!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Невреме на цел Балкан, поплави и штети во Грција и во Хрватска


Загреб, 24 октомври, 2017 - 11:35 (META) 

Поради невремето со силен дожд, ветер и со снег што го зафати целиот Балкан, во Грција и во Хрватска се забележани поплави на повеќе места и штети од турнати дрвја и бандери, јавуваат балканските медиуми.

Во градот Патра на грчкиот полуостров Пелопонез, е поплавена болница, на островот Кефалонија имало и торнадо, додека во Парга, популарното летувалиште за Македонците на брегот на Јонско Море, паѓал град. Во Солун, исто така, биле предизвикани повеќе проблеми. Се очекува лошото време да продолжи до четврток.

Силно невреме вчера ја зафати и речиси цела Хрватска, а особено се погодени местата на Јадранскиот Брег. Така, во Риека вчера до вечерта наврнале речиси 20 сантиметри дожд на еден квадратен метар, што поплавило голем број сообраќајници. На некои места имало вода до 40 сантиметри на еден квадратен метар, а состојбата почнала да се подобрува подоцна вечерта.

Во Сплит бурата кршеше гранки и превртуваше контејнери, а урна и една бандера. Во Задар падна едно дрво и тешко оштети два автомобила.

На планините паѓал снег.

Утрово на морскиот брег дува оркански ветер со брзина околу 130 километри на час, од Пореч сè до Макарска.


По Ирма, Марија и Хозе, се подготвува бурата Офелија


Вашингтон, 9 октомври, 2017 - 19:04 (META) 

Тропската бура Офелија, која се формира над Атлантскиот Океан, е 15. именувана бура во текот на оваа сезона, јавува „Си-ен-ен“.

Телевизиската мрежа јавува дека Офелија засега не претставува закана за САД.

За потсетување, во текот на сезоната на урагани годинава најопасни беа Ирма, Марија и Хозе. Пред неколку дена до брегот на САД пристигна и тропската бура Нејт, која во Централна Америка однесе 25 животи.


Ирма падна на ниво на бура, но ветерот е со јачина на ураган


Мајами, 11 септември, 2017 - 18:00 (META) 

Ирма ослаби на ново на тропска бура, но и понатаму предизвикува ветер кој речиси има сила на ураган, соопшти денеска американскиот Национален центар за урагани.

Ирма која беше означена како најсилен ураган над Атлантскиот Океан, во осум часот изутрината по локално време забележана е на околу 170 километри северозападно од Тампа во сојузната држава Флорида, со најсилни удари од ветер од 110 километри на час.

Од Националниот центар за урагани велат дека се очекува дополнително слабеење на бурата од вторник до петок по локално време.


Во поплава во Италија најмалку петмина загинати


Рим, 10 септември, 2017 - 16:26 (META) 

Најмалку пет лица загинаа, а тројца се водат како исчезнати во бурата што денеска ја погоди Италија, а меѓу најпогодените се провинцијата Тоскана и градот Ливорно.

Четири лица од исто семејство се пронајдени мртви во поплавена куќа во Ливорно, каде за четири часа падна обилен дожд, претворајќи ги улиците во реки, кои носеа сè пред себе.

Италијански медиуми јавуваат дека загинале девојче, нејзините родители и нејзиниот дедо.

Петтото тело е пронајдено на подрачје разурнато од свлечиште, додека три лица се водат како исчезнати, соопштија пожарникарите.


Ирма убиваше на Карибите, се заканува на Куба и на Флорида


Сан Хуан, 8 септември, 2017 - 17:03 (META) 

Ураганот Ирма уби најмалку 12 луѓе на Карибите и нанесе катастрофални штети на објекти, пловила и на возила. Некои делови на Карибите се толку уништени што во нив нема никакви услови за живот. Но, ураганот нема да запре таму, туку го продолжува својот пат кон Куба, а се очекува да ја погоди и американската сојузна држава Флорида.

На островот Сент Мартин загинале четири лица, а најмалку 50 луѓе се повредени. Во Порторико има тројца загинати од невремето, а на островите Сент Томас и Сент Џон има исто така три жртви. По еден загинат има на островите Ангила и Барбуда.

На островите Туркс и Каикос ураганот нанесе огромни штети ноќеска, но нема прецизни дојави бидејќи телекомуникациите се во целосен прекин.

Ураганот од петта категорија директно удри на островот Барбуда, на кој живеат 2.000 луѓе. Таму загина двегодишно дете додека со семејството се обидувало да избега од дома. Според премиерот на Антига и на Барбуда, на Барбуда повеќе нема ниту едно живеалиште што не е уништено.

Во меѓувреме, на жителите на Флорида им останува уште еден ден да размислуваат дали ќе се евакуираат или ќе останат во подрумите на своите куќи и во засолништа. Гувернерот на Флорида, Рик Скот, ги повика граѓаните да ги почитуваат предупредувањата. Скот уште вчера нареди затворање на сите јавни училишта, колеџи и универзитети.

 


На Ситонија се утврдуваат штетите од поплавите


Солун, 18 јули, 2017 - 11:21 (META) 

На Ситонија, вториот крак на грчкиот полуостров Халкидики, времето и денеска е студено и со силен ветер, иако на некои места има и сонце. Во некои места нема вода поради дефектите. Исто така, се стравува и од појава на зарази, поради тоа што во гратчето Торони, кое беше поплавено, канализацијата е решена со септички јами. Фотографиите од таму покажуваат заглавени автомобили, пропадната улица и поплавени куќи.

Подрачјето беше погодено од силно невреме вчера.

Во Неос Мармарас нема вода, а според некои туристи, се очекува дефектот да биде отстранет во текот на денот.

На првиот крак, Касандра, во Полихроно и во Ханиоти, од претпладнево е сончево, исто како во Неос Мармарас, но се стравува дека невремето Медуза со силни врнежи, грмежи и со силен ветер, кое вчера зафати голем дел од Грција, ќе продолжи и во наредните два дена.


Нов Зеланд се подготвува за втора голема бура


Велингтон, 13 април, 2017 - 9:59 (META) 

Жителите на Нов Зеланд се подготвуваат за удар на циклонот Кук, втора силна бура неделава.

Претставниците на цивилната заштита ги советуваат жителите на пониските предели да се евакуираат во повисоките. Летовите од аеродромот „Тауранг“ се откажани, а војската распореди 500 војници во тоа подрачје.

Метеоролозите предвидуваат дека ветровите во некои делови на земјата ќе дуваат со брзина од 150 километри на час. Се брановите да достигнат височина до пет метри.

Циклонот Деби во вторникот поплави неколку града во Нов Зеланд.


Бура ја одложи посетата на Меркел во Вашингтон


Берлин, 13 март, 2017 - 20:53 (META) 

Германската канцеларка Ангела Меркел ја одложи посетата на Вашингтон, каде што вчера требаше да се сретне со американскиот претседател Доналд Трамп.

Посетата на Меркел е одложена поради брзото напредување на зимската бура, која се очекува да го погоди североистокот на САД.

Меркел на новинарите им соопшти дека Трамп телефонски ја побарал за да ѝ објасни колку е сериозна ситуацијата со бурата.

– Патот е откажан – потврди Меркел.

Германската канцеларка порача дека нејзината посета на САД повторно ќе биде закажана што е можно поскоро.

Белата куќа, исто така, објави дека е одложен состанокот помеѓу Меркел и Трамп. Во соопштението се наведува дека состанокот на двајцата лидери е одложен до 17 март.

Меркел и Трамп беше предвидено да се сретнат утре, што ќе беше нивна прва средба по доаѓањето на Трамп на чело на САД.


Бурата Дорис ги приземји авионите во Британија


Лондон, 24 февруари, 2017 - 15:39 (META) 

Бурата Дорис предизвика сериозни проблеми на британските аеродроми, а на интернет се појавија снимки од неволјите со кои се соочуваат авионите при слетување.

Како што пишува „Раша тудеј“, ветровите на одредени места достигнуваат брзина и до 160 километри на час.

Едно лице загина како последица на невремето. Британските медиуми јавуваат дека жена од Вулверхемптон, во близина на Лондон, загинала откако за време на бурата цигла ѝ паднала на глава.

Во одредени места во Британија нема струја, а големи проблеми има и во сообраќајот.

Откажани се многу летови, а авионите поради силниот ветар се борат за да слетаат. Аеродромот во Манчестер ги откажа сите летови, а проблеми има и на лондонскиот аеродром „Хитроу“.


Во тропска бура во Кина, шест лица загинаа, осум се исчезнати


Пекинг, 11 јули, 2016 - 12:47 (META) 

При ударот на тајфунот Непартак, кој прерасна во тропска бура откако во саботата ја погоди континентална Кина, шест лица загинаа, а најмалку осум се водат како исчезнати.

Предизвиканата економска штета е проценета на 860 милиони јуани, односно 116 милиони евра, јавуваат кинеските медиуми.

За доаѓањето на Непартак, кој го зафати и Тајван, Кина се подготви евакуирајќи околу 230.000 луѓе, соопштија властите на источната провинција Фуџијан, која беше најмногу погодена.

Повеќе од 200.000 жители во десет кинески градови беа привремено евакуирани, додека повеќе од 1.900 куќи и станови беа целосно уништени.

За време на викендот стотина илјади жители на Фуџијан останале без електрична енергија, а сообраќајот таму бил значително нарушен при што пет аеродроми биле целосно затворени.