Елези: Ги следиме меѓународните стандарди за спречување на даночно затајување


Тбилиси, 17 јули, 2018 - 11:13 (META) 

Македонија ги следи меѓународните стандарди и трендови за спречување даночно затајување и избегнување плаќање данок, истакна заменик-министерката за финансии Ширет Елези на конференцијата која се одржува во Тбилиси, Грузија, насловена „Подобрување на меѓународната соработка: Борба против даночната евазија“.

Елези истакна дека до крајот на 2019 година државата ќе ги имплементира стандардите БЕПС (Base Erosion and Profit Shifting), кои се однесуваат на намалување на можностите за избегнување на плаќање данок преку селење на профитот во таканаречените даночни раеви.

„Македонија соработува и со Глобалниот форум за транспарентност и размена на информации. Како правна рамка и основа за спречување даночна евазија, државата ги користи и договорите за одбегнување на двојно оданочување, склучени со 48 земји“, изјави Елези.

На форумот во Грузија учествуваат 20 земји со над 60 учесници, претставници на министерства за финасии, народни банки, директори на управи за јавни приходи, претставници на Европската комисија, на Светска банка и ОЕЦД.


Николовски: Даночните постапки за земјоделците се поедноставуваат


Скопје, 11 јуни, 2018 - 16:45 (META) 

Со последните измените на Законот за персонален данок на доход, значително се поедноставуваат даночните постапки за земјоделците, порачаа на денешната заедничка прес-конференција министерот за земјоделство, шумарство и водостопанство, Љупчо Николовски и директорката на Управата за јавни приходи, Сања Лукаревска.

Со последните законски измени, се намали прагот за регистрација на овие даночни обврзници. Со измените на законот се зголеми прагот за остварени приходи од продажба на земјоделски производи од претходно 300.000 денари на 1.000.000 денари, за што земјоделците кои немаат дополнителни приходи во текот на годината, ќе имаат право на поврат на данокот на доход.

Николовски посочи дека на овој начин остануваат повеќе пари кај земјоделците, а дополнително ќе бидат ослободени од досегашните административни процедури.

„Кон крајот на годината УЈП ќе ги има сите пресметки за тоа колкава група на земјоделци ќе бидат опфатени и колку пари се враќаат кај земјоделците. Повратот ќе оди директно на земјоделците, а овој данок ќе се задржува од страна на откупувачите“, рече Николовски.

Тој додаде дека земјоделците нема да поднесуваат барање за регистрација како даночни обврзници, нешто што досега се вршеше, нема да плаќаат адмнистративни такси и нема да поднесуваат годишна даночна пријава.

Повратот на платениот данок ќе го врши Управата за јавни приходи и ќе се реализира по службена должност, по истекот на годината во која е остварен приходот, односно откако ќе завршат постапките за утврдување на годишните приходи и данокот за таа година.

Така, граѓаните ќе немаат обврска да доаѓаат во Управата и да поднесуваат барање за поврат и нема да плаќаат административни такси за барањето за поврат и за даночниот управен акт со кој се врши повратот, во вкупен износ од 300 денари.


Завршни зборови за „Тенк“, продолжуваат судењата за „Тендери“ и „Тотал“


Скопје, 14 мај, 2018 - 10:18 (META) 

Во Основниот суд Скопје 1 денеска ќе се одржат три судски рочишта за случаите на Специјалното јавно обвинителство, од кои за еден ќе се изнесуваат завршните зборови.

Во судењето за случајот „Тенк“, во кој, за набавката на прескапиот блиндиран „мерцедес“ вреден близу 600.000 евра, на поранешниот премиер Никола Груевски и поранешниот помошник министер во МВР Ѓоко Поповски, треба да бидат изнесени завршните зборови на одбраната. Во овој случај обвинета е и поранешната министерката за внатрешни работи Гордана Јанкулоска, но постапката за неа беше издвоена поради „ризична бременост“.

Во Кривичниот суд покрај овој процес, денеска ќе има рочишта и за  случаите „Тендери“ и „Тотал“. Во првиот случај и се суди на поранешната министерка за култура Елизабета Канческа – Милевска, за тендерот за завршни работи во Музејот на македонската борба за државност и самостојност од проектот „Скопје 2014“. Во овој случај обвинети се уште двајца членови на Комисијата за јавни набавки.

Во случајот „Тотал“, му се суди на новинарот Драган Павловиќ-Латас, кој не присуствуваше на претходните три рочишта поради здравствени, односно семејни причини. Латас се товари дека давал лажни податоци во завршните сметки и даночните пријави при што преку неговите фирми затаил данок во износ од 7.466.981 денар или 121.414 евра, а лично тој затаил 3.876.471 денар или 63.032 евра.


Анѓушев: Прогресивниот данок претставува порамномерен товар на даночната политика


Скопје, 20 април, 2018 - 16:19 (META) 

Во државата во моментов се води само дискусија за промена на персоналниот данок, а сите останати даноци и понатаму остануваат исти, одговори на новинарско прашање вицепремиерот за економски прашања, Кочо Анѓушев на „Конференцијата за зголемување на конкурентноста на домашните мали и средни претпријатија со цел подобрување на нивната соработка со странските инвеститори – Можности и предизвици“

– Данокот на добивка, данокот на имот и сите останати даноци остануваат исти, предмет на дискусија во Владата е само прагот на платата над која ќе се зголеми персоналниот данок. Таа дискусија ќе ја прошириме со целокупната зантересирана јавност и сите чинители на економското живеење во земјава – изјави Анѓушев.

Тој потенцираше дека зголемувањето на персоналниот данок за одредена категорија граѓани претставува социјална правда и порамномерен товар на даночната политика.

Во делот на фискалната политика, покрај ставање под контрола на сивата економија, Анѓушев оцени дека има и простор за други типови на поголема фискална дисциплина, пред се, кај трансферните цени на компаниите кои имаат свои компании ќерки во другите држави.

– Спорен е начинот на префактурирање, односно на наплаќање или ценовната политика на компаниите кога си продаваат компанија мајка на ќерка од една во друга држава. Тоа е причината за многу пропаднати фабрики во земјава како и една од најголемите причини поради кои „Фени“ дојде во ситуацијата во која дојде – додаде тој.


„Танјуг“ ги заложи уметничките дела за да го одложи плаќањето данок


Белград, 4 април, 2018 - 13:35 (META) 

Новинската агенција „Танјуг“ заложи 205 уметнички дела од вкупна вредност од 7.069.166 динари, за Секретаријатот за јавни приходи на Белград да го одложи плаќањето на данок од 5.704.093 динари на рати во траење од пет години.

Ова вчера го објави Центарот за истражувачко новинарство на Србија (ЦИНС), а пренесе “Истиномер.ср“, наведувајќи дека Агенцијата за економски регистри усвоила решение за заложно право над уметничките дела на „Танјуг“ на 5 мај минатата година.

Право на делата има Град Белград, што значи дека во случај „Танјуг“ да не го исплати долгот во предвидениот рок, Градот ќе може да го наплати со продажба на уметничките дела. „Танјуг“ во тој период не смее да ги оштети, уништи или продаде овие предмети.

„Танјуг“ на 13 март поднел барање да му се одложи плаќањето на данок, наведувајќи дека долгот е повеќе од пет отсто од вкупниот годишен приход за претходната година и дека принудната наплата на целиот износ би нанела „голема економска штета“.

Според документите до кои дошол ЦИНС, наведено е дека долгот се однесува на данок на имот и надомест за користење на градежно земјиште, меѓутоа не е прецизирано за кој имот се работи.

Според податоците на Катастарот, „Танјуг“ има право на користење 122.908 квадрати државно земјиште во општините Чукарица и Земун. Седиштето на „Танјуг“ е во државна зграда во центарот на Белград, која е еден од 155 споменици на културата во Србија.


Одложено судењето на Драган Павловиќ – Латас, одбраната вели дека е во Германија


Скопје, 30 март, 2018 - 10:30 (META) 

Новото рочиште за случајот на СЈО, „Тотал“ денеска се одложи, оти главниот обвинет, новинарот Драган Павловиќ Латас не се појави во Кривичниот суд. Наредното рочиште е закажано за 11 април.

Како што објаснија адвокатите, Латас поради семејни причини не е во можност да присуствува на рочиштето, бидејќи се наоѓа во Германија. Можно е и да се одложи следното рочиште бидејќи според адвокатите на Латас тој во Германија би требало да се задржи до 10 мај.

Според обвинението, осомничениот давал лажни податоци во завршните сметки и даночните пријави при што преку правните лица затаил данок во износ од 7.466.981 денар или 121.414 евра, а лично физичкото лице затаило 3.876.471 денар или 63.032 евра.

Поради отсуство на Павловиќ-Латас, минатото рочиште исто така беше одложено.


Канцелариите на УЈП денеска со продолжено работно време


Скопје, 15 март, 2018 - 11:14 (META) 

Даночните канцеларии на Управата за јавни приходи (УЈП) денеска ќе работат со продолжено работно време, бидејќи истекува рокот за поднесување Годишна даночна пријава (ГДП).

УЈП соопшти дека сите регионални дирекции, во Скопје, Тетово, Штип, Битола, Струмица и Прилеп ќе примаат пријави до 21.30 часот, даночните одделенија во Охрид, Струга, Ресен, Кавадарци, Велес, Неготино, Куманово, Крива Паланка, Кочани, Виница, Свети Николе, Берово, Гевгелија, Радовиш, Гостивар, Кичево и Дебар ќе примаат пријави до 18 часот, а даночните шалтери во Демир Хисар, Македонски Брод, Крушево, Кратово, Делчево, Пробиштип и Валандово, вклучувајќи ги и дополнителните шалтери отворени во Центар (зграда на ССМ), како и општините Ѓорче Петров, Гази Баба и Аеродром, ќе примаат пријави до 18 часот.

За ненавремено поднесување, односно неподнесување даночна пријава и за нецелосно пријавени приходи, законот предвидува глоба од 100 до 200 евра во денарска противвредност.

Заклучно со вчера, на ниво на цела Македонија се поднесени 393.145 годишни даночни пријави од кои 1.934 по електронски пат.


Утре истекува рокот за поднесување на годишна даночна пријава во УЈП


Скопје, 14 март, 2018 - 11:27 (META) 

Утре истекува рокот за поднесување годишна даночна пријава за утврдување на персоналниот данок на доход и пријавување на приходите кои граѓаните ги оствариле во 2017 година.

Според УЈП, до сега се поднесени вкупно 334.360 пријави, а денеска и утре се очекува тоа да го сторат уште 100 илјади граѓани.

„Со цел избегнување на метежите, особено во Регионалната дирекција Скопје, апелираме граѓаните да ги поднесуваат пријавите и на шалтерите на УЈП кои се отворени во Центар, како и општините Ѓорче Петров, Бутел, Гази Баба, Аеродром и мобилниот даночен шалтер во Драчево што ќе биде стациониран на 15 март пред месната заедница во периодот од 10.00 до 14.00 часот“, информираат од УЈП.

За ненавремено поднесување, односно неподнесување даночна пријава и нецелосно пријавени приходи Законот предвидува глоба од 100 до 200 евра, во денарска противвредност.

Пријавите освен на шалтерите може да се поднесат електронски и да се испратат по пошта.


ЦЕА: Владеењето на правото треба да овозможи амбиент за економски раст


Скопје, 2 март, 2018 - 11:03 (META) 

Македонија бележи назадување во владеењето на правото во последните години, но овие движења не се неочекувани, имајќи ја предвид долгата политичка криза која на површина го исфрли селективното спроведување на правото во подолг временски период, велат од Центарот за економски анализиа ЦЕА.

Од таму додаваат дека владеењето на правото треба да овозможи амбиент за ефикасна пазарна економија, за економски раст и развој, а системот на јавни финансии треба да почива на транспарентни процедури и правила, со цел да се намали можноста од дискрециско водење политики.

„Неодамнешниот случај на толкувања одредби од Законот за данок на додадена вредност (ДДВ) и обидот за нивна примена врз физички лица во услови на недостаток на правила и процедури, при иста даночна база и правна инциденца, е пример за недостиг од и/или нарушување на владеењето на правото“ се вели во брифот за политиките на оваа тема, подготвен од Центар за економски анализи (ЦЕА) заедно со Институт за економски истражувања „Фајненс тинк“.

Во заклучокот се вели дека владеењето на правото треба да обезбеди праведно општество, недвосмислени толкувања и неселективно спроведување на законите, кое пак е основа за добро економско владеење и овозможување услови за споделен економскиот раст и развој.


Ивона Талевска призна вина за случајот „Тифани“


Скопје, 19 февруари, 2018 - 13:11 (META) 

Новинарката Ивона Талевска денеска во судот призна вина за случајот „Тифани“, што Специјалното јавно обвинителство го покрена против неа, јави „Макфакс“.

Претходно пред судијката Софија Лаличиќ, обвинителката Елена Јосифовска го презентираше обвинителниот акт и побара осудителна пресуда и плаќање на избегнатите обврски.

Случајот „Тифани“ се однесува на кривично дело што траело од 2008 до 2014 година, при што Талевска како управителка на друштвото за консалтинг „Смарт ДООЕЛ“ и на „Смарт груп ДООЕЛ Скопје“ за даночните 2008 – 2014 година одбегнала да плати даноци, а во завршните сметки давала лажни податоци, при што одбегнала да плати 2,3 милиони денари или 37.634 евра преку фирмите и еден милион денари денари или 16.924 евра личен данок.

Според обвинението, Талевска како сопственик и управител на „Смарт центар“ ДООЕЛ експорт-импорт – Скопје и агенцијата „Смарт“ во периодот од 2008 до 2014 година за наводните потреби на фирмите купила долна облека од 500 евра, облека во износ од 33.508 евра, очила, шминки за 1.009 евра, луксузен мебел, сигурносни врати, велосипеди и слично.