Суспендиран раководителот на сектор Mлади во АМС, Комисијата треба да ја плати штетата


Скопје, 3 април, 2018 - 15:31 (META) 

Директорот на Агенцијата за млади и спорт, Дарко Каевски денеска на прес-конференција соопшти дека Агенцијата ќе поведе дисциплинска постапка и ќе го суспендира раководителот на секторот Mлади поради објавувањето на збирката поезија, која содржи сексизам и дискриминацијата.

Тој истакна дека одговорност за објавувањето на збирката ќе сносат и членовите на Комисијата којашто го вршела изборот на песните, бидејќи според него таа имала и должност да направи избор кои од песните ќе бидат објавени. Од нив ќе се бара и да ја надокнадат направената штета од 170.000 денари, за печатењето на 5.000 примероци.

-Комисијата имала обврска да изврши селекција на пристигнатите песни, одговорноста за извршениот избор ја имаат нејзините членови. Агенцијата ќе поведе постапка и ќе бара од Комисијата да ја надомести штетата во целост – рече Каевски.

Тој додаде дека не размислува да поднесе оставка, туку инсистира да се истражи случајот и да се лоцира одговорноста. Според него утврдено е несовесно, нестручно несоодветно и непрофесионално работење кај неколку чинители кои имале активна улога околу публикацијата „Млади поети“.

-Како директор не сум дал ниту писмена, ниту усна согласност да бидам уредник на збирката песни, а Агенцијата за млади и спорт не може да биде издавач, ниту пак јас како овластено лице не можам да бидам уредник, согласно Законот за издавачка дејност – вели Каевски.

Директорот на Агенцијата информираше дека МВР ќе го гони за украден идентитет авторот на песните со дискриминаторска содржина и говор на омраза, објавени во збирката „Млади поети“.


Претставници од АМС ја одобрија збирката пред печатењето, велат од „Арс ламина“


Скопје, 3 април, 2018 - 12:08 (META) 

Издавачката куќа „Арс ламина“ тврди дека настанало недоразбирање при печатењето на контроверзната збирка „Млади поети“ при што како уредник е наведен директорот на Агенцијата за млади и спорт, Дарко Каевски.

Агенцијата не ги испратила потребните податоци за печатење на публикацијата, па во понатамошната комуникација настанало и недоразбирање, поради кое како уредник е наведен директорот Дарко Каевски, за што очигледно тој не бил известен, велат од „Арс ламина“.

Каевски претходно изјави дека неговото име било впишано како уредник на збирката без да биде консултиран и според него издавач треба да биде „Арс ламина“. Од издавачката куќа не се сложуваат.

-„Арс Ламина“ има склучено договор со Агенцијата, врз основа на претходно објавениот оглас за печатење на збирката. Во техничката спецификација на огласот, како и во самиот договор, во ниеден момент од „Арс ламина“ не се побарани издавачки услуги, туку исклучиво печатарски. Во таа смисла, според договорот, „Арс ламина“ технички ја уреди книгата и ја испечати, без никакво мешање во нејзината содржина. Претставниците од Агенцијата ги одобрија финалниот изглед и содржината на збирката пред нејзиното печатење. Дополнително, „Арс ламина“ не ни може да биде издавач, бидејќи ниту ги нарачала авторските текстови (песни и предговор), ниту е носител на авторските права за истите, ниту пак направила избор и редакција на содржините од збирката“, велат од издавачката куќа.

Синоќа Каевски се сретнал и со премиерот Зоран Заев. Му ги презентирал првичните наоди од внатрешната анализа за печатењето на збирката, а Заев го охрабрил целосно да го расветли случајот. Воедно му порачал дека треба да се побара одговорност од сите учесници и да се спроведат јасни протоколи за никогаш повеќе да не се повтори грешката.


Заев: Каевски не е должен да чита сѐ, тој е добар директор со добри резултати


Скопје, 2 април, 2018 - 15:47 (META) 

За скандалот со објавената збирка поезија од Агенцијата за млади и спорт, директорот на оваа институција Дарко Каевски денеска ќе има средба со премиерот, Зоран Заев.

Каевски вчера се извини како покровител и потпишувач на проект за млади поети, рече Заев.

– Тој навистина не е должен да чита сѐ што има во материјалот, ниту, пак, е должен да го провери целиот материјал. Јас како градоначалник имам помагано финансирање на книги, и како комерцијален директор имам помагано во објавување книги. Не сум ги читал сите тие книги и детали и од таа причина не сум човек кој веднаш разрешува луѓе или слично- изјави Заев.

Според него, директорот на Агенцијата за млади и спорт е добар кадар, кој покажал добри резултати и добро ја води самата институција.

– Денеска ќе имам состанок, сакам да ги видам сите детали и од тој аспект заедно ќе донесеме одлука за оваа работа, но споделувам тоа што во моментов го чувствувам – рече Заев.


Агенцијата за млади и спорт ја повлече збирката со дискриминаторски содржини


Скопје, 2 април, 2018 - 11:28 (META) 

Директорот на Агенцијата за млади и спорт Дарко Каевски и се извини на јавноста и рече дека ќе биде повлечен тиражот на збирката „Млади поети“ кој се уште не е дистрибуиран, а во која се објавени две песни со контроверзна содржина.

-Во овие две песни има недолична содржина. Според мене, содржината дискриминира и шири говор на омраза и јас како директор на Агенцијата за млади сум против ваква содржина и го сметам за грешка. Агенцијата за млади ја почитува слободата на говор, но истовремено се противи на каков било говор на омраза и дискриминација базирана на родова, етничка или каква било друга основа – рече директорот на Агенцијата за млади и спорт, Дарко Каевски.

Каевски, кој е потпишан како уредник на збирката, вели дека потписот го ставил за постапката, а не за содржината на песните.

-Не ми е јасно зошто јас како Дарко Каевски фигурирам како уредник на збирката. Ќе испратам официјално барање до фирмата да ми објаснат зошто донеле таква одлука, кога во претходните години директорот никаде не фигурирал како уредник. Исто така ќе испратам барање и до членовите на Комисијата, кои цело време се оградуваат да ми објаснат која е нивната задача, иако во решението убаво е наведено дека освен што треба да ги изберат најдобрите три песни, треба и да направат селекција на песните. Сега е најлесно сите да се оградуваат. А, после тоа ќе покренам обвиненија против сите што не си ја почитувале работата, а сега ме местат мене – истакна Каевски.

Тој додава дека ако тој бил доволно стручен, тој ќе ги избирал песните, немало потреба да биде формирана комисија.


Повеќе средства за поддршка и партнерски односи со младите во институциите


Скопје, 20 март, 2018 - 16:59 (META) 

Со младинските организации дискутиравме за напредокот на спроведувањето на младинските политики во рамките на ресорните институции, информираше денеска премиерот Зоран Заев по завршувањето на тематската владина седница посветена на младинските политики.

Тој додаде дека ќе се организираат јавни дискусии за новиот Закон за млади, но и се донеле одлуки за формирање на важни работни групи.

– Со 16,5 милиони евра, Владата ги стимулира програмите и мерките за вработување на младите оваа година. За подбрување на образованието превидуваме 1,27 милијарди денари. За прв пат се обезбедени 80 милиони денари за подобрување на условите во ученичките и студентските домови. За капитални инвестиции во образованието предвидени се 2,14 милијарди денари – рече Заев.

Дона Костуранова од Младинскиот образовен форум информираше дека на седницата се дискутирало за средношколско и студентско право на учество во самите образовни институции.

– Преку законот за средно образование побаравме средношколците во земјата да добијат законско право да се самоорганизираат во училиштата и да им се слуша гласот. Во однос на студентските претставнички тела, побаравме вистински избори за вистински студентски претставници – рече Костуранова.

Директорот на Агенцијата за млади и спорт, Дарко Каевски, рече дека оваа институција повеќе нема да биде само за спорт туку за поддршка на младинските политики и мерки и спроведување на проектите.

– Ќе бидеме партнери на институциите во процесите на креирање и имплементација на младинските мерки – додаде Каевски.


Се подготвува нов Закон за спорт и десетгодишна национална стратегија за спорт


Скопје, 7 февруари, 2018 - 15:40 (META) 

Нов Закон за спорт и десетгодишна национална стратегија за спорт најави денеска премиерот Зоран Заев по дебатата во Владата со спортски работници, претставници на спортски федерации, здруженија и поддржувачи на развојот на спортот, за стратешките основи за развојот на спортот во Македонија.

– Ве уверувам дека во мене имате спортски партнер, а во Владата поддршка. Целта е спортистите да го добијат заслуженото место во општеството со финансиска, но и логистичка поддршка. Посебно внимание ќе посветиме на наставата по физичка култура во училиштата – рече Заев.

Директорот на Агенцијата за млади и спорт, Дарко Каевски, рече дека дел од приоритетни мерки кои ќе ги преземе Агенцијата ќе биде градењето на мали реонски базени, наградување на 250 младински клубови како и враќањето на спортски сали на федерациите.

На новинарско прашање за обвинувањата од Александар Маленко дека Каевски направил упад во пливачката Федерација на Македонија, Каевски рече дека 15 пливачки клубови бараат од Агенцијата за млади и спорт да го преиспита последното Собрание на Пливачката федерација на Македонија.

Маленко пред два дена го обвини Каевски дека направил прекршок и упад во работењето на Федерацијата со барањето на одржување на вонредно Собрание и дека со тоа ја нарушил самостојноста и независноста на ПФМ.

Каевски рече дека Маленко не е легитимен претседател на Федерацијата затоа што не е заведен во Централен регистар.

– Федерацијата има десетгодишна блокирана сметка со долг од над 20 милиони денари и дополнително треба да утврдиме и да видиме каде се тие средства. Федерацијата пет години немала завршно Собрание и нема завршна сметка, а доколку две години нема доставено завршна сметка и годишно Собрание по автоматизам треба да се оди во стечај. Ние како АМС не сакаме да го направиме тоа, не сакаме да го укинеме пливањето. Напротив, апелираме дека треба да се преземат чекори за пливањето повторно да се врати на она ниво како што беше пред 10—15 години– изјави Каевски.


СДСМ ветува дека ќе го укине екстерното тестирање


Скопје, 25 јануари, 2016 - 16:44 (META) 

Доколку победат на избори, од СДСМ ветуваат дека во интерес на учениците, професорите и на родителите ќе го укинат екстерното тестирање, кое, според партијата, е неуспешен проект што предизвикува стрес кај децата и фрустрации кај наставниците.

– Екстерното тестирање е еден од најнеуспешните проекти на Никола Груевски во образованието. Ниту нешто мери, ниту нешто подобрува. Само ги зголемува фрустрациите кај наставниците, стресот кај децата, учениците и кај родителите. Квалитетот на образованието не беше воопшто цел. Упорноста со која ВМРО-ДПМНЕ го турка овој проект и покрај огромниот револт и протести на учениците и на родителите, покажува дека власта во заминување не мисли на учениците. Од утрово лошиот систем за екстерно тестирање повторно не функционираше. Со часови матурантите чекаа во училиштата за да го полагаат тестот. Никој не презеде одговорност за тоа што учениците се држеа толку долго време во училиштата иако немаше услови за полагање – вели Дарко Каевски, потпретседател на Социјалдемократската младина на Македонија.

Според Каевски, екстерното тестирање е наменето за врз илјадници наставници да се врши постојан притисок и за да им се наметнува партиска контрола. Од партијата велат дека наместо екстерно тестирање, потребен е вистински развој на образованието.