ДИК денеска решава за оставката на Атанасов и за гласањето во странство


Скопје, 29 август, 2018 - 10:09 (META) 

Државната изборна комисија (ДИК), денеска ќе решава за оставката на пратеникот од СДСМ, Петар Атанасов. Потоа ќе разгледува барања за добивање на овластувања за набљудување на Референдумот 2018, поднесени од неколку граѓански организации, помеѓу кои и ОДИХР.

Исто така, ќе се разгледува Предлог Решение за утврдување и објавување на описите на избирачките места, како и други одлуки за претстоечкиот референдум.

На крајот, ДИК ќе решава за пополнување на местата во Општинските изборни комисии (ОИК).


Членовите на ДИК и директорот на Статистика разговараа за подготовките за референдумот


Скопје, 22 август, 2018 - 14:39 (META) 

Членовите на Државната изборна комисија денеска се сретнаа со директорот на Државниот завод за статистика, Апостол Симовски со кого разговарале за подготовките околу претстојниот референдум на 30 септември.

Од ДИК информираат дека тие разговарале за методолошко-информатичката обработка на избирачкиот список, за контролата при печатењето на изводите и посебните изводи на избирачкиот список и за внесот и преносот на податоци на денот на гласањето.

Претходно од Комисијата соопштија дека заклучно со денеска до 12 часот преку веб апликацијата www.dijaspora.sec.mk до биле достеавени вкупно 2.060 пријави од граѓани за гласање во дипломатско-конзуларните претставништва на Република Македонија во странство.

Од нив, 2019 пријави се прифатени, 38 се одбиени, а останатите пријави се во обработка.

Најголем број пријави се доставени за гласање во Љубљана – 172, во Лондон – 114, во Торонто – 111, Канбера 88 итн.  Најмал број пријави поднесени се за гласање во Киев и Приштина – по една пријава, и Њу Делхи, Каиро и Доха – по две пријави.


Членовите на ДИК дадоа свечена изјава пред Џафери и го означија почетокот на работата


Скопје, 30 јули, 2018 - 11:41 (META) 

Претседателот на Државната изборна комисија, Оливер Дерковски, потпретседателот Дитмире Шеху, членовите Елизабета Постоловска, Борис Кондарко, Јанаке Витановски, Радица Ристеска и Енвер Салиу денеска дадоа свечени изјави пред претседателот на Собранието, Талат Џафери.

Дерковски рече дека како ДИК, почитувајќи ги законите и Уставот ќе постапат и ќе направат се што е во нивна надлежност за да успее организирањето на референдумот. Тој се заложи дека ќе работат јавно и транспаретно.

– Денес ја дадовме свечената изјава и со тоа го означивме почетокот на работата на ДИК. Очекуваме Собранието исто така, да донесе значајни одлуки за работата на ДИК. Доколку се заврши се како што треба, го гледате составот, се се тоа искусни луѓе, од кои повеќето претходно веќе биле и членови на ДИК, така што сметам дека за главната задача ќе ја договориме пред се почитувајќи ги законите и Уставот на РМ – рече Дерковски.


Членовите на ДИК денеска ќе стапат на функција


Скопје, 30 јули, 2018 - 9:20 (META) 

Новоизбраните членови на Државната изборна комисија денеска ќе даваат свечени изјави во Собранието по што ќе ја одржат првата седница.

Членовите на ДИК беа избрани во средата со 100 гласа „за“ откако партиите се договорија привремениот состав на ДИК да биде избран по стариот модел односно со членови предложени од партиите со најмногу освоени гласови на последните избори.

Претседател на Комисијата е Оливер Деркоски кој доаѓа на предлог на ВМРО-ДПМНЕ, потпретседател е Дитмире Шеху предложена од ДУИ, а членови се Елизабета Постоловска од ВМРО-ДПМНЕ, Јанакие Витановски, Борис Кондарко и Радица Ристеска од СДСМ, како и Енвер Салиу од Беса.

Деркоски во петокот кажа дека првите активности на Комисијата ќе бидат нејзиното конституирање, а потоа и спроведување на референдумот за името. Тој рече дека без разлика што доаѓа од ВМРО-ДПМНЕ, тој и сите останати членови на ДИК се членови на државен орган што има одредени задачи, овластувања и надлежности.

Членовите на ДИК првично требаше свечени изјави да дадат во петокот, но поради активности на претседателот на Собранието тие беа одложени за денеска.


Новите членови на ДИК ќе дадат свечена изјава во понеделник во 10 часот


Скопје, 27 јули, 2018 - 10:44 (META) 

Собранието го презакажа давањето свечени изјави на новоизбраните членови на ДИК за понеделник во 10 часот откако денеска беше одложено поради комеморативната седница во Приштина по повод смртта на активистот за албанските права, Адем Демаќи каде отпатува собранискиот спикер Талат Џафери.

Новиот привремен состав на ДИК со 100 гласа „за“ помина експресно на седницата која се одржа во среда вечерта.

Согласно тоа, за претседател на ДИК е Оливер Дерковски предложен од ВМРО-ДПМНЕ, а Дитмире Шеху од ДУИ потпретседател. Елизабета Постоловска од ВМРО-ДПМНЕ, Јанакие Витановски, Борис Кондарко и Радица Ристеска од СДСМ, како и Енвер Салиу од Беса се членови на највисокото изборно тело во државата.


Одложени свечените изјави на новоизбраните членови на ДИК


Скопје, 27 јули, 2018 - 9:30 (META) 

Собранието ја одложи свечената изјава на новоизбраните членови на Државната изборна комисија поради комеморативната седница во Приштина по повод смртта на активистот за албанските права, Адем Демаќи.
Собранискиот спикер Талат Џафери веќе отпатувал за Приштина. Собранието дополнително ќе ја закаже активноста за свечените изјави на членовите на ДИК.

Новиот привремен состав на ДИК со 100 гласа „за“ помина експресно на седницата која се одржа во среда вечерта.

Согласно тоа, за претседател на ДИК е Оливер Дерковски предложен од ВМРО-ДПМНЕ, а Дитмире Шеху од ДУИ потпретседател. Елизабета Постоловска од ВМРО-ДПМНЕ, Јанакие Витановски, Борис Кондарко и Радица Ристеска од СДСМ, како и Енвер Салиу од Беса се членови на највисокото изборно тело во државата.


Комисијата го утврди составот на ДИК, Собраниска седница во 18 часот


Скопје, 25 јули, 2018 - 14:00 (META) 

Комисијата за изборите и именувањата на експресна седница без расправа едногласно ги утврди седуммината членови на новиот состав на ДИК, што треба да го спроведе референдумот за Договорот со Грција оваа есен.

Претседателот на Собранието Талат Џафери, закажа собраниска седница во 18 часот на која пратениците ќе треба да го изберат новиот состав на Државната изборна комисија.

Оливер Дерковски од ВМРО-ДПМНЕ е утврден за претседател на ДИК, а Дитмире Шеху од ДУИ потпретседател. Членови на Комисијата ќе бидат Елизабета Постоловска од ВМРО-ДПМНЕ, Јанакие Витановски, Борис Кондарко и Радица Ристеска од СДСМ, како и Енвер Салиу од Беса.

На вечерашната седница на Собранието, покрај изборот на членови на ДИК, ќе бидат разгледани и измените во законот за финансирање на политички партии , на Законот за Влада и измените на Изборниот законик, според договореното на лидерската средба во понеделникот.


ВМРО-ДПМНЕ ги испрати предлозите за членови на ДИК до Талат Џафери


Скопје, 25 јули, 2018 - 13:22 (META) 

Пратеничката група на ВМРО-ДПМНЕ денеска претпладне ги доставила предлозите за претседател и еден член на ДИК до претседателот на Собранието, Талат Џафери со што се очекува да се деблокира процесот за избор на составот на Државната изборна комисија.

Кабинетот на Џафери формалните известувања од политичките партии за предлозите за членови на ДИК потоа ќе ги достави до претседателот на Комисијата за прашања на изборите, Илија Димовски, кој треба да закаже седница.

Политичките партии неофицијално во јавноста веќе ги соопштија кандидатите за членови на ДИК. СДСМ за членови на ДИК ги предложи Борис Кондарко, Јанаке Витановски и Радица Ристевска, ВМРО-ДПМНЕ го предлага Оливер Дерковски за претседател, а за член Елизабета Постоловска, ДУИ ја предложи Дитмире Шеху, додека Беса го предложи Енвер Салиу.

Претседател на комисијата ќе биде Дерковски од опозициската ВМРО-ДПМНЕ, имајќи предвид дека консензуалниот договор на партиите беше овој привремен состав на ДИК да се бира по стариот модел со партиски претставници. За овие членови на ДИК треба да гласаат две третини од пратениците.


41 пријавени кандидати за членови на ДИК


Скопје, 22 јуни, 2018 - 15:57 (META) 

Поранешниот претседател на ДИК, Борис Кондарко, советникот во Уставниот суд Југослав Миленковиќ и поранешните членови на Комисијата за лустрација Јанакие Витановски и Чедомир Дамјановски се најдоа на листата на 41 кандидат кои се пријавиле на огласот за нови членови на ДИК.

Во документот до кој дојде „Телма“, меѓу пријавените е само еден поранешен член на ова тело, Ермира Асани Салија која беше единствената која не си поднесе оставка по скандалот со доделувањето на големи надоместоци.

СДСМ не ги открива имињата на своите адути. Од ВМРО-ДПМНЕ потврдија дека нивни предлози се Оливер Дерковски, поранешен директор на МЖ Транспорт и поранешната пратеничка Светлана Карапетрова. Алијансата за Албанците и БЕСА на Касами ќе предложат заеднички кандидат. Партиите ќе треба да се одлучат меѓу еден од тројцата пријавени, Агрон Меџити, Адмир Шабани и Берат Даути.

Се очекува кон крајот на месецот да биде закажана седница на собраниската комисија за прашања на избори и именувања која треба да го утврди предлогот кој од кандидатите ги исполнува условите за да стане член на ДИК. Според договорот на политичките партии претседателот и двајца членови на ДИК треба да бидат од опозицијата, а партиите на власт ќе предложат потпретседател и тројца членови.

Членовите на ДИК, Собранието ги избира со двотретинско мнозинство. Овој привремен состав на Комисијата со шест месечен мандат ќе треба да го организира најавениот референдум на есен. Се очекува по завршувањето на референдумот партиите повторно да седнат на заедничка маса и да ги договорат законските измени кои ќе се однесуваат на изборниот модел и ДИК која треба да биде целосно професионализирана.


Балканска конференција на мали и средни претпријатија се одржува во Софија


Софија, 7 јуни, 2018 - 13:46 (META) 

Денеска во Софија се одржува втората Балканска конференција на малите и средни претпријатија (МСП), во хотелот „Хилтон“.

Претставници на Бугарско-македонскиот бизнис клуб, како и нивни фирми-членки се официјални гости на овој настан.

„Бугарско-македонскиот бизнис клуб нуди различни услуги на своите членови.БМБК го поддржува развојот на бизнисот на своите членови во сите сектори на економијата. Во одредени сектори, тие имаат значително искуство и контакт мрежа“, информираат од таму.

Гости на настанот се и претставници на бугарските власти, Европскиот парламент, Европската комисија, амбасадори, други претставници на локални и европски деловни организации и трговски комори.