!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Обама го затвори кругот во Чикаго со слоганот „Да, ние направивме“


Чикаго, 11 јануари, 2017 - 10:49 (META) 

Американскиот претседател во заминување, Барак Обама, во својот проштален говор во Чикаго изјави дека Америка „денеска е подобро и посилна“.

Признавајќи дека расното прашање било предмет на поделба во САД, Обама, како 44. американски претседател, вложил напори во решавање на бројни други прашања, меѓу кои и создавање нови работни места, подобро здравство, како и смртта на Осама бин Ладен во рамки на борбата против тероризмот.

– Нашата демократија е загрозена секогаш кога је земаме здраво за готово. Сите заедно, без разлика на припадноста на некоја партија, треба да работиме на изградба на демократските институции – рече Обама, наведувајќи дека секој американски граѓанин е „актер во таквите промени“.

Американскиот претседател им одаде признание на сопругата Мишел и на ќерките Малија и Саша за нивната поддршка за време на престојот во Белата куќа.

Пред околу 18.000 лица во Чикаго, неговото политичко упориште каде пред осум години пред голема маса луѓе го прослави влегувањето во Белата куќа, Обама го заврши својот проштален говор со тогашниот слоган „Да, ние можеме“, менувајќи го во „Да, ние направивме“.

Новиот, 45. американски претседател, Доналд Трамп, кој победи на изборите на 8 ноември, официјално ќе ја преземе функцијата на 20 јануари.


За Божиќ во Чикаго ранети 40 лица, 12 загинати


Чикаго, 27 декември, 2016 - 12:53 (META) 

Божиќниот викенд во Чикаго оваа година беше рекорден по бројот на ранувања од огнено оружје. Дури 40 лица беа ранети, а од нив 12 починале.

Чикаго веќе некое време е под лупа поради зголеменото насилство во градот, а од локалната полиција изјавија дека причината за тоа се зачестените судири помеѓу бандите.

При рацијата, за време на божиќниот викенд, полицијата запленила и 45 пиштоли, што исто така преставува поголем број од вообичаено.

Во август оваа година во Чикаго имало 78 убиства, што е најголем број од 1997 година. Во Чикаго има повеќе убиства отколку во Њујорк или Лос Анџелес.

Бројките покажуваат дека до 1 декември во Чикаго биле убиени повеќе од 700 лица, што ја прави 2016 година рекордно насилна. Забележан е и пораст од 58 отсто во бројот на убиства и 48 отсто во бројот на пукања.


Поради безбедносни причини, откажан митингот на Трамп во Чикаго


Чикаго, 12 март, 2016 - 12:11 (META) 

Доналд Трамп го откажа митингот во Чикаго откако илјадници собрани се поделија во два табори – поддржувачи и противници на неговата кандидатура.

Вработена во тимот на Трамп, половина час по предвидениот почеток на митингот, излезе на подиумот и рече дека митингот ќе биде одложен од безбедносни причини.

Во соопштението на американскиот бизнисмен, кое е издадено подоцна, наведено е дека митингот ќе се одржи некој друг ден, но не е прецизирано кога.

Откако се откажа митингот, насобраните почнале да навиваат, а откако почнале да кинат плакати, избил конфликт помеѓу двете групи, поради што полицијата морала да интервенира.

Противниците на Трамп извикувале „Го замолчивме“, а поддржувачите „Го сакаме Трамп“.

Трамп во телефонски разговор за „Ем-ес-ен-би-си“, по откажувањето на митингот, рече дека направил мудра одлука да го одложи настанот заради безбедноста на луѓето.

Тој додаде дека сега очекува поддршката на неговата кандидатура за претседателски кандидат на Републиканската партија само да се зголеми.


Чикаго: Откажани 500 лета поради снежното невреме


Чикаго, 22 ноември, 2015 - 13:18 (META) 

Силно снежно невреме го погоди Чикаго и нанесе околу 40 сантиметри снег. Откажани се повеќе од 500 летови.

Меѓународниот аеродром „Охара“ е принуден да откаже 350 летови, додека аеродромот „Мидвеј“ откажа околу 175.

Властите предупредуваат дека патиштата се лизгави, а снегот предизвикал застој на улиците во градот.


ОМД избра нови претставници во Чикаго и во Лос Анџелес


Чикаго, 14 јули, 2015 - 10:55 (META) 

Алекс Василески и Марија Малиновска се новите претставници на Обединета македонска дијаспора (ОМД) во Чикаго и во Лос Анџелес.

Василески ја заменува Наталија Булинг, која беше претставник за Чикаго од 2011 година, а Малиновска доаѓа на местото на Димитар Насев, кој беше претставник за Лос Анџелес од 2009 година, а сега е член на одборот и директор на програмата за економски развој.

Василески е прва генерација Македонец-Американец со корени од Охрид, а Малиновска од Битола се преселила во Америка во 2006 година и моментално е стипендист на Универзитетот на Калифорнија во Лос Анџелес (УЦЛА), каде студирала на катедрите за глобализација и за германистика.


Џим Бејчор ги претвора уличните дупки во мозаици


Чикаго, 4 ноември, 2014 - 18:50 (META) 

Уличниот уметник Џим Бејчор повеќепати забележал дека по долгите и студени зими на улиците на неговиот роден град Чикаго се појавуваат дупки.

Американскиот уметник решил сам да го реши проблемот со дупките на патот, наместо да поднесува петиции за нивно пополнување.

Секоја пролет уметникот ги поправа улиците, правејќи мозаик во дупките. Бејчор вели дека инспирацијата ја добил од Италија, каде при посетата на археолошките локалитети забележал прекрасни мозаици.

Ви ги претставуваме последните уметнички дела на Бејчлор на улиците на Чикаго.