Меј го преживеа гласањето недоверба во парламентот


Лондон, 17 јануари, 2019 - 10:06 (META) 

Британската премиерка Тереза Меј синоќа доби доверба за продолжување на мандатот од пратениците  во британскиот парламент, еден ден откако нејзиниот договор за Брегзит претрпи тежок пораз.

Владата на Меј доби 325 гласови, наспроти 306 кои беа против.

По овој крупен чекор, Меј ќе разговара со сите парламентарни партии во обид да се изнајде решение за проблемот.

Излегувањето на Велика Британија од ЕУ, односно Брексит, треба да се случи на 29 мај, а со оглед дека договорот за регулирање на меѓусебните обврски што Меј го постигна со ЕУ не беше прифатен во парламентот, излегувањето би било „брутално раскинување“ и Велика Британија ќе се третира како секоја друга земја надвор од ЕУ. Тоа го потврдија високи претставници на Европската Унија, кои вчера порачаа дека нема да се прифати друг договор освен оној што беше постигнат со Меј.


По пропаѓањето на договорот со ЕУ за Брексит, денеска се гласа доверба на владата на Меј


Лондон, 16 јануари, 2019 - 10:47 (META) 

Владата на британската премиерка Тереза Меј денеска се соочува со гласање доверба во Парламентот по синоќешниот пораз на нејзиниот предлог за Брексит, односно договорот со ЕУ за регулирање на меѓусебните однос по излегувањето на Велика Британија од европската заедница.

Долниот дом на британскиот Парламент синоќа со 432 гласа „против“ и 202 „за“, го отфрли Договорот за истапувањето на Велика Британија од ЕУ, што минатата година во ноември го постигнаа Владата на Меј и Брисел.

По одбивањето на договорот, лидерот на опозициската Лабуристичка партија, Џереми Корбин ги повика пратениците да ја урнат владата на Меј. Сепак, според аналитичари, се очекува владата на Меј да добие доверба, откако Унионистите од Северна Ирска и одметничкото крило од конзервативците се изјаснија дека ќе ја поддржат.

Меј по гласањето синоќа, изјави дека го слушнала мислењето на Парламентот, но дека е битно да се слуша и волјата на британскиот народ, што зборува дека таа веројатно ќе го почека гласање доверба пред да соопшти ново решение, односно План Б.


Преговорите со НАТО почнуваат на 18 октомври


Скопје, 10 октомври, 2018 - 12:22 (META) 

Владата на својата 93-та седница вчера ја усвоила Информацијата за елементите од пристапните разговори за членство во НАТО, кои ќе почнат на 18 и 19 октомври во седиштето на Алијансата во Брисел. Била усвоена и Информацијата за формирање Работен комитет за интеграција во НАТО, кој ќе ги води пристапните разговори.

Министрите на седницата ја усвоиле и Информацијата за подготовка на Македонија во однос на последиците од Брексит, со фокус на трговските и економските односи, на билатерално и мултилатерално ниво и на ниво на Европска Унија. Како што соопштија од Владата, Министерството за надворешни работи ќе биде координатор на сите аспекти поврзани со процесот на Брексит, а ќе биде формирано и меѓуресорско тело со претставници од неколку министерства.

На вчерашната седница, била дадена обврска на Министерството за култура, во соработка со неколку ресорни министерства и надлежни институции, да формира работна група која ќе изготви предлог-закон за нова државна награда за унапредување на човековите права која ќе го носи името на писателот и прв претседател на Хелсиншкиот комитет на Република Македонија, Мето Јовановски.

Исто така, Владата одлучила да воведе нова интервентна субвенција за производителите на јаболка. Имено, оние производителите коишто ќе го предадат своето производство кај регистрирани откупувачи, ќе добијат субвенција од 3 денари за килограм предадени јаболка. Условот за добивање на оваа нова субвенција е родот да биде предаден најдоцна до 25 декември годинава по цена не повисока од 5 денари за килограм.


Борис Џонсон поднесе оставка


Лондон, 9 јули, 2018 - 16:49 (META) 

Борис Џонсон денеска даде оставка од функцијата министер за надворешни работи на Велика Британија, а премиерката Тереза Меј му ја прифати.

Џонсон е вториот министер што денеска ѝ откажа верност на Меј – утрово министерот за Брегзит, Дејвид Дејвис, исто така поднесе оставка.

Заминувањето на Џонсон беше соопштено непосредно обраќањето на Меј пред Парламентот за нејзиниот нов план за Брегзит што разгневи многу пратеници од редовите на ториевците.

Од Даунинг Стрит 10 соопштија дека му се благодарат на Џонсон за досегашната работа и дека неговата замена ќе биде соопштена наскоро.


„Ербас“ се закани дека ќе го напушти производството во Велика Британија


Лондон, 22 јуни, 2018 - 12:44 (META) 

Европскиот произведувач на авиони „Ербас“ се закани дека ќе ја напушти Велика Британија доколку таа се одвои од Европска унија без постигнат договор за идните трговски односи.

Компанијата која вработува 14.000 луѓе на 25 локации во Велика Британија соопшти дека ќе ги преиспита своите инвестиции во Велика Британија, како и својот иден престој во земјата доколку не биде постигнат трговски договор.

„Ербас“ ова го наведе при процената на ризикот врзан за Брексит објавен синоќа. Спред проценката, во случај да нема постигнат договор, односно доколку Велика Британија го напушти единствениот европски пазар и царинската унија без договор за транзиција, тоа ќе предизвика „големи пореметувања“ во британското производство.

„Едноставно речено тоа сценарио без договор директно му се заканува на иднината на „Ербас“ во Велика Британија“, изјави Том Вилијамс, директор во „Ербас“.

Тој додаде дека, во секое сценарио на Брексит, ќе се има силни негативни последици по авиоиндустријата во Велика Британија и посебно за „Ербас“ и дека затоа мора да се забрзаат мерките за ублажување на тие последици.

Од „Ербас“ исто така додаваат дека, моментно предложениот преоден договор помеѓу ЕУ и Велика Британија кој трае до крајот на декември 2020 е многу краток за компанијата да го реорганизира синџирот на набавки.


ЕУ и Велика Британија постигнаа преоден договор за Брексит


Брисел, 19 март, 2018 - 15:14 (META) 

Европската унија и Велика Британија постигнале преоден договор за Брексит кој ќе важи до 31 декември 2020 година, извести во Брисел главниот преговарач на ЕУ, Мишел Барние.

Со договорот биле прецизирани детали за правата на граѓаните, но и за финансиски прашања. Како што изјавил Барние, проблемот со границите со Ирска останал нерешен.

Барние додал дека станува збор за значаен исчекор, но сепак не било крај на преговорите. Голем број на прашања биле решени, а ирското прашање ќе било решено во финалниот текст.


Mej: Граѓаните на ЕУ нема да ги имаат истите права во Велика Британија по Брексит


Лондон, 1 февруари, 2018 - 11:02 (META) 

Британската премиерка Тереза Меј изјави денеска дека, граѓаните на Европска унија кои ќе дојдат во Велика Британија за време на транзицискиот период по Брексит, нема да ги имаат истите права за да останат во таа земја, како претходно, додека земјата беше членка на ЕУ.

Меј, која се наоѓа во посета на Кина, изјави дека ќе бори против предлогот, граѓаните на ЕУ да добијат полно право на престој во Велика Британија по Брексит.

Според нејзе, постои разлика помеѓу луѓето кои ќе дојдат во Велика Британија по Брексит и оние кои престојуваат таму од пред државата да ја напушти Европска унија.


ЕУ и нуди на Британија „транзициски статус-кво“ без право на глас


Брисел, 29 јануари, 2018 - 16:31 (META) 

Европската Унија денеска се одлучи да и понуди на Велика Британија 21-месечен транзиционен период по Брексит, односно по излегување на земјата од Унијата, за време на кој ќе се задржи „статус-кво“ во нејзиното членство, но без можност за гласање.

На министрите на ЕУ им требаа две минyти сите да го поддржат заедничкиот став, чиј нацрт го претставија бриселските функционери, напиша на „Твитер“ Сабине Вејанд, заменичка на главниот преговарач на ЕУ за Брексит, Мишел Барние, што значи дека сите преостанати 27 земји-членки на ЕУ се единствени во позицијата кон преговорите за излегување на Британија од ЕУ.

Понудата е, како што напиша Вејанд „статус-кво транзиција без институционално претставување која ќе трае од денот на Брексит до 21 декември 2020 година“.

Според ставот на ЕУ, во текот на транзициониот период, целото законодавство на ЕУ ќе продолжи да важи и за Велика Британија како да е земја-членка. Промените во законодавството на ЕУ што ги усвоиле институциите, телата, канцелариите и агенциите на ЕУ во тој период исто така ќе се применуваат во Велика Британија.

Исто така, ќе се применуваат сите постојни регулаторни, буџетски, надзорни, судски и извршни инструменти и структури на ЕУ, вклучувајќи ја и надлежноста на Судот на правдата на Европската Унија.

Во однос на институциите и телата на Унијата, Велика Британија, како веќе трета земја, повеќе нема да учествува во институциите и во одлучувањето на ЕУ.

„Велика Британија повеќе нема да присуствува на состаноци на експертски групи на комисии, комисии или други слични ентитети каде што земјите-членки се застапени“, стои во документот и се додава дека може да има исклучоци од случај до случај, каде Британија ќе може да биде поканета да учествува, но без право на глас.


Туск: ЕУ е отворена за можноста Велика Британија и натаму да остане членка


Брисел, 16 јануари, 2018 - 19:10 (META) 

Европската Унија е отворена за можноста дека Велика Британија ќе го промени ставот за Брексит и ќе остане дел од Унијата, рече претседателот на Европскиот совет, Доналд Туск, во Европскиот парламент.

Туск изјави дека доколку владата на Велика Британија остане на својата одлука да ја напушти ЕУ, Брексит со сите свои негативни последици ќе стане реалност во март 2019 година.

-Се разбира, оставаме и простор нашите британски пријатели да го променат мислењето. Ние овде на континентот не сме го промениле мислењето и натаму сме отворени за вас – рече Туск.

Претседателот на Европската комисија, Жан-Клод Јункер, рече дека се надева оти пораката на Туск ќе биде јасно слушната во Лондон.


Јункер и Меј не постигнаа договор за Брексит, преговорите продолжуваат


Брисел, 4 декември, 2017 - 20:53 (META) 

Претседателот на Европската комисија, Жан-Клод Јункер, денеска соопшти дека сè уште не е постигната целосна согласност со Британија за понатамошните чекори во процесот на нејзиното напуштање на Европската Унија.

Тој по средбата со британската премиерка Тереза Меј изјави дека и покрај напорите, не било можно да се постигне целосен договор, но дека тоа не го смета за неуспех, туку само за почеток на следната рунда. Тој рече дека очекува разговорите да продолжат при крајот на неделата.

– И покрај големите напори и напредокот постигнат во изминатите денови, има потреба од дополнителни преговори. Денеска ги приближивме нашите позиции, а подготвени сме да ги продолжиме преговорите подоцна неделава. Тереза Меј е тежок соговорник, таа енергично ја штити позицијата на Британија, а и јас го правам истото во име на ЕУ – изјави Јункер.

Според Меј, во преговорите бил постигнат голем напредок, но остануваат некои разлики во ставовите. Меј четири часа преговараше со Јункер – далеку повеќе од превидениот рок за оваа средба, а потоа замина на средба со претседателот на Европскиот совет, Доналд Туск.