!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Товарен брод потона во Црно Море


Москва, 19 април, 2017 - 13:56 (META) 

Товарен брод со 12-член екипаж од Русија, Украина и од Грузија денеска потона во Црното Море, соопшти руското Министерство за вонредни ситуации.

Спасувачите пронашле едно лице, а уште четири се локализирани и се подготвуваат за нивно префрлување на спасувачки брод, соопшти висок претставник на министерството на Крим, Владимир Иванов, кој не наведе што се случило со другите членови на екипажот.

На бродот „Герои арсенал“ се наоѓале двајца Руси, девет Украинци и еден граѓанин на Грузија.

Како што јавува новинската агенција ТАСС, бродот пратил сигнал за помош во 3.30 часот по московско време (4.30 по централноевропско време) и потонал на околу 30 километри од ’ртот Зелен Рог.

Портпаролот на Сојузната морнарица соопшти дека бродот кој пренесувал житарки, бил сопственост на турска компанија, регистрирана на Маршалските Острови, а пловел под знамето на Панама.


Во Египет осудени 56 лица поради бродска несреќа во која загинаа 200 мигранти


Каиро, 27 март, 2017 - 10:20 (META) 

Египетскиот суд осуди 56 лица на затворска казна поради поврзаност со превртувањето на бродот со мигранти минатата година во септември, кога загинаа 200 лица.

Осудениците добија казна до 14 години затвор, а меѓу делата за кои се осудени се убиство, убиство без предумисла и небрежност, пренесува „Би-би-си“.

Исто така, има осудени и за загрозување животи, земање пари од жртвите, некористење на спасувачка опрема, криење на осомничените.

Бродот со мигранти пловел кон Италија кога се превртел на 12 километри од египетското пристаниште Розета.

Се проценува дека на бродот имало околу 450 мигранти, вклучувајќи и 100 лица заробени во трупот на бродот.

Несреќата ја преживеаја 163 патници, повеќето Египќани. На бродот имало и државјани на Сирија, Судан, Еритреја и Сомалија.


Повеќе од 100 мигранти се удавиле во бродска несреќа во близина на Либија


Завија, 22 февруари, 2017 - 20:56 (META) 

Повеќе од 100 мигранти се удавиле во бродска несреќа во близина на брегот на Либија, јавуваат светските медиуми.

Пред неколку дена, телата на 74 мигранти биле исфрлени на брегот на либиски град Завија, но тогаш не се знаеле причините за смртта.

Според изјавите на еден од преживеаните мигранти, на бродот имало 133 лица, а само 24 од нив се спасиле.


Запрен сообраќајот на Босфорот поради бродска несреќа


Анкара, 17 август, 2016 - 12:53 (META) 

Бродскиот превоз низ Босфорот е запрен откако товарен брод се судри со пловило на крајбрежната стража.

Истанбулските власти соопштија дека шест лица се спасени после денешниот судир.

Не е објавено колку долго ќе биде затворен овој стратешки важен пловен пат.

Околу три отсто од светските нафтени резерви секоја година минуваат низ Босфорскиот премин.


Повеќе од 700 мигранти настрадале во три бродски несреќи


Њујорк, 29 мај, 2016 - 14:17 (META) 

Високиот комесаријат на Обединетите нации за бегалци УНХЦР објави дека во последните три дена, повеќе од 700 мигранти настрадале во три бродски несреќи во Средоземното Море, јужно од италијанското крајбрежје.

Мигрантите се обидувале да стигнат во Европа, криејќи се во чамци кои не се наменети за пловење по отворено море.

Портпаролката на УНХЦР, Карлота Сами за агенцијата „АП“ изјавила дека 100 лица загинале во една од трите бродски несреќи кои се случиле неделава и станува збор за најголем број на жртви од почетокот на годината.

 


Бројот на загинати мигранти кај Самос се искачи на 24 лица


Атина, 28 јануари, 2016 - 17:00 (META) 

Бројот на мигранти што ги загубиле животите во бродската несреќа што се случи денеска кај грчкиот остров Самос се искачи на 24 лица, јавува „Би-Би-Си“, повикувајќи се на информации од грчката крајбрежна стража.

Десет мигранти што патувале со бродот кој утрово се превртел кај Самос биле спасени, а според информациите на крајбрежната стража, продолжува потрагата по 11 лица кои се водат како исчезнати. Во потрагата учествуваат и екипи на агенцијата на Европската унија за контрола на надворешните граници – Фронтекс.

Ова е втора бегалска трагедија во Егејско Море во последните 24 часа. Грчките спасувачи вчера пронашле тела на седум бегалци, меѓу кои и две деца, откако чамецот во кој се наоѓале се превртел кај островот Кос.

Околу 200 луѓе од почетокот на оваа година се удавиле во Егејско Море во обид да преминат од Турција во Грција.

Во меѓувреме продолжуваат напорите на Европската унија за наоѓање начин за запирање на приливот на мигранти што од Турција влегуваат во Европа.


12 мигранти загинале во бродска несреќа кај Измир


Измир, 21 јануари, 2016 - 18:24 (META) 

Дванаесет мигранти ги загубиле животите, а 26 биле спасени, во бродска несреќа кај турското пристаниште Измир, во Егејско Море, соопшти турската крајбрежна стража.

Несреќата се случила кога поради невреме се превртел бродот што ги превезувал бегалците во Грција.

Според податоците на турската крајбрежна стража, од почетокот на оваа година настрадале околу 40 мигранти во обид од Турција да преминат во Грција.