Љутфиу вели дека годинава сепак ќе има екстерно тестирање


Скопје, 24 мај, 2017 - 16:33 (META) 

Министерот за образование и наука во заминување Пиштар Љутфиу изјави дека сепак, и на крајот на оваа учебна година ќе има екстерното тестирање иако мандатарот за состав на новата влада, Зоран Заев, најави дека екстерното тестирање ќе се укине веднаш штом Собранието почне да работи.

-Силно верувам дека новата влада нема да донесе закон против граѓаните и учениците во Македонија, затоа би апелирал учениците да се подготват за екстерно тестирање бидејќи донесувањето на законите на се случува преку ноќ, туку треба да биде во консултација и со правниот сектор со правните експерти за да донесе добар закон. Потоа законот ќе мора да помине на комисии, ќе треба во Парламент, па верувам дека ќе треба да помине извесно време по доаѓањето на новата влада. Затоа, повторно апелирам дека и покрај желбите на СДСМ да се донесе законот за укинување на екстерното тестирање, потребно е време – изјави Љутфиу.

Државниот испитен центар ги објави датумите на кои ќе се полага екстерното тестирање, а тоа се 5, 6, 8 и 9 јуни. Подготвени се 450 илјади прашања за сите предмети кои до 15 мај беа јавно прикажани.


Само август и декември не се во игра за локални избори годинава


Скопје, 12 мај, 2017 - 17:04 (META) 

На три дена до истекот на мандатот на градоначалниците, СДСМ и ВМРО-ДПМНЕ првпат денеска излегоа со можни термини за одржување на локалните избори, за да не дојде до блокада во функционирањето на општините.

Лидерот на СДСМ, Зоран Заев, одговарајќи на новинарски прашања, рече дека ако се постигне договор локалните избори да се одржат годинава, тие би биле во октомври или ноември, а доколку се одлучи да бидат следната година, термините би биле март, април или мај.

– Тоа во Македонија досега се правело во договор со сите политички партии и јас очекувам, во најмала рака, ако не ние, лидерите на парламентарните партии, барем наши претставници да направат средба во Собранието, и како што е редот и практиката, да го договорат новиот термин за изборите, а, меѓу другото, да ги договорат и распоредот на Законодавно-правната комисија и на Комисијата за политички систем, за да може бргу да се закаже седницата на Собранието, за и де факто да се одложи одржувањето на локалните избори, кои беа планирани за првата половина на мај – рече Заев.

Попладнево, пратеникот и член на извршниот комитет на ВМРО-ДПМНЕ, Антонијо Милошоски, на прес-конференција, изјави дека неговата партија е за локални избори во најкус можен рок и во нејзино име предложи три можни термини за нивно одржување.

Првиот термин што го предлага ВМРО-ДПМНЕ е 2 јули, а доколку, како што рече Милошоски, парламентарното мнозинство не е подготвено за овој датум, локалните избори да се одржат на 17 или 24 септември, односно на 15 октомври оваа година.

– ВМРО-ДПМНЕ и нашата пратеничка група ќе го поддржат секој предлог за кој ќе се одлучи парламентарното мнозинство. Се надеваме дека тоа ќе биде што поскоро, дека ќе се спроведат брзи и ефикасни локални избори, за да може локалната самоуправа како уставно право на граѓаните да не трпи голема штета – рече Милошоски.

СДСМ на ова реагираше велејќи дека ВМРО-ДПМНЕ со датумите за изборите се однесува како да е на извлекување на лотарија.

Претседателот на Собранието на Република Македонија, Талат Џафери, на денешниот бирфинг со новинарите рече дека обврска на политичките партии е да најдат консензус за датумот за локалните избори и откако ќе се договорат, да го известат Собранието за да може да почнат процедурите.


СДСМ: ВМРО-ДПМНЕ да не лицитира со датуми за локални избори како да е на лотарија


Скопје, 12 мај, 2017 - 16:56 (META) 

Социјалдемократскиот сојуз на Македонија во реакција на прес-конференцијата на Антонијо Милошоски, ја повика ВМРО-ДПМНЕ да престане да лицитира со датуми за локални избори како да станува збор за лотарија.

„Од ВМРО-ДПМНЕ да престанат лицемерно да лицитираат со датуми за локални избори како да се на лотарија додека ги оставија граѓаните на цедило без градоначалници! Да престанат да го притискаат Ѓорге Иванов да одолговлекува со давањето мандат за составување на новата влада и веднаш да ги одблокираат демократските процеси. Така Груевски и раководството на ВМРО-ДПМНЕ најдобро ќе помогнат да се обезбеди законска можност за одржување на локалните избори“, стои во соопштението на СДСМ.

Од партијата велат дека ако досега беше избрана новата влада, немало да има потреба од денешната прес-конференција на Милошоски бидејќи досега ќе беа распишани локалните избори.

„Да мислеа Груевски, Милошоски и раководството на ВМРО-ДПМНЕ на граѓаните, немаше самите на себе да си реплицираат во Собранието и да кочат легитимно формираното парламентарно мнозинство да ја формира новата влада, а знаеја што ги чека граѓаните од 15 мај кога завршува мандатот на градоначалниците и на советите. Ако беше избрана новата влада, досега ќе беа распишани и локаланите избори. Повикуваме чесните и одговорни членови на ВМРО-ДПМНЕ да прифатат дека ВМРО-ДПМНЕ е опозиција и да се постават конструктивно во демократските процеси, што водат кон избор на новата реформска влада, а потоа и кон распишување на локаните избори“, велат од СДСМ.


Предизборни рокови: Што сè нè чека до гласањето на 11 декември?


Скопје, 2 септември, 2016 - 10:46 (META) 

Двапати одложуваните предвремени парламентарни избори, овојпат ќе бидат закажани на 11 декември.

Ова пред два дена го договорија лидерите на политичките партии потписнички на Договорот од Пржино откако претходно двапати ги одложија изборите, кои беа закажани на 24 април, па на 5 јуни.

Доколку партиите не се премислат и повторно не ги одложат изборите, еве кои се роковите од Изборниот законик што треба да ги испочитуваат институциите:

  • 2 септември (денеска) – Новите министри и дополнителни заменици-министри од СДСМ и официјално ќе бидат избрани за членови на владата;
  • 12 октомври – треба да се распушти Собранието и да се распишат избори;
  • 17 октомври – Радиодифузерите, печатените медиуми и електронските медиуми (интернет-порталите) се должни да утврдат ценовници за платено политичко рекламирање на учесниците во изборниот процес;
  • 27 октомври – ДИК мора да го стави на јавен увид избирачкиот список. Јавниот увид трае 20 дена, до 16 ноември;
  • 11 ноември – ДИК треба да ги објави описите на изборните единици;
  • 18 ноември – ДИК мора да ги објави во дневен печат листите со кандидати за пратеници;
  • 21 ноември – Почнува изборната кампања;
  • 22 ноември – ДИК ќе им го достави избирачкиот список на политичките партии, а тие, во рок од пет дена, до 27 ноември, мора да достават барање за запишување, дополнување или бришење податоци;
  • 27 ноември – ДИК го потпишува избирачкиот список;
  • 8 декември – Државната изборна комисија треба да го предаде изборниот материјал на општинските изборни комисии;
  • 10 декември  – Завршува изборната кампања и почнува изборниот молк;
  • 11 декември – Предвремени парламентарни избори.

Што се реализира, а што уште треба да се направи од договореното


Скопје, 3 август, 2016 - 10:33 (META) 

Партиите и институциите, две недели откако преставниците на четирите политички партии постигнаа договор за формирање преодна што која треба да ги организира изборите, се придржуваат до сите рокови што се предвидени во договорот.

Преостанува:

  • 18 август – Краен рок за пријавување на спорните гласачи во ДИК;
  • 19 август – Формирање на ад хок тело за медиуми;
  • 31 август – Краен рок за лидерска средба;
  • 2 септември – Опозицијата именува главен и одговорен уредник на МРТВ (доколку изборите се одржат на 11 декември);
  • 2 септември – Суспендирање на измените во Законот за МВР во однос на надлежностите на министерот (доколку изборите се одржат на 11 декември).

Исполнето:

  • 23 јули – Пратениците во Собранието ги изгласаа измените во Изборниот законик;
  • 25 јули – ДИК го објави списокот со 39.502 спорни гласачи;
  • 28 јули – Пратениците ги изгласаа измените во Законот за внатрешни работи, Законот за аудио и аудиовизуелни медиумски услуги, Законот за кривична постапка и за Законот за Влада.

Викенд, скратена работна недела, па Велигден: Се кратат роковите за разврска на кризата


Скопје, 21 април, 2016 - 15:25 (META) 

Откажувањето на лидерската средба во Виена ја намали надежта дека, сепак, е можен излез од политичката криза во која се наоѓа Македонија подолго време.

Утринава се појави веста дека лидерската средба закажана за утре во Виена, а на која треба да учествуваат и еврокомесарот Јоханес Хан и европратениците Иво Вајгл, Едвард Кукан и Ричард Ховит, е одложена.

Делегацијата на ЕУ во Скопје во вторникот до лидерите на политичките партии во Македонија испрати покани за лидерска средба во Виена, во име на еврокомесарот и на европратениците. До денеска, само ВМРО-ДПМНЕ и ДУИ го потврдија своето присуство. Лидерот на СДСМ, Зоран Заев, вчера на прес-конференција соопшти дека од неговата партија нема да учествуваат на средбата доколку претседателот Ѓорге Иванов не ја повлече одлуката за аболиција и ако не се свика Собранието за да се одложат изборите, закажани за 5 јуни.

Сепак, дали има шанси за конечно решение на политичката криза која трае премногу долго? Со оглед на тоа што доаѓа викенд, а потоа и скратена работна недела поради велигденските празници, шансата за некој вид лидерски собир, без разлика каде би се одржал, има по 3 мај.

Тоа, пак, ги намалува роковите за можен излез од кризата, со оглед дека листите на кандидати за пратеници во Собранието на Република Македонија, овластените претставници на предлагачите ги доставуваат до ДИК најдоцна до 11 мај 2016 година, до полноќ.

Од 16 мај почнува изборната трка. Значи, СДСМ има шанса сепак да прифати учество на изборите до 11 мај.

Исто така, до тој датум, без разлика што претседателот на Собранието, Трајко Вељаноски, тврди дека нема уставна можност пратениците повторно да се вратат на работа, сепак, по „заобиколни патишта“ може да се свика повторно Собранието. По овој датум сè е залудно.

По 11 мај, според роковникот на ДИК и датумите предвидени во Избирниот законик, предвидени се следниве рокови:

  • 14 мај – Ждрепка за редоследот на кандидатите на гласачкото ливче;
  • 16 мај – Почеток на изборната кампања;
  • 26 мај – ДИК го заклучува избирачкиот список;
  • 29 мај – Избирачот кој не е во можност да гласа на гласачкото место (немоќно или болно лице), а сака да гласа, за тоа треба да ја извести ОИК;
  • 31 мај– Организациите и лицата доставуваат барање за набљудување до ДИК;
  • 2 јуни – ДИК го предава изборниот материјал на ОИК;
  • 3 јуни – Крај ја изборната кампања (24 часот);
  • 4 јуни  – Гласаат болните и изнемоштените лица, затворениците и притворените, како и гласачите во дијаспората;
  • 5 јуни – Гласаат граѓаните на Република Македонија;
  • 19 јуни – Евентуално прегласување.