници како јазикот, нацијата и меѓународните кодови“, додаваат од ВМРО –ДПМНЕ.

Од партијата велат дека македонската јавност очекува да слушне што точно прифатил Заев на средбата во Давос.

„Доколку не бил постигнат договор во Давос, информациите кои се лиферуваат од грчка страна треба да бидат демантирани, за да не се вознемируваат граѓаните“ се вели во соопштението.


ВМРО-ДПМНЕ: Заев да каже што договорил во Давос и зошто го крие тоа


Скопје, 6 февруари, 2018 - 10:06 (META) 

Во земјата владее целосен мрак за тоа што договорил Зоран Заев во Давос на средбата со грчкиот премиер Алексис Ципрас. Зошто грчките власти инсистираат да не се излегува од рамката на тој договор? Што се крие од македонската јавност? Власта избегнува одговори и секојдневно се прави дефокус со разни теми. Затоа невини луѓе, патриоти, се обвинуваат за тероризам и се држат во притвори, прашуваат од ВМРО-ДПМНЕ во утринското соопштение.

„Десетици луѓе се притворени без основ и врз нив се врши политички терор, само затоа што имаат спротивен политички став од Зоран Заев. Правосудните органи не одлучуваат по закон и се кршат правата на притворените. Слободите и правата на луѓето се загрозени. Владеењето на правото е нарушено, ова го констатираше и Комесарот за човекови права на Советот на Европа. Притворените се жртви на класичен терор и политичка инквизиција во современа Европа во 21 век. Правата на притворените беа прекршени и при нивното апсење, факт кој го констатираше и Народниот правобранител. Факт кој беше игнориран од МВР“, стои во партиското соопштение.

Од партијата велат дека делото според кое се води истрагата е неосновано и неаргументирано, а дека целиот процес е само акт на политички терор, кој мора да запре.

Според ВМРО-ДПМНЕ, притворот како средство за обезбедување присуство се претворило во средство за казна и додаваат дека тоа е спротивно на основните принципи на човековите права, кои ја гарантираат неприкосновеноста на слободата и нејзиното лимитирање само во исклучително законски определени ситуации.


Коѕиас: Нимиц не е надлежен да говори која е политиката на Атина и да ја опишува погрешно


Атина, 3 февруари, 2018 - 10:52 (META) 

Јасно и строго му потенцирав дека, не е надлежен да говори која е политиката на Атина, ниту да ја опишува и тоа на погрешен начин, соопштил министерот за надворешни работи на Грција, Никос Коѕиас што му порачал на медијаторот Метју Нимиц, јавува Македонската информативна агенција (МИА).

Коѕиас преку соопштение информирал дека, имал долг разговор со личниот претставник на Генералниот секретар на Обединетите Нации, по неговата посета на Скопје. Грчкиот шеф на дипломатијата додал дека, преговорите треба да се водат врз основа на она што било договорено во Давос, но и врз основа на ставовите што се поклопуваат.

„Врз основа на брифингот што го имав, за разговорите што ги имаше господинот Нимиц во Скопје, разјаснив дека преговорите не можат да се водат поинаку освен, во продолжение на договореното во Давос. Покрај тоа, секои добронамерни преговори се водат врз база на конвергенциите што веќе се постигнати“, се вели во соопштението.

Коѕиас ја поздравил изјавата на вселенскиот патријарх Вартоломеј кој повикал на трезвеност и воздржаност.


Пратенички прашања денеска во Собранието, ВМРО-ДПМНЕ нема да присуствува


Скопје, 31 јануари, 2018 - 9:39 (META) 

Во Собранието на Република Македонија денеска со почеток во 11 часот ќе се одржи седницата за пратенички прашања, на која претставници на Владата ќе даваат информации побарани од народните избраници.

На седницата, како што велат од ВМРО-ДПМНЕ, нема да се појават пратениците од најголемата опозициска партија.

Иако според вообичаената практика седницата за пратеничките прашања се одржува последниот четврток од месецот, поради учеството на премиерот Зоран Заев на Светскиот економски форум во Давос минатата седмица, таа седница мораше да се помести.

Според Деловникот за работа на Собранието, прашања на премиерот и министри први треба да им постават пратеници од опозицијата, па потоа од владејачкото мнозинство.


Учеството во Давос беше плодотворно и успешно, оцени Заев


Давос, 26 јануари, 2018 - 16:39 (META) 

Премиерот Зоран Заев, учеството на македонската делегација на Светскиот економски форум во Давос го оцени како плодотворно и успешно, информираат од Владата.

„Политичките пријатели на Македонија и потенцијалните бизнис-инвеститори ни упатија јасна порака дека реформите се клучни за економски просперитет. Како што истакнуваат светските лидери, мораме да внимаваме на развојот на локалните заедници. Мораме да вложуваме во вештините на луѓето и да гарантираме безбедна работа дома. За тоа се зборува овде во Давос. За тоа ќе работиме и кај нас дома“, изјави Заев по завршување на Самитот во Давос денеска.

Тој додаде дека Форумот е од особено значење за државата, бидејќи по повеќегодишна изолација, политичките лидери на Македонија и на регионот повторно присуствуваа на глобалната економска и политичка сцена.

„Нашиот став тука е слушнат, Западен Балкан создава сплотена иднина во ЕУ и НАТО. Овде во Давос, земјите кои се во развој имаат уникатна можност да учат и да добијат инспирација од светските економски лидери, односно од оние кои го трасираат патот на развојот на светот. Интеграцијата на Македонија надвор, реформите и економските мерки дома, се клучни за развој и за внатрешен напредок на нашата држава“, додаде Заев.

Во рамките на Светскиот економски форум во Давос, тој се сретна со премиерите на државите од регионот како и со претставници од Европската банка за обнова и развој, Светска банка, „Мајкрософт“, „Филипс“ и со еврокомесарот, Јоханес Хан.


Макрон: ЕУ мора да се промени за да може да се натпреварува


Давос, 24 јануари, 2018 - 21:15 (META) 

Францускиот претседател Еумануел Макрон на Светскиот економски форум во Давос рече дека Европската Унија оваа година мора да се реформира.

Како што вели тој, само така ќе може да се натпреварува со големите сили како Кина и САД.
Макрон рече дека „амбициозните“ членки на ЕУ треба да овозможат брзо движење кон поголема интеграција, дури и ако другите членки не сакаат да се придружат.

-Помалку амбициозните не треба да ги блокираат амбициозните во просторијата – рече Маркон.

Тој додаде дека земјите кои го користат еврото мора да се договорат за „посилен и поправеден систем“, а дека членките на ЕУ треба ги координираат своите даночни политики.


Заев и Ципрас во снежниот Давос го топат мразот за името


Давос, 24 јануари, 2018 - 16:41 (META) 

Премиерот Зоран Заев и неговиот грчки колега Алексис Ципрас денеска за прв пат официјално се сретнаа на маргините на Светскиот економски форум во Давос, Швајцарија.

„Започна средбата со премиерот на Република Грција, Ципрас. Отворено разговараме и градиме меѓусебна доверба во интерес на граѓаните“, напиша Заев на официјалниот „Твитер“ профил.

Од Владата соопштуваат дека премиерите на двете земји дополнително ќе одлучат дали ќе дадат изјави за медиумите откако ќе заврши средбата.


Наскоро лидерска средба кај Иванов за името


Скопје, 24 јануари, 2018 - 12:28 (META) 

Лидерите на политичките партии наскоро ќе се сретнат со претседателот Ѓорге Иванов за да разговараат за рамката за решението на спорот со името, кој нашата држава го има со Грција, информираше денеска портпаролот на Влада, Миле Бошњаковски.

– Владата го започна процесот на анализа и на координација околу најновата рамка на медијаторот Метју Нимиц. Очекуваме да изградиме широк национален консензус. Кабинетот на министерот за надворешни работи е во координација со кабинетот на претседателот Иванов за организација на средба на која што ќе бидат повеќе политички субјекти, на која ќе се разговара за рамката – рече Бошњаковски.

Средбата помеѓу премиерите Зоран Заев и Алексис Ципрас е предвидена за попладне во Давос. Бошњаковски го повтори ставот на владата дека „атмосферата е позитивна“ и дека „постои оптимизам во двете држави дека ќе се најде решение за спорот со името со цел да се сочува достоинството на двете страни.“

– Самата средба претставува исчекор напред кон решение – додаде Бошњаковски.