Азески: ЦЕФТА договорот е мртов, соседите наместо да соработуваат се случува катастрофа


Скопје, 28 ноември, 2018 - 16:08 (META) 

ЦЕФТА договорот е мртов, тоа само треба да се констатира, рече денеска претседателот на Стопанска комора на Македонија, Бранко Азески по средбата со раководството на ВМРО-ДПМНЕ, на која се размениле мислења околу економските прашања од значење за бизнисот.

– Загрижува ЦЕФТА договорот кој паѓа. Секој ден имаме кршење на неговите одредби. Ако претставуваше предворје на ЕУ, преку кое се подготвуваме да влеземе на 28-члениот пазар, не успеавме да го поминеме тестот на шестчлен пазар на Балканот. Осум отсто бележиме пад во разменета изминатиот период, тоа е доволен индикатор дека тој договор е мртов. Тоа треба само да се констатира. Регионот сам и испраќа сигнал на Европската унија дека не е за таму каде што тргнал. Ова што се случува сега со Косово, Србија и Босна и Херцеговина е катастрофа. Наместо да ја интензивираме размената со соседите, остваруваме суфицит со земји како Германија – рече Азески одговарајќи на новинарски прашања.

Тој додаде дека кажал се со податокот дека, размената идната година со Германија ќе достигне над четири милијарди, а со првиот наш сосед имаме 300 милиони евра размена.

Во однос на економијата, Азески потенцираше дека Македонија мора да се стреми кон уште поголема соработка и размена со соседите и да гради сериозен пристап кога се во прашање индустријата, извозот и образованието на кадарот, согласно потребите на пазарот.

Фокусот идната година, според него треба да се стави и врз општините кои, како што истакна, имаат многу ниска инвестициска активност, но и врз малата искористеност на капиталните инвестиции, како и на општата потрошувачка која е многу слаба.

Лидерот на ВМРО-ДПМНЕ, Христијан Мицкоски напомена дека неговата партија секогаш била и ќе остане партнер на стопанските комори во Македонија.

– Економијата оди надоле, граѓаните се се посиромашни и понезадоволни. Голем дел се одлучуваат да ја напуштат државата трајно или привремено. Власта го напушти и пристапот на привлекување странски инвестиции – рече Мицкоски.

Ова е втора средба на Мицкоски со Азески годинава, по првата одржана на 1 март.


Четирите комори заедно ќе реагираат против скратената постапка за Законот за личен доход


Скопје, 26 ноември, 2018 - 11:26 (META) 

Четирите комори во државата, преку проектот „Партнерство за подобра бизнис регулатива“ кој се имплементира со поддршка на УСАИД, ќе упатат заедничка реакција што предлог-законот за личен доход ќе се усвојува по скратена постапка, најави претседателот на Стопанска комора на Македонија, Бранко Азески во неговата колумна објавена на „Плусинфо“.

Тој вели дека роковите за поднесување на коментари на засегнатите страни на ЕНЕР сé уште течат, а носењето на законот по скратена постапка не е одлика на партнерски однос помеѓу јавниот и приватниот сектор, каков што бизнис-секторот и Владата се стремат и јавно се залагаат да го воспостават.

Бизнис-заедницата смета дека, доколку прогресивното оданочување се реализира, истото би имало негативни последици врз целата бизнис заедница со тоа што значително ќе се зголеми сивата економија и ќе се нарушат условите под кои ќе се одвива целокупната економија во државата.

Со предлог-законот за личен доход кој Владата го испрати на усвојување во Собранието, со измените се воведува дополнителна стапка од 8 проценти, за делот од доходот кој надминува 90.000 денари месечно.


Стопанска комора: Прогресивното оданочување ќе предизвика поголеми трошоци за бизнисот


Скопје, 6 ноември, 2018 - 15:45 (META) 

Прогресивното оданочување ќе предизвика околу 35 отсто повисоки трошоци за плати и 50 проценти повеќе за другите давачки, покажале првичните пресметки на некои од компаниите – членки на Стопанската комора на Македонија.

Претседателот на Комората, Бранко Азески пред денешната вонредна седница на Управниот одбор, рече дека секое ново оптоварување на фирмите ја намалува нивната конкурентност.

– Ние не сме против зголемување на животниот стандард, но сметаме дека тоа треба да се направи на двонасочна и рамноправна основа – потенцира Азески.

Одговорајќи на новинарски прашања, тој истакна дека во однос на прогресивното оданочување мора да се земе предвид и присуството на странските компании во земјава, вкупно 154, односно нивниот став и размислување за ефектот од ваквата мерка.

Министерот за фнансии, Драган Тевдовски го повтори ставот на Владата дека целта на новата владина мерка е правично оданочување како чекор напред кон градење поправедно општество, јакнење на јавното образование, јавното здравство, социјалата, обезбедување на повисоки плати и зголемување на животниот стандард.


Азески: Членството во НАТО и ЕУ ќе придонесе за позитивни економски резултати


Скопје, 4 септември, 2018 - 14:57 (META) 

Премиерот Зоран Заев денеска учествуваше на трибина во организација на Стопанската Комора на Македонија (СКМ) на која заедно со претседателот на комората, Бранко Азески разговараа за перспективите на македонската економија од полноправното членство на земјата во ЕУ и НАТО.

– Крајно време е после 27 години независност да ја ставиме Македонија на една брза трака или брз мотор, со лидерството заедно со стопанството кон членство во ЕУ и НАТО што ќе придонесе нашата земја да биде прикладно место за живеење – рече Заев.

Азески порача дека бизнис-заедницата застанува цврсто зад напредните процеси кои се очекува да резултираат со полноправно членство на земјата во ЕУ и НАТО што ќе резултира со забрзување на економските процеси на раст и развој.

Тој додаде дека со членството на земјата во НАТО ќе се отвори можност за пласман на македонските производи и услуги за потребите на НАТО Алијансата којашто добавува 32 милиони производи од 16 милиони добавувачи.

– Една од придобивките не е само што НАТО ни ја гарантира безбедноста, мирот и стабилноста кои што се најважни предуслови за бизнисот. Има и една друга убава придобивка овде, имаме право како членка да партиципираме во набавките што НАТО ги прави. Тоа ни следува со членството. Лично разговарав со генералниот секретар, бројките се многу убави и тоа отвора трговска можност на многу домашни компании да влезат и да заработат и профитираат. Тоа се стотици милиони евра можности кои се отвораат за нашите компании – додаде Заев.

Според владини проценки и анализи, најавата за членство во НАТО и ЕУ придонесе кон постигнување на позитивни економски резултати, односно домашниот бруто-производ (БДП) ќе бележи пораст во вториот квартал помеѓу 2,5 проценти и 4 проценти.

Премиерот додаде дека индустриското производство до јули е зголемено за 5,5 проценти во однос на истиот период лани, извозот е зголемен за 14,5 процент, а приходите од даноците се зголемени од осум до 10 проценти.


Азески: Треба уште многу работа за да се остварат планираните економски проекции


Крива Паланка, 7 јуни, 2018 - 16:27 (META) 

Стари патишта, лоша инфраструктура без железничко поврзување и гасоводна мрежа која е едвај пет проценти искористена во просек, таква е сликата на Коридорот 8 на влезот од Бугарија кај Деве Баир, констатираше денеска претседателот на Стопанска комора на Македонија, Бранко Азески при работната посета на главната мерна станица на гасоводот на ГА-МА на влезната точка во месноста Жидилово, кај Крива Паланка.

Тој додаде дека инвестициите долж Коридорот 8, што ги поврзува Турција, Бугарија, Македонија и Албанија, треба да бидат едни од најприоритетните. Во вкупната патна инфраструктура на Коридорот 8 од вкупно 960 километри патна мрежа, низ Македонија поминуваат околу 315 километри.

„Имајќи го предвид фактот дека од планираните инвестициони активности на Владата за 2018 година, во  вкупна вредност од 268 милиони евра, дел се предвидени за изградба на експресен пат на Ранковце-Крива Паланка, а патниот правец Крива Паланка – Деве Баир, во план е да се гради со кредит од Европска банка за обнова и развој, како Комора сметаме дека државните институции треба активно да работат на целосно исполнување и реализирање на планот“, потенцира претседателот Азески.

Магистралниот гасовод влегува во Македонија кај Деве Баир на границата со Бугарија и се протега преку Крива Паланка, Кратово и Куманово до Скопје, во должина од 98,197 километри, разводна гасоводна мрежа.

„Преносниот гасоводен систем е проектиран за физички капацитет од 800 милиони нормални метри кубни природен гас годишно. Засега, со користење на само 5 отсто од капацитетот овој енергенс, иако економски најисплатлив, во Македонија сè уште претставува голем финансиски трошок за компаниите. Потребно е да се бараат алтернативни решенија и да се овозможи гасот да влегува и од други места, на пример, преку Грција“, посочи Азески.

Согласно состојбата констатирана на терен, Азески изјави дека преку својот претставник во Владата во следниот период активно ќе лобираат да се реализираат капиталните инвестиции, да се исполни планот на Владата за период 2017 – 2021 година, да се изградат експресниот пат Ранковце – Крива Паланка и автопатот Крива Паланка – Деве Баир кој е всушност и најфрекфентниот пат кон Бугарија.

„Бизнис секторот презема вакви чекори, бидејќи искуството на стопанството покажува дека се потребни и повеќе од 3 години за да се реализираат инвестициските активности кои се испорачуваат до Владата. Сепак, актуелните чекори што ги презема Владата на економски план се во еден дел усогласени со барањата на бинзис-секторот, преку планот за економски раст. Но на терен реализацијата на капиталните инвестици, процентот на раст на домашниот бруто-производ и останатите макроекономски показатели покажуваат дека треба уште многу да се работи за оставрување на планираните проекции“, рече тој.


Азески: Потребно е итно зајакнување на индустријата за одржлив економски раст


Сарево, 18 мај, 2018 - 9:42 (META) 

Македонија треба итно да ја зајакне основата на својата индустрија со цел да се овозможи одржлив раст на вкупната економија, рече претседателот на Стопанска комора на Македонија, Бранко Азески на 13. Меѓународен симпозиум за корпоративно управување на тема: „Дигитална економија – двигател на економскиот раст“, во Босна и Херцеговина.

Тој додаде дека иднината треба да се гради врз ефикасноста на технолошката опременост, за што, главен предуслов се инвестициите.

„Во Македонија постојат повеќе иницијативи кои во моментов се реализираат и кои имаат за цел да ги поддржат бизнисите во остварувањето на забрзан технолошки развој и воведување иновации, каде целта на ваквата поддршка е создавање нови работни места, економски раст и развој, како и подобрување на бизнис-климата преку развој на конкурентските способности на компаниите“, изјави Азески.


„Даути комерц“ отвори дистрибутивен центар во Подгорица, инвестиција од 3,5 милиони евра


Подгорица, 14 мај, 2018 - 10:20 (META) 

По Косово и Албанија, македонската компанија „Даути комерц“ отвори дистрибутивен центар во Подгорица, а инвестицијата е во вредност од 3,5 милиони евра, информираат од Стопанска комора на Македонија.

„По 14 години работа на црногорскиот пазар од 2004 година, своето присуство „Даути комерц“ сега го заокружува со сопствен стопански објект во Подгорица, преку кој ќе се третира увезената стока од Македонија, Србија, земји членки на Европската Унија, Азија, Јужна Америка. Препознатлива е преку успешното пласирање на неколку македонски и меѓународни бренда на пазарите во регионот како што се „Бекутан” на Алкалоид АД Скопје, италијанскиот бренд за тестенина „Дивела“, млечниот бренд „Мегле“, се вели во соопштението.

Претседателот на Стопанска комора, Бранко Азески изјави дека „компанијата својот успех го потврдува во исклучително професионалниот начин на продажба и пласирање на производите на пазарот, со развиени најнови технологии во сите свои претставништва.“


Владата и бизнис-заедницата потпишаа меморандум за подобра соработка


Скопје, 9 мај, 2018 - 16:08 (META) 

Четирите стопански комори и Владата денеска потпишаа Меморандум за формално воспоставување на јавно-приватен дијалог.

Меморандумот за соработка треба да придонесе за поголема соработка помеѓу бизнис-заедницата и Владата, зајакнување на дијалогот меѓу јавниот и приватниот сектор, особено во делот на легислативата.

Директорот на Канцеларијата за развој на УСАИД, Македонија, Едвард Гонзаелс, оцени дека е зголемен дијалогот меѓу Владата и приватниот сектор во последните месеци.

– Коморите поаѓајќи од заедничките интереси во застапување на компаниите заедно со Владата ќе ги градат политиките кои ги засега секој сектор во стопанството, особено микро, малите и средните претпријатија – изјави Гонзалес.

Претседателот на Стопанска комора на Македонија, Бранко Азески, рече дека коморите и до сега биле партнери во донесување на законите, но биле противници во имплементирањето. Тој побара од Владата, да се прекине со практиката во минатото законите да се носат по скратена постапка и да се следи примерот со Австријците, односно ниту еден закон кој се однесува на бизнисот да не се носи без консултација со коморите.

Вицепремиерот Кочо Анѓушев оцени дека потпишувањето на меморандумот е само формално заокружување на соработката што секојдневно владата ја има со бизнис-заедницата. Тој рече дека носењето на закони по брза постапка, негативно влијаеле врз бизнисите и затоа, како што кажа, сега компаниите се и премногу инклузивни во носењето на законите.

Претседателот на Стопанската комора на Северозападна Македонија, Неби Хоџа, потенцираше дека компаниите во минатото се соочувале со голем број на инспекции, селективна правда и борба со сивата економија и се надева дека оваа платформа ќе овозможи решавање на проблемите на бизнис-заедницата.

На денешниот настан во Владата беше презентирана и анкета направена помеѓу 177 компании членки на коморите која покажува дека се намалува паричното казнување на фирмите, а се зголемува бројот на опомени. Половина од фирмите исто така сметаат дека имаат високо даночно оптоварување и комплексна и нејасна регулатива, но и различно толкување на законите.

Во однос на ефектите од прогресивното одданочување 34 отсто се изјасниле дека тоа би било негативно, 28 отсто дека би било позитивно, а една третина од команиите не знаат што точно ќе се случи со прогресивното одданочување.

Како приоритетни реформи за подобрување на деловното опкружување, компаниите очекуваат ефикасно судство, намалување на сивата економија и на корупцијата.

Проектот на УСАИД – „Партнерство за подобра бизнис регулатива“ е спроведуван од „Епи центар интернационал“ во партнерство со коморите.


Компаниите ги кажаа забелешките, законот за инвестиции влегува во владина процедура


Скопје, 5 март, 2018 - 15:57 (META) 

Компаниите, членки на Стопанската комора на Македонија, на средбата денеска со вицепремиерот за економски прашања, Кочо Анѓушев и министерот за економија, Крешник Бектеши ги кажаа забелешките за Законот за поддршка на инвестициите кој наскоро ќе влезе во владина процедура.

Анѓушев рече дека досегашните забелешки добиени преку јавните дебати биле вградувани во законот, но и дека денеска слушнале неколку корисни сугестии.

– Ценам дека конечно добивме текст кој ќе биде применлив и лесно имплементирачки и ќе даде резултат во развојот на економијата – изјави Анѓушев по средбата.

Претседателот на Стопанската комора на Македонија, Бранко Азески посочи дека компаниите се задоволни со мерките од Планот за економски пораст и дека стопанството изразува поддршка за побрзо донесување на Законот за финансиска поддршка на инвестициите.

– Очекуваме брза постапка и поддршка од сите засегнати страни, за донесување на Законот за финансиска поддршка на инвестициите, за да компаниите бидат поттикнати на нови инвестиции и зголемување на бројот на вработени – рече Азески.

Според последните проценки, околу 8.000 компании ќе имаат корист од програмата.


Азески – Мицкоски: ВМРО-ДПМНЕ да не ги кочи законите кои се за подобрување на економијата


Скопје, 1 март, 2018 - 13:26 (META) 

Раководството на ВМРО-ДПМНЕ предводено од претседателот на партијата Христијан Мицкоски, денеска се сретнаа со претседателот на Стопанска комора на Македонија, Бранко Азески.

Целта, како што рече Мицкоски, е како опозициска партија да изготват поконкурентна и посоодветна економска програма, за да ги освојат симпатиите на бизнис-заедницата.

– Како ново раководство, ги презентиравме нашите заложби и планови како економски ќе делуваме во иднина и кои ќе бидат економските политики кои што нашата партија планира да ги презентира пред македонската јавноста. Финалната верзија на тие политики ќе биде донесена во соработка и на барање на бизнис-заедницата. За нас како ВМРО-ДПМНЕ е значајно да добиваме правилна навигација, за да видиме какви се нивните потреби и да најдеме решенија, а понатаму кога ќе ја формираме следната македонска влада тоа да го примениме – рече Мицкоски.

Претседателот на Стопанска комора на Македонија, Бранко Азески рече дека од нив е побарано да не ги кочат законите во Собранието кои се однесуваат на економијата во државата и подобрување на стандардот на граѓаните и дека комуникацијата ќе продолжи и во наредниот период.

-Ги замоливме во името на најголемата и најзначајната бизнис-заедница во државата, економските закони во Собрание и законите кои влијаат на квалитетот на живот на граѓаните да добијат поддршка и приоритет и покрај политичките превирања кои постојат и различните погледи во државата. Нашите предлози кои одат до Влада ќе ги испраќаме и до ВМРО-ДПМНЕ, да бидат во тек и да дадат свое мислење. Нивните предлози исто така ќе доаѓаат во Стопанската комора, што исто така е напредок. Добивме уверување од Мицкоски дека ова раководство на ВМРО-ДПМНЕ ќе биде бизнис определено – додаде Азески.