Османи се заблагодарил на Гарет за упорноста во решавањето на политичката криза


Скопје, 3 јули, 2018 - 10:41 (META) 

Вицепремиерот задолжен за европски прашања Бујар Османи се сретнал со амбасадорот на Обединетото Кралство во Македонија, Чарлс Гарет по повод завршувањето на неговиот мандат.

Османи се заблагодарил на Гарет за ангажманот, посветеноста и како што се вели во соопштението „упорноста да ни се помогне да ја пребродиме длабоката политичка и институционална криза, а потоа и да ја вратиме Македонија на евроатлантскиот пат“.

„За неполна недела, Лондон ќе биде домаќин на земјите од Западниот Балкан, кои заедно со претставниците на Европската унија, како дел од т.н. Берлински процес, ќе ја реафирмираат својата евроатлантска ориентација, ќе ги разгледаат предизвиците за унапредувањето на меѓусебната соработка, и ќе ги отворат можностите за побрза интеграција на Западниот Балкан во Европската Унија“, изјавил Османи.

Покрај стратешките цели на државата како што се ЕУ и НАТО интеграцијата, Османа посочил и на постигнатиот напредок во соработката во различни области: поддршка на реформите во македонската администрација, образованието, во правосудниот систем, демократијата и социјалната кохезија, реформи во безбедносниот систем итн.


Договорот и го отвора патот на Македонија кон НАТО и ЕУ, вели британскиот амбасадор


Скопје, 13 јуни, 2018 - 12:52 (META) 

Британскиот амбасадор во Република Македонија, Чарлс Гарет денеска го поздрави постигнатиот договор меѓу премиерите Зоран Заев и Алексис Ципрас за спорот за името посочувајќи дека тоа ќе го отвори патот Македонија да оди напред во евроатлантските интеграции, кон ЕУ и НАТО.

– Тоа не е добро само за Македонија, туку и за регионот – рече Гарет по потпишувањето на Меморандум за соработка со Владата на Република Македонија .

Тој изрази надеж дека Македонија ќе добие датум за почеток на пристапните преговори на состанокот на Советот на ЕУ, а подоцна и покана за членство во НАТО.

Британскиот министер за надворешни работи Борис Џонсон вчера го поздрави постигнатиот договор меѓу премиерите на Македонија и на Грција Зоран Заев и Алексис Ципрас за спорот за името.

„Фантастична вест е дека премиерите Зоран Заев и Алексис Ципрас постигнаа договор за прашањето за името. За ова е потребно лидерство и политичка храброст. Ги охрабрувам сите политички лидери во двете земји да ги препознаат бенефитите што ќе ги донесе решавањето на ова долгогодишно прашање“, напиша британскиот министер за надворешни работи на „Твитер“.


Бејли, Герет, Пломп, Османи и граѓани собираа ѓубре на кејот на Вардар


Скопје, 26 април, 2018 - 16:17 (META) 

Холандскиот амбасадор Ваутер Пломп, амбасадорот на Велика Британија Чарлс Герет и американскиот амбасадор Џес Бејли, заедно со вицепремиерот Бујар Османи денеска на кејот на Вардар зад Луна паркот го чистеа расфрланиот смет во еко акцијата, која трета година по ред ја организира амбасадата на Кралството Холандија заедно со „Пивара“ и „Пакомак“.

Ова е трета по ред волонтерска еко-акција што ја организираат „Пивара“, „Пакомак“ и Амбасадата на Холандија. Во претходните две акции беа исчистени брегот и водите на езерото Матка, како и кејот на реката Вардар, на кој и годинава се собираше целокупниот сув отпад. Годинешната акција е воедно и дел од активностите за одбележување на Денот на Кралот – националниот празник на Холандија.

– Се радувам што оваа година имавме можност да го одбележиме нашиот голем национален празник и со ваква акција. Го споивме убавото со корисното и уште еднаш се обидовме да го дадеме својот придонес за намалување на загадувањето кое е голем проблем за луѓето и за природата. Единствен ефикасен начин за трајно надминување на овој проблем е повеќе работа, посветеност и соработка меѓу јавниот сектор, компаниите и граѓаните. Со нашиот денешен ангажман сакаме да покажеме дека секој од нас може да даде личен пример за другите и да го поттикне решавањето на кој било проблем – истакна холандскиот амбасадор.

Целокупната логистичка поддршка за соодветен транспорт, селектирање и рециклирање на собраниот отпад ја обезбеди „Пакомак“.


АЕК и ААВМУ за јавноста сè уште се главно „политички“ тела


Скопје, 4 април, 2018 - 14:26 (META) 

Мал е процентот граѓани кои знаат што претставуваат двата регулатора во сферата на медиумите и на електронските комуникации и кои се нивните надлежности. Ова е заклучокот на презентацијата на завршниот мониторинг извештај за работата на АВМУ и АЕК.

Во изминатите 18 месеци, „Евротинк“ во соработка со „НВО Инфоцентар“, „Транспарентност Македонија“ и Хелсиншкиот комитет за човекови права ја следеше работата на двете агенции нивната транспарентност и перцепцијата за нив во пошироката јавност. На завршниот мониторинг извештај презентиран денеска му предходеа 5 квартални извештаи кои се јавно достапни.

Општата препорака од претставниците на организациите што го работеле извештајот е двата регулатора повеќе да се ангажираат за информирање на јавноста за нивните надлежности и за помошта што може да им ја пружат. Притоа, како што кажа комуникологот Сеад Џигал, во ова дигитално време тоа не треба да се прави само еднонасочно, туку двете агенции да бидат подготвени и за двонасочна комуникација.

Иако на почетокот на проектот, финансиран од амбасадата на Велика Британија, постоела одредена недоверба во поглед на институциите, тие потоа почнале одлична соработка со спроведувачите на набљудувањето, што е за пофалба, истакна британскиот амбасадор Чарлс Гарет.

Директорот на АЕК, Сашо Димитријоски, и директорот на ААВМУ, Зоран Трајчевски, рекоа дека од соработката со граѓанските организации дошле до увид за одредени проблеми, што довело до подобрување на нивната работа. Како што истакнаа презентерите, за пофалба е што АЕК, за разлика од ситуацијата кога донираше пари за Панорамското тркало на ЈСП, ја прекинала таквата практика.

Министерот за информатичко општество и администрација, Дамјан Манчевски, зборувајќи за измените на законот за аудио и аудиовизуелни медиумски услуги, кој е веќе во собраниска процедура, истакна дека треба тој да донесе професионализација на Советот на ААВМУ и на Програмскиот совет на МРТ за конечно политиката да ги тргне рацете од медиумите. Манчевски потенцираше дека членови на Советите во АВМУ и МРТ и на  Комисијата во АЕК, сеуште се високи партиски функционери.

Тој нагласи дека Владата се зафатила со главните аспекти на медиумските реформи и порача дека е потребен дополнителен ангажман на сите, за медиумската сфера да биде контролирана од саморегулацијата, а не од државата и политичките структури.

Според проф. д-р Снежана Трпевска, експерт за медиуми, со медиумските реформи се доцни, а ќе биде потребен голем ангажман за да се средуваат работите во медиумскиот сектор во иднина.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на Фондацијата Отворено општество – Македонија.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на Фондацијата Отворено општество – Македонија.


Сугарески и Гарет разговарале за економската соработка меѓу Македонија и Британија


Скопје, 2 февруари, 2018 - 12:11 (META) 

Министерот за транспорт и врски, Горан Сугарески денеска имал средба со амбасадорот на Велика Британија во земјава, Чарлс Гарет, на која го информирал за капиталените проекти што се реализираат во Македонија во делот на инфраструктурата.

„Амбасадорот беше запознаен со проектите што ќе се реализираат во следниот период во делот на патната инфраструктура, изградба на железницата на Коридорот 8, како и за проектите што ги реализира Министерството за транспорт и врски во комуналната инфраструктура и гасификацијата“, стои во соопштението од Министерството.

На средбата се разговарало и за актуелните состојби во соработката меѓу двете земји, при што акцентот бил ставен на зголемувањето на економската соработка меѓу Македонија и Велика Британија.


Мицкоски – Гарет: ВМРО-ДПМНЕ ќе учествува во реформите, ама ако се создадат услови за тоа


Скопје, 9 јануари, 2018 - 15:23 (META) 

Претседателот на ВМРО-ДПМНЕ, Христијан Мицкоски денеска се сретнал со амбасадорот на Велика Британија во Република Македонија, Чарлс Гарет со кого разговарал за стратешките приоритети на државата, актуелната политичка состојба и реформските процеси.

На средбата, како што информираат од партијата, Мицкоски истакнал дека ВМРО-ДПМНЕ ќе биде конструктивен фактор во градењето на политичкиот амбиент за реализација на реформските зафати кои треба да донесат подобрување на квалитетот на животниот стандард и дека таквата конструктивност е базирана на принципиелни и разумни основи.

Мицкоски посочил дека за да се реализира тоа потребен е дијалог со владата и дека самиот процес е двонасочна улица на исполнување на обврски и одговорности.

„Тој истакна дека сериозен проблем преставува политичкиот прогон кој го врши власта и дека тоа е и пречка за придвижување на општествените процеси кои се во застој. Воедно беше посочено дека пратеничката група на партијата нема да учествува во работата на Собранието се додека не се создадат услови за нормално, демократско функционирање на оваа институција“, информираат од ВМРО-ДПМНЕ.


Гарет: За спорот со името потребни се тешки одлуки и вистинска политичка храброст


Скопје, 24 декември, 2017 - 10:52 (META) 

Македонија има многу висок рид кој треба да го искачи за да добие датум за преговори до средината на следната година, претстои тешка задача но правилно е да се биде оптимист, вели амбасадорот на Велика Британија во Македонија, Чарлс Гарет, во неделното интервју на „Радио Слободна Европа“.

Тој вели дека јасно е дека Владата е решена да оди напред и да се справи со заробената држава, но дека се работи за долг пат и дека е потребен напор на долг период.

-Потребна е реална програма на вклучување на граѓаните за тие да ги одобрат реформите. Исто така и граѓанското општество да се вклучи од страна. Тоа е маратон, не спринт – смета британскиот амбасадор.

Гарент потенцира дека во секоја демократија опозицијата игра клучна улога и дека е важно сите партии во Парламентот да и овозможат на опозицијата да дојде и да ја одигра својата улога.

-Прашањата за притворите треба да ги одговорат официјалните лица од судството и обвинителството. Прашањата за повлекувањето на имунитетот за притвор на пратениците е секако работа на самиот Парламент. Не е на мене како странски дипломат да зборувам за тоа, но треба да се фокусираме на фактот дека настаните од 27 април беа екстремно насилни настани и од она што слушам и јас и другите и што видовме од снимките од таа вечер по се изгледа дека барем дел од тоа беше организирано. Сега ова е многу сериозно прашање и потребна е многу сериозна истрага проследена со процесот на владеење на правото. Јас мислам дека секој во Македонија во голема мера го разбира и се согласува со тоа и не ми е јасно на мене како бојкотот на Парламентот може да помогне во постигнувањето на таа цел – вели Гарент.

Да се реши спорот со името до јуни 2018 година, Гарет смета дека е разумна цел дури и во реално кратка временска рамка и додава дека за пронаоѓањето на соодветно решение ќе бидат потребни тешки одлуки и вистинска политичка храброст.

-Јас не го потценувам сето тоа, но ние мора да бидеме свесни дека таму има прозорец на можности кој политичарите на двете страни се одлучни да направат нешто во врска со тоа. Ние треба да се фокусираме на користа која ќе протече од тоа решение – додава Гарет.


Меј го покани Заев на самитот за Западен Балкан во Лондон


Скопје, 22 декември, 2017 - 13:16 (META) 

Амбасадорот на Велика Британија во земјава, Чарлс Гарет на денешната средба на премиерот Зоран Заев му ја предал поканата од британската премиерка, Тереза Меј за самитот за Западен Балкан, што ќе се одржи во Лондон во јули следната година, а во рамките на Берлинскиот процес, соопшти владината прес-служба.

Меј во поканата наведува дека целта на самитот во Лондон е да се поддржат земјите од Западен Балкан во регионалната соработка и добрососедските односи, заложби договорени на самитот во Трст во јуни оваа година.

Фокусот на самитот во Лондон ќе биде ставен на меѓусебното поврзување на државите, енергетиката, дигитализацијата и претприемништвото, а во делот на безбедноста, на справувањето со корупцијата, организираниот криминал, движењето на луѓе и стоки, тероризмот и насилниот екстремизам.

Премиерот Заев на средбата со Гарет истакнал дека Македонија ќе даде активен придонес во сите важни прашања што ќе бидат тема на самитот.

На состанокот Заев и Гарет разговарале и за важноста на потребните внатрешни реформски процеси, посебно во делот на независноста на правосудството и владеењето на правото.


Конференција „Иднината на Берлинскиот процес“: Позитивен, но недоволно видлив


Скопје, 1 декември, 2017 - 14:03 (META) 

Берлинскиот процес за четири години создаде позитивни моменти во односите на Западен Балкан со Европската Унија и донесе извесни резултати, но за да се постигне целосниот потенцијал, потребно е да се зголеми видливоста на процесот во јавноста.

Ова е заклучокот од денешната конференција „Иднината на Берлинскиот процес“, организирана од Институтот за демократија „Сосиетас цивилис“, на која учествуваа и амбасадорите на Италија и на Велика Британија, Карло Ромео и Чарлс Гарет.

Игор Бандовиќ од „Европскиот фонд за Балкан“ рече дека политичарите декларативно се посветени на евроинтеграциите, но ако се прашат граѓаните колку од тоа гледаат на дело, одговорот е дека „не ги чувствуваат промените“. Тој истакна дека сите земји од регионот, имајќи предвид дека имаат заедничко минато, се борат со исти проблеми, односно реформи во правосудството, независност на судството и борба против корупцијата.

Координаторот на Центарот за ЕУ-интеграција, Зоран Начев, рече дека во Берлинскиот процес треба да се вклучат повеќе актери, не само владите на државите од Западен Балкан, односно парламентите, граѓанските организации и вработените во администрацијата. На тој начин ќе се поттикне забрзувањето на имплементацијата на предвидените мерки.

Амбасадорот Ромео повтори дека Берлинскиот процес не е сам по себе цел, туку механизам за забрзување на ЕУ-интеграциите на земјите од Западен Балкан, преку нивна поголема меѓусебна соработка, а со тоа и со зголемена соработка на регионот со ЕУ. Тој го спомена самитот во Трст кој се одржа во јули годинава, а на кој беа дефинирани проекти и обезбедени финансии за транспортна и за енергетска поврзаност на земјите, за зголемена безбедносна и прекугранична соработка.

Британскиот амбасадор Гарет рече дека земјите од Западен Балкан треба да го искористат следниот период за забрзување на евроинтеграциите, истакнувајќи дека и во европските институции и во земјите членки на ЕУ се свесни дека е потребно придвижување на процесот.

Следниот самит посветен на Берлинскиот процес ќе се одржи во Лондон, во јули следната година. Гарет рече дека се работи на подготовка на самитот и оти четирите клучни точки на кои ќе се фокусираат се: транспортна и енергетска поврзаноста на шесте земји од Западен Балкан, дигитално-технолошкото претприемништво, младите и нивна едукативна професионална обука и безбедноста, која овојпат ќе се однесува на борбата против фискалниот криминал и корупцијата.


Ахмети до Гарет: ДУИ е посветена на реформите на судството и на безбедносниот систем


Тетово, 14 ноември, 2017 - 18:46 (META) 

Лидерот на ДУИ, Али Ахмети и британскиот амбасадор Чарлс Гарет денеска во Тетово разговараа политичката ситуација, системските реформи и евроатлантските интеграции, соопштија од ДУИ.

На средбата, Ахмети, ги повторил приоритетните определби на ДУИ во ова парламентарно мнозинство, односно посветеноста на системските реформи, владеењето на правото, добрососедство, интеграцијата во НАТО и отворање на разговорите за членство во Европската Унија.

– ДУИ особено е посветена на судските реформи и реформите на безбедносниот систем. По локалните избори, сета наша енергија ќе се фокусира на исполнувањето на обврските пред нас – изјави Ахмети.

Во контекст на интеграција на Македонија во НАТО и ЕУ, изразил оптимизам поради унапредувањето на дијалогот со Атина и Софија, што, како што истакнал, претставува предуслов за деблокирање на интегративниот процес на нашата земја.