!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Македонија да биде претпазлива при зачленувањето во ЕУ, порачува професор Претифер


Тетово, 15 март, 2017 - 14:26 (META) 

Во Британија сега е време на големи промени, а земјите од Балканскиот Регион, како Македонија, Албанија и другите, сакаат да знаат што ќе се случува и во кој правец ќе оди овој процес, затоа што европските земји се зависни една од друга, изјави Џемјс Претифер, професор од Англија, кој денеска на Универзитетот на Југоисточна Европа во Тетово, одржа предавање на тема „Брексит и Југоисточна Европа“. Претифер во својот говор кажа дека тој лично ја поддржал идејата за излез на Британија од Европската Унија.

– Јас сум убеден дека ќе имаме добар резултат бидејќи ние, како Британија, имаме потреба од добри долготрајни односи со Европа, а и Европа има потреба за долготрајни односи со нас, но структурата на Унијата не ѝ одговараше на Британија и јас лично ја поддржав одлуката за излез од ЕУ на референдумот. Сметам дека на ЕУ ѝ е важно да има добар договор со нас, бидејќи земји како Германија, на пример, имаат големи инвестиции во британската индустрија. Можеби ќе биде потешко за медитеранските земји што имаат големи долгови, како Италија или Грција, но тие проблеми не се предизвикани од нас и тие самите треба да ги решат – рече Претифер.

Според професорот, Европската Унија носи големи предности и зачленувањето на Македонија во ова семејство ќе ѝ донесе голема добробит, но тој додава дека државата треба да биде претпазлива затоа што во Европската Унија се случуваат големи промени.

– Мора да земете предвид што сега претставува ЕУ. Настрана од Брексит, ЕУ сега се менува и ќе продолжи со менување и никој не знае дали во иднина ќе остане во сегашната форма. ЕУ ќе ѝ донесе добробит на Македонија, но мора да знаете дека има многу проблеми, како, на пример, во Грција, која најверојатно ќе мора да ја напушти еврозоната, а на некој начин еврото е тоа што е Унијата, така што тоа е многу значајно за Македонија како соседна земја на Грција – истакна Претифер.

На крајот од предавањето, професорот Претифер се осврна на политичката состојба во Македонија, која, според него, најверојатно ќе се реши се нови избори, со оглед на, како што кажа, заглавениот процес околу формирањето на новата влада.


ЕУ нема да потклекне под заканите на Велика Британија, вели Туск


Стразбур, 15 март, 2017 - 11:18 (META) 

Претседателот на Европскиот совет, Доналд Туск, изјави дека ЕУ нема да потклекне пред „заканите“ на Велика Британија дека земјата е подготвена да ги напушти преговорите за Брексит без да постигне договор со нив.

Туск истакна дека за ЕУ ништо не значат заканите на Велика Британија.

– Нас нема да нè уплашат заканите и можам да ве уверам дека тие едноставно немаат ефект – рече претседателот на Европскиот совет во обраќањето пред Европскиот парламент во Стразбур.

Туск слична порака упати и преку „Твитер“.

„Нема да нè уплашат заканите дека непостигнувањето договор за Брексит е добро за Обединетото Кралство, а лошо за ЕУ. Непостигнувањето договор е лошо за сите, пред сè за Британија“, напиша Туск на „Твитер“.

Тој додаде дека главна цел е и мора да биде зајакнување на меѓусебната доверба и на единството меѓу 27 членки на ЕУ.


Британскиот парламент ѝ даде зелено светло на Меј да ја почне процедурата за Брексит


Лондон, 14 март, 2017 - 12:17 (META) 

Британскиот парламанет го усвои законот за Брексит и ѝ даде зелено светло на премиерката Тереза Меј да го активира членот 50 од Лисабонскиот договор и да ја почне процедурата за излегување на Велика Британија од Европската Унија, јавува „Би-би-си“.

Меј, која беше именувана за премиер на Велика Британија кратко по референдумот на кој Британците гласаа за излегување на земјата од ЕУ, во јуни минатата година, се соочуваше со обиди од страна на парламентот да се дадат дополнителни услови на преговорите за напуштање на ЕУ.

Сепак, по Долниот дом на британскиот парламент и Домот на лордовите синоќа дал зелено светло за законот за активирање на процедурата за излегување на Британија од Унијата.

Со ова владата на Меј сега има одврзани раце да ја почне процедурата пред крајот на март, што претходно како термин го одреди самата премиерка.


Горниот дом ѝ постави нови услови на Меј за Брексит


Британскиот Горен дом на лордовите денеска гласаше за измена на планот на премиерката Тереза Меј, со кој таа ќе може да ги почне преговорите за напуштање на Европската Унија.

Како што се наведува, Меј ќе може да го направи тоа само ако вети заштита на три милиони граѓани на ЕУ, кои живеат во Велика Британија.

Со 358 гласови „за“ и со 256 „против“, Домот на лордовите гласаше за аманадман на законот за ЕУ, со кој од владата се бара во рок од три месеци на почетокот на преговорите за излегување да ги објави предлозите за тоа како ќе ги заштити граѓаните на Британија кои во моментов живеат во ЕУ.

Одлуката не го доведува во прашање планот за законот кој дозволува активирање на член 50 од Лисабонскиот договор, но ќе предизвика доцнење на усвојувањето на тој текст кој овозможува почеток на процедурата за напуштање на ЕУ.

Владата соопшти дека е разочарана од ваквиот исход од гласањето, но Меј нагласи дека останува на намерата да го почне процесот за напуштање на Унијата пред крајот на мај, без разлика на одлуката на Горниот дом.


Берлин и Рим го поддржаа ставот на Брисел за Брексит


Лондон, 24 февруари, 2017 - 16:54 (META) 

Берлин и Рим го поддржаа планот на Европската комисија да се откаже почетокот на трговските преговори со Британија сè додека Лондон не даде гаранции во износ од повеќе милијарди евра.

Британскиот весник „Фајненшл тајмс“ наведува дека германските и италијанските претставници соопштиле дека го поддржуваат ставот на главниот преговарач на ЕУ, Мишел Берние, на почетокот на разговорите да се изнесат условите.

Весникот истакнува дека овие ставови се прелиминарни затоа што членките на ЕУ сè уште немаат официјален став.

Сепак, ставот на Берлин и на Рим претставува удар за британските министри, кои сметаат на тоа дека Германија ќе има поблаг однос и дека ќе ги надгласа радикалните мислења во Европска комисија.


По Брексит околу 12.000 лекари би можеле да ја напуштат Британија


Лондон, 23 февруари, 2017 - 10:20 (META) 

Околу 12.000 лекари, кои дипломирале во Европската економска зона, може да ја напуштат Велика Британија бидејќи чувствуваат помала сигурност за својата иднина по референдумот за Брексит, покажа истражувањето на „Британската медицинска асоцијација“.

Весникот „Гардијан“ пишува дека истражувањето, кое се темели на одговорите на 1.193 лекари, предизвика страв дека недостигот од специјалисти во британските болници може да се продлабочи.

Четириесет и два проценти од испитаниците изјавиле дека размислуваат да ја напуштат Велика Британија, 23 отсто не биле сигурни, додека 39 проценти се изјасниле дека немаат таква намера.

– Во момент кога националната здравствена каса веќе ја достигна својата граница и земјата се соочува со сериозен недостиг од персонал, тоа би било катастрофално – рече д-р Марк Потер, претседател на советот на асоцијацијата.

Во Велика Британија работат 280.932 лекари, од кои 11 отсто се квалифицирале во друга земја од Европската економска зона.


За Брексит ќе бидат потребни повеќе од две години, оцени Јункер


Минхен, 17 февруари, 2017 - 9:03 (META) 

Претседателот на Европската комисија Жан Клод Јункер оцени дека ќе бидат потребни повеќе од две години за да се постигнат сите договори околу излезот на Велика Британија од Унијата.

-Мислам дека нема да успееме во рок од 24 месеци да ги постигнеме сите договори за Велика Британија да ја напушти ЕУ и да воспостави целосен однос со европскиот континент, изјави Јункер, додавајќи дека во Велика Британија мора да бидат сменети најмалку 20.000 закони пред да може да ја напушти ЕУ.

Британската премиерка Тереза Меј најави дека во март ќе го активира член 50 од Лисабонскиот договор за да ги почне преговорите за Брегзит.


„Ролс Ројс“ лани загубил 5,2 милијарди евра


Лондон, 15 февруари, 2017 - 10:27 (META) 

Британската компанија „Ролс Ројс“ соопшти дека минатата година имала загуба од 5,2 милијарди евра поради вртоглавиот пад на вредноста на британската фунта по референдумот за излез на земјата од ЕУ.

Компанијата, која меѓу другото произведува и мотори за авиони, соопшти дека поради падот на фунтата од речиси 20 отсто во однос на доларот морала да ја намали вредноста на некои од договорите.

Освен тоа, „Ролс Ројс“ морала да плати 788 милиони евра за порамнување во врска со обвиненијата за давање мито.

„Ролс Ројс“ повеќе не произведува луксузни автомобили, бидејќи тој дел од преземе „Бе-ем-ве“.


Британскиот Врховен суд ѝ ги врза рацете на Тереза Меј за Брексит


Лондон, 24 јануари, 2017 - 14:16 (META) 

Британскиот Врховен суд пресуди дека владата не може да ја почне процедурата за излегување на Велика Британија од ЕУ без претходно да гласање во парламентот.

Судската одлука ѝ ги врзува рацете на британската премиерка Тереза Меј, која не може да ја почне процедура за излегување од ЕУ додека не добие согласност од парламентот.

Како што наведува „Би-би-си“, се очекува пратениците за напуштањето на ЕУ да гласаат пред 31 март, за кога британската влада го најави почнувањето на процедурата.

Врховниот суд заклучи дека за одлуката за излез од ЕУ не е потреба согласност од парламентите на Шкотска, Велс и на Северна Ирска.

Дел од британската јавност ја критикуваше владата затоа што не се консултирала со парламентот за одлуката за напуштање на Унијата. Премиерката Тереза Меј наведе дека може без согласност на парламентот да го активира членот 50 од Лисабонската спогодба, кој го регулира излегувањето на некоја членка од ЕУ.


Ле Пен: 2017 ќе биде година на националистичките партии


Кобленц, 21 јануари, 2017 - 19:43 (META) 

Претседателката на крајно десничарската француска партија Национален фронт, Марин ле Пен, денеска на собирот на претставниците на десно-популистичките партии во Европскиот парламент, кој се одржува во германскиот град Кобленц, изјави дека 2017 ќе биде година на националистичките партии, пренесува ХРТ.

„Минатата година англосаксонскиот свет со Брексит и со изборот на Доналд Трамп за претседател на САД ја почна борбата за сопствена слобода. Во 2017 година тоа ќе го направат нациите на континентална Европа“, рекла Ле Пен, притоа укажувајќи на важните избори кои оваа година треба да се одржат во Франција, Германија и во Холандија.

Таа на состанокот на крајно десничарските партии ја критикувала Европската Унија, нарекувајќи ја антидемократска творба која се бори против националните интереси на земјите членки.

Ле Пен во својот говор пред водечките европски политичари од крајната десница, како Холанѓанецот Герт Вилдерс, Матео Салвини од италијанската Северна лига и Фрауке Петри од Алтернатива за Германија, остро ја критикувала политиката на Ангела Меркел кон бегалците, оценувајќи ја како „неодговорна и спротивна на волјата на сопствениот народ“.

Истовремено, во Кобленц се одржуваат протести против собирот на европските националистички партии. Под паролата „Кобленц останува шаренолик“, околу 3.000 демонстранти протестираат против расизмот и за поголема толеранција.