!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

ВМРО-ДПМНЕ: Насилствата продолжија – тоа е животот што СДСМ го ветуваше


Скопје, 17 октомври, 2017 - 12:46 (META) 

„Напад со нож, запален автомобил, пукање со огнено оружје се случија за само 24 часа по завршување на изборниот ден. Ова е животот што го ветуваше СДСМ“, порача ВМРО-ДПМНЕ денеска, во првото соопштение во последните 36 часа, откако претходно партијата беше во молк по говорот на нејзиниот претседател Никола Груевски.

„Нападот со нож врз претседателот на ГРОМ, Стевчо Јакимовски, од страна на лица блиски до СДС е обид за политичко замолчување, кое не смее да остане неказнето. Надлежните институции треба веднаш да реагираат и да го расветлат целиот случај во најбрз можен рок. Запален е автомобил на симпатизер на ВМРО-ДПМНЕ во Лисиче само неколку часа по завршувањето на изборите. Аздисаноста на криминалните структури блиски до СДС по изборите не запира, од медиумите видовме фотографии како двајца активисти на партијата се сликале со пиштоли пред штабот на партијата во Бутел. Според информациите објавени во медиумите, активистите на СДС во Бутел во неделата вечер пукале со пиштоли и создавале хаос низ Бутел“, се вели во соопштението од партијата.


Тепачка на гласачко место во Бутел


Скопје, 15 октомври, 2017 - 11:18 (META) 

На гласачко место во основното училиште „Петар Здравковски Пенко“ во Скопје утрово во 10 часот се степале двајца гласачи. Гласачите се отстранети од местото и гласањето продолжило непречено.

Тепачката се случила во училиштето, по што реагирало полициското обезбедување, кое не ги привело, туку само направило записник.

Двајцата гласачи се поткачиле на разминување и почнале да се туркаат, по што си размениле и тупаници.

Училиштето се наоѓа меѓу општините Бутел и Чаир и таму гласаат жителите од двете општини.


Заев: Реални се шансите да добиеме чиста препорака од ЕК


Скопје, 8 септември, 2017 - 15:45 (META) 

„Иднината наша, како граѓани, иднината на Република Македонија, е во ЕУ и во НАТО. Реални се шансите наесен Македонија да добие чиста препорака од ЕК.  Реални се шансите Македонија да стане 30. земја членка на НАТО. Реалност се економските перспективи, спокој во семејствата, децата дома, нови вработувања, успешни претпријатија, европско образование, современо здравство“, порача премиерот и претседател на СДСМ, Зоран Заев, во неговиот говор по повод 8 Септември, Денот на независноста на Република Македонија, на прославата во местото Три Круши во Драчево, што ја организираше неговата партија.

– Чекорот кон слободата и кон шансите го направивме заедно. Исто како што на 8 септември пред 26 години граѓаните масовно, самостојно излегоа на референдумот и избраа независна Република Македонија, и ние во големо мнозинство, сплотени во различностите, со силна верба во вистината и во правдата, избравме слобода. Затоа што, ако нешто е темел на социјалдемокртаската идеја, тоа е нашето чувство за солидарност и за слобода. И бидете горди и на тоа. Оваа шанса да бидеме подобри е нашата иднина. Затоа подаваме рака на сите. Затоа се отворивме за сите. Затоа работиме со сите – рече, меѓу другото, Заев.

Тој на сопартијците им порача дека треба да се подготвени за различностите по која било основа и за критичката мисла.

Премиерот Заев пред прославата во Три Круши, на градските гробишта Бутел во Скопје оддаде почит и положи венци со свежо цвеќе на вечните почивалишта на претседателите на Република Македонија, Киро Глигоров и Борис Трајковски.


Физичка пресметка и закана со пиштол во Бутел


Скопје, 26 август, 2017 - 13:10 (META) 

Непознати лица синоќа со закана со пиштол се обиделе да ги нападнат 22-годишниот М.Ж. и неговиот 25-годишен другар Н.А. на улицата „Бутелска“ во Скопје, пред кафе-бар, соопшти МВР.

Настанот се случил во 23 часот додека М.Ж. се движел со своето возило во кое бил и Н.А. (25). Од левата страна тие биле заобиколени од возило од кое излегле три непознати лица, а паралелно до возилото на М.Ж и зад него, застанале уште две возила од кои излегле уште неколку лица. Три лицата кои излегле од возилото што им го попречило патот, се доближиле до М.Ж. и Н.А. и почнале да им се обраќаат со погрдни зборови. Во еден момент, едно од лицата извадило пиштол и успеало да го извлече Н.А. од блокираното возило надвор по што и физички го нападнал.

Во меѓувреме дошло уште едно возило кое застанало и од него излегло друго повозрасно лице кое се упатило кон напаѓачот со пиштол во рацете и го натерал заедно со другите лица да го напуштат местото на настанот.
Полицијата презема мерки за целосно расчистување на случајот.


Два пожари ноќеска – радовишанка се надишала чад, изгорела работилница


Два поголеми пожари се регистрирани ноќеска, при што во едниот 75-годишна радовишанка се изнадишала чад и завршила в болница, а во вториот изгорела работилница за брикети во скопската населба Бутел.

Во Радовиш ноќеска во 1.35 часот бил пријавен пожар на улицата 22 Октомври. Пожарот избувнал во куќата на 75-годишната М.Р., при што изгорела покуќнината во собата каде што спиела сопственичката. Пожарникарите го изгасиле пожарот, а жената која вдишала од чадот потоа била префрлена во Медицинскиот центар во Штип.

Во пожар кој избувнал во работилница за изработка на брикети на улицата Бутелска 7 во Скопје, изгорела целата работилница, соопшти СВР Скопје. Пожарникарите, на кои случајот им бил пријавен вчера, околу 40 минути пред полноќ, потоа го локализирале пожарот.


Уставните судии гласаа нерешено за крстот во Бутел


Скопје, 29 јуни, 2016 - 11:53 (META) 

Уставните судии и денеска не донесоа одлука за иницијативата за оценка на уставноста и на законитоста на одлуката за поставување 55-метарски крст во општина Бутел.

Како што информираат од судот за „Мета“, на денешната седница присуствувале осум судии, кои гласале изедначено, однсно четворица биле за отфрлање, а четворица за прифаќање на иницијативата.

Иницијативате ќе биде повторно разгледувана на некоја од наредните седници на уставниот суд, најверојано на следната.

Ова е третпат да не се донесе одлука за оваа иницијатива, која до судот во март годинава ја поднел струшкиот градоначалник Зијадин Села, според кого, одлуката за поставување крст во општина Бутел не била во согласност со Бадинтеровиот принцип.

Поставувањето на крстот, кој е донација на Светскиот македонски конгрес (СМК), предизвика тензии откако членови на ДУИ и нивни поддржувачи поставија камп и протестираа против изградба, на што со контрапротести одговори СМК, чиј претседател Тодор Петров беше и физички нападнат дента по свеченоста за осветување на камен-темелникот.


Латиновски: Никој нема право да ја поништи одлуката за изградба на крстот


Скопје, 9 март, 2016 - 16:20 (META) 

Градоначалникот на општина Бутел, Петре Латиновски, и денеска ја предводеше колоната граѓани што излегоа на протест пред зградата на Министерството за внатрешни работи и побараа од министерот Оливер Спасовски да ја заштити локацијата каде треба да биде изграден 55-метарскиот крст во општината.

На протестот, кој траеше околу 15 минути, насобраните порачаа дека крстот ќе се изгради без оглед на сè, пренесува порталот „Нова ТВ“.

– Се надевам дека овој глас ќе допре таму каде што треба, верувам во институциите, верувам во институцијата Министерство за внатрешни работи. Досега сите вработени во оваа институција покажале дека се професионалци и знаеле да си ја завршат работата и да ги заштитат граѓаните – ја пренесува порталот изјавата за медиумите на Латиновски.

Градоначалникот на Бутел ги отфрлил шпекулациите дека е донесено решение за повлекување на одлуката за изградбата на крстот и додал дека ниту тој како градоначалник, ниту некој друг има право да ја поништи одлуката.


Спасовски: Ќе има пријави за протестите во Бутел, честитки за присебноста на полицајците


Скопје, 5 март, 2016 - 15:26 (META) 

Министерот за внатрешни работи, Оливер Спасовски, изјави дека ќе има постапки за одредени случаи и ќе бидат поднесени соодветни пријави поради синоќешните протести во Бутел.

– Прво сакам да оддадам признание на полицајците што беа на настаните, затоа што најпрофесионално ја извршуваа својата задача и што немавме нарушување на јавниот ред и мир. Најважно од сè е дека граѓаните беа на висина на задачата. Тоа е од исклучителна важност и навистина треба да се честита за присебноста и за смиреноста, заради тоа што ова време во Македонија е време во кое треба да се носат рационални и разумни одлуки, а не одлуки на ниво на емоции – одговори Спасовски на прашањето, дали полицијата поднесе пријави за вчерашните и завчерашните протести.

Запрашан, исто така, зошто полицијата дозволила групата на Беќир Асани да уништува државен имот, Спасовски истакна дека полицијата постапувала во согласност со правилата.

– Сметавме дека најважно од сè е да го зачуваме мирот и стабилноста и, пред сè, да не овозможиме да имаме ескалација на судирите. Најлесно е да го запалите огнот, меѓутоа најважно од сè е да не дозволиме да имаме ескалација на состојбите – изјави Спасовски.

За денешните протести пред МВР, тој изјави дека никој не најавил, но и дека секој има право да протестира.

– Јас мислам дека по една ваква мирна разврска, по висината и одговорност на која што беа и политичките субјекти и сите коишто учевствуваа во овој  процес, нема место да се протестира пред Министерството за внатрешни работи. На таков начин се понижуваат полициските службеници коишто најпрофесионално си ја извршија својата задача во овие тешки моменти за Македонија и за општина Бутел – додаде Спасовски.

 


Кај темелите на крстот во Бутел е мирно и празно, шаторите отстранети


Скопје, 5 март, 2016 - 11:56 (META) 

Денеска во скопски Бутел, на местото каде што два дена кампираа граѓани кои се противеа на одлуката да се постави крст висок 55 метри, е мирно и вообичаено за саботно претпладне.

Има само поголема раздвиженост на возила кои одат кон гробиштата „Бутел“, поради верскиот празник Задушница.

Впрочем, тоа беше и причината на раководството на ДУИ да одлучи да го отстрани кампот од местото каде пред една недела беше поставен камен-темелник за изградба на крст.

Засега не се знае дали кампот е отстранет трајно или е само за денешниот христијански празник. Таму сега има само екипи кои поставуваат нова палма на местото на запалената.

Ги нема шаторите, а останати се само јагленосаните трупци кои гореа до доцна синоќа.

Мирно е и на местата каде што синоќа беа запрени и граѓаните кои тргнаа да го бранат поставувањето на темелите на крстот.


Тројца од повредените полицајци во Бутел пуштени на домашно лекување


Скопје, 5 март, 2016 - 11:16 (META) 

Министерот за внатрешни работи, Оливер Спасовски го посетил полицаецот Т. П. во Ургентниот центар во Скопје, при што му посакал брзо закрепнување.

Од МВР, информираат дека во синоќешните настани во Бутел биле повредени уште тројца полицајци, но по укажаната лекарска помош биле пуштени на домашно лекување.

– Полицајците беа повредени откако група од неколку стотини граѓани се обиде да го пробие полицискиот кордон и да се пресмета со групата која претходно постави шатори на местото на кое е предвидена изградба на верско обележје – се вели во соопштението на МВР.