Панчевски: Со претресот на СЈО настапи целосен мрак за правдата во Македонија


Скопје, 9 октомври, 2017 - 16:25 (META) 

Судијата Владимир Панчевски денеска обвини дека во четвртокот минатата недела настапил „целосен мрак за правдата во Македонија“ со, како што вели, „незаконитиот и брутален претрес“ што врз него го извршиле Специјалното јавно обвинителство и истражители на Министерството за внатрешни работи.

Панчевски, во интервју за „Алсат-М“, тврди дека не бил извршен претрес во простории во Кривичниот суд во Скопје, туку станувало збор за личен претрес врз него. Тој ја оспорува и наредбата за претрес, издадена од гевгелискиот суд, и вели дека стварната надлежност за постапување против него ја има Основниот суд Скопје 1, а доколку имало потреба од „конспиративност“, постапката во ваков случај ја одредува Апелацискиот суд Скопје.

– Од канцеларијата на в.д. претседателот на судот, бев спроведен во канцеларијата каде ја извршувам судската функција, без да ми се објасни зошто ми е ограничена слободата и сум спроведен на друго место да ми се врши претрес. Насилно ми одзедоа мобилни телефони. Женско лице, инспектор, односно припадник на истражителите на МВР, ми ги одзеде (телефоните) од џебовите на панталоните иако според сите стандарди, меѓународни, домашни и секакви, женско лице не врши претрес на машко лице, додека двајца инспектори ми ги држеа раширени рацете – вели Панчевски, кој во интервјуто за себе зборува во трето лице.

Тој тврди дека за време на претресот во судот имало вооружени лица и полицајци насекаде.

– Незаконитата процедура на крај заврши со кражба на клуч, што се гледа од снимката од видеонадзорот што го доставив до медиумите. Снимката е таа, може да ме распнат, да ме судат и да ме осудат. Панчевски е со чиста совест за сè досега, како претседател на Основниот суд Скопје 1 и како судија во тој суд. Сум постапувал секогаш чесно, во согласност со закон и никако поинаку – вели судијата.

Прашан дали ги предупредил обвинителите на СЈО дека има видеонадзор и околу законитоста на снимањето, Панчевски вели дека тој не бил должен да предупредува за тоа дали има видеонадзор и дека тој бил поставен поради здравствената состојба на неговата мајка, која починала пред 20 дена.

– Го прегледав видеонадзорот бидејќи кога требаше да го заклучам станот, по завршувањето на претресот, го немаше клучот. Знаејќи го начинот на работење на СЈО како судија во Основниот суд Скопје 1 и сите незаконитости за кои сум кажувал претходно во мои изјави, што писмени што усни до медиумите и до јавноста, се посомневав дека можеби некој го зел. Од кои причини го зеле клучот не знам. Генерално, морам да кажам дека се плашам за личниот живот повеќе, со овој мрак на правдата. Не е битно дали ќе водат постапки за Панчевски, Панчевски е веќе осуден и лежи казна затвор во нечија глава. Тие ќе ги реализираат своите намери и слободно можат да ги реализираат, јас сум со чиста совест и не се плашам – вели Панчевски.

Тој тврди дека никогаш не местел предмети, а шпекулациите за постоење на двоен АКМИС, преку кој тој ги следел предметите од дома, ги оценува како „параноидни халуцинации за некакво сценарио во нечија глава“.


Крв, лицемерие, навреди и песимизам: Каде се изгуби духот од Пржино?


Скопје, 22 јули, 2015 - 10:12 (META) 

Бруталниот и недипломатски начин на разговори и преговори меѓу власта и опозицијата кој почна во резиденцијата на ЕУ во Пржино, очигледно сè уште не е завршен.

Тогаш лидерите се согласија зад себе да ги остават партиските интереси и да размислуваат за доброто на грѓаните и на државата, но само по една недела го заборавија тоа, па партиските секири кои  биле само засолнети, пак се размафтаа: „Груевски сака да се спаси со пролевање крв“, „На Груевски очигледно му e поважно да се сонча во Тел Авив“, „Врв на лицемерието: Радмила Шекеринска денес излезе да критикува“, „Во Владата седи тепач“, „Власта е нарачател на насилства“, „СДСМ и платениците треба да бидат свесни дека ќе се носат со последиците“, „Треба да се применат методи и техники кои се реализираат во сите слични случаи и примери застапени во западните демократски земји“…

Иако еврокомесарот Јоханес Хан во понеделникот рече дека нема време за грубење и за одмор, барем не за институциите и дека треба да се почитуваат сите договорени рокови за да се подготват изборите, партиите лиферуваа десетина соопштенија со нови и со стари навреди.

Во понеделникот требаше да се одржи првата средба на работната група и да почне спроведување на Договорот од Пржино.

Како што на прес-конференција објасни заменик-претседателката на СДСМ, Радмила Шекеринска, од ВМРО-ДПМНЕ средбата ја откажале половина час пред почетокот. Таа изјави дека за премиерот Груевски, очигледно поважно е да се сонча во Тел Авив, отколку да се реализираат обврските што сите ги презеле со потпишувањето на Договорот на 2 јуни.

На ова, Шекеринска доби реакција од владејачката партија, во која тие ја нарекуваат лицемeрна. „Радмила Шекеринска која не дошла на досегашните состаноци, денеска излезе да ги критикува другите. Врв на лицемерието.“

Употребата на „дипломатскиот јазик“ продолжи.

Петре Шилегов на прес-конференција ја праша власта на Никола Груевски дали намерата им е преку пролевање крв да се спаси од сопствената одговорност, мислејќи на новинарите кои се критички настроени кон власта, а за кои СДСМ смета дека се претепани, па повтори дека „тоа што во Владата сè уште седи тепачот на сопственикот на порталот „Мактел“, лично вицепремиерот Владимир Пешевски, без против него да се води каква било постапка, упатува на скандалозен факт дека нарачател на насилствата е самата власт“.

Од ВМРО-ДПМНЕ му одговорија дека СДСМ сноси политичка одговорност за сите овие случаи бидејќи тие се оние што постојано се закануваат со насилство и со пресметки, шират омраза, лаги и конструкции и се партија која го промовираше насилството. „Токму раководството на СДСМ и нивните финансиери од Сорос со своето неодговорно и непрофесионално однесување придонесуваат кон вкупната атмосфера во државата. Тие во континуитет лиферуваа лаги, манипулации, измами и шпекулации во јавниот простор и тоа не само против политичари, туку и против стотици други уметници, професори, професионалци во своите области, па дури и обични граѓани. Тие свесно предизвикуваат состојба на омраза и на насилство“, порачаа од владејачката партија. 

На ова СДСМ имаше уште една реакција: „Сите институции се во рацете на Никола Груевски. По девет години, уште ли мисли Груевски дека може да се вози на приказната дека некој друг е виновен за состојбите во државата?“.

Во размената на непријателски оган, се вклучија и партиите од албанскиот блок.

Лидерот на ДПА, Мендух Тачи, по средбата со амбасадорката на ОБСЕ, Мариане Берец, изјави дека не верува дека ќе се реализира договорот потпишан во Пржино. Тачи додаде дека овој договор го потпишал бидејќи смета дека тоа е единствениот пократок пат на Албанците да им се овозможи бргу да дојдат до ситуација да гласаат против структурите на Ахмети, за кои Тачи вели дека се виновни за состојбата во која моментално се наоѓаат Албанците.

Од ДУИ, пак, на ова му одговорија дека тој единствено сака да собере политички поени.

Дека нема приближување, туку, напротив, дека има заострување на анимозитетот едни кон други, очигледно забележал и еврокомесарот Јоханес Хан, кој посредуваше во Пржино.

– Не беше сè договорено на 2 јуни, но се надевам дека партиите ќе можат да се договорат. Го олеснивме договорот, но нема сè да олеснуваме – рече Хан по средбата на Советот на министрите на ЕУ во Брисел.

Атмосферата како да ја почувствува и словачкиот министер за надворешни работи, Мирослав Лајчак, па во интервју за „Мета“ рече дека никој не може да биде сигурен дека Договорот ќе биде имплементиран.

„Не можете да бидете сигурни дека договорот ќе биде имплементиран. Страните кои потпишаа треба да се осигураат дека ќе биде имплементиран, а договорот е прилично специфичен околу тоа што треба да биде сторено и кога. Тоа што сакаме да го видиме е имплементацијата, почнувајќи со првиот чекор како што предвидува договорот. Ова е договор кој треба да биде имплементиран во име на европската иднина за вашата земја. Ова не смее да биде договор кој едната страна го користи против другата политичка партија, бидејќи во тој случај ќе пропадне“, изјави Лајчак.