Димитров: Преговорите за Македонија следната година се тест за кредибилитетот на ЕУ


Брисел, 13 јули, 2018 - 16:35 (META) 

Министерот за надворешни работи, Никола Димитров, по 14. Совет за стабилизација и асоцијација кој се одржа во Брисел, порача дека една од причините зашто е важен почетокот на преговорите со Македонија е тоа што се и тест за кредибилитетот на Европската унија.

-Ние сме фанови на холандската стриктност и правичност, сакаме да го започнеме пристапниот процес токму затоа што е реформска алатка, сакаме да го направиме ова на начин што ќе го тестира кредибилитетот на сите земји членки. Станува се појасно дека ако Македонија не е една од земјите со пристапни преговори, тогаш има премногу преправање, а не доволно објективна проценка во нашиот регион – изјави Димитров на новинарско прашање како Владата може да се осигура дека идната година земји како Франција и Холандија нема повторно да го блокираат стартот на преговорите со Македонија во ЕУ.

Министерот оцени дека Македонија сака да се фокусира на домашните реформи и дека тоа што владата се обидува да го направи сега за една, две или три години е она што можеше да биде направено во последните петнаесет години.

– Ако порано беше автопат, сега патот е тесен и нагорен – рече Димитров.

Димитров заедно со државниот секретар за ЕУ, Бујар Османи, високата претставничка за надворешни работи, Федерика Могерини и еврокомесарот за проширување, Јоханес Хан, изразија огромно задоволство за последните случувања во Македонија, отворањето на патот за преговори во јуни 2019, поканата за членство во НАТО, постигнатиот договор со Грција како и со Бугарија.

Могерини, потпишувањето на Договорот со Грција го нарече „една од најголемите успешни приказни на нашето време без страв дека претерувам кога го кажувам ова”.  Хан потврди дека ќе биде во Македонија на 17 јули за стартот на техничкиот дел на процесот на скрининг со Владата.


Димитров и Османи на 14-от состанок на Советот за стабилизација и асоцијација


Брисел, 13 јули, 2018 - 9:30 (META) 

Вицепремиерот за европски прашања Бујар Османи и министерот за надворешни работи Никола Димитров во Брисел денеска ќе учествуваат на 14-от состанок на Советот за стабилизација и асоцијација на Македонија и ЕУ.

На состанокот се очекува да бидат разгледани теми за односите меѓу Македонија и ЕУ во рамки на Спогодбата за стабилизација и асоцијација, подготовките и предизвиците кои произлегуваат од временската рамка за почеток на преговорите, која неодамна ја усвои Советот на Европската Унија, како и останати теми поврзани со европските интеграции на Македонија.

Со годинешниот состанок ќе претседава високата претставничка на ЕУ и потпретседателката на Европската Комисија, Федерика Могерини, а во делегацијата на ЕУ е и еврокомесарот за  проширување Јоханес Хан. Копретседавач ќе биде македонскиот министер за надворешни работи Никола Димитров, а ќе учествува и вицепремиерот за европски прашања Бујар Османи.

Советот за стабилизација и асоцијација меѓу Република Македонија и ЕУ, како највисока форма на институционална соработка меѓу двете страни, заседава еднаш годишно.


Заврши самитот во Лондон, Британија ја удвојува финансиската поддршка за Македонија


Лондон, 11 јули, 2018 - 10:44 (META) 

Премиерот Зоран Заев и владината делегација го завршија учеството на Самитот ЕУ – Западен Балкан (Берлински процес), што се одржа во Лондон, на кој учествуваа лидерите на земјите од регионот, премиерката на земјата-домаќин Тереза Меј, германската канцеларка Ангела Меркел, високата претставничка за надворешни работи и безбедност на ЕУ, Федерика Могерини и еврокомесарот Јоханес Хан.

Заев на маргините на Самитот, кратко се сретнал со германската канцеларка Ангела Меркел која ја запознал со подготовките за претстојниот референдум за реализација на одредбите од договорот за решение на македонско-грчкиот спор и за стратегиско партнерство.

„Премиерката на Обединетото Кралство на Велика Британија и Северна Ирска, Тереза Меј, како исклучително успешна приказна меѓу последните два самита ЕУ-Западен Балкан го истакна историскиот договор меѓу Македонија и Грција при што им честиташе на премиерите Заев и Ципрас, потенцирајќи дека прогресот е возможен. Меј најави удвојување на финансиска поддршка за проекти за јакнење на јавната администрација во Македонија, како и помош за обука за дигитални вештини на еден милион деца од основните училишта од регионот, со цел да ја спознаат својата моќ во модерниот свет“, информираат од Владата и додаваат дека за идните проекти е предвидена и нова финансиска поддршка од фондовите на ЕУ.

За време на својата работна посета во Лондон, премиерот Заев имал интервју за британскиот телевизиски сервис Би-би-си, за познатата емисија „Хард ток“ (Hard Talk).


Османи се заблагодарил на Гарет за упорноста во решавањето на политичката криза


Скопје, 3 јули, 2018 - 10:41 (META) 

Вицепремиерот задолжен за европски прашања Бујар Османи се сретнал со амбасадорот на Обединетото Кралство во Македонија, Чарлс Гарет по повод завршувањето на неговиот мандат.

Османи се заблагодарил на Гарет за ангажманот, посветеноста и како што се вели во соопштението „упорноста да ни се помогне да ја пребродиме длабоката политичка и институционална криза, а потоа и да ја вратиме Македонија на евроатлантскиот пат“.

„За неполна недела, Лондон ќе биде домаќин на земјите од Западниот Балкан, кои заедно со претставниците на Европската унија, како дел од т.н. Берлински процес, ќе ја реафирмираат својата евроатлантска ориентација, ќе ги разгледаат предизвиците за унапредувањето на меѓусебната соработка, и ќе ги отворат можностите за побрза интеграција на Западниот Балкан во Европската Унија“, изјавил Османи.

Покрај стратешките цели на државата како што се ЕУ и НАТО интеграцијата, Османа посочил и на постигнатиот напредок во соработката во различни области: поддршка на реформите во македонската администрација, образованието, во правосудниот систем, демократијата и социјалната кохезија, реформи во безбедносниот систем итн.


Османи: Преговорите со ЕУ имплицираат длабока трансформација на општеството


Скопје, 21 јуни, 2018 - 11:30 (META) 

Вицепремиерот задолжен за европски прашања, Бујар Османи, денеска во просториите на Секретаријатот за европски прашања се сретна со вишиот заменик- генерален директор на одделот за Блискиот Исток и Европа во рамките на Јапонската агенција за меѓународна соработка, Чи Миуахара.

Од Кабинетот на вицепремиерот информираа дека Миуахара го информирала Османи за приоритетните области на соработка во рамките на новата јапонска иницијатива за соработка во земјите од Западен Балкан.

– Имаме успешна билатерална соработка веќе 20 години, која има покажано конкретни и одржливи резултати, преку која се имплементирани значајни проекти во Република Македонија и од која пред сè имаат корист граѓаните – истакнал Османи.

Посочил дека Јапонија се покажала како вистински пријател на Македонија, кога во 2016 година, за време на кризата со поплавите, обезбедила ургентна помош од над 100.000 евра за надминување на последиците од поплавите. Укажал и на значајноста на помошта која јапонската Влада ја обезбедила за земјава за справување со мигрантската криза.

Османи изразил уверување дека соработката меѓу двете земји ќе се прошири и продлабочи особено во рамките на новата јапонската иницијатива за соработка со земјите од Западен Балкан, и тоа во дефинираните приоритетните области на Иницијативата, како што намалување на ризикот од катастрофи, развој на приватниот сектор, животна средина итн. Во таа насока вицепремиерот информирал дека Спогодбата за техничка соработка меѓу владите на Јапонија и Република Македонија е во фаза на финална консултација и дека очекува наскоро таа да биде потпишана.

– Како држава се наоѓаме во исклучителен може да се рече историски период. За неколку дена очекуваме позитивна одлука од Брисел за почеток на преговорите за полноправно членство во Европската унија, по што општеството ќе влезе длабока трансформација, за што, секако добредојдена ни е помошта од сите наши пријатели, а Јапонија ја сметеме за еден од поважните, рекол Османи.


Османи – Тачи: Добивањето датум за преговори ќе биде пресвртница за цел Западен Балкан


Приштина, 19 јуни, 2018 - 11:31 (META) 

Затворивме исклучително комплексен и тежок спор меѓу Македонија и Грција, што претставува меѓудржавен дипломатски успех кој верувам ќе се наметне како начин на затворање на отворените прашања меѓу соседите во целиот регион, порачал вицепремиерот за европски прашања Бујар Османи на денешната средба со претседателот на Косово, Хашим Тачи.

На средбата се разговарало за напредокот во соработката меѓу двете земји, за европските перспективи на Западниот Балкан, како и очекувањата од претстојните самити на Европската Унија.

Според Османи, добивањето датум за преговори нема да биде само пресвртница за Македонија, туку и за европските перспективи на целиот Западен Балкан.
Во текот на работната посета на Косово, Османи ќе се сретне и со косовскиот вицепремиер Енвер Хоџај.


Османи утре во посета на Косово, средби со Тачи и Хоџај


Приштина, 18 јуни, 2018 - 16:12 (META) 

Вицепремиерот за европски прашања, Бујар Османи, утре ќе престојува во еднодневна работна посета на Република Косово, информираат од Секретаријатот за европски прашања.

Осамни ќе има средби со претседателот на Косовo, Хашим Тачи, како и со потпретседателот на Владата на Косовo, Енвер Хоџај.

На средбите ќе бидат отворени прашањата за напредокот во меѓусебната соработка меѓу Република Македонија и Република Косово, очекувањата од претстојните Самити на Европската Унија, и воопшто, европските перспективи на земјите од Западниот Балкан.


Османи го претстави планот „18“ пред претставници на ВМРО-ДПМНЕ


Скопје, 8 јуни, 2018 - 16:42 (META) 

Вицепремиерот задолжен за европски прашања, Бујар Османи, заедно со претставниците на Секретаријатот за европски прашања, го презентираше планот „18“ пред претставниците на опозициската партија ВМРО-ДПМНЕ

Тој на средбата им се заблагодарил за конструктивната улога која ја имала опозицијата во имплементацијата на реформите од планот „3-6-9“.

-Имам целосно разбирање за потребата на опозицијата да гради алтернативни политики од оние на Власта, но, апелирам, за суштинските реформи, за евроатланската перспектива но и за стратешките интереси на земјава, да изградиме политички и севкупно, општествен консензус, кој ќе претставува катализатор на напредокот на земјата – изјави Османи.

Вицепремиерот им ги преставил клучните области од новиот реформски план како и досегашните предлог мерки на планот, како основа на која во претстојниот период Секретаријатот за Европски прашања ги собира, систематизира и обработува сите предлози кои доаѓаат од Делегацијата на Европската Унија, администрацијата на ЕУ во Брисел, домашниот граѓански сектор, експертската јавност, и секако, од опозицијата.

-Вашите предлози, коментари и евентуални забелешки, имаа посебен третман во дефинирањето на целовитоста на планот „18“, имајќи ја предвид интенцијата на Владата и владејачкото мнозинство, за изградба на политички консензус, и тоа не само за законите кои упатуваат на тоа поради потребата од двотретинско мнозинство, туку како клучна политичка придобивка која упатува на сериозноста на државата – изјави Османи

Тој истакнал дека реформите од планот „18“ имаат и суштинско значење во изградбата на поквалитетен живот за сите граѓани на оваа земја, подобри услови за водење бизнис, поголем економски напредок, повеќе работни места, повеќе правда и создавање на подобро општество.


Османи: Ова се последните клучни и најкритични метри на 25-годишниот маратон


Скопје, 8 јуни, 2018 - 10:54 (META) 

Наредните часови ќе бидат клучни за одлучување за исходот од преговорите помеѓу Македонија и Грција. Сметам дека е прерано да се каже кој ќе биде исходот, но сметам дека ова се последните метри на еден 25-годишен маратон, а обично последните метри се најкритични, изјави вицепремиерот задолжен за економски прашања, Бујар Османи на денешната прес-конференција.

Тој вели дека и од двете страни има волја за затворање на ова прашање и дека од страна на двете влади има активен ангажман.

– Мое чувство е дека повеќе разликите се во интерпретација на напишаното отколку во генералните принципи. Сите меѓународни пријатели не охрабруваат, ни помагаат и се обидуваат да го олеснат спорот. Ова е идеална прилика да се затвори прашањето, со што ќе ни се отвори процесот за НАТО и ЕУ. Барам разбирање да бидеме внимателни, во критичните последни чекори многу е лесно да се изместите заради преоптовареност на преговорите и емоциите. Така што треба да бидеме внимателни и да видиме каков ќе биде исходот во наредните часови и денови – рече Османи.


Османи – Могерини: Наредните часови можат да бидат клучни за исходот од преговорите


Брисел, 7 јуни, 2018 - 13:05 (META) 

Вицепремиерот задолжен за европски прашања, Бујар Османи заедно со министерот за економија Крешник Бектеши, во рамките на дводневната посета работна посета на Брисел, остварија средба со високата претставничка на Европската Унија за надворешни работи и безбедносна политика и потпретседателката на Европската комисија, Федерика Могерини.

На средбата, Османи ја информирал Могерини за новиот реформски план „18“, со кој Македонија останува посветена на реформскиот процес и по добивањето на препораката и позитивниот извештај на Европската комисија.

„Планот „3-6-9“ создаде солидна основа и подготовка за имплементација на суштинските и долгорочните реформи во насока на приближување на нашето општество со европското, при што, „планот 18“ претставува логично продолжение на реформската агенда на Владата за системска координација и следење на имплементацијата на овие реформи, се до почетокот на преговорите“, истакна Османи.

На средбата, Османи информирал и за остварениот напредокот во односите меѓу Македонија и Грција.

„Имаме сериозен напредок и како никогаш порано двете земји не биле поблиску до решение. Наредните часови можат да бидат клучни за исходот од преговорите и се надевам дека евентуално позитивниот исход ќе создаде атмосфера за продлабочување на односите меѓу Македонија и Грција, како и услови за забрзано продлабочување на евроатланската перспектива на Македонија“, додаде Османи.