!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Јункер и Меј не постигнаа договор за Брексит, преговорите продолжуваат


Брисел, 4 декември, 2017 - 20:53 (META) 

Претседателот на Европската комисија, Жан-Клод Јункер, денеска соопшти дека сè уште не е постигната целосна согласност со Британија за понатамошните чекори во процесот на нејзиното напуштање на Европската Унија.

Тој по средбата со британската премиерка Тереза Меј изјави дека и покрај напорите, не било можно да се постигне целосен договор, но дека тоа не го смета за неуспех, туку само за почеток на следната рунда. Тој рече дека очекува разговорите да продолжат при крајот на неделата.

– И покрај големите напори и напредокот постигнат во изминатите денови, има потреба од дополнителни преговори. Денеска ги приближивме нашите позиции, а подготвени сме да ги продолжиме преговорите подоцна неделава. Тереза Меј е тежок соговорник, таа енергично ја штити позицијата на Британија, а и јас го правам истото во име на ЕУ – изјави Јункер.

Според Меј, во преговорите бил постигнат голем напредок, но остануваат некои разлики во ставовите. Меј четири часа преговараше со Јункер – далеку повеќе од превидениот рок за оваа средба, а потоа замина на средба со претседателот на Европскиот совет, Доналд Туск.


Туск: Има напредок со Британија околу прашањето за Ирска


Брисел, 4 декември, 2017 - 20:23 (META) 

Претседателот на Европскиот совет, Доналд Туск, изјави дека преговорите за излегување на Велика Британија од ЕУ се доближуваат до напредок во врска со прашањето на статусот на границата со Ирска.

Туск на „Твитер“ наведе дека е охрабрен од разговорите со премиерот на Ирска и дека е остварен напредок за декемврискиот самит на ЕУ.

Преговарачот на Европскиот парламент, Ги Верхофстат, рече дека во следниот период е можен договор за ирската границата, за сумата која Лондон треба да ја плати за напуштање на ЕУ, како и за правата на граѓаните по излегувањето на Велика Британија од Европската Унија.

Британската премиерка Тереза Меј денеска се сретна со властите во ЕУ во обид да се финализира договорот во очи самитот на ЕУ на крајот на следната недела.

Статусот со границата со Ирска е спорна точка затоа што тоа е единствената копнена граница на Велика Британија. Ирската влада бара гаранции дека нема да има царински пунктови на границата со Северна Ирска и дека движењето на луѓето и на стоката нема да биде променето по Брексит.


Пресуден ден за преговорите за Брексит – Меј доаѓа во Брисел


Брисел, 4 декември, 2017 - 10:16 (META) 

Британската премиерка Тереза Меј денеска ќе пристигне во Брисел на пресудни разговори за состојбата на преговарачкиот процес за излегувањето на Британија од Европската Унија, а исходот од состанокот би можел да ги одреди условите под кои ќе се случи тоа.

Меј ќе разговара со претседателот на Европската комисија, Жан-Клод Јункер, и со претседателот на Европскиот совет, Доналд Туск, во надеж дека ќе постигнат договор за износот што Лондон треба да го плати.

Договорот за овие прашања е услов за влез во следната фаза на преговорите за иднината на трговските односи.

Највисоките претставници на Унијата ќе се обидат од Британија да добијат што повеќе отстапки за правата на граѓаните и за границата со Ирска.

Велика Британија ќе ја напушти ЕУ на 29 март 2019 година.


ЕУ се подготвува за можноста да не постигне договор за Брексит


Париз, 12 ноември, 2017 - 13:07 (META) 

Главниот преговарач на Европската Унија за Брексит, Мишел Барние изјави дека Брисел се подготвува за можноста да не постигне договор со Лондон, иако тоа не е сценариото кон кое тежнеат.

– Тоа не е моја опција… но е една од можностите. Треба да бидеме подготвени сите, државите и компаниите – вели Барние во интервју за францускиот неделник „Журнал ди Диманш“.

Барние предупреди дека ако не се постигне договор до 29 март 2019 година, датумот кој е предвиден за излегување од Унијата, Велика Британија ќе има односи со ЕУ како што се сегашните односи на Унијата со Кина.

Брисел во петокот, по последните преговори и даде две недели на Велика Британија да ја потврди својата посветеност на условите за излез од ЕУ за во декември да бидат покренати преговорите за трговските односи.


Брексит може да биде запрен, тврди еден од авторите на правилата


Лондон, 10 ноември, 2017 - 14:56 (META) 

Еден од луѓето што ги креирале правилата за излегување од ЕУ, денеска изјави дека Велика Британија може правно да го запре процесот во било кој момент пред датумот за излегување во 2019 година.

– Се додека разговорите за разводот траат, страните сè уште се во брак, Можеме да се премислиме во секој момент – изјави Џон Кер, кој го составил членот 50 од спогодбата на ЕУ.

Тој додаде дека владата на Велика Британија погрешно ги навела гласачите да поверуваат дека процесот е незапирлив.

Британската премиерка Тереза Меј денеска предупреди дека нема да ги толерира обидите за „блокирање на демократската желба на британскиот народ, забавувањето или прекинувањето на истапувањето од ЕУ“.

Владата планира да го вгради во закон датумот и времето за излегувањето на Британија од ЕУ и тоа да се случи на 29 март 2019 година во 23 часот.

Во меѓувреме, в петок ќе продолжуваат преговорите на двете страни во Брисел, се конкретен напредок.


Британија давала двојно помалку пари во ЕУ отколку што тврделе заговорниците на Брексит


Лондон, 31 октомври, 2017 - 18:37 (META) 

Британската статистичка служба соопшти дека придонесите на Велика Британија во Европска Унија се двојно помали од тоа што го тврделе заговорниците на Брексит во пресрет на минатогодишниот референдум.

Канцеларијата за национална статистика соопшти дека од Велика Британија минатата година биле префрлени вкупно 9,4 милијарди фунти (12,4 милијарди долари). Тоа се околу 180 милиони фунти неделно, додека заговорниците на Брексит тврдеа дека со излегувањето од Унијата ќе се заштедат околу 350 милиони фунти кои би можеле да се користат за здравствена заштита.

Во Велика Британија се оценува дека тврдењата на заговорниците на Брексит ја засилиле поддршката за излез од ЕУ.


„Виз ер“ бара дозвола за работа во Велика Британија поради Брексит


Будмипешта, 18 октомври, 2017 - 18:55 (META) 

Унгарската нискотарифна авиокомпанија „Виз ер“ аплицираше за дозвола за работа како авионски оператор во Велика Британија, за да биде сигурна дека ќе продолжи да работи и по излегувањето на таа земја од Европска Унија.

Во соопштението доставено до Лондонската берза, „Виз ер“ наведува дека ќе основа британска подружница „Виз ер УК“ со база на аеродромот „Лутон“. Таа подружница би почнала со работа во март 2018 година, односно во зависност од добивање на дозволата за работа.

„Виз ер“ од аеродромот „Лутон“ има летови до 41 дестинација. Компанијата соопшти дека до крајот на 2018 година, во „Лутон“ ќе вработи повеќе од 100 лица во менаџментот, но и пилоти и екипаж.

„Обединетото Кралство ни останува најголем пазар во Европа и во моментов сме осми најголем оператор во Велика Британија“, изјави извршниот директор на „Виз ер“, Јожеф Варади.


Брексит ќе чини до 60 милијарди евра, потврди Тајани


Лондон, 18 октомври, 2017 - 12:28 (META) 

Претседателот на Европскиот парламент, Антонио Тајани, денеска изјави дека сметката за излегувањето на Велика Британија од Европската Унија (Брексит) изнесува меѓу 50 милијарди и 60 милијарди евра, колку што беше и претходната неформална проценка на Брисел.

– Треба да бидеме реални, но британската влада не е реална. Се споменуваа 20 милијарди, но тоа е бесмислено. Сметката ќе биде меѓу 50 милијарди и 60 милијарди евра, а тоа е реално – рече Тајани во емисија за британската телевизиска мрежа „Би-би-си“.

Тој истакна дека е неопходно да се стави сметката на маса, притоа критикувајќи го „нејасниот став“ на британските власти во преговорите со Брисел за Брексит.

– Сакаме да знаеме што сака Велика Британија. Во тоа е проблемот. Не е јасно – рече Тајани.


Туск предложи амбициозна реформа на ЕУ по Брексит


Брисел, 18 октомври, 2017 - 10:25 (META) 

Претседателот на Европскиот совет, Доналд Туск, предложи амбициозна програма која предвидува 13 самити за две години за заживување на Европската Унија по излегувањето на Велика Британија од Унијата.

Туск го упати својот предлог по апелите за заживување на ЕУ, кои неколкупати ги упатија претседателот на Европската комисија, Жан-Клод Јункер, и францускиот претседател Емануел Макрон.

Програмата почнува со самитот на ЕУ в четврток и в петок во Брисел, откога редовно ќе се одржуваат собири на лидерите на Унијата до јуни 2019 година, како и неформални состаноци за специфични теми.

Туск предложил и вонреден самит во Романија предвиден за март 2019 година, по заминувањето на Велика Британија, како и самит за безбедност следната година во Виена.

„Многу сум задоволен што ја гледам вашата подготвеност да ја забрзате работата и да се надмине чувството на беспомошност“, наведе Туск во писмото до лидерите на ЕУ.


Барние: Лондон да ги почитува прописите на ЕУ во транизицискиот период


Лондон, 26 септември, 2017 - 10:18 (META) 

Велика Британија, која побара двегодишен транзициски период за излегување од Европска Унија, ќе мора да се придржува до сите европски прописи во тој период, изјави главниот преговарач на Европска Унија за Брексит, Мишел Барние.

– Ако идејата е Велика Британија во овој период и понатаму да биде дел од единствениот пазар, тогаш мора да се зачуваат сите европски прописи и финансиски услови без никаков исклучок – изјавил Барние.

Тој додал дека Европска Унија треба да одлучи дали ќе има транзициски период и дали тоа е во нејзин интерес.

Британската премиерка Тереза Меј во говорот во петокот предложи преоден период за излегување од ЕУ кој би траел околу две години. Како што додаде, за време на преодниот период пристапот до пазарот треба да продолжи според сегашните одредби на ЕУ.