Могерини: На 30 септември нема да гласате на избори туку за вашата иднина


Скопје, 14 септември, 2018 - 9:45 (META) 

Со политичко лидерство и водство, храброст и одговорност можете да одите напред, порача Федерика Могерини, високата претставничка на Европската Унија за надворешни работи и безбедносна политика и заменик-претседател на Европската комисија во скопската чаршија и додаде дека решавањето на отворените прашања и спроведување на европските вредности ја носи Македонија кон ЕУ.

Могерини истакна дека Македонија има огромни резултати кои биле незамисливи пред една и пол година, па поради тоа, отворен е патот во следниот јуни да се отворат претпристапни преговори со ЕУ.

– Мојата порака до граѓаните на вашата земја, запаметете дека на 30 септември кога ќе гласате, вие сте клучот за ЕУ. Не молчете пред вашата иднина. Не можете да ја пропуштите оваа можност. Вие сте вашата иднина. Ова не се избори, ниту нешто поврзано со политика. Мора да бидете сигурни дека на 1 октомври сте направиле избор за вашата иднина, односно сте одлучиле за иднината на вашите деца – рече Могерини.

Таа се сретна и со претседателот на државата Ѓорге Иванов кој и го повторил својот став дека ги поддржува евроатланските интеграции на Македонија, но дека „ЕУ и НАТО не смеат да бидат алиби за лош договор со кој се отвораат многу повеќе прашања, одошто се затвораат“.

Иванов, како што соопшти неговиот Кабинет, порачал дека „стратешките цели не смеат да се злоупотребуваат на сметка на националните интереси и интересите на македонскиот народ“.


Шилегов: Хаосот на Бит пазар мора да се реши, бесплатни тезги за нелегалните продавачи


Скопје, 16 мај, 2018 - 13:43 (META) 

Град Скопје нема да отстапи во намерата да ги расчисти тротоарите на Бит пазар од сите пречки што го оневозможуваат нормалното одвивање на сообраќајот за пешаците, велосипедистите и возачите, рече денеска на прес-конференција градоначалникот, Петре Шилегов.

Тој нагласи дека со отстранување на нелегалните продавачи на тротоарот на булеварот Крсте Мисирков, кај Бит пазар, ќе се реши хаосот и ги повика продавачите, кои овие неколку дена ги блокираат улиците, да ја прифатат подадената рака и да продолжат да работат во рамките на Бит пазар користејќи ги поволностите кои им се овозможуваат.

– Досега остваривме неколку средби со продавачите на диво поставените тезги кај Бит пазар.Овозможивме бесплатни тезги за два месеца за продавачите што ќе влезат во пазарот и ќе продолжат да работат на тие тезги. Отворено кажувам дека еднакво внимание укажуваме за развој на двете страни на Вардар. Правилата и редот мора да важат насекаде – рече Шилегов.

Тој објасни дека станува збор за не повеќе од 30 продавачи на диво поставени тезги на тротоарот на булеварот Крсте Мисирков, кои имаат поволности да добијат бесплатни тезги на Бит пазар. Во моментов на Бит пазар има 130 слободни тезги кои можат да ги добијат овие продавачи.

– Не сакаме никого да оставиме без работа или да го спречиме да си ја продава стоката. Затоа предвидуваме транзициски период со бенефиции за да може секој да се снајде. Овој чекор го преземаме со цел да ги вратиме купувачите во чаршијата и на пазарот и да овозможиме полесна пристапност до тезгите и до дуќаните. Воведувањето ред на ова место значи и поголема безбедност и пофункционален град. Јас немам обврска да овозможувам бесплатни тезги за пазарџиите, но имам обврска да ги уредам тротоарите, и да им овозможам на граѓаните пристапност до пазарот. Во моментов постојат нефер услови меѓу продавачите на нелегалните тезги на тротоарот и продавачите во пазарот – нагласи Шилегов.


Министерство за култура: Нема причини да запре реконструкцијата на Али-пашината џамија во Охрид


Охрид, 7 февруари, 2018 - 13:41 (META) 

Комисијата од стручни лица, која Министерството за култура ја формираше заради испитување на реконструкцијата на Али-пашината џамија во Охрид, заклучила дека нема основа министерот за култура да нареди прекинување на работите.

Реконструкцијата на оваа џамија, која треба да добие високо минаре од 32 метри предизвика бурни спротивставувања во Охрид и во земјава, со забелешка дека минарето ќе доминира над Чаршијата. Реконструкцијата, инаку, е по проект на Заводот за заштита на спомениците на културата и музеј од Охрид, кој предвидува минарето да се изѕида до височината што ја имало во 16 век.

Сега за реконструкцијата ќе се бара и мислење од УНЕСКО.

„Работната група дојде до заклучок дека министерот за култура нема основа да ги запре работите, но ги охрабруваме сите надлежни институции да постапуваат доколку имаат индиции за прекршување на законските процедури. Работната група препорача, а Министерството ќе достави барање до УНЕСКО за стручно мислење – дали е во склад со стандардите за заштита на градот да се реконструира објектот во такви димензии“, соопшти Министерството за култура.


Охрид е преполн со странски туристи


Охрид, 10 декември, 2016 - 16:48 (META) 

Викендов во Охрид престојуваат стотина грчки, албански, полски и бугарски туристи.

Сончевото и топло време, невообичаено за овој период од годината, ги наполни охридската чаршија и шеталиштето, не само со странски туку и со домашни гости.

Топлиот и пријатен ден беше добредојден за изборниот молк да се помине во пријатна и релаксирана атмосфера.


Денови на занаетчиството во Стара скопска чаршија


Скопје, 10 декември, 2014 - 10:39 (META) 

Годинава, петти пат  Занаетчиската комора на Република Македонија ја организира манифестацијата „Денови на занаетчиството во РМ“, која е под покровителство на Министерството за економија.

Манифестација има цел да ги промовира потенцијалите на занаетчиството како фактор на економски развој, креатор на нови работни места, атрактивно занимање за младите, како чувар на традицијата и на културата на нашата земја.

Централната манифестација ќе се одржи денеска во 11.30 часот во хотелот „Буши ресот енд спа“ во Стара скопска чаршија.

Традиционално, во рамки на манифестацијата ќе се додели признанието „Занаетчија на годината“ од ЗКРМ, како и признанието „Признание за најуспешните“ кое го доделува Министерството за економија.

На манифестацијата ќе се обрати министерот за економија, Беким Незири, министерот за образование и наука, Абдилаќим Адеми, претседателот на Занаетчиската комора, Весна Симова, како и заменик-амбасадорот на Сојузна Република Германија во Македонија, Ханс-Хелге Зандер.