Oсуммина загинати во пожар во зграда во Португалија


Лисабон, 14 јануари, 2018 - 10:35 (META) 

Во пожар што вчеравечер зафатил еден кат од зградата на Граѓанскиот дом во Вила Нова да Раиња, приградска населба на Тондела, околу 250 километри северно од Лисабон, загинаа најмалку осум лица, а најмалку 35 се повредени, објавија локалните власти.

Пожарот избувнал откако експлодирал котел за парно греење, а во тој момент во Граѓанскиот дом имало околу 60 луѓе, кои учествувале на аматерски турнир во картање или гледале фудбал на телевизија. Огнот веднаш по експлозијата го зафатил покривот и почнал бргу да се шири, предизвикувајќи паника.

Според градоначалникот на Тондела, Жосе Антонио Жесус, во зградата многу бргу се насобрал јаглероден моноксид. Според еден весник, стаклената волна во покривот веројатно го засилила ширењето на пожарот.  Во објектот имало многу чад, па луѓето биле дезориентирани, а некои од нив паѓале едни врз други при обидот да избегаат по скалите.

Пожарот бил изгаснат за еден час, а во интервенцијта учествувале повеќе од 170 пожарникари и три хеликоптери со кои повредените биле транспортирани во блиската болница.


Најмалку тројца загинати во пожар во солитер на Хаваи


Хонолулу, 15 јули, 2017 - 11:43 (META) 

Најмалку три лица загинаа во пожар во солитер во Хонолулу, на Хаваи.

Пожарот избил вчера попладнето по локално време, на 26. кат од солитерот „Марко Поло“. Огнот бргу се проширил на другите катови.

Полицијата стравува дека тоа не е конечен број на жртви. Во пожарот повредени се 16 луѓе. Околу 100 пожарникари го гаснеле огнот четири и пол часа.

Зградата има 36 ката и 568 станови, а била изградена во 1971 година.


ВМРО-ДПМНЕ: Владата неспособна да помогне на стружани и да ја спаси туристичката сезона


Скопје, 17 јуни, 2017 - 10:47 (META) 

„Владата на СДС и нивните коалициски партнери ја покажуваат сета своја неспособност и незаинтересираност за проблемите на граѓаните во Струга. Девет дена гори депонија која го загадува воздухот, го загрозува здравјето на граѓаните и животната средина и ја претвора Струга од бисер на Охридското Езеро во депонија“, обвини ВМРО-ДПМНЕ денеска во соопштение.

Партијата вели дека со неправилното постапување, се загрозува туристичката сезона.

„СДС и нивните коалициски партнери со сопствената неспособност ја загрозуваат туристичката сезона на Охридското Езеро, со што директно ја загрозуваат и егзистенцијата на стотици семејства чиј извор на приходи се средствата што доаѓаат од туризмот. Владата на СДС знае да укинува, да блокира и да брка од работа, но е сосема глува и не ги слуша барањата на стружани за итно затворање и за дислокација на местото за одлагање на отпадот“, се вели во соопштението.


Голем шумски пожар ја зафати Скопска Црна Гора


Скопје, 2 април, 2017 - 17:12 (META) 

Голем шумски пожар ја зафати Скопска Црна Гора, а во моментов екипи на противпожарната бригада се на терен.

„Поголема шумска површина гори од 12 часот, а нашите екипи се на терен и сè уште го гаснат пожарот. Се работи за место над селата Булачани и Раштак“, изјавија за „Мета“ од противпожарната бригада.

Чадот од запалената површина може да се забележи и од некои делови на Скопје.


Два пожари ноќеска – радовишанка се надишала чад, изгорела работилница


Два поголеми пожари се регистрирани ноќеска, при што во едниот 75-годишна радовишанка се изнадишала чад и завршила в болница, а во вториот изгорела работилница за брикети во скопската населба Бутел.

Во Радовиш ноќеска во 1.35 часот бил пријавен пожар на улицата 22 Октомври. Пожарот избувнал во куќата на 75-годишната М.Р., при што изгорела покуќнината во собата каде што спиела сопственичката. Пожарникарите го изгасиле пожарот, а жената која вдишала од чадот потоа била префрлена во Медицинскиот центар во Штип.

Во пожар кој избувнал во работилница за изработка на брикети на улицата Бутелска 7 во Скопје, изгорела целата работилница, соопшти СВР Скопје. Пожарникарите, на кои случајот им бил пријавен вчера, околу 40 минути пред полноќ, потоа го локализирале пожарот.


Регистриран чад во авионот на „Египет ер“


Каиро, 21 мај, 2016 - 10:08 (META) 

Неколку минути пред да исчезне од радарот, во патничкиот авион на „Египет ер“ бил регистиран чад, јавуваат светските медиуми.

Авионот на египетската авиокомпанија, кој со 56 патници и 10 членови на екипажот леташе на релација Париз – Каиро, во четвртокот се урна во Средоземното море, кај островот Крит, кратко по влегувањето во египетскиот воздушен простор.

Чадот, според информациите, кои биле потврдени од францускиот истражен тим, бил регистриран во тоалетот на авионот, неколку минути пред да се изгуби сигналот со контролата на летање.

Египетската војска вчера соопшти дека пронашла остатоци од авионот, а по неа и грчкото министерство за одбрана објави дека во морето се пронајдени тела од настраданите патници, багаж и седишта од авионот.

Според информациите, деловите од авионот и телата на патниците биле пронајдени на околу 8 километри од местото каде авионот на „Египет ер“ последен пат бил забележан од радарот.


Во Чад војници пукале на демонстранти и убиле едно лице


Нџамена, 22 февруари, 2016 - 19:55 (META) 

Студент од Чад е убиен од група војници, кои отвориле оган на демонстранти за време на протестот поради групното силување на една девојка.

За време на престрелката ранети се пет други лица.

– Војниците пукаа на студентите, убија еден, а ранија петмина – изјавил доктор од болницата во градот Фаја Ларгеу.

Протестот на студентите е само еден од низата инциденти во Чад, откако брутално беше силувана една девојка.


Жител на Дурачка Река се задушил од чад од пожар во својот дом


Крива Паланка, 9 јануари, 2016 - 15:17 (META) 

Вчера, околу 11.30 часот, во полициската станица во Крива Паланка било пријавено дека 50-годишниот Орце И. од селото Дурачка Река починал од задушување со чад, во пожар кој избувнал во неговиот дом.

Како што информираат од полицијата, пожарот настанал кога од шпоретот на дрва се запалиле дел од кујнските елементи и облека.

Увид на местото извршила екипа од надворешната канцеларија за криминалистички работи, а лекар од кумановската болница констатирал дека на телото на починатиот нема траги на насилство и дека причина за смртта е труење со јаглерод моноксид.

Со согласност на јавен обвинител, телото на починатиот било дадено на семејството за погреб.


Жена се задушила од чад во својот дом


Скопје, 27 декември, 2015 - 15:00 (META) 

Будимка А. (77) од виничкото село Црни Врв се задушила во пожар во својата куќа. Пожарот, од засега непознати причини, избувнал во вечерните часови во една од собите од куќата, сопственост на Будимка А., додека таа спиела.

Пламенот набрзина ги зафатил собите. Огнот во куќата го забележале соседите, кои веднаш ја повикале бригадата за противпожарна заштита и ја известиле полицијата. Пожарникарите што дошле во Црни Врв го изгаснале пожарот, но не можеле да ја спасат сопственичката, која била пронајдена мртва во собата во која спиела. Смртта е констатирана од доктор од здравствениот дом во Виница, кој потврдил дека жената починала од преголема доза вдишан јаглероден моноксид.

Увид на местото на настанот извршила полицијата, која работи на утврдување на причините за избувнувањето на пожарот во куќата на Будимка.


Скопјанец се задушил во пожар во својот дом


Скопје, 17 ноември, 2015 - 14:57 (META) 

Педесет и тригодишен скопјанец го загубил животот во пожар што вчераутро, во 7.20 часот, избувнал во неговата куќа во населбата Илинден, соопшти полицијата.

Како што информираат оттаму, станува збор за Слободан Н., кој се задушил од чадот и починал.

По наредба на јавен обвинител, телото на починатиот било дадено за обдукција, а во тек е истрага што треба да ги утврди причините за пожарот.