Заев: Македонија мора да биде земја со нула толеранција за корупција


Скопје, 5 јуни, 2018 - 12:49 (META) 

Република Македонија мора да биде средина со нула толеранција за корупција. Законскиот пакет од оваа област мора да биде сеопфатен и ефикасен: За да се алармираат коруптивните активности, конфликтите на интереси, злоупотребата во финансирањето на политички партии и изборните кампањи. Мора да обезбедиме поголеми ингеренции за максимална ефикасност на Државната комисија за спречување на корупцијата, порача премиерот Зоран Заев на завршната конференција на Мрежа 23, насловена, „Поглавје 23: Пандорина кутија или клуч за добро владеење“, во организација на Институтот за европски политики и Хелсиншкиот комитет за човекови права.

Покрај него, на конференцијата учествуваа и вицепремиерот Бујар Османи и министерката за правда, Рената Дескоска.

Заев рече дека вистински реформи во правосудството и борбата против корупција се нешто што го бара и ЕУ, но и на Македонија не и одговара неквалитетна законска рамка.

– Нам, како земја која влезе во овие реформи, и како земја која доби чиста препорака и очекува датум за старт на преговорите, ни е сосема јасно дека ниту Европската Комисија ниту земјите-членки на ЕУ нема да прифатат половично реализирани реформи. Крајно, и најбитно, ни нам не ни се потребни половично реализирани реформи. Напротив, зборуваме за коренити промени – рече Заев.

Посочувајќи дека корупцијата и кршењето на човековите права се причината што ги изнела луѓето на протести и доведе до смена на власта, премиерот повика на беспоштедна борба и во иднина против тие зла.

– Владата на Република Македонија, судиите и судската администрација, борците против корупцијата во независните контролни агенции и невладини организации, борците и активистите за човекови права, граѓаните на нашата земја – сите ние, треба докрај да ја отвориме кутијата на правосудството, без разлика дали е Пандорина, и храбро и отворено да продолжиме со реформите. Само така можеме да градиме држава по европски правила, без разлика колкав е отпорот кон новите демократски промени – порача Заев.

Министерката за правда, Рената Дескоска, која ја презеде функцијата вчера, рече дека борбата против корупцијата е прашање на кое секоја земја ја покажува способноста за ефикасно спроведување на донесените закони.

– Секој чекор во имплементацијата на Поглавјето 23 во Република Македонија е чекор напред во јакнење на правната сигурност и довербата на граѓаните во судскиот систем и во правната држава – рече Дескоска.


Засадено „дрво на човековите права“ на местото на споменикот на Ќосето


Скопје, 10 мај, 2018 - 15:42 (META) 

На местото каде што до пред два месеци стоеше споменикот на Андон Јанев – Ќосето, денеска беше засадено дрво гинко, кое, како што вели скопскиот градоначалник Петре Шилегов, е дрво на човековите права.

Во церемонијата, освен Шилегов, учествуваа и заменик-министерот за надворешни работи на Германија, Михаел Рот, претседателката  на Градскиот совет на партијата СПД во Нирнберг, Ања Прелс-Камерер и амбасадорот на Германија, Томас Герберих, како и претставници од Нирнберг, кој е збратимен град со Скопје.

На церемонијата беше промовирана и изгравирана плоча, донација од Нирнберг. Таа, рече Шилегов, ќе потсетува на правото на праведно и јавно судење на секој граѓанин пред независен и непристрасен суд, изразено во Универзалната декларација за човекови права на Обединетите нации.

– Поставувањето на споменикот на Ќосето пред зградата на судот беше сфатено како порака за партиска послушност на судиите на тогашната власт. Но, отстранувањето на споменикот и засадувањето на таканареченото дрво на човекови права на местото на постаментот-дивоградба е симбол на почитување на законитоста, правдата и правичноста – истакна Шилегов.


Мијатовиќ од денеска нова комесарка за човекови права на Советот на Европа


Брисел, 3 април, 2018 - 10:16 (META) 

Поранешната претставничка на ОБСЕ за слобода на медиумите, Дуња Мијатовиќ, од денеска ја презема должноста комесар за човекови права на Советот на Европа и е првата жена која е на таа функција.

Мијатовиќ изјави дека нејзин приоритет ќе биде да се обезбеди примена на постоечки норми и почитување на човековите права и додаде дека за тоа е потребна политичка волја но и ангажирање на целото општество.

„Имам за цел да ја продолжам работата на претходните комесари и да ја одржам способноста на оваа институција, брзо и ефикасно да реагира во заштитата на човековите права. Верувам дека човековите права се универзални и ниту една земја не е надвор од нив“ , изјави Миајтовиќ.

Таа оцени дека најважно е да се постигне повторна афирмација и посветеност на човековите права и да се врати довербата во нивната важност.

Таа беше избрана од Советот на Европа на јануарското заседане и го наследува Нилс Муижниекс, а мандатот и трае шест години.


Македонија мора да му се извини на Ел-Масри до март


Скопје, 9 февруари, 2018 - 12:57 (META) 

На Република Македонија и се заканува прва Резолуција со осуда од Совет на Европа доколку до март годинава не му се извни на германскиот државјанин со либанско потекло, Калид ел-Масри.

Ова беше кажано на денешната прес-конференција на вториот мониторинг-извештај за реформите во судството што го одржаа претставници на три невладини организации кој што го спроведуваат проектот „Заедничка акција за итни реформи во судството“.

Ангела Шумкоска од Здружение на млади правници појасни дека одлуката на Судот за човекови права во Стразбур, во случајот со Ел-Масри против Македонија, е донесена уште 2012 година и дека се уште не е извршена.

Комитетот на министри на Советот на Европа разгледувајќи го извршувањето на судските пресуди од ЕСЧП за Македонија во декември 2017 година, констатирал дека до март 2018 година, државата е должна официјално да му се извини на Ел-Масри. На истиот состанок Комитетот на министрите издал налог за изготвување на нацрт-времена резолуција која би била усвоена од страна на министрите на Советот на Европа на состанокот во јуни, доколку Македонија не ги исполни обврските.

Шумкоска појасни дека во земјава генерално има проблем со јавната свест кај одговорните во надлежните институции за спроведување на одлуките на судот во Стразбур, но и генерално,по што настануваат клонирани случаи, односно исти или слични повреди на правата загарантирани со ЕКЧП.

Мониторирајќи го објавувањето на судските одлуки, Институтот за европска политика (ЕПИ) констатирал дека негативниот тренд продолжува и по воведување на единствениот судски портал sud.mk.

Во набљудуваниот период од октомври до декември, најмногу пресуди објавил Управниот суд, потоа Граѓанскиот суд во Скопје, а Кривичниот суд објавил само 18 судски одлуки.

Институтот за човекови права пак, констатирал дека во набљудуваниот период има благ тренд на подобрување од аспект на транспарентноста во Судскиот совет, Советот за утврдување на факти, кој во меѓувреме е укинат, и Советот на јавни обвинители.

Покрај ова кај Судскиот совет за прв пат е констатирана и промена на начинот на избор на претседатели на судови и на судии при што повеќе внимание се обраќа на квалитативното оценување.


Заев – Мужниекс: Постои позитивна енергија за движење на државата напред


Скопје, 31 јануари, 2018 - 19:34 (META) 

Во Македонија постои позитивна енергија за движење на државата напред, оценил комесарот за човекови права на Советот на Европа, Нилс Мужниекс, на денешната средба со премиерот Зоран Заев, во Скопје, соопшти владината прес-служба.

На средбата било разговарано за почитувањето на човековите права во земјава, за меѓуетничките односи, за почитувањето на правата на ранливите групи и генерално, на сите граѓани во земјава.

– Го спроведуваме успешно концептот едно општество за сите, што ја има мнозинската поддршка на граѓаните во Република Македонија. Луѓето во Македонија покажаа дека им е доста од национализми и дека она што е од интерес за сите се еднакви права и можности во здравството, образованието, институциите – истакнал Заев на средбата, додавајќи дека успешниот модел на функционирање на Македонија како вистинска мултиетничка држава го обезбедува и патот на земјата кон Европската Унија и кон НАТО.

Комесарот за човекови права на Советот на Европа денеска се сретна и со министерот за надворешни работи, Никола Димитров, со кого разговарал за текот на реформите од планот „3-6-9“, во однос на состојбата со човековите права и слободи во земјава.

„Заеднички беше оценето дека исполнувањето на стандардите на Советот на Европа во поглед на владеењето на правото, демократијата и човековите права е од особено значење за побрзото интегрирање на Република Македонија во европските и евроатлантските институиции“, стои во соопштението за средбата меѓу Димитров и Мужниекс.


Во Скопје утре Марш на толеранција за лицата со попреченост


Скопје, 14 ноември, 2017 - 16:41 (META) 

Со конференција во Скопје на која ќе се дискутира за проблемите на лицата со попреченост, а потоа и со марш на толеранција, Хелсиншкиот комитет за човекови права поддржан од 25 организации утре ќе потсети на проблемите на луѓето што живеат со различна попреченост.

На конференцијата ќе бидат презентирани наодите од истражувањата и анализите за потребите  на овие лица во областите на социјална заштита, образование, здравствена заштита, вработување и квалитет на живот.

По конференцијата, ќе се одржи и марш на толеранцијата „Гледај со срцето, прифати ја различноста“, кој ќе почне во 15 часот од Музеј на Град Скопје, по што поворката преку улица Македонија ќе се упати во паркот „Жена борец“, каде ќе се говорат некои од учесниците во маршот.


Дефокусираните пратеници препораките на Мемети ги вратија на собраниска комисија


Скопје, 7 ноември, 2017 - 16:02 (META) 

Откако вчера Собранието на Република Македонија не ги изгласа препораките за надминување на констатираните состојби во извештајот на Народниот правобранител, односно имаше само 37 гласови „за“, еден воздржан и пет „против“, денеска координаторот на пратеничката група на СДСМ и на коалицијата, Томислав Тунтев, се обиде да го „покрие“ тоа со деконцентрираност на пратениците. Пратеникот од ДУИ, Артан Груби, пак, рече дека станува збор за техничка грешка.

Во меѓувреме, препораките денеска се на повторно разгледување, односно Комисијата за политички систем и односи меѓу заедниците повторно ќе ги разгледува и ќе ги утврдува мерките во нејзиниот извештај за спроведување на препораките за надминување на констатираните состојби, содржани во извештајот на Народниот правобранител.

Тунтев денеска на прес-конференција во Собранието изјави дека пратениците биле во салата и имало кворум, но поради „немарност и дефокусираност“, не го стиснале копчето за гласање на точката за Народниот правобранител.

Пратеникот од ДУИ, Артан Груби, рече дека малиот број присутни пратеници од ДУИ се должи на зафатеноста на пратениците.


Хелсиншки го повика Собранието да ги усвои препораките на Прибе за човековите права


Скопје, 7 ноември, 2017 - 11:53 (META) 

Хелсиншкиот комитет за човекови права на Република Македонија побара пратениците во Собранието итно да ги изгласаат препораките од комисијата на Прибе за човековите права, содржани во Извештајот на народниот правобранител. Истото го побара и ВМРО-ДПМНЕ денеска, иако вчера во Собранието отсуствуваа најмногу пратеници од таа партија кога се гласаше за извештајот.

„Собранието на РМ одби да ја задолжи Владата да ги подобри состојбите во сферата на човековите права со конкретни мерки содржани во Извештајот на Народниот правобранител, бидејќи немаше доволно присутни пратеници. Апелираме до пратениците, особено до владејачкото мнозинство, во најкус можен рок да ги изгласаат мерките содржани во извештајот на Народниот правобранител, каде се наведени препораките на Прибе. Во најмала рака е несериозно владејачкото мнозинство да нема обезбедено кворум за да се изгласаат вакви исклучително важни мерки“, се вели во реакцијата од Хелсиншки комитет.

ВМРО-ДПМНЕ, исто така, реагираше, но притоа ја обвини само пратеничката група на СДСМ, иако вчера на седницата кога требаше да се гласа, имаше едвај десетина пратеници на опозициската партија.

„Владата на СДС и Зоран Заев водат лажна грижа за заштита на човековите права. Доказ за тоа е одбивањето на парламентарното мнозинство на СДС да ја задолжи Владата да ги подобри состојбите во сферата на човековите права со конкретни мерки содржани во Извештајот на Народниот правобранител. Владата и Заев кои досега пред медиумите се прикажуваа за душегрижници за човековите права, сега не сакаат ниту да се дебатира за истото. Ова е уште еден пример за незаинтересираноста на Владата да разговара за унапредување на состојбите со човејковите права и за нивниот гол и лажен популизам“, порачува ВМРО-ДПМНЕ.


Говорот на омраза е сè поприсутен, вели народниот правобранител


Скопје, 6 ноември, 2017 - 12:31 (META) 

Со жалење морам да констатирам сè поголем говор на омраза во последните години, што е многу загрижувачко и ги повикувам институциите тоа да се спречува, рече народниот правобранител Иџет Мемети, презентирајќи го годишниот извештај за состојбата со човековите права во Македонија во 2016 година.

Правобранителот истовремено алармираше за огромна партизираност на институциите.

– За жал, огромен број институции спроведуваат партиска агенда и дури имаше и случаи кога цела институција се ангажираше за партиска задача – рече Мемети.

Тој посочи дека груба манипулација претставувале и вработувањата во јавниот сектор, не само во изминатата година, туку и пред тоа. Според Мемети, администрацијата е предимензионирана, а без вистинска анализа за потребите не може да се зборува за создавање квалитетна администрација.

Мемети нагласи и дека граѓаните не добиваат вистински квалитет во услугите што ги плаќаат, не само во поглед на сметките за струја и за вода, туку и за телефонските и за интернет-услугите.

Народниот правобранител информираше дека во 2016 година за 4 отсто се зголемил бројот на повреди на човековите права и слободи, а притоа како особено значајна ја спомена употребата на прекумерна сила од полицијата, како и од затворската полиција. Како особено алармантно, го спомена непрофесионалното постапување на полицијата при протестите што се одржуваа по прогласувањето амнестија за високи функционери од претседателот Ѓорге Иванов, како и однесувањето на полицијата кон обвинетите во таканаречениот „Кумановски случај“.

Сериозен проблем, рече Мемети, е и тоа што имаме проблематичен и непрочистен избирачки список. Тој побара од изборните органи итно да се измени Изборниот законик поради многуте случаи во кои на гласачите им е одземено правото на глас, што е уставно загарантирана категорија.

На Мемети му реплицираше Илија Димовски од ВМРО-ДПМНЕ, кој се согласи со дел од забелешките, но и се пожали дека дури и на пратениците некогаш им се одзема правото да зборуваат во Собранието.


Заев до ЛГБТИ-заедницата: Ве охрабрувам да бидете гласни и слободно да се изразувате


Скопје, 1 ноември, 2017 - 12:22 (META) 

Ве охрабрувам да бидете гласни, слободно да се изразувате и да дејствувате во насока на заштитата на правата на граѓаните, истакна премиерот Зоран Заев, во своето обраќање по повод одбележувањето на петгодишнината од формирањето на ЛГБТИ-Центарот во Скопје.

Осврнувајќи се на инцидентите и на нападите, кои сè уште не се расчистени и поради кои центарот ја смени својата локација и се иссели од просториите во Скопската чаршија, Заев рече дека тие времиња на беззаконие, на кршење на човековите права по која било основа се минато, затоа што „Владата поставува темели на држава која е заедничка за сите и која ќе се стреми да ги штити правата на секој, без разлика на какви било различности, припадност, уверувања и слично“.

Еден од чекорите што се преземаат во таа насока, рече Заев, е подготовката на новиот закон за спречување и заштита од дискриминација, за кој во тек е јавната расправа.

– Целта е, со овој закон да постигнеме законска усогласеност со меѓународните стандарди за човекови права. Дефинирањето поими, што се подразбира под дискриминација, ќе биде во согласност со меѓународните стандарди. Значајни промени се предвидени и во самата Комисија за заштита од дискриминација, која ќе биде професионализирана, преку транспарентен избор на членови, докажани во областа на човековите права. Знаеме дека законите не се доволни и дека тоа што е потребно е да се погрижиме сите ние, како заедница, да покажеме почитување и недискриминација по која било основа, низ давањето личен пример, во семејството, во нашето непосредно опкружување, во општеството – истакна Заев.