Зелен и современ Охрид бара „Охрид СОС“ од идниот градоначалник


Охрид, 12 октомври, 2017 - 11:04 (META) 

Граѓанската иницијатива „Охрид СОС“ до кандидатите за градоначалници се обрати со своја „Платформа за зелен и современ Охрид“.

Од иницијативата велат дека проектите што досега се предлагале биле за развој на масовен туризам кој е надминат, неодржлив, со краткотрајна и ограничена добивка и е сосема несоодветен за регионот.

„Охрид нема стратегија за развој на турзимот, ниту стратегија за управување со УНЕСКО-регионот. Заштитата на Охридското Езеро се раководи според Законот за трите езера од 1977 година и езерото веќе бележи знаци на неблагопријатни ефекти врз екосистемот. Студенчишко Блато десетици илјади години ја прочистува езерската вода, а сепак му се закануваше целосно бетонирање. Галичица е еден од само 20 прекугранични биосферни резервати на УНЕСКО во целиот свет, а со предлог-измените за управување со Националниот парк, повеќе од 604 хектари треба да го изгубат степенот на заштита, стотици хектари шума ќе бидат на удар, од кои 84 хектари само од ендемичниот македонски даб“, се вели во соопштението.

Од „Охрид СОС“ велат дека потребна е вистинска валоризација на брендот УНЕСКО, отворање на нови пазарни сегменти и следење на промените во побарувачката на глобално ниво, креирање туристички производ со поголема додадена вредност со таргетирање на општествено одговорни посетители.


Мислав Галер ќе биде нов извршен директор на „Оне-Вип“


Скопје, 26 септември, 2017 - 10:38 (META) 

Мислав Галер ќе биде нов извршен директор на телекомуникацискиот оператор „Оне-Вип“. Тој обврските на новата функција ќе ги преземе од октомври 2017 година и ќе го наследи Димитар Ковачевски, кој одлучил да ја напушти компанијата.

„Ковачевски ќе остане во „Оне-Вип“ до крајот на годината за да помогне во веќе почнатите проекти кои се однесуваат на зацврстување и на позиционирање на брендот на компанијата, а во исто време да овозможи непречено продолжување на операциите и пренесување на обврските на својот наследник“, информираат од компанијата.

Новиот извршен директор на „Оне-Вип“, Мислав Галер, доаѓа од позицијата постар директор за големи корисници и е член на менаџерскиот тим за Хрватска и за Македонија.

„Со долгогодишното искуство на динамичниот хрватски пазар, познавањето на бизнис-трансформација, како и на процесите при спојување на компании и на продажни тимови, тој сигурно ќе даде голем придонес за уште посилно позиционирање на „Оне-Вип“ на македонскиот пазар“, додаваат од компанијата.


Заврши шестото издание на Неделата на дизајн во Скопје


Скопје, 28 ноември, 2016 - 11:09 (META) 

Шестото издание на Неделата на дизајн во Скопје заврши, а го одбележаа добри презентации, изложби, таргетирани предавања, работилници за професионалци проследени со музичка програма.

Првпат беа доделени и награди за дизајн и тоа во три категории: за најдобар студенски производ/прототип, најдобар млад бренд во подем и за најдобра презентација на компанија.

На завршниот настан во „Јавна соба“ организаторите порачаа дека македонскиот дизајн со сигурност се движи во нагорна линија и дека Неделата на дизајн  ја исполнува својата задача на артикулатор и стимулатор на дизајн-сцената во земјата и во регионот.


Позлатена „калашников-ламба“ во Скопје се продава за 48.360 денари


Скопје, 2 ноември, 2016 - 11:35 (META) 

Столна ламба на која телото ѝ е во форма на автоматската пушка „калашников“ и тоа во златна боја, во продавница во Скопје се продава за 48.360 денари (околу 800 евра).

Ламбата, наводно, ја има само во два примероци – онаа што е во излогот и што е на продажба, и другата која била во домот на сопственикот на продавницата.

Како што ни рекоа таму, ламбата е со висока цена бидејќи била „италијански бренд и била изработена од квалитетен материјал“.


Компаниите во ТИРЗ, нелојална конкуренција за текстилните фабрики


Скопје, 10 октомври, 2016 - 13:26 (META) 

Компаниите во технолошко-индустриските зони (ТИРЗ) се нелојална конкуренција на текстилните фабрики, бидејќи квалификувани работници заминуваат да работат кај странските инвеститори кои се ослободени од плаќање давачки за нив.

Ова денеска го истакна претседателот на Здружението на текстилната индустрија и конфекција при Стопанска комора на Македонија, Ангел Димитров.

– Се случува обучени работници, во чија едукација сме вложувале 20 години и за кои сме плаќале придонеси, да ги напуштат текстилните компании и да заминат во некоја од фабриките во ТИРЗ за 1.000-2.000 денари поголема плата. Тие се ослободени од плаќање на придонесите за вработени и од тие пари им се дава не многу повисока плата на работниците. Ние не можеме да го забраниме тоа право на работниците, но бараме одредено изедначување во однос на поволностите. Ослободувањата од давачките за странските компании нека важат за вработувања на лица кои не се вработени, односно се во евиденцијата на Агенцијата за вработување, а не за веќе обучени кадри – додава Димитров.

Поради овој тренд, сè повеќе се намалува бројот на вработени во текстилните фабрики. Од 2007 година, бројот на работници во текстилната индустрија е намален за 6.000 лица. Според Димитров, на овој начин се прави и дупка во Фондот за пензиско и инвалидско осигурување, кој со трансферот на работниците останува без парите што дотогаш текстилните компании ги плаќале за нив.

Во однос на состојбите во текстилната индустрија, Димитров додаде дека има огромен расчекор меѓу потребите на бизнисот и квалификуваниот кадар.

– Има прилив на високостручни кадри кои завршиле виско образование, но немаат минимално знаење. Потребно е да се создадат критериуми за тоа кој може да се запише и да заврши факултет. Ние во компаниите добиваме кадри кои немаат основни стручни познавања. Потребно е да се воведе и миниум знаење за висококвалификуван кадар – додаде Димитров.

Тој уште еднаш ја истакна потребата од соработка меѓу факултетите и стопанството, кои во моментот, според него, се во голем расчекор.

Лон-производството кај текстилните фабрики е 97 проценти од вкупното производство, а текстилните работници бараа поддршка и субвенции од државата таа структура во работата да се промени.

Имено, тие побарале од државата субвенционирање за да можат да набават современи машини со помош на кои ќе ја зголемат продуктивноста и лон производството ќе го преобразат во класично, така што би извезувале готови производи под сопствен бренд.

Во првите седум месеци извозот во текстилната индустрија изнесувал 359 милиони долари и забележал зголемување на пет проценти во однос на лани. Оваа индустрија во вкупниот извоз учествува со 11 проценти.


Салата „Борис Трајковски“ и стадионот „Филип Втори“ добија нови имиња


Скопје, 22 февруари, 2016 - 12:15 (META) 

Најголемиот македонски стадион, Националната арена „Филип Втори“, и Спортскиот центар „Борис Трајковски“ ќе добијат нови брендирани имиња и тоа „Телеком арена“ и „Вип арена“.

Договорот помеѓу Спортскиот центар „Борис Трајковски“ и „Оне Вип“ е веќе потпишан, а деновиве се очекува параф да стават и првите луѓе на скопскиот стадион и на „Телеком“.

Спортскиот центар кој го носеше името на поранешниот претседател на Република Македонија, Борис Трајковски, е изграден во 2008 година од Владата на Република Македонија. Во состав на спортскиот центар се наоѓа мултифункционална спортска сала која е еден од најголемите репрезентативни спортски објекти на Република Македонија.

Договорот за соработка помеѓу „Оне Вип“ и Спортскиот центар „Борис Трајковски“ се потпиша во времетраење од две години, со можност за продолжување на уште две години, а почнува да важи од 15 февруари 2016 година.

„Условите и сумата на договорот остануваат во рамки на деловни информации“, стои во соопштението на страницата на овој центар.

Преименувањето на стадионот, пак, е во тренд со европската и со светската практика. Во Германија има „Алијанц арена“, потоа „Сигнал Идуна парк“, „Фрапорт стадион“…

Договорот со „Телеком“ треба да биде потпишан деновиве, а пред подготвката за најголемиот настан досега, домаќинството на Европскиот супер-куп во 2017 година.


Охридската цреша ќе стане заштитен производ


Охрид, 6 март, 2015 - 11:45 (META) 

Извонредно сочната и вкусна цреша, позната како oхридска, која се произведува, главно, во реонот на селата Лескоец и Велгошти, во близина на Охрид, се најде на листата производи кои се во постапка на заштитување. Заедно со црешата, на листата се и овчиот кашкавал и сирењето од Бистра.

Досега процесот на заштитување го завршија шест производи: кочански ориз, тетовски грав, македонски ајвар, овчеполски мед, малешевско бело сирење, старо бачилско бело сирење.

Во согласност со Законот за индустриска сопственост, оризот, гравот, ајварот, сирењето, виното, медот и минералната вода се првите 18 заштитени производи. Со новиот Закон за квалитетот на земјоделските производи, заштитувањето го врши Министерството за земјоделство.

Со заштитувањето, овие производи ќе добијат поголема додадена вредност и ќе се продаваат на странскиот пазар.


„Лего“ – најмоќна марка на светот


Лос Анџелес, 19 февруари, 2015 - 12:32 (META) 

Данската компанија „Лего“ (Lego), по падот на популарноста почнувајќи од 2000 година, повторно е меѓу најмоќните марки во светот, па во 2014 година од „Ферари“ (Ferrari) ја презеде лидерската позиција на листата со најдобрите марки во светот, објави истражувачката компанија „Бренд фајнанс“ (Brand Finance), пренесе „Денар“.

Авторите на студијата истакнуваат дека на популарноста на овој производител на играчки влијаел успехот од филмот „Големата авантура на Лего“ минатата година, кој придонесе и за угледот на марката, но и за резултатите од продажбата, пренесува францускиот весник „Фигаро“.

Иако се истакна во поглед на лојалноста, препознатливоста и угледот на марката, „Лего“ од гледна точна на финансиската вредност на е на листата со 10 најмоќни фирми, додека „Ферари“ и понатаму на таа листа котира добро, со вредност од 4,7 милијарди евра во минатата година, односно за 18 проценти повеќе отколку во 2013 година.

Инаку, во листата за финансиски највредни компании во 2014 година предводат „Епл“, „Самсунг“ и „Гугл“, се вели во истражувањето.

Во категоријата на марки што забележале најбрз пораст, доминра „Твитер“. Неговата вредност е речиси тројно зголемена, на 4,4 милијарди долари, а следат актерите во секторот за нови технологии, како што е кинескиот „Баиду“ или американскиот „Фејсбук“ (+150 проценти).


Сите сакаат да заработат од трагедијата во Париз


Париз, 15 јануари, 2015 - 10:12 (META) 

Милиони луѓе во светот на социјалните медиуми објавија „Je suis Charlie“ („Јас сум Шарли“), идентификувајќи се слоганот кој во себе ја крие пораката „Слободен сум, не се плашам“.

Фразата „Јас сум Шарли“ е дело на уметникот Жоашим Ронса, кој непосредно по нападот на својот твитер-профил ја објави сега славната фотографија, на која слоганот е испишан со фонтот на парискиот сатиричен магазин. Таа стана најммногу преобјавуваната фотографија на социјалните мрежи.

Повеќе од 50 Французи, една Австралијка и еден Белгиец се обидоа да ги патентираат сликата и слоганот.
Белгискиот бизнисмен Јаник Ујтерхаген, 24 часа по минатонеделните трагичните настани во Париз, поднесе барање за заштита на фразата за користење на средства за чистење, препарати за тоалет, хартиени производи, облека, игри, пијалаци, реклами и телекомуникации.

Австралијката Грета Гросберг, која стои зад компанијата за модни додатоци „Фастлинк“, поднесе барање да ги патентира двете фрази „Je suis Charlie“ (Јас сум Шарли) и „Charlie Hebdo“ (Шарли ебдо), една недела по нападите во Париз во кои загинаа 17 лица.

Гросберг потврди за весникот „Аустралијан“ дека поднела барање за патентирање и изјави дека е изненадена што некои ја сметаат нејзината постапка за навредлива. Таа вели дека засега нема некои посебни планови како ќе ги користи заштитените фрази.

Ронса е згрозен од ваквите обиди и вели дека само една организација, НВО „Репортери без граници“, добила дозвола да ја користи неговата слика. Тој веќе консултирал адвокати за да го сопре комерцијалното користење на слоганот.

– Ужасна е самата помисла дека слоганот кој е полн со толку многу надеж, ќе биде нечија сопственост. Сакам оваа порака да остане чиста. Четири милиони лица на улиците на Париз ја извикуваа поракава. Таа се извикуваше на улиците на Лондон, Њујорк и насекаде на светот. Ќе бидам згрозен ако некој се обиде да заработи на слоганов – вели Ронса.

Експертите за петентно право се поделени во врска со ваквите барања. Дел од нив сметаат дека барањата ќе бидат одбиени бидејќи се спротивни на јавната политика и на прифатените морални принципи на Директивата за трговски марки. Сепак, според некои експерти, за разлика од други трговски марки кои се директно поврзани со трагедии, овој слоган нема ништо потценувачко или навредливо. Тие истакнуваат дека слоганот има позитивна конотација, претставува одраз на слободата на изразување и е производ на движењето за заштита на слободата на говорот и борбата против тероризмот, кое израсна по трагичните настани.