!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Повеќе од 40 сомалиски мигранти убиени во близина на брегот на Јемен


Сана, 18 март, 2017 - 10:57 (META) 

Повеќе од 40 сомалиски мигранти, меѓу кои имало жени и деца, биле убиени ноќеска во близина на брегот на Јемен, додека биле превезувани со чамец, јавуваат светските агенции.

Чамецот, со околу 140 мигранти од Сомалија, бил погоден од лесно оружје во близина на пристанишниот град Ходеда, на западниот брег на Јемен, соопштила канцеларијата за бегалци на Обединетите нации (УНХЦР). Чамецот, и покрај нападот, успеал да доплови до пристаништето, кое е под контрола на бунтовниците Хути.

Засега никој не ја презел одговорноста за нападот. Бунтовниците за нападот ја обвинуваат арапската коалиција, која, пак, ги отфрла ваквите наводи.

Во чамецот, како што објави Меѓународната организација за миграција (ИОМ) во Јемен, биле пронајдени телата на 42 лица.

Според управата на пристаништето, преживеаните мигранти заедно со тројца јеменски шверцери биле уапсени.


Спасени 131 мигрант кај западното грчко крајбрежје


Атина, 8 октомври, 2016 - 16:16 (META) 

Околу 130 мигранти се спасени денеска во близина на западното грчко крајбрежје, откако чамците со кои пловеле побарале помош поради лошите временски услови, соопшти крајбрежната стража.

Бродот пристигнал во пристаништето Метони на Пелопонескиот Полуостров со помош на локалната полиција, а сите патници се безбедни.

Не е позната националната припадност на мигрантите, кои тврделе дека сакале да се упатат кон Италија.


Пронајдени тела на 22 мигранти во чамец во Медитеранот


Атина, 21 јули, 2016 - 10:16 (META) 

Тела на 21 жена и на еден маж се пронајдени во чамец кој превезувал мигранти преку Медитеранот, соопшти хуманитарната организација „Лекари без граници“.

Организацијата навела дека повеќе од 200 преживеани се спасени од гумен чамец и се префрлени на еден од бродовите на организацијата.

Групата соопшти дека телата на настраданите долго се наоѓале во чамецот.

Други детали не се соопштени.


Најмалку 11 бегалци се удавија денеска во Егејско Море


Атина, 1 ноември, 2015 - 13:47 (META) 

Најмалку 11 бегалци, од кои шест деца, се удавија денеска во близина на грчкиот остров Самос. Како што соопшти грчката крајбрежна стража, чамецот пловел од турскиот брег и во еден момент се превртел.

Во слични инциденти покрај грчките острови на Егејско Море, изминатите денови загинаа десетици бегалци.


Во Либија спасени 120 бегалци


Триполи, 7 септември, 2015 - 19:08 (META) 

Либиската крајбрежна стража соопшти дека спасила повеќе од 100 бегалци кои се наоѓале во гумен чамец, на кој му се расипал моторот.

Директорот на крајбрежната стража, Мухамед Данди, изјави дека на 60 километри источно од Триполи биле спасени 121 бегалец.

Тој додал дека бегалците биле од арапските и од африканските земји, а дека меѓу нив имало и 10 жени. Тие се префрлени во прифатен центар во Триполи.

Во четвртокот крајбрежната служба спасила 104 бегалци во истата област.