Банкарите бараат одложување на оданочување на каматите од депозитите до влез во ЕУ


Скопје, 9 ноември, 2018 - 11:13 (META) 

Македонската банкарска асоцијација бара одложување на оданочувањето на каматите на депозитите на граѓани најавено за од 2020 година, до влезот на земјата во ЕУ.

Ова е заклучокот од седницата на Собрането на оваа асоцијација на која биле разгледани предложените законски измени што се однесуваат на оданочување на доходот од камати на депозити на граѓаните.

-Ставот на Македонската банкарска асоцијација е дека нивната примена треба да се одложи до влез на нашата земја во Европската унија, со цел да се задржи позитивниот тренд на штедењето, да се обезбеди свеж капитал за стопанството, како и да се одржи стабилноста на банкарскиот сектор – велат од МБА.

Во однос на воведувањето прогресивно одданочување, ценат дека е потребна поширока расправа заради унапредување на предлогот со вклучување на позитивни искуства од земјите каде веќе е во примена.

Македонската банкарска асоцијација најавува дека ќе побара средба во Министерството за финансии за подетално да ги презентира своите ставови.

Според предложеното законско решение од Министерството за финансии, каматите од депозитите треба да се оданочуваат од 2020 година со стапка од 15 проценти, но на износот над 15.000 денари. Оданочувањето денес изнесува 10 проценти.


Тевдовски: Наплатата на даноци повисока за 120 милиони евра повеќе од лани


Скопје, 10 септември, 2018 - 11:24 (META) 

Наплатата на даноци и придонеси заклучно со август е повисока за 120 милиони евра во однос на минатата година, вели министерот за финансии Драган Тевдовски. Тој додаде дека даноците и придонесите пораснале за седум проценти во однос на минатата година.

– Наплатата на даноците покажува интензивирање на економската активност. Ова се должи во голема мерка на растот на данокот на добивка, чија наплата е подобра за 25 проценти во однос на лани или за околу 35 милиони евра. Тоа укажува на зголемена активност на фирмите. Исто така има раст на придонесите на седум проценти што укажува дека трендот на раст на плати и нови работни места продолжува и после второто тримесечје. Имено, високата наплата на придонеси во првото полугодие од годинава е поврзано со растот на платите за 5,6 проценти и растот на бројот на работни места за околу 10.000 нови – рече Тевдовски и дополни дека сервисирањето на обврските од државата се одвива непречено.

– Повратот на ДДВ кон фирмите е навремен и неселективен. Од почетокот на годината до крајот на август, во стопанството се вратени 250 милиони евра поврат на ДДВ. Во август имавме извршено најголем поврат во последните години, во износ од 44 милиони евра. Со обезбедување на ликвидност на фирмите, се поддржуваат нивните тековни, но и инвестициски активности. Во овој период се забележува поголема инвестициска активност на компаниите. Имено, ако се анализира увозот, во периодот од јануари-јули 2018, најголем раст од 19,7 проценти се забележува кај секторот машини и транспортни уреди. Овој податок укажува на раст на инвестициите на фирмите во основни средства. Тоа ќе придонесе за раст на економската активност и во иднина, поголемо производство и нови работни места- вели Тевдовски.


За борба против даночна евазија и сива економија, потпишана Конвенцијата на ОЕЦД


Скопје, 19 јули, 2018 - 10:10 (META) 

Со цел борба против даночната евазија и сивата економија, Македонија ја потпиша Конвенцијата за заемна административна помош за даночни прашања на Организацијата за економска соработка и развој (ОЕЦД) и Советот на Европа, информираат од Министерство за финансии.

„Станува збор за Kонвенција потпишана од повеќе од 120 држави. Taa овозможува даночна соработка меѓу потписниците преку размена на информации, соработка при наплата на даноци, заеднички даночни контроли и слично. Конвенцијата претставува глобален инструмент за даночна соработка помеѓу државите и воедно најопширна мултилатералнa конвенција за размена на информации и даночна соработка. Меѓу земјите потписнички се и земјите од Г-20 и земјите членки на ОЕЦД. Од регионот потписнички на конвенцијата се Албанија, Бугарија, Хрватска и Словенија“, се вели во соопштението.


Грчките синдикати најавуваат 24-часовен штрајк на јавниот и приватниот сектор


Атина, 29 мај, 2018 - 10:38 (META) 

Најголемите грчки синдикати на вработените во јавниот и приватниот сектор за утре закажаа генерален 24-часовен штрајк, што ќе ја парализира цела Грција, јавува новинската агенција МИА.

Проблеми ќе има во авионскиот, железничкиот и бродскиот превоз, а нема да се емитуваат ниту вести и информативни емисии поради учеството на новинарите во штрајкот.

Грчките авиокомпании откажале или презакажале дел од летовите, а бродовите и возовите исто така нема да сообраќаат. Јавниот сектор нема да работи до четврток, а протести се закажани за утре во центарот на Атина.

Синдикатите ги повикуваат граѓаните да ги „обединат силите против мерките на штедење, невработеноста и прекумерните даноци“.


Експерти од Светска банка прават анализи ќе понудат различни модели на оданочување


Скопје, 11 април, 2018 - 13:00 (META) 

Светска банка смета дека Владата оди во добра насока со заложбите за воведување на прогресивен данок, имајќи ги предвид податоците за приходната страна на буџетот.

При презентацијата на редовниот економски извештај за Западен Балкан, на новинарско прашање, дали Светска банка смета дека прагот од 1.000 евра за воведување на прогресивен данок е добар,  директорот на Канцеларијата на Светска банка во Македонија, Марко Мантованели, рече дека тој праг детално треба да се разгледа.

– Министерство за финанасии оди во правилна насока, имајќи ги предвид податоците за приходите денес, но прагот треба дополнително да се разгледа – изјави Мантованели.

Тој додаде дека вкупните приходи се со низок процент на учество во домашниот бруто-производ (БДП).

– Рамниот данок има предности и неповолности, и е поголемо оптоварување за сиромашните – додаде Мантованели.

Според Светска банка, резултатот од рамниот данок врз македонската економија е константно намалување на приходите и поради тоа сме таму каде што сме.

Во 2016 и 2017 година имало намалување на приходната страна, а исклучок бил данокот на добивка на данокот на капитал.

– Има можност за зглемување на оданочувањето на капиталот, данок кој би бил таргетиран, а не да се однесува на општата популација – изјави економистот во канцеларијата на Светска банка во Македонија, Бојан Шимбов.

Во однос на даночните реформи во државата, од Светска банка велат дека тим од експерти од Вашингтон ја разгледуваат даночната политика и ќе понудат различни модели, како и објаснување и како ќе влијаат врз различни групи даночни обврзници.

Студијата наскоро ќе биде објавена од Светска банка и ќе биде презентирана пред јавноста.


Светска банка: Економијата во Македонија закрепнува, прогнозите се позитивни


Скопје, 11 април, 2018 - 12:02 (META) 

По минатогодишната стагнација на македонската економија, Светска банка за земјите од Западен Балкан за годинава предвидува раст од 3,2 проценти и 3,5 проценти во 2019 година.

Редовниот економски извештај за Западен Балкан покажува дека економиите на Македонија и Србија, влијаеле и на намалувањето на растот на економијата на Западен Балкан, од 3,1 процент во 2016 година на 2,4 проценти во 2017 година.

– Економското влијание на политичката криза во Македонија беше подолго од очекуваното. Растот забави на нула во 2017 година, заради големото намалување на инвестициите. Но, економијата веќе започнува да закрепнува во 2018 година, предводена од потрошувачката и закрепнувањето на инвестициите. Нашите прогнози се позитивни за блиска иднина – изјави директорот на Канцеларијата на Светска банка во Македонија, Марко Мантованели.

Градежната и преработувачката индустрија во првите три квартали лани забележале пад.

– Во четвртиот квартал лани имаме мало закрепнување на преработувачката индустрија, кое продложи и на почетокот на годината. Кај градежништвото нема јасна слика. По падот на активноста, имаме привремено пролонгирање на проектите во јавните инвестиции, бидејќи Владата го ревидира квалитетот. Во креирањето на 190.000 работни места на Балканот, Македонија учествува со 18.000. Така што и покрај стагнацијата на економијата, има позитивно поместување на пазарот на трудот. Мерките за вработување треба да бидат активни без фискални импликации како во минатото – рече економистот во канцеларијата на Светска банка во Македонија, Бојан Шимбов.

Тој додаде дека извозот растел побрзо од увозот, со што се придонело за намалување на трговскиот дефицит. Според Шимбов, позитивно е тоа што во него придонеле и домашните извозници, како резултат на закрепнувањето на економијата во Европа, која е наш најголем трговски партнер. Странските инвестиции лани имал мал пад, поради политичката криза и несигурноста.

Светска банка ја поздрави заложбата на владата за фискална консолидација со фискалната стратегија, а го нотираше и ланското намалување на јавниот долг, прв пат по 2008 година.

Од Светска банка препорачуваат зголемување на приходите и подобро менаџирање на расходната страна.

– Има простор за зголемување на приходната страна преку ефикасна наплата на даноците и зголемување на квантитетот на истите. Притоа, тие треба да бидат искористени за продуктивна цел, не на тековни трошоци и нетаргетирани социјални трошења како во минатото – додаде Шимбов.

Светска банка оценува дека потенцијалното членство во НАТО и преговорите со ЕУ, ќе бидат сидро за структурните реформи кои позитивно би влијаеле на економскиот раст, зголемување на сигурноста на странските и домашните инвеститори.

Во однос на емиграцијата на населението, податоците на Светска банка покажуваат дека 25 отсто се иселени, а пикот бил достигнат во 2015 година.

– Долго не е спроведен попис и точната бројка не може да се одреди. Извор на податоците се Обединетите нации и Виенскиот институт, со што проксимативно, бројката е 25 отсто од популацијата. Во 2015 година сме имале исторски максимум на иселување, споредено со 2000 година. Трендот на иселување на висококвалификувана работна сила продолжува – појасни Шимбов.

Од Светска банка ѝ препорачуваат на владата континуирани заложби за фискална консолидација, воведување на даночни реформи за мобилизирање на приходи, зајакнување на даночни проходи и ревидирање на даночните отстапки, рационализирање  и подобрување на квалитетот и ефикасноста на социјалните трошења, рационализација на субвенциите посебно во земјоделстовото, обезбедување на одржливост на пензискиот систем.


Да се искористи потенцијалот за економска соработка со Турција, порача Заев


Скопје, 15 март, 2018 - 11:43 (META) 

Во Македонија веќе работат сериозен број на турски компании кои плаќаат плата на вработените, плаќаат даноци во буџетот и учествуваат во севкупното производство и во извозот, рече премиерот Зоран Заев по состанокот со компаниите членки на Стопанска комора Македонија – Турција, МАТТО.

Тој додаде дека уште повеќе треба да се зголемува бројот на турски инвестиции и да се искористи големиот потенцијал за соработка што двете земји го имаат.

„Импресионирани од мотивацијата која што ја добивме од неодамнешната посета на Турција, наша заедничка должност е да разработиме конкретни проекти и активности кои за деловната заедница ќе значат бизнис и повеќе профит, за Република Македонија нови работни места, зголемување на БДП и севкупниот извоз“, изјави Заев.

Тој ги информирал компаниите за можностите што ги отвора Планот за економски раст и законското решение кое што помина на владина седница. Заев очекува дека стопанствениците ќе ги пронајдат своите можности за инвестирање преку поддршката што ја овозможува овој План и ќе преземат храбри чекори за нови инвестиции во Македонија.

На средбата со компаниите присуствувале и министерот без ресор задолжен за странски инвестиции, Аднан Ќахил и советникот за економија и финансии, Фатмир Бесими.


Речиси половина од платите во Македонија не се пријавуваат реално


Скопје, 6 февруари, 2018 - 14:47 (META) 

Високата стапка на невработеност на корупција и на сиромаштија се ризици за појава на скриена економија во Македонија, Албанија и Косово се вели во истражувањето кое беше презентирано во рамките на Регионалниот форум за скриена економија, кој денеска се одржува во „Холидеј Ин“.

Скриените плати, се уште се еден од најголемите проблеми и подразбираат целосно или делумно непријавување на приходот кај речиси половина од испитаниците, односно 44 проценти од вработените во Македонија, 36 проценти во Албанија и  37 проценти во Косово.

– Една третина од испитаниците во Македонија изјавиле дека реалната плата е повисока од минималната наведена во договорот. Негативната перцепција кон социјалното и здравственото осигурување, придонесува кон тоа, вработените да прифатат платата да им биде исплатена во готово отколку за осигурување. Секој петти испитаник во Македонија и во Албанија попрво би бил непријавен работник доколку зема повисока нето-плата, отколку пријавен со пониска плата – изјави Ана Мицковска Ралева од Центарот за истражување и креирање политики (ЦРПМ).

Корупцијата, како што се вели во истражувањето, е најважниот фактор за постоење на скриена економија. Една третина од анкетираните бизнисмени во Македонија, две третини во Албанија и Косово изјавиле дека постојано се случуваат манипулации со данокот на додадена вредност (ДДВ). Во истражувањето се вели дека, корупцијата е најважниот фактор за постоење на скриена економија според 45,7 проценти од анкетираните бизнисмени во Македонија, 72,9 проценти во Албанија, Косово 48,6 проценти.

Герши Гаши од организацијата Демократија за развој од Косово вели дека, голем проблем претставува недостатокот на соработка помеѓу институциите и министерствата. Тој го наведе и нетранспарентното трошење на јавните пари, кое влијае на избегнување на плаќање на даноци.

– Голем проблем е и правната несигурност. Честото менување на законите, прави даночните обврзници да не се сигурни, кој закон е на сила во однос на плаќањето на даноците – изјави Гаши.

Истражувањето „Мониторинг на скриената економија во Македонија, Албанија, Косово“ било спроведено во 2016 година, на 1.100 испитаници и 70 бизнисмени.


Тевдовски: Со буџетот за 2018 се фокусиравме на ефикасно трошење на парите


Париз, 14 декември, 2017 - 14:33 (META) 

Министерството за финансии се фокусираше на ефикасност во трошењето на средствата во буџетот за 2018 година, рече министерот за финансии, Драган Тевдовски на министерската конференција во Париз на тема „Доброто деловно јавно управување-сервис за граѓаните и бизнисите“, организарана од Организацијата за економска соработка и развој (ОЕЦД).

Тој додаде дека важно е да има инвестиции и трошење, но уште поважно е за што парите ќе бидат потрошени.

„Ние не се фокусиравме толку на расходната страна и намалувањето на расходите, колку на тоа, за што се трошат средствата. Наш приоритет како министерство и влада е да ја зајакнеме ефикасноста при трошењето на јавните средства, притоа обезбедувајќи, расходите ефективно да се користат за вистинските цели, а јавноста да добие вредност за парите“, рече Тевдовски.

Тој додаде дека за социјалните трансфери и земјоделски субвенции, Владата многу повеќе се фокусира на нивната правилна употреба.

Во однос на транспарентноста на трошењето, Тевдовски истакна дека, „доколку јавноста е запознаена како се управува со средствата и како тие се трошат, тогаш би можела да врши постојан притисок врз функционерите кога тие не управуваат добро со средствата.“

За Стратегијата за управување со јавни финансии потенцираше дека треба да биде усвоена до крајот на годината, и спроведена во наредните години.


Светска банка препорачува Владата да ги одложи ад хок зголемувањата на пензиите


Скопје, 16 ноември, 2017 - 19:05 (META) 

Поради долготрајната политичка криза, Светската банка во редовниот есенски извештај за Западен Балкан проектира економскиот пораст на Македонија до крајот на годината да изнесува 1,5 отсто. Проекцијата за порастот за следната година е 3,2 проценти, а за 2019 година – 3,9 проценти, со очекување да закрепнат инвестициите и потрошувачката.

Светска банка наведува дека приоритет за Македонија е фискална консолидација со зголемено ниво на приходи и подобрена ефикасност на приходната и на расходната страна.

– По разрешувањето на политичката криза, главниот ризик е поврзан со фискалната страна. Битно е да се одржи макроекономската стабилност за да не се поткопаат изгледите за пораст – рече Марко Мантованели, директор на канцеларијата на Светска банка во Македонија, во обраќањето на прес-конференцијата во Приштина, која беше пренесувана во седиштето на банката во Скопје.

Главен двигател на порастот се очекува да биде приватната потрошувачка и зголемувањето на инвестициите повразни со изградбата на двата автопатишта.

Фискалниот дефицит се очекува да се намали на 2,2 проценти до 2019 година, за што Владата треба да почне реформи со зголемување на наплатата на даноците, намалување на трошењето и зголемување на ефиканоста на социјалните трошења.

Во врска со социјалните трошења, Светска банка ѝ препорачува на Македонија да ги рационализира субвенциите, особено во земјоделството и да обезбеди одржливост на пензискиот систем. Првата препорака е Владата да ги одложи ад хок зголемувањата на пензиите, што во изминатите години создало притисок на Фондот за пензиско и инвалидско осигурување.

– Моментално Фондот за пензиско и инвалидско осигурување е во добра кондиција и добива трансфери од централната власт, кои се зголемуваат со тек на годините. Целта е да се намали зависноста на пензискиот фонд од тие трансфери. Ние работиме на параметарски измени во законската регулатива кои ќе ги намалат тие притисоци – рече економистот на Светска банка, Бојан Шимбов, на прес-конференција во Скопје.

Прашан дали во измените на регулативата може да влезе и делот за зголемување на старосната граница за пензионирање, Шимбов рече оти не може да одговори на тоа прашање, дека на пензиите работи конкретен специјалист и дека анализата за измените е во тек.