!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Заев и Рама од Поградец прогласија ново поглавје во соработката на двете држави


Поградец, 15 декември, 2017 - 18:20 (META) 

Заедничката седница на владите на Македонија и Албанија во Поградец отвора ново поглавје во билатералните односи на двете земји и значи работење на решенија што водат до спокојна и безбедна иднина на нашите граѓани и нашите земји, а не на нивно одложување, порача македонскиот премиер Зоран Заев попладнево во пограничниот албански град, пренесува службата за информирање.

Според Заев, владите на Македонија и на Албанија испраќаат силна порака во регионот, дека двете држави имаат одговорни политички раководства коишто работат искрено и отворено, со цел да го подобрат квалитетот на живот на граѓаните во двете земји и за добра и безбедна иднина на двете држави во евро-атлантското семејство.

– Албанците во Македонија и Македонците во Албанија навистина се мост за градење поблиски врски и соработка и тоа треба да го имаме секогаш предвид – порача македонскиот премиер.

Pogradec makedonska vlada pred zaednichka sednica so albanskata 15dek17 - Vlada na RM

Тој посочил дека за Македонија ЕУ и НАТО не се само политички интерес, туку и можност за економски развој на државата и финансиска стабилизација на граѓаните. Заев и во Поградец ја искажал увереноста дека Македонија следната година ќе почне преговори за членство во ЕУ.

– Со право очекуваме дека идната 2018 заедно ќе започнеме преговори за членство во ЕУ, како Македонија така и Албанија – рекол премиерот Заев, заблагодарувајќи се на Албанија за поддршката.

Албанскиот премиер Еди Рама го поздравил придонесот на Заев во изградбата на Македонија во едно општество за сите, функционални институции и социјална кохезија, а најавил засилена соработка во инфраструктурата, патниот и железничкиот сообраќај, меѓугранични и царински олеснувања и вложувања во енергетиката.

По меѓувладината седница потпишана е заедничка Декларација за поголема заедничка соработка, а премиерите потпишале и Меморандум за разбирање, за превенција и сузбивање насилен екстремизам и радикализација којашто води кон тероризам.


Мајстор загинал откако го удрила струја од далновод


Струга, 13 септември, 2017 - 15:09 (META) 

Мајстор кој работел во Струга вчера трагично го загубил животот откако добил струен удар од далновод додека работел на куќа.

Како што соопшти СВР Охрид, вчера, околу 11.30 часот, во Струга на улицата Едвард Кардељ, Г.М. (44) од Охрид, неговиот брат А.М. и М.П., како вработени во „АМГ Дизајн 2013“, местеле олуци на куќа и во еде момент Г.М. со олук допрел кабел од далновод, кој бил н 2,5 метри од терасата каде што стоел. Притоа добил електричен удар и паднал, по што била повикана итна медицинска помош, која го пренела во Општа болница во Струга, каде била констатирана смрт.

Бил извршен увид и по наредба на јавен обвинител телото на починатиот било предадено на семејството.


Бектеши и Река разговарале за изградба на далноводот Битола – Елбасан


Скопје, 12 јуни, 2017 - 16:03 (META) 

Проектот за изградба на далноводот Битола – Елбасан, кој се очекува да ја стабилизира и да ја зајакне дистрибутивната мрежа за електрична енергија, бил една од темите на разговор помеѓу министерот за економија, Крешник Бектеши, и амбасадорот на Албанија во Македонија, Фатос Река.

Од Министерство за економија информираат дека двајцата соговорници се согласиле за продлабочување на меѓусебната соработка преку поголема трговска размена, зголемување на бројот на туристи во двете земји и поттикнување на инвестициите кај бизнис-секторот во различни капацитети во Македонија и во Албанија.

Амбасадорот Река го поканил министерот Бектеши да оствари официјална посета на Република Албанија.


Кривична пријава за маж што „расклатил“ столбови на далновод


Дебар, 24 април, 2017 - 11:58 (META) 

Жител на селото Голем Папрадник, Дебарско, доби кривична пријава за предизвикување општа опасност, бидејќи копал околу два бетонски столба на далновод и ја нарушил нивната стабилност.

Полициската станица од Дебар го товари 69-годишниот Д.Д. дека во изминатите месеци, кај местото Парешки кории, во близина на селото Баланци, неовластено извршил ископ околу два бетонски столба за пренос на електрична енергија од 10-киловолтен далновод, од кој со електрична енергија се напојуваат општина Центар Жупа, неколку индустриски капацитети, како и селата во регионот.

Со тоа, вели полицијата, пријавениот значително ја нарушил стабилноста на бетонските столбови, со што можел да го доведе во опасност и нормалното снабдување со електрична енергија на корисниците во целиот регион.


Поради поставување нов далновод, можни се прекини во снабдувањето со струја во Тетовско


Тетово, 13 мај, 2016 - 15:48 (META) 

Поради почнување на градежните работи на последната делница од новиот далновод во Тетово, утре ќе биде исклучен далноводот што ги поврзува Скопје и Тетово. На постојната траса ќе се уриваат старите и ќе се градат нови столбови.

– Поради изградбата на далновод, Тетово и околните населени места ќе останат да се снабдуваат со електрична енергија од страната на Гостивар. Сепак, поради едностраното снабдување со електрична енергија, предизвикано од објективни околности, т.е. изградбата на далноводот, а имајќи го предвид фактот дека Тетово и околината се голем потрошувачки регион, не може да се исклучи мал ризик од повремени и краткотрајни прекини во снабдувањето со електрична енергија – изјавија од државната компанија МЕПСО.

Со новиот далновод, се очекува Тетовскиот Регион во иднина да нема проблеми во снабдувањето со струја. Новиот далновод, за кој се очекува дека ќе биде изграден за неполни два месеци, ќе го замени постојниот што беше во функција подолго од 60 години.


ЕУ ќе го финансира енергетското поврзување со Албанија со 12 милиони евра


Брисел, 22 февруари, 2016 - 13:55 (META) 

Европската унија ја потврди својата намера да обезбеди 12 милиони евра за поддршка на изградбата на првиот далновод за електрична енергија помеѓу Албанија и Македонија, за воведување на подобрувања на ефикасноста на мрежата, во рамки на инфраструктурата на МЕПСО.

Коридорот Исток – Запад за пренос на електрична енергија треба да ги поврзе пазарите на Бугарија, Македонија, Албанија, Црна Гора и на Италија.

Проектот е дел од агендата за поврзување на Западен Балкан, со финансирање обезбедено од Програмата за предпристапни фондови (ИПА), преку Програмата за инвестирање на Западен Балкан (ПИЗБ).

Европската банка за обнова и развој (ЕБОР) веќе има одобрено кредит од 37 милиони евра за овој проект, со кој ќе се поттикне регионалната интеграција на пазарите за енергетика на Западен Балкан.

 


Македонија се поврзува директно со енергетскиот систем на Србија


Штип, 16 ноември, 2015 - 15:24 (META) 

Утре, 17 ноември, ќе биде ставен во функција новиот далновод, поставен на 168 челични решеткасти столбови, на траса долга 70 километри од Штип до македонско-српската граница, кај Куманово. Со овој систем на МЕПСО, македонскиот енергетски систем директно се спојува со енергетскиот систем на Србија.

Со изградбата на овој далновод, македонскиот електропреносен систем добива петта врска со четири соседни електропреносни системи. Веќе има две интерконекции со грчкиот електропреносен систем и по една врска со електропреносните системи на Србија, Бугарија и на Косово.

Капацитетот за размена на електрична енергија на овој вод е 600 мегавати. Во изградбата на овој далновод, МЕПСО вложи повеќе од 11 милиони евра.

В.К.