!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Османи: Целта не е планот „3-6-9“ да продолжи со „12“, туку со почеток на преговори со ЕУ


Скопје, 20 ноември, 2017 - 17:05 (META) 

Целта на планот „3-6-9“ не е по неговата имплементација, тој да продолжи во нов дел „12“, туку со одлука за почнување преговори, порачал вицепремиерот Бујар Османи на заедничката средба со министрите Оливер Спасовски, Биљен Салији и Дамјан Манчевски со еврокомесарот Јоханес Хан.

Како што соопштија од кабинетот на Османи, вицепремиерот го запознал Хан со деловите „6“ и „9“.

На средбата посебно се разговарало за областите за кои се констатирало дека има итна потреба од реформи, како што се безбедносните служби, правосудството, како и реформата на јавната администрација.


Османи, Спасовски, Саљији и Манчевски ќе му реферираат на Хан за „3-6-9“


Скопје, 19 ноември, 2017 - 16:10 (META) 

Вицепремиерот за европски прашања, Бујар Османи, заедно со вицепремиерот и министер за внатрешни работи, Оливер Спасовски, министерот за правда, Билен Саљији, како и со министерот за информатичко општество и администрација, Дамјан Манчевски, утре во Секретаријатот за европски прашања ќе има средба со еврокомесарот за проширување и за соседска политика, Јоханес Хан.

Од СЕП информираат дека Османи ќе ги презентира новите реформски пакети „6-9“, кои претставуваат дополнување на планот „3-6-9“.

Спасовски, Саљији и Манчевски ќе го информираат Хан за реформските приоритети во правосудството, реформата на безбедносните служби, како и за реформите во јавната администрација.


Османи побарал поддршка од Иванов за да се обезбеди консензус со опозицијата за името


Скопје, 17 ноември, 2017 - 15:17 (META) 

Вицепремиерот за европски прашања, Бујар Османи, денеска имал средба со претседателот, Ѓорге Иванов, кого го информирал за посетата во Брисел со министерот за надворешни работи, Никола Димитров, и за пораките што ги добиле од министрите за надворешни работи на земјите членки на Унијата.

Од Секретаријатот за европски прашања информираат дека Османи му реферирал на Иванов и за реформските пакети на Владата од делот „6-9“ и нагласил дека по имплементирањето на реформите и отстранување на отворените политички прашања, Владата очекува одлука за почеток на преговорите со ЕУ до средината на 2018 година.

– Имаме неповторлива шанса во 2018 година да направиме историски исчекор и да го затвориме прашањето за ЕУ и за НАТО. Потребно е да ги тргнеме настрана нашите лични, партиски, па дури и етнички приоритети, да оствариме консензус за реформите и да испорачаме резултат – истакна Османи.

Османи побарал од Иванов поддршка за реформскиот процес, но и поддршка за обезбедувањето консензус и вклученост на опозицијата, за законите за кои е тоа потребно, како и поддршка од двотретинско мнозинство во Собранието.


Османи и Коѕиас сè уште не можат да најдат термин за средба


Скопје, 17 ноември, 2017 - 11:53 (META) 

Вицепремиерот за европски прашања, Бујар Османи, и шефот на грчката дипломатија, Никос Коѕиас, ќе се сретнат, но засега не се знае кога ќе се одржи средбата.

Од Секретаријатот за европски прашања велат дека во моментов се работи на усогласувањето на распоредите.

– Средба ќе има, но засега не се знае кога. И на двете страни агендите се пребукирани. Кога ќе имаме точен датум, ќе ве информираме – изјавија од СЕП за „Мета“.

Оттаму не можеа да прецизираат дали средбата сепак ќе се одржи следната недела, како што најави Османи или, пак, ќе се одржи подоцна.

Османи најави дека следната недела ќе замине во Атина, каде ќе има средба со Коѕиас. Средбата била договорена за време на посетата во Брисел, а вицепремиерот на „Твитер“ објави фотографија од усогласувањето на агендите.

„Со Никос Коѕиас ја договараме нашата следна средба. Јас со мојот нотес, тој со својот паметен телефон. Тоа е уште еден доказ дека итно мора да напредуваме кон вредностите и стандардите на ЕУ“, напиша Османи.


Жешка пролет за Македонија најавија Хан и Могерини


Брисел, 14 ноември, 2017 - 13:37 (META) 

Министерот за надворешни работи Никола Димитров и вицепремиерот за европски прашања Бујар Османи денеска во Брисел со еврокомесарот за проширување Јоханес Хан и високата претставничка за надворешна политика на ЕУ, Федерика Могерини разговарале за потребата за интензивирање на реформскиот процес и негово преточување во конкретни резултати.

На средбите, како што соопштија од македонското МНР, биле испратени охрабрувачки пораки за европски перспективи на Македонија. Хан и Могерини ја реафирмирале поддршката на тековните реформски процеси и градењето мостови на добрососедство како силни аргументи за добивање безусловна препорака како клучен предуслов за посакуваната политичка одлука за отпочнување преговори со Унијата наредната пролет.

Како клучни моменти од суштинско значење за Македонија во претстојниот период биле истакнати:

  • Февруари: објавување на Стратегијата на претседателот на Европската комисија, Жан Клод Јункер за ЕУ перспективите на Западен Балкан,
  • Април: извештајот на ЕК за напредокот
  • Мај: самитот ЕУ – Западен Балкан во Софија за време на бугарското претседателство со Советот на ЕУ.

– Во Стратегијата на претседателот на ЕК Јункер, треба да има место за сите. Пресвртот во Република Македонија е најдобрата приказна од регионот за 2017 година. Во комбинација со охрабрувачкиот регионален наратив и поддршката од ЕУ можеме да направиме разлика и вистински исчекор во 2018 г. Сепак, на тој пат клучни ќе бидат резултатите од реформите – порача Димитров.

Во рамки на дводневната посета, Димитров оствари повеќе средби меѓу кои и со заменикот генерален директор на Генералниот директорат за внатрешни работи Сајмон Мордју, министерот за надворешни работи на Португалија, Аугусто Сантос Силва и шефот на британската дипломатија, Борис Џонсон.


Османи: Македонија не смее да си дозволи да го пропушти овој бран на европски оптимизам


Брисел, 14 ноември, 2017 - 10:13 (META) 

Не е возможно да има кредибилност на процесот на проширување, без Македонија да биде дел од Стратегијата на Европската Комисија за проширувањето на Унијата, изјавил вицепремиерот за европски прашања Бујар Османи на средбата со високата претставничка за надворешна и безбедносна политика, Федерика Могерини.

Според Османи, создадени се соодветни услови за 2018 година да биде историска година за Македонија за евроатланските амбиции. Тој потенцирал тоа дека е важно за Унијата да може полесно да се справи со новите предизвици, уште поважно за стабилноста на регионот, а најважно за Република Македонија, „која не смее да си дозволи да го пропушти овој моментум на европски оптимизам“.

Осамни и и шефот на македонската дипломатија Никола Димитров ја истакнале успешната реализација на планот „3-6-9“ чија имплементација, според нив, ќе ги одрази барањата на Унијата за реформи во Македонија.

Вицепремиерот за европски прашања на Могерини и ја пренел и намерата на Владата за „храбро и позитивно да се посвети на затворањето на сите отворени политички прашања, како што и спорот со Грција за употребата на уставното име на Република Македонија“.


Хан следната недела доаѓа во Македонија


Брисел, 13 ноември, 2017 - 20:20 (META) 

Еврокомесарот за проширување и соседска политика, Јоханес Хан по средбата со вицепремиерот за европски прашања, Бујар Османи, и шефот на македонската дипломатија, Никола Димитров, најави дека следната недела ќе престојува во Македонија.

„Одличен состанок со вицепремиерот, Бујар Османи и Министерот за надворешни работи, Никола Димитров. Уверен сум дека владата ќе ја искористи позитивната динамика и дека ќе видиме понатамошни реформски резултати до крајот на годината. Ова бара конструктивна соработка на сите политички сили, вклучувајќи ја и опозицијата. Со нетрпение ја очекувам мојата посета на Скопје следната недела, со политички состаноци и средби со граѓанското општество“, напиша Хан на „Твитер“.


Османи во 2018 година очекува одлука за почеток на преговори за членство во ЕУ


Брисел, 13 ноември, 2017 - 18:39 (META) 

Вицепремиерот за европски прашања, Бујар Османи и Министерот за надворешни работи, Никола Димитров денеска во Брисел имаа работна средба со Еврокомесарот за проширување и соседска политика Јоханес Хан, на која Османи истакнал дека 2018 година ќе биде клучна година за процесот на евроинтеграција на Македонија.

Османи потенцирал дека Владата има намера до крајот на оваа година да испорача напредок во имплементацијата на реформите што би резултирало со позитивен извештај и чиста препорака од Европската комисија.

– Соодветно на отстранувањето и на останатите, политички пречки за напредок во евроинтегративните процеси, како што се односите со соседите и внатрешните политички прашања, очекувам и напредок од страна на Европскиот совет во јуни/јули, следната година, за кога се надевам на одлука за почеток на преговори за полноправно членство во Европската Унија. За нас 2018 година претставува историска шанса кога сите коцки се наредени за да го направиме клучниот исчекор и конечно да го затвориме прашањето за НАТО и ЕУ – истакна Османи.

Во рамки на посетата Османи и Димитров утре треба да имаат средба и со Потпретседателката и Висока претставничка за надворешна и безбедносна политика Федерика Могерини.


Владата по изборите агресивно се посвети на реформите, реферирал Османи во Брисел


Брисел, 13 ноември, 2017 - 10:22 (META) 

Имплементацијата на делот „3“ и динамиката за реализација на остатокот од клучните реформи од планот „3-6-9“ биле темите на кои реферирале вицепремиерот за европски прашања, Бујар Османи и министерот за надворешни работи, Никола Димитров на денешниот работен појадок во Брисел со министрите за надворешни работи на земјите-членки на Европската Унија.

Османи ги претставил резултатите и постигнувањата од имплементацијата на делот „3“ од планот „3-6-9“ кој, како што истакнал, била успешно завршена со одржувањето на фер, слободни и кредибилни избори.

Остатокот од реформите како што потенцирал Османи се однесуваат и се фокусирани на судството, на разузнавачките служби, на јавната администрација во насока на нејзина деполитизација и професионализација, како и на останатите области како борбата против корупцијата, условите за работа на медиумите, реформите во полицијата,

– По изборите, Владата повторно агресивно се посвети на реформите и дооформување на планот „3-6-9“, кој, во себе ќе ги содржи сите препораки и забелешки од релевантните извештаи и од нашите меѓународни пријатели, затоа што наша цел е, по неговата имплементација да не следи нов дел 12, туку отпочнување преговори – изјавил Османи на средбата.

Османи и Димитров реферирале и за напредокот во затворањето и на политичките прашања, односно, како што стои во соопштението, тие информирале за текот на процесот околу законот за употреба на јазици, за кој се очекува набрзо да биде изгласан во Собранието, како и за напредокот во добрососедските односи, за што ги потенцирале Договорот со Бугарија и напредокот во односите со Грција кои се движат во нагорна линија.

Во рамките на посетата на Брисел, на агендата на Османи и Димитров се и средбите со Еврокомесарот за проширување и соседска политика Јоханес Хан и со Висока претставничка за надворешна и безбедносна политика на ЕУ, Фредерика Могерини.


Димитров и Османи во дводневна посета на Брисел – ќе имаат средби со Могерини и со Хан


Скопје, 12 ноември, 2017 - 18:10 (META) 

Министерот за надворешни работи, Никола Димитров и вицепремиерот за европски прашања, Бујар Османи од утре ќе престојува во дводневна работна посета на Брисел.

Двајцата министри ќе имаат средби со високата претставничка за надворешни работи и безбедносна политика на ЕУ, Федерика Могерини и со еврокомесарот за соседска политика и проширување, Јоханес Хан. Тема на разговорите ќе бидат новите можности на евроинтегративните процеси на Македонија, кредибилноста на процесот на проширување на Унијата, а но и регионалните предизвици во контекст на соработката на земјите од Западен Балкан.

Во рамките на посетата, Димитров и Османи исто така ќе учествуваат и на работниот појадок на министрите за надворешни работи на земјите – членки на ЕУ, организиран под покровителство на постојаните претставници на Шведска и Бугарија во ЕУ, каде заедно со шефот на македонската дипломатијаќе реферираат за напредокот на Македонија во спроведувањето на реформите за европска интеграција.
.