Повторно протести синоќа пред унгарската државна телевизија


Будимпешта, 18 декември, 2018 - 12:13 (META) 

Протестите против режимот на Виктор Орбан продолжија и вчера во Будимпешта, со околу 2.000 демонстранти што протестираа пред објектот на унгарската државна телевизија. Исто како и претходната ноќ, се бараше независност на јавниот телевизиски сервис и судството.

Дел од демонстрантите, следени од бројни полициски сили кои кои се соочија со силно полициско обезбедување, носеа транспаренти со пораки дека јавната телевизија станала пропагандно средство на власта.

-Дојдов најмногу за одбрана на независноста на судството. Се надевам дека ќе видиме уште многу протести со повеќе илјади луѓе и јас можам да помогнам само преку моето доаѓање овде“, изјавил за „Еуроњуз“ Габор Хачи, 35-годишен правник, кој на демонстрациите излегол поради новиот закон со кој административните судови треба да одговараат пред извршната власт.

На синоќешните демонстрации им претходеше инцидент вчера претпладнето во државната телевизија, откако обезбедувањето со груба примена на сила исфрли двајца од десетте пратеници кои сакаа на телевизија да ги прочитаат барањата.

Тие заедно со уште осум колеги преноќија во телевизијата по големите протести во неделата вечерта, кога полицијата употреби и солзавец.


Полицијата со солзавец против демонтрантите, а пратеници избркани од унгарската телевизија


Будимпешта, 17 декември, 2018 - 12:04 (META) 

Двајцата независни пратеници во унгарскиот парламент, претпладнево од страна на обезбедувањето беа избркани од објектот на унгарската државна телевизија, каде сакаа да прочитаат петиција.

Инцидентот се случи неколку часа по синоќешните големи протести против режимот на унгарскиот премиер Виктор Орбан, на кои во Будимпешта полицијата фрлаше солзавец.

Двајцата пратеници со опозициска ориентација беа дел од групата од десет пратеници кои ноќта ја минаа во унгарската државна телевизија.  Во петицијата, инаку се наведуваат барањата од вчерашните протести, кои се одржаа и во главниот град Будимпешта, но и во голем број градови во Унгарија. Се бараше повлекување на новиот закон за работата, кој е наречен „робовски закон“, но се повторија и досегашните барања за независност на јавните медиуми и за приклучување на унгарската канцеларија на обвинителството на ЕУ.

Вчера на најголемиот протест, во Будимпешта, под мотото „Среќен Божик, господине премиер!“ околу 10.000 демонстранти учествуваа на четвртиот и најмасовниот протест во последната седмица, кои се одржуваат поради сè поавторитарното владеење на Орбан. Протестната прошетка се одвиваше мирно сè додека полицијата не употреби солзавец пред објектот на унгарската државна телевизија. Потоа групата од 10 пратеници влезе во телевизијата, а надвор останаа другите демонстранти.


Британски новинар го фотографираше Груевски на прошетка во Будимпешта


Будимпешта, 12 декември, 2018 - 9:54 (META) 

Даниел Нолан, дописник на британски „Гардијан“ од Будимпешта вчера на својот Твитер-профил објави фотографија од избеганиот поранешен македонски премиер Никола Груевски во Будимпешта.

Retrock butik vo Budimpeshta za fotografijata so Gruevski

Груевски бил фотографиран од Нолан во центарот на Будимпешта, како чекори кон штанд за автобуски туристички тури „Хоп Он – Хоп Оф“. Фотографијата е направена пред бутикот „Ретрок“ близу метро станицата „Деак Ференц“ и паркот „Ержебет“ во Пешта, односно ноќниот клуб „Аквариум“.

Фотографијата е објавена вчера, на денот кога се наврши еден месец од бегството на Груевски од Македонија. Тој доби политички азил во Унгарија.


Студенти протестираат неколку дена пред истекот на рокот за соросовиот Универзитет да си замине од Унгарија


Будимпешта, 27 ноември, 2018 - 9:40 (META) 

Оваа седмица е последниот рок по кој ќе се види дали Централно-европскиот универзитет (ЦЕУ), приватниот универзитет основан во 1991 од страна на финансиерот и филантроп Џорџ Сорос, ќе остане во Унгарија, пишува „Глобал војсес“. Оваа институција, со седиште во Будимпешта од 1993, е во правна неизвесност уште од април 2017, кога унгарската влада ја усвои контроверзната измена на постоечките закони за високо образование во земјата.

Студентите се собраа да протестираат во саботата на 24 ноември и го окупираа главниот плоштад пред зградата на Парламентот во Будимпешта за да ја одбранат академската слобода во земјата.

Кон крајот на октомври, претседателот и ректор на ЦЕУ Мајкл Игнатиеф, изјави дека институцијата нема да ја чека владата до 1 јануари 2019 да го потпише документот со кој ќе се обезбеди местото на универзитетот како унгарско-американска академска институција во Унгарија. Наместо тоа, Централно-европскиот универзитет даде рок на унгарската влада до 1 декември 2018 и започна со воспоставување кампус во главниот град на соседна Австрија, Виена, каде што студентите од прва година би се префрлиле во академската 2019 година.

Универзитетот се подготвува да се исели во друга држава. „Универзитетот“ во случајов ги опфаќа сите засегнати од преселбата, вклучително и студентите, студентите на докторски студии, истражувачите, професорите и вработените од службата, од кои дел работат во ЦЕУ во Будимпешта повеќе од една деценија.

Разговорите кои се водат изминатиов период во унгарските академски кругови се во знакот на темата за академската слобода. Корвиновиот универзитет во Будимпешта се соочува со реформа со која би се организирале активностите на универзитетот според структура за правење профит, со што драстично би се намалил бројот на студенти стипендирани од државата. Истовремено, Катедрата за општествени науки при универзитетот ЕЛТЕ започна со штрајк и ја разгоре дискусијата за родови студии како резултат на затворањето на програмата. Покрај ова, унгарската Академија на науките се бори против намалувањата во буџетот кои се најавени од страна на унгарската влада.

Голем број студенти, истражувачи, професори и нивни поддржувачи излегоа на протест во саботата за да го свртат вниманието кон борбата за академската слобода во Унгарија. Според некои медиуми на протестот излегле илјадници луѓе а говорници биле претставници од ЕЛТЕ, Корвиновиот универзитет, ЦЕУ и унгарската Академија на Науките.

Говорниците го адресираа прашањето за академската слобода и законот од април 2017 кој го присилува ЦЕУ на егзил и повикаа на солидарност со работниците поради минатонеделната најава за нов закон кој ги изложува работните на експлоатација преку прекувремено работење. Се чини дека на списокот на проблематични регулативи во Унгарија му нема крај, а говорниците, од кои голем дел се општествени научници, ја критикуваа измената во Уставот со која се криминализира бездомништвото во земјата.

Говорниците и протестирачите ја искористија оваа можност да го искритикуваат унгарскиот премиер Виктор Орбан заради доделувањето азил на поранешниот македонски премиер Никола Груевски, бегалец од законот кој беше осуден во неговата земја на двегодишна казна затвор поради корупција.

Под мотото „Слободен универзитет“, студентското движење „Студентите за ЦЕУ“ (Students4CEU) го окупираше плоштадот Кошут пред Парламентот при крајот на саботниот протест. Студентите ја слават академската слобода со отворени предавања и проекции преку седмицата.

Окупацијата на плоштадот Кошут ќе заврши на 1 декември. Тогаш е и крајот на можноста за Централно-европскиот универзитет целосно да остане во Будимпешта.


Белград без официјална реакција за „случајот Груевски“


Белград, 16 ноември, 2018 - 11:43 (META) 

Поголемиот дел медиуми во Србија денеска ги пренесуваат информациите од министерствата за внатрешни работи на Албанија и Црна Гора дека поранешниот македонски премиер Никола Груевски избегал од Македонија преку Албанија и Црна Гора во автомобил на амбасадата на Унгарија во Тирана, и тоа два дена пред за него да биде распишана потерница.

Но српската власт сè уште не се огласила за „Случајот Груевски“.

Министерството за внатрешни работи на Србија за регионалната телевизија „Н1“ претходно објасни дека Груевски нема српски пасош, ниту државјанство. Но, одговор на прашањето дали Груевски на пат кон Унгарија поминал и на територијата на Србија уште не стаса.

Провладиниот српски весник „Политика“ вчера на насловната страница објави текст потпишан од редакцијата кој, без да наведува извори, изнесе повеќе тврдења за бегството на Груевски, меѓу кои и неточното, дека Груевски од Тирана одлетал за Будимпешта. Но албанската полиција вчера соопшти дека Груевски во неделата, два дена пред за него да биде распишана меѓународна потерница, ја напуштил Албанија на граничниот премин „Хани и Хоти“ кон Црна Гора.


Груевски: Во Будимпешта сум, побарав политички азил


Будимпешта, 13 ноември, 2018 - 13:36 (META) 

Поранешниот премиер и екс лидер на ВМРО-ДПМНЕ Никола Груевски по кого е распишана потерница, се наоѓа во Будимпешта и таму ќе бара политички азил.

Ова самиот го соопшти на социјалната мрежа „Фејсбук“.

„Во последните неколку денови примив безброј закани по мојот живот. Јас сум во Будимпешта сега, и побарав политички азил од унгарските власти. Секогаш ќе останам верен на каузата на Македонија. Никогаш нема да отстапам“, вели Груевски на статус на „Фејсбук“.

Груевски е правосилно осуден на двегодишна затворска казна во случајот „Тенк“ за незаконска набавка на луксузен „мерцедес“ кој против него го водеше Специјалното јавно обвинителство.

Откако неколку дена не можеше да го најде и да му врачи решение сам да се упати во затвор, Основниот суд вчера побара од МВР да издаде потерница по Груевски.


За 50 милиони евра биле купени 15 амбасади и конзулати на лоши локации


Скопје, 9 мај, 2018 - 15:30 (META) 

Државниот секретар во Министерството за надворешни работи, Виктор Димовски на денешната прес-конференција обелодени дека во текот на владеењето на ВМРО-ДПМНЕ, биле направени огромни злоупотреби при купување и реконструкции на објекти за амбасади, конзулати и резиденци во Виена, Прага, Будимпешта, Љубљана и Истанбул.

Тоа е утврдено со  увид во документацијата за купување на објектите за дипломатско-конзуларни претставништва, како и директен увид на самите објекти, кој е вршен во изминатите неколку месеци.

Владата во 2007 година одобрила 40 милиони евра за купување 15 дипломатски-конзуларни претставништа, а со мини-ребаланс на буџетот во декември истата година уште 10 милиони евра.

– Сите купени објекти се наоѓаат на локации во кои нема амбасади. Исклучок е Прага, каде прв сосед ни е амбасадата на Северна Кореја. Објектите се далеку од останатите ДКП-а и од центарот на градот, односно во обични резиденцијални квартови. Тоа укажува и на можноста дека реалната цена во времето кога биле купени била пониска од таа што е платена – рече Димовски.

Тој рече дека биле фаворизирани несоодветни и поскапи објекти, иако имало доставени понуди и за поквалитетни објекти, со поголема квадратура и на репрезентативни места.  Правени се непотребни реконструкции и адаптации на објектите, и тоа неквалитетни, а скапо платени материјали, а некои се вршени и по повеќепати, па односот на вкупно потрошените пари во однос на цената на купување во некои случаи е и 1 спрема 3, рече државниот секретар во МНР.

Димовски како пример го посочи објектот во Виена за кој се платени 3,5 милиони евра со агенциска провизија од 105 илјади евра и реконструкција која чинела 1,4 милиони евра, а продавачот една година претходно го платил истиот објект речиси два и пол пати помалку.

– Има индиции дека продавачот на објектот само пред една година платил 1,46 милиони евра. Утврдено и е дека фирмата била формирана со единствена цел да го изврши тоа продавање на објектот. Една адвокатска канцеларија била застапник и на продавачот и на купувачот – Република Македонија  кажа Димовски.

Втор пример е објектот во Будимпешта кој е во опасност да се урне бидејќи била направена неквалитетна доградба и се создало свлечиште.

– Македонија од 2010 година за резиденција и за амбасада во Будимпешта до денес плаќа закупнина и покрај купен објект од 1,07 милиони евра, рече државниот секретар во МНР.

Во Прага, пак, купениот објект бил дивоградба, а надлежните власти донеле одлука за негово уривање затоа што бил изграден спротивно на чешките закони.

– Постојат индиции дека кабинетот на поранешниот претседател на Владата и поранешниот генерален секретар на Владата постојано и во детали биле информирани за сите постапки. Врз основа на сето ова има индиции дека се направени сериозни нарушувања на постапките и процедурите за купување на објектите поради што се исплатени огромни суми со што е нанаесена директна штета од поголем обем на буџетот на РМ. Сите овие наоди ќе бидат доставени до надлежните институции за натамошно постапување – рече Димовски, додавајќи оти се уште не е точно утврдено колку точно средства се потрошени за купување на овие објекти.


Ги зајакнуваме односите со Кина за идна експанзија на економската соработка, рече Заев


Будимпешта, 27 ноември, 2017 - 13:52 (META) 

Премиерот Зоран Заев на Самитот на шефови на влади за соработка на земјите од Централна и од Источна Европа со Народна Република Кина, ги претстави позициите на Македонија за подобрување на бизнис-климата во земјата и за унапредување на животниот стандард на граѓаните.

– Владата на Република Македонија ќе продолжи со активностите кои имаат цел значително да ја подобрат бизнис-климата, преку воспоставување подобра институционална инфраструктура за привлекување инвестиции, што ќе повлече забрзување на економскиот пораст, развој на приватниот сектор и отворање на нови работни места – посочи премиерот Заев во своето обраќање на пленарната сесија на економскиот, трговскиот и финансиски форум на овој самит.

Заев во своето излагање оддаде признание на Варшавската иницијатива која, како што рече, овозможила земјите од Централна и од Источна Европа да прераснат во мост што ги поврзува земјите од Западна Европа, Централна Азија и Кина. Тој истакнал дека овој потенцијал е од извонредно значење за регионот и дека земјите во него треба да го искористат овој момент за реални и конкретни проекти кои ќе донесат економски пораст.

– Би сакале да бидеме вклучени во повеќе настани за промоција на нашата трговија во рамки на процесот за соработка 16+1. Би сакал да апелирам кон кинеските институции да продолжат уште повеќе да го промовираат принципот на трговски олеснувања, што треба да резултира со олеснет пристап на нашите производи до кинеските пазари и учество на саеми и други бизнис-активности – порача Заев.

Премиерот Заев ги информираше присутните на форумот дека Република Македонија ќе биде домаќин на неколку важни настани поврзани со процесот на соработка со Народна Република Кина, како што е „Кина SEEC Координативен центар за културна соработка“.

– Координативниот центар за култура ќе биде основан во јануари 2018 година во Министерството за култура на Република Македонија. Би сакал да ве информирам дека нашата земја ќе биде домаќин и на петтиот Кинески симпозиум за соработка на земјите од Централна и од Источна Европа во 2018 година и на четвртиот состанок на министри за културна соработка во 2019 година – рече Заев, додавајќи дека соработката се одвива во области како што се здравството и медицината.


Протести во Будимпешта – повеќе од илјада демонстранти се собраа близу руската амбасада


Будимпешта, 25 април, 2017 - 11:14 (META) 

Повеќе од илјада луѓе се собраа вчера близу амбасадата на Русија во Будимпешта, продолжувајќи ги протестите против, како што велат, засиленото руско влијание врз Унгарија во последните неколку години и против авторитарната политика на премиерот Виктор Орбан, известуваат унгарски медиуми.

Намерата на демонстрантите беше протестот да се одржи пред руската амбасада, но полицијата го забрани тоа.

Писателот и филозоф Андраш Лањи, говорејќи на протестот, рече дека владата постепено се движи кон диктатура, во која противниците се затвораат или се убиваат, наведувајќи ги како примери Русија, Азербејџан и Иран.

– 21 век стана опасен период, во кој се зголемува растојанието помеѓу Истокот и Западот – рече Лањи.

Хенриета Николета Антал, активистка од иницијативата што се противи на преобразувањето на градскиот парк, ги повика демонстрантите да се приближуваат кон западните вредности и животен стил.

На протестот се извикуваа пароли „Европа! Европа!“ и „Да ја запреме Москва“, како одговор на владината кампања „Да го запреме Брисел“.

Унгарската влада во последните години е остар критичар на бриселските политики, кои ги нарекува реформи со кои се сака да се одземе сувереноста на членките на ЕУ.


Попоски на конференција за предизвиците на НАТО во Будимпешта


Скопје, 25 февруари, 2016 - 9:56 (META) 

Министерот за надворешни работи на Република Македонија, Никола Попоски, денеска ќе учествува на безбедносна конференција посветена на задачите и на предизвиците на НАТО во пресрет на самитот на Алијансата во Варшава, што ќе се одржи во Будимпешта, Република Унгарија.

Во фокусот на конференцијата ќе бидат актуелните безбедносни предизвици со кои се соочува Евроатлантскиот Регион во пресрет на Самитот на НАТО во Варшава и промовирање на интензивни дискусии за наоѓање на решенија за состојбите за кои сѐ уште не постои обединета позиција или недоволна соработка.

Во рамки на конференцијата, на панел-дискусија посветена на европската безбедносна перспектива пред самитот на НАТО во Полска, министерот Попоски ќе настапи заедно со Петер Сијарто, министер за надворешни работи и за трговија на Република Унгарија, Мирослав Лајчак, заменик премиер и министер за надворешни и за европски работи на Словачката Република, и Тед Вајтсајд, заменик генерален секретар за јавна дипломатија на НАТО.