Османи се сретна со делегација од Европскиот совет за надворешни работи


Скопје, 18 септември, 2018 - 11:59 (META) 

Вицепремиерот задолжен за европски прашања, Бујар Османи денеска оствари средба со делегација од Европскиот совет за надворешни односи предводена од Норберт Ротген, претседател на Комитетот за надворешни работи на Бундестагот која е во посета на нашата земја.

Посетата на претставниците од Европскиот совет за надворешни односи, како што е наведено во соопштението од кабинетот на вицепремиерот Османи, е со цел поддршка на европската и евроатланската перспектива на Република Македонија, особено во насока на охрабрување на земјата, во овие одлучувачки моменти, за приклучување кон европскиот моментум во регионот.

– Претставува вистинска чест присуството на нашите меѓународни пријатели и добронамерници, чија поддршка во овој период е недвосмислена и претставува важен поттик и охрабрување за граѓаните, во нивната одлука да ја поддржат европската перспектива на земјава – истакна Османи.

Во таа насока вицепремиерот Османи информираше за активностите на Владата, но и на политичките партии околу претстојниот референдум, при што, изрази надеж и очекувања за неговата успешност.

– Граѓаните ја сфатија сериозноста на оваа одлука, а со приближување на денот на одлуката, поддршката за евроатлантската перспектива на земјава расте сѐ повеќе – истакна Османи, потенцирајќи дека очекува зрело однесување и од сите релевантни политички претставници во земјата, кои, како што истакна, очекува дека нема да ја пропуштат оваа неповторлива шанса за да ѝ помогнат на сопствената земја и на сопствените граѓани, во исполнување на нивната аспирација за членство во ЕУ и НАТО.


Автопатот Скопје – Блаце ќе почне да се гради догодина и ќе чини околу 100 милиони евра


Скопје, 10 септември, 2018 - 13:57 (META) 

Изградбата на автопатот Скопје – Блаце ќе стартува на пролет, следната година и ќе се одвива во две фази, информираше министерот за транспорт и врски Горан Сугарески при работната посета на Општина Арачиново.

Во првата фаза ќе се градат 1,6 километри, а потоа ќе се допроектира останатиот дел од десетина километри, по што ќе се работи паралелно.

Вицепремиерот за европски прашања Бујар Османи неодамна изјави дека изградбата на автопатот ќе чини 100 милиони евра, но ресорниот министер истакнува дека не сака да шпекулира и оти точната сума ќе се знае кога ќе се заврши проектирањето.

Првиот дел од автопатот ќе се финансира од Јавнотот претпријатие за државни патишта, а останатиот дел со помош на Европската банка за обнова и равзој. На трасата се превдидени четири тунели и девет мостови.


Владата формираше Kомитет за интеграција во НАТО со кој претседава Заев


Скопје, 5 септември, 2018 - 9:21 (META) 

Владата на 86. седница формираше Комитет за интеграција во НАТО, а со него претседава премиерот Зоран Заев, а негови заменици се вицепремиерите Радмила Шекеринска Јанковска, Бујар Османи и министерот за надворешни работи Никола Димитров.

Постојани членови на Комитетот се и министрите Оливер Спасовски, Рената Дескоска, Драган Тевдовски, Дамјан Манчевски, генерал – мајор Васко Ѓурчиновски, началник на генералштабот на АРМ, директорот на дирекција за безбедност на класифицирани информации Стојан Славески, националениот координатор за НАТО Стево Пендаровски, заменикот-министер за одбрана Беким Максути, заменикот-министер за внатрешни работи Агим Нухиу.

Од Влада соопштуваат дека во работата на Комитетот може да учествуваат и други членови на Владата и други релевантни чинители доколку се расправа за теми од нивната област.


Во Општина Чаир утре почнува владиниот карван „Твојот глас“


Скопје, 31 август, 2018 - 15:26 (META) 

Со Отворен ден во Општина Чаир утре од 13 до 18 часот, на кој граѓаните ќе може да дискутираат со вицепремиерот Бујар Османи, почнува владиниот карван разговори со граѓаните „Твојот глас“.

Во рамките на овие настани, граѓаните ќе може да разговараат со министри, заменик- министри, државни секретари и пратеници, и да предлагаат идеи и да кажуваат забелешки за работата на Владата.


Ахмети: Членството во ЕУ и НАТО ќе ни донесе напредок, стабилност и мир


Скопје, 13 август, 2018 - 16:02 (META) 

Секретаријатот за европски прашања денеска во Клубот на пратеници организираше панел дискусија „Патот до Брисел преку Охрид“ за одбележување на 17 години од потпишувањето на Охридскиот рамковен договор со кој се направи спој помеѓу Охрид како внатрешна интеграција и Брисел како надворешна интеграција на државата.

Премиерот Зоран Заев рече дека Охридскиот рамковен договор гарантира дека насилството нема да биде начин на остварување на нечии права, дека гарантира недискриминација и претставува темел на соживот помеѓу етничките заедници.

– Сега создадовме уште еден историски договор, 17 години по рамковниот. Договорот со Грција ни го гарантира правото да се определуваме како Македонци, нашето државјанство е македонско, нашиот јазик е и ќе остане македонски. Како што пред 17 години храброста на политичарите и на граѓаните ја извадија Македонија од кризата така и сега имаме шанса да ја осигуриме нашата европска иднина – рече Заев.

Лидерот на ДУИ, Али Ахмети, рече дека пред 17 години без ангажирањето на НАТО државата ќе платела висока цена, но не материјална, туку човечка.

– Тогаш имаше многу ангажирања во спротивен правец за договорот да не се реализира. Имаше струи и земји кои што не сакаа нашата земја да биде стабилна и да оди напред, но прогресивните сили победија. Сега, референдумот е момент кој што треба да не сплоти затоа што е во интерес на сите граѓани. Треба да не однесе во правец кон членството во ЕУ и НАТО затоа што таму го гледаме развојот, напредокот и иднината, а тоа ќе значи мир, стабилност и благосостојба за граѓаните, државата и целиот регион – рече Ахмети.

Охридскиот рамковен договор означи крај на еден конфликт за кој се уште не може да даде одговор на прашањата дали мораше да се случи, смета Дафина Јовановска – Стојановска, пратеник во Собранието на Република Македонија како претставник на опозициската партија ВМРО-ДПМНЕ.

-Таа 2001 година не потсетува на период на загинати, исчезнати и трауми. Ужасите на војната не му се потребни на едно вакво мало општество. Војната и резултатите од неа отворија рани кои што времето ќе ги залечи ако не додава некој сол на нив. Тажно е кога се отвораат прашањата кои што се болни за да се затскрие неспособноста да се решат реалните проблеми на граѓаните како сиромаштијата, корупцијата и криминалот – потенцираше Јовановска – Стојановска.

Доколку референдумот за спорот за името биде неуспешен тогаш тоа ќе значи крај на владеењето на правото, а најверојатно и на мирот рече поранешната заменичка на помошникот Скератар за одбрана на САД, задолжена за Европа и Азија во администрацијата на Обама, Евелин Фаркаш.

– Американскиот Стејт департмент ги поддржува мирот и стабилноста на Западен Балкан и борбата против Путин и путинзмот – вели Фаркаш.

Дека од големо значење е одлуката која што граѓаните ќе ја донесат на претстојниот референдум смета и сер Барни Вајт Спунер (Sir Barney White-Spunner, поранешен генерал на Британската армија и поранешниот командант на НАТО во Република Македонија, за време на потпишувањето на рамковниот договор.

– НАТО значи дека 29 членки ќе стојат зад вашиот грб и ќе ве штитат, ќе има обуки за војската, зголемување на БДП, странски инвестиции и многу вработувања – вели Спунер.

На одбележувањето на годишнината од Рамковниот договор не присуствуваа потписниците Бранко Црвенковски, поранешен лидер на СДСМ и Љубчо Георгиевски поранешен претседател на ВМРО-ДПМНЕ. Вицепремиерот за европски прашања рече дека тој лично ги поканил, но дека тие во овој период биле надвор од Скопје.

Забележително беше и отсуството на вицепремиерот за спроведување на Рамковниот договор, Хазби Лика, за кој Османи рече дека тој самиот треба да одговори зошто не дошол на одбележувањето.


Османи: Преговорите со ЕУ ќе бидат тежок, долготраен и скап процес


Скопје, 1 август, 2018 - 14:33 (META) 

Вицепремиерот за европски прашања Бујар Османи и посебниот советник на претседателот на Владата за евроатлантски интеграции, Бојан Маричиќ денеска на прес-конференција во владата ја презентираа преговарачката структура за пристапување на Македонија во Европската Унија за која рекоа дека е процес кој ќе биде тежок, долготраен, макотрпен, скап и каде што ќе има многу тешки политички одлуки.

Османи рече дека основната функција на процесот на преговори е нашата подготовка за членство и дека трансформацијата треба да резултира со создавање европско општество.

Според моделот кој бил одлучен на вчерашната седница на Влада, ќе има Координативно тело за процесот на пристапување, кое ќе ги утврдува преговарачките позиции на РМ во преговорите. Во него ќе учествуваат примерот, неговите заменици, шефот на дипломатијата, министрите за финансии, економија, правда и информатичко општество.

Османи, како политички преговарач ќе ја предводи државната делегација за пристапни преговори со ЕУ со улога да ги води преговорите и да обезбеди непречено одвивање на процесот по сите поглавја. Заменик на Османи ќе му биде шефот на дипломатијата Никола Димитров, во неа учествува главниот технички преговарач, шефот на мисијата на РМ во ЕУ и секретарот на преговарачката група.

Преговарачка група е третата структура. Таа е задолжена за техничкото ниво на преговорите со ЕК за сите поглавја, а ќе ја предводи главниот технички преговарач, Маричиќ.

Османи појасни дека СЕП ќе биде и Секретаријат на преговарачката група, а ќе биде назначен и секретар на преговарачката група.

-Државните и јавни институции ќе бидат локомотивата на овој процес, а Собранието, судството, опозицијата, граѓанското општество и сите други засегнати страни ќе мораат да бидат вклучени – рече Маричиќ.

Вицепремиерот Османи појасни дека до октомври, СЕП ќе направи мапирање на институциите, на групите на интереси како и конкретните имиња кои ќе дадат придонес на овој процес.

-Ова ќе биде комплексна операција и многу скапа. Се прават пресметки колку ќе чини, министерството за финансии треба да се прилагоди на потребите на овој процес. Владата ќе го финансира овој процес од буџетот бидејќи е една од најважните стратешки цели на државата, а финансиска помош ќе имаме и од ЕУ преку ИПА фондовите бидејќи буџетот не е доволен да ја покрие оваа интензивна агенда – појасни Османи.

Маричиќ вели дека во процесот ќе бидат вклучени повеќе стотици луѓе, а до крајот на процесот таа бројка може да достигне и до илјада луѓе.


Османи: Во септември се отвора Поглавјето 23, за правосудство и основни права


Скопје, 26 јули, 2018 - 16:17 (META) 

Утврден е календарот за скрининг процесот за подготовка на земјата за пристапни преговори со ЕУ. Во септември се отвора Поглавјето 23 за правосудство и основни права, изјави денеска вицепремиерот за евроинтеграции и главен преговарач на Македонија.

– Имаме прелиминарен договорен календар за скенирање на поглавјата. Во меѓувреме работиме на создавање на државната структура и верувам ќе бидеме подготвени веќе на следната седница на Влада да ја усвоиме структурата. Во септември ќе започне скринингот на поглавјето 23, потоа почнува поглавјето 24, па следат 5, 30,… Имаме целосен календар како тоа ќе се случува се до јуни 2019 година. Меѓутоа, паралелно ние работиме на воспоставување на структурата и подготовка на државата за овој важен процес – рече Османи, кој со норвешкиот амбасадор во земјата потпиша Меморандум за соработка чија цел е поддршка на процесот на евроинтеграциите.

Вицепремиерот за евроинтеграции воедно нагласи дека процесот на скринингот паралелно ќе се одвива со уште два процеса, а тоа се имплементацијата на Договорот од Преспа и итните реформски приоритети преточени во Планот 18.

Тој додаде дека очекува напорен период затоа што во одредени моменти Собранието ќе биде зафатено со уставните измени и со референдумот, а ќе треба да се испорачаат и резултати во реформите.

Според него, ќе треба сериозна координација на институциите за да може во претстојниот временски период од 12 месеци да се реализираат трите наведени важни паралелни процеси.


Османи-Рот: Свесни сме за комплексноста на процесот за членство во ЕУ, но и на придобивките


Скопје, 24 јули, 2018 - 12:58 (META) 

Вицепремиерот за економски прашања Бујар Османи, денеска во просториите на Секретаријатот за европски прашања имаше средба со германскиот државен министер за Европа, Михаел Рот.

Османи изразил голема благодарност за континуираната поддршка и посветеноста на Германија на процесот на пристапување во Унијата на земјите од Западен Балкан, рефлектирана и преку иницијативата „Берлински процес“, соопштија од СЕП.

Османи се осврнал на важноста на периодот во кој се наоѓа Македонија на евроинтегративниот пат, во контекст на неодамнешната одлуката на Европскиот Совет за временска рамката од 12 месеци, или јуни 2019 година, за почеток на преговорите за членство во Европската Унија.

-Свесни сме за комплексноста на процесот, кој вклучува огромен корпус на законодавство на Унијата кое треба да се транспонира во националното законодавство но тоа се придобивки кои водат кон суштинската трансформација на земјата во европско демократско општество со функционална пазарна економија, ефикасни институции и професионална администрација – рече Османи.


Бујар Османи денеска на средба со Михаел Рот


Скопје, 24 јули, 2018 - 9:48 (META) 

Државниот министер за Европа во Министерството за надворешни работи на Сојузна Република Германија, Михаел Рот, денеска ќе има средба со вицепремиерот задолжен за европски прашања, Бујар Османи.

На средбата ќе стане збор за подготовките за процесот на скрининг, актуелните политички случувања во контекст на подготовката на претстојниот референдум во однос на Договорот со Грција, како и останати теми поврзани со европските интеграции на Република Македонија, информираат од кабинетот на Османи.

Германскиот министер Рот вчера по средбата со шефот на македонската дипломатија Никола Димитров порача дека Македонија направи историски чекор е направен кон НАТО и ЕУ, и оти би било трагично ако тој пат се попречи.

– Без решение за спорот за името нема конкретна перспектива за ЕУ и за НАТО. Сега е направен исчекор на тој пат. Ова е голем успех, историски пробив и би било трагично ако кон натамошниот пат кон ЕУ биде попречен, ако не постои подготвеност во оваа земја во однос на прашањето на ЕУ, Уставот, изборното право. Треба да постои конструктивна соработка. Владата носи посебна одговорност за сето ова, но и опозицијата носи одговорност – порача државниот министер надлежен за Европа во Министерство за надворешни работи на Германија Михаел Рот.


ВМРО-ДПМНЕ: Според Заев, криминогениот Османи треба да ја европеизира државата


Скопје, 18 јули, 2018 - 9:49 (META) 

Зоран Заев назначува за шеф на преговарачкиот тим за преговори со ЕУ, човек кој пред три години го обвинуваше за криминал и му поднесуваше кривични пријави, велат од ВМРО-ДПМНЕ.

Во соопшетнието се додава дека „според стандардите на Заев, Бујар Османи кој до пред извесно време беше криминоген сега ќе треба да ја европеизира Македонија.“

„Зоран Заев е човек кој денес едно зборува, а утре друго. Република Македонија е жртва на неговата политика базирана на лаги, манипулации и тргување со националните интереси. Власта не води грижа ниту за државата, ниту за граѓаните. Зоран Заев и СДСМ ги кршат Уставот, законите и процедурите, за по секоја цена да го спроведат капитулантскиот договор. Менувањето на Изборниот законик со цел да се изигра и заобиколи законската обврска и зададената практика за гласање на ДИК со дво третинско мнозинство и со консултација на опозицијата е гушење на демократијата и претставува удар врз досега воспоставената пракса која гарантира изразување на волјата на граѓаните“, се додава во соопштението.