Вучиќ апелираше до Србите од Косово да избегнат конфронтација


Белград, 22 ноември, 2018 - 16:17 (META) 

Претседателот на Србија, Александар Вучиќ порача Србите на Косово да дадат се од себе, за да спречат конфронтација и сите заедно по мирен пат и со дозволени политички средства да се борат за своите интереси, јавува дописничката на „Мета“ од Белград.

Оваа изјава на Вучиќ следува откако Косово го зголеми данокот за увоз на српски производи од 10 на 100 отсто.

На состанокот со претставниците на Србите од Косово, Вучиќ рече дека „Белград ќе продолжи да ја следи ситуацијата и дека Србите треба да знаат дека нема да бидат оставени на милост и немилост, но изразил надеж дека никому нема да му падне на памет да применува насилство.“

Вучиќ изјавил дека имал информации за движење на „албански трупи“ од две бази спрема северот на Косово и претпоставува дека „или покажуваат мускули или го контролираат нелегалниот премин за да спречат влез на српска роба“.

Тој додаде дека со воведување на данокот, „косовските Срби остануваат без производи од Централна Србија, но и без медицински материјал за болниците“.

Сцените со палење на робата од Србија во Качаник, српскиот претседател ја споредил со сцени од палење на еврејски книги во нацистичка Германија.

Во однос на изјавата на косовскиот премиер Рамуш Харадинај, дека Косово нема да го укине данокот се додека Србија не ја признае независноста на Косово, Вучиќ изјавил дека „мора да се подготват за долга и тешка борба, бидејќи тие нема да ја признаат независноста“.


Вучиќ на средба со амбасадорите поради одлуката на Косово за зголемување на данокот


Белград, 21 ноември, 2018 - 17:00 (META) 

Претседателот на Србија, Александар Вучиќ оствари средба со амбасадорите на Кина, Русија, САД, Велика Британија, Франција, Германија и Италија откако владата во Приштина објави дека го зголемува данокот на производите од Србија од 10 на 100 отсто, јавува дописничката на „Мета“ од Белград.

Владата на Косово ја усвои одлуката за зголемен данок за увоз на роба од Србија и БиХ од 10 на 100 отсто. Данокот од 10 отсто беше воведен пред две недели. Таа одлука ја осудија владите на Србија, БиХ, а ЕУ повика на почитување на Централноевропскиот договор за слободна трговија ЦЕФТА.

Вучиќ го повтори ставот дека дијалогот помеѓу Белград и Приштина нема да продолжи додека косовските власти не ја повлечат одлуката за данок.


На 2.000 евра приход – 240 евра вкупен данок


Скопје, 11 ноември, 2018 - 10:30 (META) 

Не стивнуваат реакциите од бизнис-секторот, но и од граѓаните кои имаат поголеми месечни приходи по најавата на Владата дека од 1 јануари 2019 стапува на сила нов закон за данок на личен доход со кој се укинува рамниот данок и се воведува прогресивно оданочување. Даночните промени предизвикаа и повеќе дилеми околу износот и начинот на плаќање на даноците за личен доход.

Според новата регулатива, доколку даночната основа на поединечна исплата по некој од основите кој се даночи со прогресивни стапки го надминува прагот од 1.500 евра, за делот над 1.500 евра ќе се плати данок по повисоката стапка од 18 отсто уште во моментот на исплатата. На пример, доколку се исплаќа надоместок по основ на договор за дело од 2.000 евра , исплатувачот ќе треба да плати вкупен данок од 240 евра (10 отсто односно 150 евра за делот што е до 90.000 денари и 18 отсто односно 90 евра за делот што го надминува прагот од 90.000 денари).

На крајот на годината, со годишната даночна пријава ќе се врши пребивање помеѓу вкупниот доход што го остварило едно лице и вкупниот данок што бил платен, и доколку постои разлика помеѓу платениот данок и данокот што треба да се плати за остварениот доход, на лицето ќе му се врати повеќе платениот данок, или пак лицето ќе треба да доплати.

Од Министерството за финансии тврдат дека директно зголемување на даноците ќе има само за 38.000 лица, а кај 453.000 лица ќе има намалување на ефективната даночна стапка.


Стопанска комора: Прогресивното оданочување ќе предизвика поголеми трошоци за бизнисот


Скопје, 6 ноември, 2018 - 15:45 (META) 

Прогресивното оданочување ќе предизвика околу 35 отсто повисоки трошоци за плати и 50 проценти повеќе за другите давачки, покажале првичните пресметки на некои од компаниите – членки на Стопанската комора на Македонија.

Претседателот на Комората, Бранко Азески пред денешната вонредна седница на Управниот одбор, рече дека секое ново оптоварување на фирмите ја намалува нивната конкурентност.

– Ние не сме против зголемување на животниот стандард, но сметаме дека тоа треба да се направи на двонасочна и рамноправна основа – потенцира Азески.

Одговорајќи на новинарски прашања, тој истакна дека во однос на прогресивното оданочување мора да се земе предвид и присуството на странските компании во земјава, вкупно 154, односно нивниот став и размислување за ефектот од ваквата мерка.

Министерот за фнансии, Драган Тевдовски го повтори ставот на Владата дека целта на новата владина мерка е правично оданочување како чекор напред кон градење поправедно општество, јакнење на јавното образование, јавното здравство, социјалата, обезбедување на повисоки плати и зголемување на животниот стандард.


Заев: Прагот за прогресивниот данок е одбран внимателно, нема да отстапиме


Скопје, 6 ноември, 2018 - 14:57 (META) 

Премиерот Зоран Заев, во однос на прогресивниот данок, денеска рече дека Владата нема да отстапи, бидејќи еднаш веќе направиле отстапки.

– Ние ја направивме нашата отстапка. Од 1.000 евра отстапивме на 1.500 евра. Уште еднаш напоменувам, имаме работно-активни или приматели на приход помеѓу 900.000 и еден милион граѓани. Се работи за еден процент на граѓаните. Околу 9.000 граѓани, ќе потпаднат под новиот праведен данок. Тоа, значи дека секој, кој што има приход месечен над 90.000 денари, за тоа што е над 90.000 денари ќе треба прв пат да плати осум проценти. Односно, ако има нето-приход од 100.000 денари, за 10.000 денари треба да плати осум проценти или 800 денари. Дај боже, сите да имаме во државата, приход поголем од 90.000 денари. Мојот приход е 87.000 денари, тоа е платата на премиерот. Зборуваме за приход над премиерската плата, над претседателската плата, веројатно во државата, над пратеничката плата итн – одговори  Заев на новинарско прашање и додаде дека ќе се акумулираат средства во висина од 25 милиони евра.

Тој додаде дека младите луѓе како на пример информатичари, архитекти, градежници сè уште не земаат плата над 90.000 денари.

-Дај боже, во иднина да земаат над 90.000 денари. Да ја отвориме таа спирала до крај, за да се покачат платите. Навистина, се работи за праг, многу внимателно одмерен – објасни Заев.


 За приход од 100.000 денари ќе се плаќа данок од 10.800 денари


Скопје, 6 ноември, 2018 - 12:03 (META) 

Не стивнуваат реакциите од бизнис-секторот, но и од граѓаните кои имаат поголеми месечни приходи по најавата на Владата дека од 1 јануари 2019 стапува на сила нов закон за данок на личен доход со кој се укинува рамниот данок и се воведува прогресивно оданочување. Даночните промени предизвикаа и повеќе дилеми околу износот и начинот на плаќање на даноците за личен доход.

Според новата регулатива, доколку даночната основа на поединечна исплата по некој од основите кој се даночи со прогресивни стапки го надминува прагот од 90.000 денари, за делот над 90.000 ќе се плати данок по повисоката стапка од 18 отсто уште во моментот на исплатата. На пример, доколку се исплаќа надоместок по основ на договор за дело од 100.000 денари, исплатувачот ќе треба да плати вкупен данок од 10.800 денари (10 отсто односно 9.000 денари за делот што е до 90.000 денари и 18 отсто односно 1.800 денари за делот што го надминува прагот од 90.000 денари).

На крајот на годината, со годишната даночна пријава ќе се врши пребивање помеѓу вкупниот доход што го остварило едно лице и вкупниот данок што бил платен, и доколку постои разлика помеѓу платениот данок и данокот што треба да се плати за остварениот доход, на лицето ќе му се врати повеќе платениот данок, или пак лицето ќе треба да доплати.

На пример, доколку на лицето од горниот пример тие 100.000 денари му се единствениот доход во годината, на него ќе му бидат вратени 800 денари, затоа што 100.000 денари на годишно ниво е под годишниот праг од 1.080.000 денари за повисоката стапка од 18 отсто.

„За да можат граѓаните навремено и прецизно да следат колку доход имаат остварено во текот на годината, колку данок имаат платено, колку данок треба да доплатат или да им се врати, а со тоа и соодветно да си планираат, ќе се изработи онлајн сервис преку кој граѓаните во кое било време ќе можат да ги добијат сите овие информации, и преку кој ќе можат предвреме да доплатат даночен долг“, информираа од Министерството за финансии.

Најавата на Владата ги фати неподготвени работодавачите и работниците со оглед на тоа што промената се најавува само два месеци пред да стапи на сила и на крајот на годината кога компаниите веќе ги имаат подготвено финансиските планови за 2019 година. Речиси сите стопански комори реагираа, а некои од нив побараа одложување на примената на прогресивниот данок за пет години. Реагираа и вработените во компаниите од софтвреската индустрија со образложение дека тие не се најбогатиот слој граѓани за кои власта тврди дека е наменета новата даночна реформа.

Од друга страна, од Министерството за финансии тврдат дека директно зголемување на даноците ќе има само за 38.000 лица, а кај 453.000 лица ќе има намалување на ефектвната даночна стапка.

„За најголем дел од популацијата новата ефективна даночна стапка е пониска од моменталната, додека позначајно зголемување има единствено кај најдоходовните 1 отсто. За најдоходовните 1 отсто од населението, зголемувањето на ефективната даночна стапка изнесува 4 процентни поени, додека за групата под тоа, зголемувањето е 0,6 процентни поени“, соопшти Министерството за финансии.


Стопанските комори се против даночните реформи за прогресивно оданочување


Скопје, 5 ноември, 2018 - 15:44 (META) 

Бизнис-заедницата смета дека, доколку прогресивното оданочување се реализира, истото би имало негативни последици врз целата бизнис заедница со тоа што значително ќе се зголеми сивата економија и ќе се нарушат условите под кои ќе се одвива целокупната економија во државата.

Ова го покажува анализата на резултатите од истражувањето помеѓу членовите на Платформата за јавно – приватен дијалог во која се Стопанска комора на Македонија, Стопанска комора за информатички и комуникациски технологии – МАСИТ, Стопанска комора на северозападна Македонија и Сојуз на стопански комори на Македонија.

„При тоа треба да се има предвид фактот дека станува збор за сериозна промена на даночниот режим со кој се создава нов систем на обврски на неполни два месеци пред крајот на годината, кога најголем дел од деловните субјекти веќе ги имаат направено планирањата за следната фискална година. Со предложените измени во даночниот систем се усложнува работењето на компаниите“, се вели во соопштението на „Епи центар Интернационал“ кој го имплементира проектот „Партнерство за подобра бизнис регулатива“, финансиран од страна на УСАИД.

Стопанските комори се согласни дека изразениот став е јасен и недвосмислен и дека неопходно е да се земе предвид при креирање и ревидирање на националните политики.

„Врз основа на спроведеното истражување стопанските комори испратија и официјален Позиционен документ до Владата и сите надлежните министерства. Со овој документ стопанските комори излегоа со заедничко барање за одложување на најавените даночни реформи за воведување на прогресивно оданочување, за најмалку пет години. Воедно, стопанските комори и понатаму повикуваат на конструктивен дијалог за заедничко креирање на сите политики кои ја засегаат бизнис заедницата, со цел да се избегнат непоправливите штети кои би можеле да му се нанесат на македонското стопанство како резултат на избрзани одлуки во кои не се земени предвид сите релевантни фактори“, се додава во соопштението.


Даночните измени ќе удрат по штедачите, земјоделците, берзанските играчи, банките


Скопје, 5 ноември, 2018 - 10:52 (META) 

 

Министерството за финансии го објави предлог-законот за данок на личен доход со кој се воведува прогресивен наместо рамен данок кај повеќе категории обврзници односно се воведуваат големи промени во стапката на оданочувањето на различни видови доход кај граѓаните. Иако оттаму укажуваат дека станува збор за воведување праведен данок кој ќе ги опфати само лицата со високи примања, одредбите во самиот предлог-закон покажуваат дека непосредно или посредно даночните измени ќе ги почувствуваат штедачите, самостојните земјоделци, граѓаните кои остваруваат примања од вложување на берзата, граѓаните кои се осигуруваат, банките, осигурителните компании…

Даночните измени предвидуваат поделба на доходот на две групи – доход од труд и доход од капитал.  За доходот од труд (плати, пензии, договори за дело, доход од авторски права, доход од самостојна дејност), се воведува прогресивност, односно дополнителна стапка од 18 отсто за даночната основа која надминува 1.080.000 денари годишно, односно 90.000 денари месечно.

Конкретно, за даночна основа (т.е. бруто-доход, минус социјални придонеси, минус даночно намалување) до 90.000 денари месечно, даночната стапка останува 10 отсто.

„Тоа значи дека за најголем дел од населението номиналната даночна стапка останува иста. Стапката од 18 отсто ќе важи за износот над тоа. На пример, на месечна даночна основа од 100.000 денари, за 90.000 денари ќе се плаќа данок по стапка од 10 отсто, додека за 10.000 денари ќе се плаќа данок по стапка од 18 отсто“, информираат од Министерството.

Со законот се предвидува и оданочување на доходот од капитал (закуп и подзакуп, дивиденди, капитални добивки, добивки од игри на среќа) и другиот доход со единствена стапка од 15 отсто.

„Поради нередовноста на овој доход, во пракса е поедноставно тој да се оданочува со единствена стапка отколку со прогресивни стапки. Ваква е практиката и во земјите од регионот (Хрватска, Словенија, Албанија, Србија). Поради тоа што овој доход во најголема мера завршува кај најдоходовните сегменти од популацијата, со цел да се обезбеди поправедна дистрибуција на доходот, избрана е стапка која е повисока од основната стапка на данокот на доход од труд“, велат од Министерството.

Со новата регулатива се воведува и оданочување на капиталните добивки од хартии од вредност и на каматите од орочени депозити со стапка од 15 отсто, со одложена примена од почетокот на 2020 година. На доход од камати до 250 евра годишно, нема да се плаќа данок. Сепак, воведувањето ваков данок сериозно може да го дестимулира штедењето во банките, што на своевиден начин е голем удар за банкарскиот сектор чиј главен извор на финансии и давање кредити се токму штедните влогови на граѓаните.

Со новиот закон се предвидува и оданочување на доход од осигурување се подразбира односно премијата за осигурување на живот уплатена од правно лице или обврзник кој остварува доход од самостојна дејност, премијата за неживотно осигурување уплатена од правно лице или обврзник кој остварува доход од самостојна дејност, придонеси во доброволен пензиски фонд уплатени од правно лице или обврзник кој остварува доход од самостојна дејност, исплатената осигурана сума, освен надоместокот на штета, исплатениот пензиски надоместок од доброволно капитално финансирано осигурување и освен пензискиот надоместок исплатен преку програмирани повлекувања.

Од Министерството за финансии велат дека промените се воведуваат со цел да се адресира постоечката регресивност кај данокот на доход, како и да се обезбедат дополнителни буџетски средства за обезбедување квалитетни јавни услуги.

„Најдоходовните 1 отсто од луѓето во Македонија во 2017 година заработувале во просек 4.486 евра месечно, што е 14,4 пати повеќе од просечниот доход на граѓаните во државава. Ова ја става Македонија на прво место во Европа по социјалната нееднаквост. Со реформата очекуваме да обезбедиме дополнителни 25 милиони евра. Средствата ќе бидат искористени за борба против сиромаштијата. Оној кој има доход повисок од 90.000 денари, ќе плати нешто повеќе, за да му дадеме можност на својот сограѓанин да оди напред“, изјави министерот за финансии Драган Тевдовски при презентацијата на даночните измени.


УЈП го продолжи рокот за поднесување на пријавата за ДДВ


Скопје, 26 октомври, 2018 - 13:01 (META) 

Управата за јавни приходи соопшти дека, рокот за поднесување на пријавата за данок на додадена вредност ДДВ-04 се продолжува, поради отежнатото поднесување на даночни пријави преку системот е-даноци.

„Крајниот рок за поднесување на ДДВ-пријавата, 25 октомври се продолжува за два работни дена, односно крајниот рок за поднесување на ДДВ-04 пријавите ќе се смета 29 октомври“, информираат од УЈП.

УЈП ја својата веб-страница, потсети дека граѓаните треба да се регистрираат во неколку чекори на системот e-pdd.ujp.gov.mk, со што ќе биде на увид Годишната даночна пријава.

Заклучно со 12 октомври во апликацијата „е-персонален данок“ се регистрирале 36. 824 граѓани.


Бизнис-заедницата смета дека е добро што ќе се одложи прогресивното оданочување


Скопје, 13 септември, 2018 - 12:18 (META) 

Денеска, четирите стопански комори, потписници на Платформата за јавно-приватен дијалог: Стопанска комора на Македонија, Стопанска комора за информатички и комуникациски технологии – МАСИТ, Стопанска комора на северозападна Македонија и Сојуз на стопански комори на Македонија испратија официјален допис до Министерството за финансии со што го поздравија одложувањето на најавената даночна реформа за прогресивно оданочување.

„Во текот на изминатите неколку месеци членовите на Платформата спроведоа заедничко истражување на 546 домашните претпријатија и организираа две фокус групи по однос на ставот за прогресивното оданочување и последиците кои истиот ќе ги донесе врз развојот на македонската економија. Анализата на резултатите јасно го истакна ставот на бизнис заедницата дека доколку прогресивното оданочување се реализира, во моментов истото би имало негативни последици врз целата бизнис заедница. Согласно направеното истражување, при изработката на официјалниот позиционен документ стопанските комори вертикално се усогласија во сите структури и го изразија својот став по однос на ова прашање“, велат од таму.

Тие бараат одложување на оваа даночна реформа за пет години. Од таму сметаат дека прагот за кој даночните обврзници се спремни да ги плаќаат даноците е прилично низок и зголемување на стапките ќе предизвика дестимулирачки ефект во економијата или со други зборови ќе ја поттикне даночната евазија.

„Подобро е со постоечките механизми да се поттикнат економските оператори да не прават затајување на данок, односно да ги плаќаат сите даноци, наместо да манипулираат со средствата“, се вели во Позициониот документ изработен од страна на коморите.

Оваа активност е дел од Проектот  „Партнерство за подобра бизнис регулатива“ финансиран од страна на УСАИД а имплементиран од Епи центар Интернационал во партнерство со четирите стопански комори.