!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Ахмети до Гарет: ДУИ е посветена на реформите на судството и на безбедносниот систем


Тетово, 14 ноември, 2017 - 18:46 (META) 

Лидерот на ДУИ, Али Ахмети и британскиот амбасадор Чарлс Гарет денеска во Тетово разговараа политичката ситуација, системските реформи и евроатлантските интеграции, соопштија од ДУИ.

На средбата, Ахмети, ги повторил приоритетните определби на ДУИ во ова парламентарно мнозинство, односно посветеноста на системските реформи, владеењето на правото, добрососедство, интеграцијата во НАТО и отворање на разговорите за членство во Европската Унија.

– ДУИ особено е посветена на судските реформи и реформите на безбедносниот систем. По локалните избори, сета наша енергија ќе се фокусира на исполнувањето на обврските пред нас – изјави Ахмети.

Во контекст на интеграција на Македонија во НАТО и ЕУ, изразил оптимизам поради унапредувањето на дијалогот со Атина и Софија, што, како што истакнал, претставува предуслов за деблокирање на интегративниот процес на нашата земја.


Заев и амбасадорите на ЕУ и на САД разговараа за реформите на безбедносните служби


Скопје, 1 ноември, 2017 - 10:46 (META) 

Делегација на Владата на Република Македонија, предводена од премиерот Зоран Заев, министерот за внатрешни работи, Оливер Спасовски, како и од вицепремиерот за европски прашања, Бујар Османи, вчера со евроамбасадорот Семуел Жбогар, амбасадорот на САД, Џес Бејли, на Велика Британија, Чарлс Гарет, на Холандија, Воутер Пломп, на Шведска, Матс Стафансон, како и со амбасадорката на Швајцарија, Сибил Сутер Тејада, разговараше за заложбите на Владата за исполнување на предвидените активности во рамките на планот „3-6-9“ во насока на извештајот на Прибе, а кои се поврзани со реформите на разузнавачките и на безбедносните служби.

Како што соопштија од владината прес-служба, амбасадорите ја презентирале можноста во рамките на идните реформски активности во оваа насока да се вклучи Демократска контрола на вооружените сили (ДКВС) од Женева, посебно во поддршка на процесот на зајакнување на собраниската и на судската контрола врз службите.

Амбасадорите, како што се наведува во соопштението, искажале подготвеност на нивните влади да ги подржат овие суштински реформи во Македонија од технички и од финансиски аспект.

Заев на состанокот нагласил дека Владата се раководи од идејата реформата во оваа област да биде транспарентна, темелна и сеопфатна и да биде под целосна контрола на институциите.


Шекеринска и Бартол го честитаа Денот на независноста од врвот Мусица кај Крушево


Крушево, 8 септември, 2017 - 15:52 (META) 

Министерката за одбрана, Радмила Шекеринска, и морнаричкиот капетан Горазд Бартол, шеф на Канцеларијата за врски на НАТО, денеска од врвот Мусица на Бушева Планина им го честитаа 8 Септември, Денот на независноста, на сите граѓани на Република Македонија.

Придружувани од амбасадорите на ЕУ, Самуел Жбогар, на Обединетото Кралство, Чарлс Герет, одбранбени атаеши во Македонија, членовите на планинарското друштво „Ристо Карпуш“, голем број граѓани на Крушево денеска беа дел од настанот „Заедно кон врвот“ кој се организира по повод Денот на независноста.

– Дозволете ми на граѓаните на Република Македонија да им го честитам 8 Септември – Денот на независноста и да посакам следните 26 години да имаме поголема благосостојба и стабилност. Во 26-те години независност поминавме низ добри и тешки моменти, но покажавме дека кога се има иста цел, кога сме упорни и истрајни, таа цел е достижна. Денеска ни треба заедништво околу нашата заедничка стратешка цел – членство во НАТО и во ЕУ – рече министерката.

Морнаричкиот капет Бартол го честиташе Денот на независноста и изрази уверување дека сите 29 земји членки на НАТО ја поддржуваат Република Македонија да стане 30. членка на Алијансата.

– Вашата земја помина избори, има нова влада и нови идеи. Имам чувство дека вашата земја е решена да продолжи на патот кон членство во НАТО и во ЕУ. Можам да ве уверам дека сите 29 земји даваат поддршка на вашата земја и со нетрпение очекуваме вашата земја да стане 30. членка на алијансата. Мојата канцеларија е тука да ви помогне – рече Бартол.


Груевски го информирал Гарет за партизација на институциите од страна на власта


Скопје, 26 јули, 2017 - 19:55 (META) 

Претседателот на ВМРО-ДПМНЕ, Никола Груевски, денеска се сретнал со амбасадорот на Велика Британија во Македонија, Чарлс Гарет.

На средбата, како што информираат од ВМРО-ДПМНЕ, Груевски го истакнал значењето на брзото зачленување на Македонија во ЕУ и во НАТО и очекувањето западните партнери да дадат максимален придонес во таа насока.

На средбата било разговарано за повеќе актуелни теми со посебен осврт на, како што се вели во соопштението, „незаконските чистки и бруталната партизација што СДС ја спроведува во сите области“.

Груевски исто така ја нагласил „политичката злоупотреба на СЈО и континуираните притисоци врз судовите за носење одлуки кои не се базираат на аргументи и на право“.

„Исто така, се разговараше и за притисоците врз медиумите кои резултираа со неизбалансирано информирање исклучиво во полза на владејачката коалиција, што го загрозува правото на јавноста да добива точни и проверени информации за прашања кои се од интерес на граѓаните“, се вели во соопштението на ВМРО-ДПМНЕ.


Анѓушев – Гарет: Македонија може повеќе да извезува во Велика Британија


Скопје, 19 јули, 2017 - 18:11 (META) 

Вицепремиерот за економски прашања, Кочо Анѓушев, денеска се сретна со британскиот амбасадор во земјава, Чарлс Гарет, со кој разговарал за економската соработка помеѓу Македонија и Обединетото Кралство.

Тие заклучиле дека соработката е на солидно ниво, но и дека постои можност економските односи уште повеќе да се развијат, особено во поглед на извозот од Македонија.

„Обединетото Кралство е значаен економски партнер на Македонија, втора земја по обем на трговската размена. Сметам дека досегашната меѓусебна економска соработка е добра основа која може да ја надградиме, особено во намалување на трговскиот дефицит и зголемување на извозот кон Обединетото Кралство. Со економските политики кои Владата ќе ги спроведe во наредниот период, ќе се насочиме кон тоа да ги развиваме македонските компании да произведуваат производи со повисока додадена вредност, да станат поконкурентни на регионалните и на европскиот пазар и да го зголемат извозот, со што ќе придонесеме и за отворање нови работни места и за побрз пораст на економијата“, истакна Анѓушев.

Амбасадорот Гарет се осврнал на активностите од Берлинскиот процес, односно на самитот за Западен Балкан кој се одржа во Трст, но и на активностите кои следуваат наредната година.

„На самитот во Трст, Македонија навистина имаше успешно претставување. Наредниот самит за Западен Балкан ќе се одржи во Обединетото Кралствo и се надевам дека планираните реформски процеси во земјата ќе бидат реализирани, а Република Македонија ќе добие уште поголема поддршка на наредниот самит“, изјавил Гарет.


Димитров и Гарет разговарале за реформските приоритети


Скопје, 23 јуни, 2017 - 14:32 (META) 

Министерот за надворешни работи на Република Македонија, Никола Димитров, денеска се сретна со британскиот амбасадор Чарлс Гарет, со кого разговарал за остварувањето на надворешно-политичките приоритети на новата реформска влада, со акцент на силната определба за зацврстување на владеењето на правото и на демократијата во земјата.

Димитров и Гарет разговарале и за имплементирањето на итните реформски приоритети, при што Димитров искажал подготвеност за засилена дипломатска активност за ЕУ и за НАТО-интеграциите, но го нагласил и очекувањето за добивање конкретни сигнали од стратешките партнери на Македонија.

„Амбасадорот Гарет ја поздрави заложбата на новата влада за имплементација на реформската агенда и заживување на евроатлантскиот интегративен процес, при што уште еднаш ја потврди посветеноста на Обединетото Кралство за поддршка на Република Македонија во остварувањето на нејзините надворешно-политички приоритети“, информираат од МНР.

На средбата биле разменети мислења и за последните политички случувања во Обединетото Кралство, особено во контекст на почетокот на преговорите за излез на земјата од ЕУ, безбедносните предизвици по терористичките напади во последните месеци, како и заемната подготвеност за унапредување на партнерските односи во сите сфери од заемен интерес и по Брексит.


Меј до Заев: Новата Влада отвора пат за напредок на Република Македонија


Скопје, 14 јуни, 2017 - 13:07 (META) 

Премиерот Зоран Заев денеска се сретна со амбасадорот на Велика Британија Чарлс Гарет, на која британскиот амбасадор ја поздравил определбата на новата Влада кон реформските процеси, како и конструктивните и инклузивни политики.

Гарет, во име на британската премиерка Тереза Меј му врачи и честитка на премиерот Заев, за неговото стапување на должност претседател на Владата на Република Македонија, со јасно изразена надеж дека новата Влада отвора пат за напредок на Република Македонија.

„После долгогодишна политичка криза, новата Влада има важна можност да ги имплементира многу потребните реформи“, стои во честитката, во која Меј ја охрабрува посветеноста на македонската Владата за зајакнување на владеењето на правото, спроведување на потребните судски реформи и градењето независни институции.

Заев на средбата ја повторил посветеноста за придвижување на реформскиот процес. Тој истакнал дека првичните резултати од реформите ги очекува во септември и изрази надеж дека тогаш ќе биде почната и втората фаза од сериозните реформи.

Премиерот Заев рекол дека Владата е определена, во интерес на сите граѓани, да ги вклучи во реформските процеси граѓанскиот сектор, опозицијата, како и сите кои сакаат и можат да помогнат.

Британскиот амбасадор Гарет, на средбата со премиерот Заев соопштил дека Велика Британија останува голем пријател на Македонија на патот на демократските и интеграциските процеси, во интерес на граѓаните на Македонија, како и одблиску заинтересирана за стабилноста, безбедноста и просперитетот на целиот регион.


Амбасадорите на Ахмети му ја потврдиле поддршката за формирање на новата влада


Тетово, 3 мај, 2017 - 21:19 (META) 

Претседателот на Демократската унија за интеграција, Али Ахмети, денеска во седиштето на партијата во тетовска Мала Речица остварил средба со амбасадорот на Велика Британија, Чарлс Гарет, на Холaндија, Ваутер Пломп, на Шведска, Матс Стафансон, и со Марко Акватичи, од aмбасадата на Германија, соопшти партијата.

„На средбата гостите го поздравија изборот на претседателот од парламентарното мнозинство на Собранието на Македонија и ја потврдија целосната поддршка од страна на ЕУ во однос на формирањето на извршните органи, за земјата преку нова и реформска влада да го продолжи што поскоро патот на интегративните процеси кон ЕУ и кон НАТО“, информира ДУИ.


Груевски на амбасадорите им рекол дека изборите се најбрз начин за излез од кризата


Скопје, 25 април, 2017 - 19:17 (META) 

Претседателот на ВМРО-ДПМНЕ, Никола Груевски, денеска со амбасадорите на Германија, Велика Британија, Шведска и на Холандија, Кристине Алтхаузер, Чарлс Гарет, Матс Стафансон и Ваутер Пломп, разговарал за актуелната политичка состојба, за позициите и за ставовите на ВМРО-ДПМНЕ во однос на нејзино надминување.

На средбата, на која присуствувале и членовите на извршниот комитет на партијата, Никола Попоски, Никола Тодоров и Владимир Ѓорчев, Груевски на амбасадорите им соопштил дека „најдобар и најбрз начин да се излезе од политичката криза е спроведување на предвремени парламентарни избори заедно со редовните локални избори“.

Во однос на дебатата во Собранието, од ВМРО-ДПМНЕ било истакнато дека партијата ги користи сите законски и деловнички можности за искажување на сопствените ставови и позиции.

„Ништо нема незаконски и нема ништо што досега не се случило во минатото во Македонија, низ Европа и во светот, практично тоа е начинот на кој ВМРО-ДПМНЕ го изразува револтот од прифаќањето и од наметнувањето на тиранската платформа“, стои во соопштението.

ВМРО-ДПМНЕ ги информирал амбасадорите дека во јануари, за време на разговорите со ДУИ за коалицирање, партијата истакнала дека нема да преговара за албанската платформа и оти потоа разговорите се фокусирале на унапредување на користењето на јазиците на немнозинските заедници во општините каде тие се повеќе од 20 отсто.

Од партијата нагласиле дека „е потребен дијалог и дебата, во рамките на институциите за поместување на работите, и организирање избори за излез од кризата“.

Претходно, амбасадорската четврока на 19 април имаше средба со лидерот на СДСМ, Зоран Заев.


Гарет: Излезот од политичката криза е во владеењето на правото


Скопје, 31 март, 2017 - 15:19 (META) 

Независно и ефикасно судство во заштита на правата и на слободите на граѓаните беше темата на конференцијата организирана од Мисијата на ОБСЕ и од Здружението на судии на Македонија, што се одржа денеска во Скопје, а по повод „Денот на судството“.

Околу 100 судии и високи судски претставници разменија мислења за важната улога на судството како гарант на владеењето на правото и на основните права на граѓаните.

Претседателот на Врховниот суд на Република Македонија, Јово Вангеловски, рече дека независното и непристрасно судство е носечки столб и гарант за демократијата и за владеењето на правото.

Вангеловски рече дека не постои општество каде нема постојани обиди за мешање во судството, но ако „судиите се држат до законот и до моралот не постои начин да се влијае врз нив“.

– Обидите за притисок врз судиите не можат да се исклучат во ниту едно општество, но битна е издржливоста на судиите. Затоа треба да знаат дека законодавната и извршната власт се минливи, но судската власт е трајна и треба да суди непристрасно. Политиката е надмоќна во дефинирањето на правото, но судството е надмоќно во неговото спроведување – рече Вангеловски.

Шефицата на Мисијата на ОБСЕ во Македонија, Нина Суомалаинен, истакна дека мисијата нашла добри партнери во судството во земјава, со кои заедно реализирале многу проекти од големо значење за зајакнувањето на институциите во земјава.

– Постојат уште многу предизвици, особено во врска со судската независност и непристрасност, како и со ефикасноста на судовите. Се надевам дека сите релевантни институции ќе ги засилат своите напори за да се соочат со предизвиците – рече Суомалаинен.

Британскиот амбасадор во Македонија, Чарлс Гарет, чија амбасада финансиски ги поддржа настаните организирани во Штип, Битола и во Скопје, а кои претходеа на денешната завршна конференција, истакна дека „владеењето на правото и концептите што ги штити, се централни во политичката дебата денес“.

– Тие се централни за Договорот од Пржино и за барањето одржлив излез од политичката криза. Во сите демократии, владеењето на правото е камен-темелник на кој се базираат слободата, праведноста, почитувањето, благосостојбата, сето она што навистина ни е потребно. Кога сè што правиме е изграденo врз тие темели, општеството ќе биде посилно, за граѓаните денес, како и за идните генерации – рече Гарет.